རྒྱབ་སྐྱོར་བ་ཚད་ལྡན་རེག་མཁན་ཨ་ཚོགས་ཀླུ་མཁར་བྱམས།

གླང་དར་ཚ་བོ། (ཨ་རི།)

 
སྤྱིར་བཏང་ཁོ་བོར་མཚོན་ན་སློབ་སྦྱོང་གི་ཆུ་ཚད་ཞན་པ་དང་ཆབ་སྲིད་ཀྱི་གོ་རྟོགས་དམའ་བ། དེ་བཞིན་དུ་སྤྱི་ཚོགས་ཀྱི་གནས་བབ་ཀུན་ལ་ཤེས་རྒྱ་ཤིན་ཏུ་ནས་ཆུང་བའི་གྲས་ཤིག་ཡིན། རེད་དེ་དེང་སྐབས་ཚ་ཚ་འུར་འུར་དུ་འགྲོ་བཞིན་པའི་སྲིད་སྐྱོང་གི་འོས་བསྡུའི་སྐོར་ལ་ཞིབ་འདང་རེ་བརྒྱབ་ཡོང་དུས། ཅི་ཡང་མི་ཤེས་པའི་ཁོ་བོས་ཀྱང་གནད་དོན་འདྲ་མིན་སྣ་ཚོགས་ཤིག་མཐོང་ཡོང་ལ་རྟོགས་ཀྱང་ཡོང་གི སྤྱིའི་ཆ་ནས་ཞུས་ཡོང་ན་ཉིས་སྟོང་བཅུ་དྲུག་ལོའི་སྲིད་སྐྱོང་ཚང་མ་སྐྱོན་དང་ཡོན་ཏན་གཉིས་ཀ་ལྡན་མཁན་མཐའ་དག་ཡིན་པར་གོར་མ་ཆག རྒྱུ་མཚན་ནི་མི་ལ་སྐྱོན་མེད་དང་ཤིང་ལ་འཛེར་མེད་ཅིག་གནམ་འོག་ཏུ་མེད་ཅེས་པ་ལྟར་རེད། འོན་ཀྱང་ང་ཚོ་བོད་པ་ཚོ་ནི་ཕྱོགས་གཅིག་ལས་ཕྱོགས་གཉིས་ཀར་ལྟ་ཐུབ་མཁན་ནམ་ཡང་ན་མཐོང་ཐུབ་མཁན་ནི་ཧ་ཅང་གི་དཀོན་པོ་གྱུར་འདུག
དཔེར་ན་སོ་སོའི་རྒྱབ་སྐྱོར་ཡོད་ས་ཞིག་ཡིན་ན་དེའི་ཡོན་ཏན་ཁོ་ན་ལས་སྐྱོན་ཆ་ཏིལ་འབྲི་ཙམ་ཡང་མཐོང་གི་མེད་ཚད་དུ་གྱུར་ཡོད་པ་དང་དེ་བཞིན་དུ་སོ་སོའི་ངོས་ནས་མི་དགའ་སའམ་ཡང་ན་ཁ་གཏད་ཅིག་ལ་ལྟ་ཚུལ་དེ་ནི་མ་རུང་བདུད་ཀྱི་འདུ་ཤེས་ལྟ་བུ་འཇོག་བཞིན་པར་མཐོང་།

དེ་ཡང་བློ་རྣལ་དུ་ཕབ་ཏེ་དྲང་ཕྱོགས་སུ་འགྲེང་ནས་ཞིབ་ལྟ་རེ་དང་ཞིབ་འདང་རེད་བརྒྱག་པ་ན། ད་ལོའི་སྲིད་སྐྱོང་གི་འོས་མི་ཀུན་གྱི་ནང་ནས་རྒྱབ་སྐྱོར་བ་ཚད་ལྡན་རེག་མཁན་དེ་བོད་ཀྱི་ཆབ་སྲིད་བཙོན་ཟུར་དང་སྲིད་སྐྱོང་འོས་མི་ཨ་ཚོགས་ཀླུ་མཁར་བྱམས་མཆོག་གཅིག་པུ་ཆགས་འདུག་དྲན།

