ཨེ་མ་ཧོས་མཚམས་སྦྱོར་བྱས།
སྦས་པའི་རྣལ་འབྱོར་བ་ཞིག་སྐུ་ཞི་བར་གཤེགས་པ་དང་སྐུ་འཇའ་ལས་སུ་གྱུར། ཉེ་བའི་བོད་མདོ་ཁམས་གསེར་རྟ་རྫོང་ཁོངས་རགས་བཀྲམ་བྱམས་པ་གླིང་གི་བླ་མ་ཐུབ་ཤེར་རིན་པོ་ཆེ་སྐུ་མྱ་ངན་ལས་འདས་ཡོད་པ་དང། ཁོང་སྐུ་གཤེགས་ནས་བདུན་ཕྲག་གཅིག་ཙམ་གྱི་རྗེས་སུ་སྐུ་གདུང་ཁྲུ་གང་ཙམ་ལས་མ་ལྷག་པར་འཇའ་ལུས་སུ་དེངས་ཡོད་འདུག
བླ་མ་ཐུབ་བསྟན་ཤེས་རབ་རིན་པོ་ཆེ་ནི་ཤར་རྒྱལ་བ་ཀཿཐོག་པའི་དགོན་ལག་གཞི་ཆེན་རགས་བཀྲམ་དགོན་པའི་ཁོངས་གཏོགས་ཏོག་ཚ་སྡེ་པ་རུ་ཕྱི་ལོ་༡༩༣༠ བོད་རབ་བྱུང་བཅུ་དྲུག་པའི་ལྕགས་རྟ་ལོར་སྐུ་འཁྲུངས་ཤིང་། རགས་བཀྲམ་བྱམས་པ་གླིང་གི་ཆོས་སྒོར་ཞུགས་ནས་འདོན་རྟ་དབྱངས་སོགས་ཆོ་ག་ཕྱག་ལེན་བཅས་ལ་སློབ་གཉེར་གནང་། སྐུ་ན་སོན་པ་དང་སྔ་འགྱུར་བསྟན་པའི་ཆུ་མགོ་ཤར་རྒྱལ་བ་ཀཿཐོག་དགོན་གྱི་བཤད་གྲྭ་རུ་ཞུགས་ནས་ཀཿཐོག་མཁན་ཆེན་རྒྱལ་མཚན་འོད་ཟེར་སོགས་ཀྱི་ཞབས་ལ་གཏུགས་ནས་མདོ་སྔགས་རིག་གནས་དང་བཅས་ལ་སྦྱངས་པ་མཐར་སོན་ནས་མཁས་པའི་མཚན་སྙན་དང་བཅས་མཁན་པོའི་མཚན་གནས་བཞེས། སྐབས་དེ་ཙམ་དུ་འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་སོགས་རིས་མེད་ཀྱི་སྐྱེས་དམ་པ་དུ་མ་ཞིག་གི་ཞབས་ལ་གཏུགས་ཡོད་འདུག
ཀཿཐོག་ནས་མཁན་པོའི་མཚན་གནས་བཞེས་རྗེས་ཀཿཐོག་གི་དགོན་ལག་ཨ་འཛོམ་དགོན་དུ་ཕེབས་ནས་མཁན་པོ་མཛད་འགན་བཞེས་ནས་བཞུགས་ཡོད་པ་དང། ཨ་འཛོམ་རྒྱལ་སྲས་འགྱུར་མེད་རྡོ་རྗེའི་(1896-1959)མདུན་ནས་ཟབ་ལམ་འོད་གསལ་རྫོགས་པ་ཆེན་པོའི་ཁྲིད་ཁ་ཡོངས་སུ་རྫོགས་པ་ཞུས་ནས་ཉམས་བཞེས་མཛད། སྨྱོ་ཤུལ་ལྗོན་པ་ལུང་སོགས་སུའང་ཕེབས་ནས་སྨྱོ་ཤུལ་མཁན་པོ་ལུང་རྟོགས་རིན་པོ་ཆེ་སོགས་ཀྱི་མདུན་ནས་སྔ་འགྱུར་རྙིང་མ་པའི་ཐུན་མོང་མ་ཡིན་པའི་ཟབ་ཆོས་དག་ལ་སློབ་གཉེར་ཉམས་བཞེས་མཛད་ཡོད་འདུག
