རྔ་བ་རྒྱལ་ཁམས་པ།
ལྷ་ལྡན་ཡུལ་ནས་རྒྱ་སེའི་མེ་ཏོག་བཏབ།།
སྤོས་ངད་ལྡིང་ནས་ཆུ་དང་ལུད་ཀྱིས་གསོས།།
ནེ་པ་ལ་རུ་འདབ་མ་བྲིལ་བའི་དུས།།
དུངས་སེམས་བྱིས་པའི་ངང་ཚུལ་ན་ཟུག་ལྕི།།
ཁྱོད་ནི་བརྩེ་དུངས་རིག་པའི་ལྷ་མོ་སྟེ།།
ང་ནི་དེ་ཡི་ཕྱོགས་ལ་ཆ་རྒྱུས་ཆུང་།།
ད་ལྟ་བསམས་ན་ཁྱོད་ཀྱི་རྣམ་འགྱུར་ཀུན།།
སྒྱུ་མ་མཁས་པའི་སྒྱུ་མ་སྟོན་པ་འདྲ།།
མཚར་སྡུག་ལང་ཚོར་སྐྱོན་ཞིག་གླེང་རྒྱུ་མེད།།
རྨ་བརྗོད་འཕྲུལ་ལྕེ་ཨ་བུ་ནེ་ཙོའི་མཆུ།།
རེ་དྭོགས་ཚོར་བ་རྐྱེན་པོའི་རླུང་འཚུབ་ཀྱིས།།
དམ་བཅའི་སྐར་ཚོམ་ཆུང་ཆུང་གློ་བུར་འཐོར།།
ང་གཉིས་བསམ་སྤྱོད་ཕྱོགས་རེ་མཐུན་པ་དེས།།
འཛུམ་དང་རྒོད་སྒྲར་ད་དུང་དྲི་བསུང་འཐུལ།།
ངང་ཚུལ་མི་བརྟན་ཕྱི་ཐག་ཐུང་ཐུང་ཅན།།
དྲན་ཚེ་དམན་ཤར་ཕལ་ལ་ཡི་ག་ལྡོག།
སྔ་ལོ་ཞིག་ལ་ང་གཉིས་སླར་ཡང་འཕྲད།།
ང་རང་རྒས་བཞིན་ཁྱོད་ཀྱང་རྒས་ནས་འདུག།
ང་ལ་ཁྱིམ་ཡོད་ཁྱོད་ཀྱང་ཁྱིམ་ན་སྐྱིད།།
ང་གཉིས་འཕྲད་པ་རྨི་ལམ་ཞིག་དང་འདྲ།།
བག་ཆགས་ཞེས་བྱ་སྲིད་པའི་ལམ་པོ་ཆེ།།
ཅི་ཙམ་བསགས་པ་དེ་ཡིས་ན་ཟུག་བསྐྱེད།།
འོན་ཀྱང་ང་གཉིས་པར་གྱི་བག་ཆགས་དེ།།
ཕྱི་མཐར་ཁུར་མི་དགོས་པའི་བརྩེ་བ་བྱེད།།
ཤ་ཁྲག་ལུས་པོ་འདི་ཡི་ཕར་ནང་ན།།
གསལ་རིག་སེམས་ཀྱི་ངོ་བོ་ཆགས་ཐོགས་མེད།།
འཛིན་པའི་སྣང་བ་ཞིག་པའི་ཁྱིམ་ཞིག་ནས།།
འུ་ཅག་སླར་ཡང་སྐྱིད་པའི་བྲོ་ཞིག་རྡུང་།།
10/31/2015
ཞེན་ཆགས་མ་ཆེ་ན་ཡག་གི་རེད། ལས་དབང་བཙན་པོ་ལ་སུས་ཀྱང་ལྡོག་ནུས་མེད་དོ།།