བདེ་འཇགས་དང་ཡིད་རྟོན་གྱིས་ཁེངས་པའི་བོད་ཡིག་གི་མཁའ་དབུགས།

རྫ་ཚེ་རིང་བཀྲ་ཤིས།

 
ང་ཚོར་བདེ་འཇགས་དང་ཡིད་རྟོན་གྱིས་ཁེངས་པའི་ཤེས་རིག་གི་གླིང་ཀ་ཞིག་དགོས།
ང་ཚོར་རང་དབང་གིས་འགན་འཁྲི་མ་བརླགས་པའི་བོད་ཡིག་གི་ཁྲོམ་ར་ཞིག་དགོས།
ང་ཚོར་ཀུན་སྤྱོད་དང་གུས་ཞབས་ཀྱིས་མ་བསྐྱུར་བའི་སྨྲ་བརྗོད་ཀྱི་འབབ་སྟེགས་ཤིག་དགོས།
དེ་ནི་ངས་མཐོང་ན་འདོད་པའི་ང་ཚོའི་སྐད་ཡིག་དང་ཤེས་རིག་ཀུན་སྤྱོད་གསུམ་གྱི་མ་འོངས་པ་ཡིན།

མ་གཞི་དྲག་སྤྱོད་རང་བཞིན་གྱི་མཚོན་ཆ་ནི་གྲི་དང་མེ་མདའ་ཁོ་ན་མ་ཡིན་པར་གང་ན་སྤྱི་ཚོགས་ལ་བརྡབ་བསིག་དང་། མི་སྒེར་གྱི་ལུས་སེམས་ལ་དོ་ཕོག་གཏོང་བྱེད་ཀྱི་འཆལ་གཏམ་དག་ཀྱང་སྟེ། དེ་ལ་མི་སེམས་གསོད་པའི་མཚོན་ཆ་ཞེས་བརྗོད་ཡོད།
ང་ཚོའི་ཕ་མེས་གྲི་དང་མེ་མདའ་རྒྱན་དུ་བསྲེལ་མཁན་དག་གིས་ཅུང་གདོད་མ་ཅན་གྱི་འཚོ་བ་དེར་ལྟོས་ན་དུས་རབས་དང་ཁོར་ཡུག་གསར་པའི་འོག་གི་ཕྲུ་གུ་དག་དང་། ཁྱད་པར་དུ། སྤྱི་ཚོགས་ཀྱི་རྩོམ་པ་པོ་རྣམས་ནས་ངེས་པར་དུ་རང་ཉིད་སྤྱི་ཚོགས་ཀྱི་སྔོན་ཐོན་ཅན་གྱི་མི་སྣ་ཞིག་ཏུ་བསམ་སྲིད།

ཡང་ཕྱོགས་གཞན་ཞིག་ནས་ང་ཚོས་སྤྱི་ཚོགས་ལ་ཞབས་འདེགས་ཞུ་བ་དང༌། སྤྱི་ཚོགས་ཀྱིས་ང་ཚོར་རྩི་བཀུར་ཐོབ་པ་གཉིས་ནི་ལྟོས་གྲུབ་ཀྱིས་ཐག་བཅད་པའི་འགྲོ་སྟངས་ཞིག་རེད། དུས་རབས་དང་གདོང་ཐུག་རྒྱག་བཞིན་པའི་ང་ཚོའི་བོད་ཡིག་གི་ཁྲོམ་ར་ཆུང་ཆུང་འདིར་ཞེན་ཁོག་དང་ཤ་ཚས་མ་བཞག་པར་ཨུ་ཚུགས་ཀྱིས་རྩོམ་ཡིག་འབྲི་བ་དང༌། བསམ་འཆར་འདོན་པ་དག་ནི་ཕྱོགས་གཅིག་ནས་མི་རིགས་ཀྱི་དོན་དམ་པའི་བླ་སྲོག་འཚོལ་མཁན་དེ་རེད་མོད། སྐབས་རེར་ལོང་བས་འུར་རྡོ་འཕེན་པ་ལྟ་བུའི་ཉེན་ཁ་ཅན་དང་། རྩྭ་ཡན་རླུང་གིས་བསྐྱོད་པ་ལྟ་བུའི་རང་ཚུགས་མེད་པའི་བྱེད་སྟངས་ཀྱིས་སྤྱི་ཚོགས་ཀྱིས་ཡིད་ཆེས་བརླག་པའི་རྒྱུ་རྐྱེན་སྒྲུབ་བཞིན་ཡོད།