བོད་ལ་དུས་འགྱུར་མ་བྱུང་བའི་སྐབས་ཙམ་ལ་ཕྱིར་རང་ཡུལ་དུ་ཕེབས་ནས་བཞུགས་ཤིང་། དུས་འགྱུར་གྱི་སྐབས་དང། དེའི་རྗེས་སུ་ཉམས་ཆུང་སྦས་པའི་བརྟུལ་ཞུགས་ཁོ་ན་དང་དུ་བླངས་ནས་རྫོགས་པ་ཆེན་པོའི་ཉམས་བཞེས་ཁོ་ན་ལ་རྩེ་གཅིག་ཏུ་གཞོལ་བར་མཛད་ཡོད་ལ། ཉེ་ཆར་བོད་ཟླ་བཅུ་པའི་གནམ་གང་ཕྱི་ལོ་༢༠༡༥ ལོའི་ཟླ་༡༢ ཚེས་༡༡ རེས་གཟའ་ལྷག་པའི་དགོང་མོ་ཆུ་ཚོད་དྲུག་ཙམ་གྱི་སྟེང་དུ་སྐུ་གཤེགས་ཡོད་པ་དང། སྐུ་མ་གཤེགས་པའི་སྔོན་ནས་འབྲེལ་ཡོད་རྣམས་ལ་མི་རིང་བར་སྐུ་གཤེགས་རྒྱུ་ཡིན་པ་དང་། སྐུ་གདུང་ལོངས་སྐུ་ཆས་སུ་ཞལ་བསྒྱུར་རྒྱུས་མཚོན་རྒྱས་སྤྲོས་རིགས་གཏན་ནས་མི་དགོས་པའི་ཞལ་ཆེམས་བཞག་ཡོད་འདུག སྐུ་གཤེགས་ནས་ཉིན་བདུན་གྱི་རིང་ཐུགས་དམ་དུ་བཞུགས་ཤིང། སྐུ་གདུང་ཞུགས་འབུལ་ཞུ་བའི་སྐབས་ཁྲུ་གང་ཙམ་ལས་མ་ལྷག་པར་འཇའ་ལུས་འཕོ་ཆེན་གྱི་སྐུར་གཤེགས་ཡོད་འདུག
བོད་ཟླ་༡༡ ཚེས་༡༢ མཚན་མོ་སྐུ་གདུང་ཞུགས་འབུལ་ཞུ་བའི་སྐབས་པདྨའི་དབྱིབས་ཅན་གྱི་ཁ་བ་སབ་སིབ་ཏུ་བབས་པ་སོགས་དང། ཉི་མའི་འོད་དང་ལྷན་དུ་ཁ་དོག་སྣ་ཚོགས་ཀྱི་འོད་མདངས་འཕྲོ་བ་སོགས་ཡ་མཚན་པའི་རྟགས་དུ་མ་ཞིག་བྱུང་ཡོད་པ། གནས་དེར་བཞུགས་པའི་འབྲེལ་ཡོད་ཅིག་གིས་ཁུངས་ལྡན་གནས་ཚུལ་ངོ་སྤྲོད་གནང་སོང་། ཁོང་གི་བཞུགས་གནས་འབྲོག་ས་ཁུག་ཀྱོག་ཅིག་ཡིན་པ་ལས། སྐབས་དེར་འབྲེལ་ཡོད་ལྟོས་བཅས་རྣམས་ཀྱིས་སྐྱེས་ཆེན་དམ་པ་ཞིག་སྐུ་ཞི་བར་གཤེགས་པའི་སྐབས་ཀྱི་ཆོ་ག་དང་བྱེད་སྟངས་དག་ཇི་བཞིན་བྱུང་ཡོད་ན། ཕལ་ཆེར་སྐྲ་སེན་ཙམ་ཡང་མ་ལུས་པར་འཇའ་ལུས་དེངས་སྲིད་པ་རེད་འདུག།
