མཁོ་གཏོང་བ། ཀ་ཉག་ཚེ་རིང་།
ཕྱི་ལོ་༢༠༡༥ ཟླ་༡༠ ཚེས་༥ ཉིན་གནས་ཚུལ་འབྱོར་གསལ་ལ། ཕྱི་ཟླ་༩ ཚེས་༢༣ ཉིན་གྱི་བོད་ནང་གི་ཕྱི་དྲོའི་ཆུ་ཚོད་བཞི་པ་ཙམ་ལ་རྔ་པ་ཀིརྟི་དགོན་པའི་གྲྭ་བློ་བཟང་འཇམ་དབྱངས། རང་ལོ་༡༥ ཡིན་པ་ཁོང་གིས་དཔའ་བོའི་སྲང་ལམ་ནས་རྔ་པ་རྫོང་མཁར་གྱི་གཞུང་ལམ་དུ་གོམ་བགྲོད་ཀྱིས་ཕེབས་ཏེ་ “བོད་ལ་རང་དབང་དགོས། རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས།” ཞེས་སྐད་འབོད་གནང་ནས་རྒྱ་ནག་གཞུང་ལ་ཞི་བའི་ངོ་རྒོལ་གནང་ཡོད་ཀྱང་། དེ་མ་ཐག་དེར་ཡོད་ཉེན་རྟོག་པ་རྣམས་ཀྱིས་འཛིན་བཟུང་བཙན་ཁྲིད་བྱས་ཡོད་པ་དང་། དེའི་རྗེས་སུ་ད་བར་བཀག་ཉར་བྱས་ཡོད་པ་ཙམ་ལས་གནས་ཚུལ་གཞན་དག་ཞིབ་ཕྲ་ཤེས་རྟོགས་མ་བྱུང་།
ཁོང་ནི་རྔ་པ་རྫོང་རྨེའུ་རུ་མ་ཡུལ་ཚོའི་རུ་ཆེན་གཉིས་པའི་བ་ཆོས་ཚང་གི་ཕ་ཆོས་འཕེལ་དང་མ་མཚོ་མོ་གཉིས་ཀྱི་བུ་ཡིན་ཞིང་། ཆུང་ཆུང་སྐབས་ནས་རྔ་པ་ཀིརྟི་དགོན་པར་ཆོས་ཞུགས་བྱས་ཏེ་དེང་སྐབས་སྔོན་འགྲོའི་འཛིན་གྲྭར་སློབ་གཉེར་གནང་བཞིན་ཡོད་འདུག་པ་བཅས།
དེ་མིན་ཕྱི་ཟླ་༩ ཚེས་༡༠ ཉིན་གྱི་བོད་ནང་གི་ཉིན་གུང་ཆུ་ཚོད་༡༢ ཙམ་ལ་རྔ་པ་རྫོང་སོ་རུ་སྡེ་བའི་ཚུར་རིས་ཚང་གི་བུ་འཕྲིན་ལས་དང་། ཚེ་སྟོད་ཚང་གི་བུ་བློ་སངས་གཉིས་ཀྱིས་”བོད་ལ་རང་དབང་དགོས། རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས།”ཞེས་ངོ་རྒོལ་སྐད་འབོད་གནང་བཞིན་རྔ་པ་རྫོང་མཁར་གྱི་གཞུང་ལམ་དུ་གོམ་བགྲོད་བྱས་ཡོད་ནའང་སྐབས་ཐོག་དེར་ཉེན་རྟོག་པས་འཛིན་བཟུང་བཙན་ཁྲིད་ཀྱིས་ད་བར་གནས་ཚུལ་ཅི་ཡང་ཤེས་རྟོགས་མེད་པར་གྱུར་ཡོད་པ་དང་། ཁོང་གཉིས་ནི་རྔ་པ་རྫོང་ཆོས་རྗེ་མ་ཡུལ་ཚོའི་སོ་རུ་མ་སྡེ་བའི་ཡིན་འདུག་པ་ཙམ་ལས་ཞིབ་ཕྲ་ཤེས་རྟོགས་མ་ཐུབ།
གཞན་ཡང་དེ་སྔོན་ཕྱི་ཟླ་༩ ཚེས་༡༠ ཉིན་ནས་གཞུང་འབྲེལ་གྱི་ལས་ཁུངས་ཁག་ལས་གཞན་པའི་མི་སྒེར་གྱི་དྲ་ལམ་ཡོངས་རྫོགས་བཀག་སྡོམ་བྱས་ཡོད་པར་མ་ཟད། རྫོང་མཁར་གྱི་གཞུང་ལམ་ཁག་ལ་ཉེན་རྟོག་པ་མང་རུ་བཏང་ནས་རྒྱུན་དུ་ལྟ་རྟོག་བྱེད་མུས་ཡིན་འདུག་པ་བཅས།
བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས།
ཕྱི་ལོ་༢༠༡༥ ཟླ་༡༠ ཚེས་༥ ལ།
ཞི་བའི་ངོ་རྒོལ་བ་ཚང་མ་ནི་བོད་ཞི་བདེ་ཡི་ཞིང་ལ་བཀོད་པའི་དཔའ་བོ་དཔའ་མོ་རྐྱང་རྐྱང་ཡིན་པས། རྟག་ཏུ་རྒྱལ་ལོ།
༼བོད་རང་བཙན་ཡིན༽ཟེར་བའི་འབོད་ཚིག་ཀྱང་འདུག་ལབ་སོང་། ག་རེ་བྱས་ནས་ཆ་ཚང་གཏོང་གི་མེད་དམ། ཀིརྟི་བྱེས་པ་གྲ་ཚང་གི་གཏན་འཁེལ་ཡིན་ནམ། དེ་ལས་མཐོ་བའི་སྒྲིག་འཛུགས་གང་རུང་གི་གཏན་འཁེལ་རེད། ལན་ཞིག་གནང་རོགས།