མ་གཞི་སྤྱི་ཚོགས་ཀྱི་སྐྱོན་མཚང་ཐེར་འདོན་བྱ་རྒྱུ་དང༌། དངོས་ཡོད་ཀྱི་ལངས་ཕྱོགས་རྒྱུན་སྐྱོང་བྱ་རྒྱུ། དྲང་བདེན་གྱི་རྩ་དོན་གཙུག་ཏུ་བཀུར་རྒྱུ་བཅས་ནི་རྩོམ་པ་པོའི་དགོས་ངེས་ཀྱི་ཆ་རྐྱེན་ཡིན་ན་ཡང༌། གནས་ལུགས་དང་མ་བྲལ་བའི་བསམ་བློའི་ལྟ་སྐུལ་ནི་དེ་ལས་ཀྱང་ངེས་པར་དུ་ཁ་འབྲལ་དུ་མི་རུང་བ་ཞིག་རེད།
དེས་ནི་དགོས་པ་དང་དགག་བྱ། གྲུབ་འབྲས་དང་ཉེན་ཁ། བདེན་པ་དང་རྫུན་པ། སྤྱིར་བཏང་དང་དམིགས་བསལ་སོགས་ཀྱི་ཕྱོགས་དང་འབྲེལ་བའི་བསམ་གཞིག་གི་མ་ལག་མང་པོ་ཞིག་མཁོ་སྤྲོད་བྱེད་སྲིད།

དཔེ་མཚོན་གཞན་ཞིག་གི་ཐོག་ནས་བཤད་ན། སྙུག་ཐོགས་པ་ཚོས་དུས་རྒྱུན་གཞུང་ལ་སྐྱོན་བརྗོད་བྱེད་པ་ལྟ་བུར་ང་ནི་མོས་མཐུན་དང་དགག་བྱ་གཉིས་ཀ་བྱེད་མཁན་གྱི་གྲས་ཡིན། མོས་མཐུན་བྱེད་པའི་རྒྱུ་མཚན་ནི་རྟོགས་སླ་བ་ཞིག་སྟེ། སྐྱོན་བརྗོད་དང་ཐེར་འདོན།དོགས་སློང་དང་ལྟ་བསྐུལ་བཅས་མེད་ན་སྤྱི་ཚོགས་ཀྱི་སྒྲིག་འཛུགས་དེ་འཕེལ་མེད་དུ་གནས་རྒྱུར་མ་ཟད་ཐ་ན་རུལ་སུངས་ཀྱི་ལམ་དུ་དམའ་ལེན་བྱེད་ངེས་ཡིན།
གནས་ལུགས་དེ་ལྟར་ཡིན་བཞིན་དུ་དགག་བྱ་བྱེད་པའི་རྒྱུ་མཚན་ནི་སྐྱོན་བརྗོད་ལ་དགའ་བའི་གསར་བུ་སྙུག་འཛིན་དག་ལ་འཛིན་སྐྱོང་གི་འགྲོ་སྟངས་དང་སྒྲིག་གཞི། གོང་འོག་ལྟོས་འབྲེལ་གྱི་དྲ་བ་རྙོག་འཛིངས་ཅན་གྱི་གྲུབ་སྟངས། ཡོངས་ཁྱབ་དང་སྣེ་མང་རང་བཞིན་གྱི་དཀའ་རྙོག་དང་ཉིན་རེའི་འཚོ་བའི་ངོ་བོར་ཆགས་པའི་ལས་དོན་ཞིག་ལ་ལྟོས་ནས་དེའི་ལས་བྱེད་པར་ཡང་རང་གི་ལས་ཀར་བྲོ་མེད་ཆོ་མེད་ཀྱི་མངོན་སྟངས་ཕྲན་བུ་ཡོང་སྲིད་པ་བཅས་གཞི་རྩའི་སྤྱི་ཚོགས་དང་སྒྲིག་འཛུགས་ཀྱི་ཆོས་ཉིད་ལ་ཤེས་རྟོགས་དང་བསམ་ཤེས་གང་ཡང་མེད་པར། སྒེར་སོ་སོར་ཡུལ་དུས་ཉི་ཚེ་བར་ཧོབ་དེ་བྱུང་བའི་ཚོར་སྣང་ཕྲ་མོ་རེ་གཞིར་རྩར་བཟུང་བའམ། དེ་ལས་ཀྱང་ཐབས་སྐྱོ་བ་ཁྱི་རྒྱུག་ལུག་འདྲོག་གི་སྐད་ཆ་གོ་བ་ཙམ་རེ་རྒྱུ་མཚན་དུ་བྱས་ནས་རྒྱུག་པ་ལེབ་རྡུང་བྱེད་པ་དེ་རིགས་རེད།

ང་ཚོས་བསམ་བློ་ཏོག་ཙམ་བཏང་བ་ཡིན་ན་ཡང༌། མི་སྒེར་ཞིག་ལ་རྒྱལ་འཚོང་དང་ལྟ་ལོག རྐུན་མ་དང་ཁྲམ་པ་སོགས་ཀྱི་ཞྭ་མོ་གཡོག་རྒྱུ་ནི་ཤིན་ཏུ་འཇིགས་སྣང་ཅན་གྱི་བྱ་སྤྱོད་ཅིག་སྟེ། ཇི་ལྟར་རང་ཉིད་ཀྱི་ལུས་ཐོག་ལ་མིང་དེ་ཚོ་འཇིགས་སུ་རུང་བ་ཞིག་ཡིན་པ་ལྟར་གཞན་ལ་དེ་ལྟར་འདོགས་པ་ལའང་འགན་འཁུར་གྱི་བསམ་བློ་ཚད་མཐོན་པོ་ཞིག་ངེས་པར་དུ་དགོས་པ་ཡིན།