སྐྱེས་བུ་དམ་པ་མ་འདྲ་བ་ཅིག་ཡིན་པ་འདྲ། ཡིན་ནའང་སྐུ་འཇའ་ལུས་སུ་གྲུབ་ཟེར་མངོན་སུམ་ལ་སྙོན་མ་གདིང་རོགས་མ་གཏོགས་སྐུ་གཟུགས་ཆུང་ངུ་རུ་གྱུར་པ་མཐོང་རྒྱུ་འདུག་གདའ།
སྐྱབས་སུ་མཆི།། སྐྱེས་ཆེན་དམ་པ་ཞིག་ལོས་ཡིན།། བླ་མེད་རྫོགས་པ་ཆེན་པོའི་རྣལ་འབྱོར་བ་ཞིག་ལོས་ཡིན།། རྙིང་མ་དང་བོན་པོ་གཉིས་ལ་དེ་སྔར་ཀྱང་འཇའ་ལུས་པ་མང་དུ་བྱུང་འདུག ཡིན་ནའང་བླ་མ་འདི་ཉིད་ཀྱི་སྐུ་ལུས་ཁྲུ་གང་ལྷག་ཙམ་འདུག་པས་འཇའ་ལུས་སུ་དེངས་ཟེར་ན་ གང་འདྲ་འདུག་གམ།།
རྫོགས་ཆེན་གྱི་རྒྱུད་ནས་བྱུང་བའི་འཇའ་ལུས་སུ་དེང་པའི་རྟགས་མཚན་མངོན་དུ་གྱུར་བ་རེད། ལུས་རྡུལ་ཕྲན་དང་སེམས་ཆོས་ཉིད་དུ་དེང་པའི་རྟགས་སུ་སྐུ་ལུས་གྲུ་གང་དུ་གྱུར་བའོ། །གསང་བ་བྱེད་ཐུབ་ན་ལུས་ལྷག་མ་མེད་པར་འཇའ་ལུས་སུ་དེང་ངེས་པ་ཡིན་ནོ། །
་་་་་་་་་་ གནས་དེར་བཞུགས་པའི་འབྲེལ་ཡོད་ཅིག་གིས་ཁུངས་ལྡན་གནས་ཚུལ་ངོ་སྤྲོད་གནང་སོང་། ཁོང་གི་བཞུགས་གནས་འབྲོག་ས་ཁུག་ཀྱོག་ཅིག་ཡིན་པ་ལས། སྐབས་དེར་འབྲེལ་ཡོད་ལྟོས་བཅས་རྣམས་ཀྱིས་སྐྱེས་ཆེན་དམ་པ་ཞིག་སྐུ་ཞི་བར་གཤེགས་པའི་སྐབས་ཀྱི་ཆོ་ག་དང་བྱེད་སྟངས་དག་ཇི་བཞིན་བྱུང་ཡོད་ན། ཕལ་ཆེར་སྐྲ་སེན་ཙམ་ཡང་མ་ལུས་པར་འཇའ་ལུས་དེངས་སྲིད་པ་རེད་འདུག། ་་་་་་་་་
་་་་་་་ །གསང་བ་བྱེད་ཐུབ་ན་ལུས་ལྷག་མ་མེད་པར་འཇའ་ལུས་སུ་དེང་ངེས་པ་ཡིན་ནོ། །་་་་་་་་་་་
འཇའ་ལུས་ཆོས་སྐུ་འགྲུབ་པར་བྱིན་གྱིས་རློབས།??