སྐབས་འདིར་ཚད་ལྡན་ཟེར་བ་དེ་ཅི་ཞིག་ལ་གོ་དགོས་ཟེར་ན་ཆོལ་ཁའི་ཞེན་ཁོག་གི་ནད་ཀྱིས་ཟིན་མཁན་དང་སྐབས་འཚོལ་རིངས་ལུགས་པ་མ་ཡིན་མཁན་གང་ཞིག་ལ་མི་རིགས་དང་རྒྱལ་ཁབ་ལ་ཤ་ཚ་ཡོད་མཁན། ཁ་ཁོག་མཚུངས་ཤིང་བོད་དོན་ཐད་ལྷག་བསམ་རྣམ་དག་གིས་ལས་འགུལ་སྤེལ་ཐུབ་མཁན། དེ་མཚུངས་སུ་རང་ཉིད་ཀྱི་དུས་ཚོད་གསེར་ལས་དཀོན་པ་དེ་མི་རིགས་དང་རྒྱལ་ཁབ་སླད་བྱ་འགུལ་སྤེལ་དུས་བློས་གཏོང་ཕོད་མི། ལས་འགུལ་དང་མཇལ་ཁ་གང་ཡིན་ཡང་ཁེ་སང་ཡོད་དུས་འཚང་ཀ་ཤིག་ཤིག་ཏུ་ཡོང་བ་དང་དེ་མིན་མི་ཡོང་མཁན་ལྟ་བུ་མ་ཡིན་པ། སྤྱི་ཚོགས་ཀྱི་གནོན་ཤུགས་ཇི་ཙམ་ཡོད་རུང་སྤམ་མི་ཞུམ་མཁན།
མདོར་ན་བོད་ཀྱི་འདས་སོང་ལོ་རྒྱུས་ལ་རྒྱུས་མངའ་དང་ལྡན་ཞིང་བོད་བཙན་པོའི་སྙིང་སྟོབས་ཀྱི་དྲོད་ཁོལ་མ་ཡལ་མཁན་དག་དག་རེད་འདུག་ལ། ཆོལ་ཁ་དབྱེར་མེད་ནས་རྒྱབ་སྐྱོར་གནང་མཁན་ཡོད་པ་འདི་ཡིས་ཀྱང་ཚད་ལྡན་གྱི་རྒྱབ་སྐྱོ་བ་ཐོབ་ཡོད་པ་གསལ་བོ་རེད།

དེ་མིན་གཞན་པའི་སྲིད་སྐྱོང་ཚང་མའི་རྒྱབ་སྐྱོར་བ་ཡོད་ཚད་ཅེས་ལབ་ན་འགྲིག་གི་ཡོད་རྒྱུ་མ་རེད་མོད། བརྒྱ་ཆ་བདུན་ཅུ་བརྒྱད་ཅུ་ཙམ་ནི་ཆོལ་ཁའི་ཞེན་ཁོག་དང་ལུང་ཚན་གྱི་འཐེན་ཁྱེར། སྐབས་འཚོལ་བ།
བླ་མ་དང་བླ་མས་གསུང་ཡོད་དོ་ཅོག་དགོས་དུས་སུ་བེད་སྤྱོད་དང་མི་མཁོ་བའི་སྐབས་སྣང་མེད་དུ་འཇོག་མཁན། སྤྱིར་རང་རེའི་གནས་བབ་ལ་བསམ་གཞིགས་མེད་ཁར་སོ་སོའི་འཚོ་ཐབས་གཅིག་པུ་ལ་བསམ་མཁན། དོན་མེད་བཙན་བྱོལ་དུ་ལོ་དང་ཟླ་བ་ག་ལེ་ངང་བསྐྱལ་ན་འདོད་མཁན། བོད་ལ་རང་དབང་གི་ཉི་མ་འཆར་དུས་ཤིག་ཚེས་ན་ཡང་ཕྱིར་བོད་ལ་འགྲོ་འདོད་མེད་ཅེས་ཟེར་མཁན་ལྟ་བུ་ཤ་སྟག་ལས་གཞན་མེད་ཚད་དུ་སྣང་། འདི་ལ་ཁུངས་ལུང་དང་གཞི་མེད་ཞིག་ཅིས་ཀྱང་མིན་པར་རི་མགོའི་རྫི་བོས་ཀྱང་ཤེས་ཚད་ཅིག་ཏུ་གྱུར་ཡོད།