བོད་ཡིག་གི་ཁྲོམ་ར་འདིར་མཚོན་ན། དྲྭ་ཟིན་དང་སྤྱི་སྟེགས་འདི་དག་ཁྱིམ་གཞི་ལྟ་བུ་རེད་ལ། འདི་ང་ཚོར་ཇི་ལྟར་གཅེས་ཤིང་ཕངས་པ་དེ་ཙམ་དུ་མི་གཞན་གྱིས་ཀྱང་མཐོང་དང་ཆ་འཇོག་ཡོད་པའི་གླིང་ཀ་ ལེགས་པོ་ཞིག་ཏུ་བསྐྱེད་སྲིང་བྱ་རྒྱུ་དེ་ང་ཚོ་ཐུན་མོང་གི་འགན་འཁྲི་ཡིན། དེ་ཡང་མཐར་གཏུགས་ན། བོད་སྐད་བོད་ཡིག་བེད་སྤྱོད་བྱེད་མཁན་དག་གི་བསམ་བློ་དང་ཤེས་ཡོན། ཀུན་སྤྱོད་དང་ལྷག་བསམ་བཅས་ལ་རག་ལས་ཡོད།
ང་ཚོས་གཞན་ལ་སྐྱོན་བརྗོད་བྱེད་སྐབས་སུ་ཡང་། ཐོག་མར་རྫུན་དང་གཡོ་སྒྱུ། ཧོལ་རྒྱུག་དང་སྨྱོ་སྤྱོད་བཅས་པའི་ཡིག་འབྲུ་དེ་དག་ངེས་པར་ཁྱེད་ཀྱི་ངག་ཐོག་དང་ཡིག་ཐོག་ཏུ་མ་བསླེབས་པ་ཞིག་དགོས།

གལ་ཏེ་ང་ཚོས་སྤྱི་ཚོགས་འདིར་གཏོར་སྐྱོན་དང་དཀྲོགས་གཏམ་སྤེལ་ཏེ་རང་ཉིད་ཀྱི་གཏམ་སྤྱོད་ལ་འགན་མ་ཁུར་བ་ཡིན་ན། གཅིག་ཏུ་རང་ཉིད་ཀྱི་མི་ཚེའི་ཕུགས་བསམ་གྱི་བདེ་ཐང་དང་འབྲེལ་བ། གཉིས་ནས་ཕ་རོལ་པོའི་ལྟོ་གོས་གཏམ་གསུམ་དང་འབྲེལ་བ། གསུམ་ནས་བོད་ཡིག་གི་རྩོམ་པ་པོའམ་ཤེས་ཡོན་པ་ཚོར་མི་མང་གི་མཐོང་དང་ཆ་འཇོག་ཅི་ཙམ་བྱེད་དང་ཡང་འབྲེལ་བ་ཞིག་ཡིན་ལ། དེ་ནི་དོན་ངོ་མ་ང་ཚོས་འཕྱ་ལད་བྱེད་པའི་གྲི་དང་མེ་མདའི་སོ་ཁ་ནང་ལ་བསྐོར་ནས་དོན་མེད་དམེ་འཁྲུག་བྱེད་པའི་གསར་བུ་སྤྱི་ཚོགས་ཀྱི་སློབ་གསོ་མ་ཐོབ་པ་དག་གི་བྱེད་སྤྱོད་དང་ཡང་བྱེད་སྟངས་མི་འདྲ་བ་ཙམ་ཁྱད་པར་གཏན་ནས་མེད།
དེས་ན་ང་ཚོས་སུ་ལ་སྐྱོན་བརྗོད་བྱེད་པའི་སྔ་རོལ་དེར་རྒྱུ་འབྲས་ཀྱི་བསམ་བློ་ཐེངས་གཅིག་འཁོར་ཐུབ་་རྒྱུ་དེ་སེམས་གཏིང་གི་རེ་བ་ཡིན།

མཇུག་ཏུ། བརྩེ་བ་ཅན་གྱི་ང་ཚོའི་སྟོན་པ་དེས།
བསམ་པ་ནང་ན་ཡོད་པ་ཀུན།།
ཕྱི་རོལ་དུ་ནི་ཉེ་བར་དམིགས། །
ཞེས་གསུངས་པ་ལྟར། ང་ཚོས་ཀྱང་དངོས་ཡོད་དང་ཕུགས་བསམ་ལ་ཕྱོགས་པའི་དྭངས་གཙང་གི་སེམས་ཁམས་ཤིག་གིས་ཁ་བ་ཅན་གྱི་ཤེས་རིག་གི་སྐྱེད་ཚལ། སྐད་ཡིག་གི་ཁྲོམ་ར། ཀུན་སྤྱོད་ཀྱི་འབབ་སྟེགས་འདི་དག་བདེ་འཇགས་དང་ཡིད་རྟོན་གྱིས་ཁེངས་པའི་སྤྱི་གླིང་ཞིག་ཏུ་བསྒྱུར་རྒྱུར་བརྩོན་ལེན་བྱེད་དགོས།