གསང་སྔགས་ནས་གསུངས་པའི་སྒྱུར་ལུས། འོད་གསལ། འཇའ་ལུས་ལ། གོ་བ་ཆགས་པ་ཙམ་གྱིས། མདོ་ལུགས་ཀྱི་ས་བརྒྱད་དགུའི་བསོད་ནམས་ཐོབ་པར་གསུང་སྲོལ་འདུག་པས་་་་་
ཀཿཐོག་གཞི་ཆེན་བླ་མ་ཐུབ་ཤེར་དགུང་ལོ་85། ཟླ་༡༢ ཚེས་༡༡་ལ་གཤེགས།
སྟག་ལུང་རྩེ་སྤྲུལ་དགུང་པོ་89། ཟླ་༡༢་་ཚེས་༢༤་གཤེགས།
རྙིང་མ་པའི་བླ་མ་ཚོ་ལ་སྐུ་ཀེགས་ཡོད་པ་ཡིན་ནམ།
དྲི་མེད་ལགས་ཀྱིས་གསུངས་པ་ལྟར་རེད།། བྱ་བྲལ་སངས་རྒྱས་རྡོ་རྗེ་ལྟ་བུ་སྐུ་ཚེ་རིང་པོ་ཞེ་དྲག་རེད།། ཚེ་ཡི་དངོས་གྲུབ་ཐོབ་ཟེར་ན་དེ་འདྲ་ཡིན་གྱི་རེད།། ཡིན་ནའང་དགའ་ལྡན་ཁྲི་རིན་པོ་ཆེ་རི་རྫོང་ལྟ་བུའང་དགུང་ལོ་མཐོན་པོ་རེད།།
རྟོགས་པའི་བསྟན་པ་གནས་པའི་རྟགས་རེད། རྒྱུད་ནས་བྱུང་བའི་འཇའ་ལུས་སུ་དེང་པའི་རྟགས་མཚན་མངོན་འདུག་ཡིན་ན་ཡང་གྲུ་གཟུགས་དེ་ཚོས་ཁྱབ་བསྒྲགས་ཆེད་དུ་གྲུ་དང་ཐོ་འཇལ་བ་ལ་ངོ་རྒོལ་ཡོད། དེ་མིན་འཇའ་ལུང་འཕོ་ཆེན་དེངས་ན་སེམས་ཅན་ཐེར་འབུལ་འདྲེན་པའི་གནས་ལ་བར་ཆད་བྱས་པ་རེད། བོད་ནས་ཚོགས་འདུ་དཀར་ཟས་མདར་ཟས་རྩོད་པ་ལས་ཉམས་ལེན་ཡང་དག་གི་བླ་རྒན་དེ་ཚོ་སྐུ་བདག་རེ་བྱས་ན་ཅི་མ་རུང་སྙམ་མོ།།
སྔ་འགྱུར་རྙིང་མ་བའི་བླ་མ་རྩ་ཆེན་གཉིས་སྐུ་གཤེགས་པར་མྱ་ངན་ཞུ། དྲི་མེད་ལྷག་བསམ་ལགས་དགུང་གྲངས་བརྒྱད་ཅུར་ཕེབས་ནས་གཤེགས་ན་སྐུའི་བར་ཆད་ག་ལ་ཡིན། འཇིག་རྟེན་འདིའི་འགྲོ་དོན་མཐའ་རུ་ཕྱིན་པ་ལགས་སོ། །
མཁན་པོ་ལགས་སྐུ་གཤེགས་པར་ཐོས་པས་ཡིད་སྐྱོ་གནས་སུ་གྱུར། སྐུ་འཇའ་ལུས་དེངས་ཟེར་ཀྱང་དབུ་ལ་བལྟས་ནས་ཇེ་ཆུང་དུ་མ་སོང་བ་འདྲ་བོ་འདུག སྐུ་ལུས་ཇེ་ཆུང་དུ་སོང་ན་མགོ་མཇུག་ཚང་མ་འགྲོ་དགོས་རེད། འོན་ཀྱང་ངེད་ཀྱིས་མཐོང་སྣང་ཡིན་སྲིད། །