དཔེ་མཚོན་ཡག་ཤོས་ཤིག་ནི་སྲིད་སྐྱོང་འོས་མི་གཞན་དག་གི་རྒྱབ་སྐྱོར་བ་དག་ལ་བལྟས་ན་གསལ་བོ་ཡིན་པ་ཞིག་ལ། ཐོག་མ་ཚོགས་གཙོ་སྤེན་པ་ཚེ་རིང་གི་རྒྱབ་སྐྱོར་བའི་སྐོར་ནས་ཞུས་ན་མང་ཤོས་ཆོལ་ཁའི་ཞེན་ཁོག་གི་དབང་གིས་ཡིན་པ་དང་ལུང་ཚན་འཐེན་ཁྱེར་གྱི་དབང་གིས་ཡིན་པ་གསལ་བོ་རེད། ཁོང་ལ་མདོ་སྨད་ཀྱི་ལྟ་བ་མཁྲེགས་འཛིན་ཅན་དང་རྒས་འཁོགས་དག་གིས་རྒྱབ་སྐྱོར་བྱེད་ལ་དེ་བཞིན་དུ་དགོས་པའི་དབང་གིས་ཆོལ་ཁ་ག་གེ་མོ་ཞིག་ལ་དངོས་ཤུགས་བརྒྱུད་གསུམ་དུ་སྡང་སེམས་ཡོད་མཁན་གྱི་དབུས་གཙང་གི་མི་ཉུང་ཤོས་ཤིག

དེ་བཞིན་དུ་བཀྲ་ཤིས་དབང་འདུས་ལ་མཚོན་ན་ཡང་གཅིག་མཚུངས་སུ་རྒྱབ་སྐྱོར་བ་ཧ་ཅང་གི་ཉུང་ཉུང་རེད། རྒྱུ་མཚན་ཁོང་མི་ཡག་པོ་མིན་པ་དང་ཤེས་འཇོན་མེད་པས་མིན་པར་ལུང་ཚན་གྱི་དབང་གིས་གྱུར་ཡོད། ཁོང་ལ་རྒྱབ་སྐྱོར་བ་ནི་ཁོང་གི་ཕ་ཡུལ་གཅིག་པ་ཡིན་ཟེར་མཁན་གྱི་མངའ་རིས་ཚོ་དང་ཁམས་སྟོད་འབྲི་རུ་ནས་ཁ་ཤས་ལས་མེད། ཡོད་པ་དེ་དག་ཞེན་ཁོག་ཁོ་ན་ལས་ཁོང་གི་སྐྱོན་དང་ཡོན་ཏན་གང་ལ་ཡང་བསམ་ནས་མིན་པར་ཧ་ཅང་གི་གསལ།

དེ་བཞིན་དུ་སྲིད་སྐྱོ་བློ་བཟང་སེང་གེ་ལ་ཡང་དེ་མཚུངས་སུ་རྒྱབ་སྐྱོར་མང་ཤོས་མདོ་སྟོད་ནས་ཡིན་པ་ཧ་ཅང་གི་གསལ། ཁོང་ལ་ཡང་དགེ་སྐྱོན་ཅི་ཡིན་ལ་མ་ལྟོས་པར་དགའ་མཁན་དང་ཞེན་ཁོག་ཅན་ཚོས་རྒྱབ་སྐྱོར་བྱེད་ཉག་ཅིག་དང་། དེ་མིན་ཚོས་སྐྱོན་ཆ་ཕྲ་མོ་ཚུན་ཆད་བསྡུ་རུབ་ཀྱིས་སྤྱི་ཚོགས་དྲྭ་ལམ་ཁག་ཏུ་སྤེལ་བཞིན་པ་དེས་རྟོགས་ཐུབ་སྙམ། བྱས་ཙང་མདོར་བསྡུས་ནས་ཞུས་ན་རྒྱབ་སྐྱོར་བ་ཚད་ལྡན་རེག་མཁན་ནི་ཨ་ཚོགས་ཀླུ་མཁར་བྱམས་གཅིག་པུ་ལས་མི་འདུག་གོ