ཡ་མུ་ནའི་འགྲམ་ནས་གཱཾངྷཱིའི་བང་སོར་མཇལ་བ།

རྫ་ཚེ་རིང་བཀྲ་ཤིས།

 
སངས་རྒྱས་ལ་ཕྱག་འཚལ་ལོ།། ང་ཉིན་འདི་དག་གི་རིང་ཐའེ་ཝན་ནས་རྒྱ་གར་དུ་ཐོོན་ཙམ་ཡིན། གནས་སྐབས་ལྡི་ལིར་སྡོད་རིང་ཡང་། ཚད་པ་ཅུང་ཆེ་བས་དོན་དག་དམིགས་བསལ་མེད་ན་ཕྱི་ལ་འགྲོ་བ་ཅུང་ཟད་ཉུང་། འོན་ཀྱང་དེ་རིང་ནི་སྤྱི་ཟླ་བཅུ་པའི་ཚེས་གཉིས་ཏེ། བདག་ཉིད་ཆེན་པོ་གཱཾངྷཱི་ཡི་འཁྲུངས་སྐར་དུས་དྲན་ལ་ཁེལ། རྒྱ་གར་རྒྱལ་ཡོངས་ཀྱིས་ཀྱང་ཉིན་འདིར་གུང་གསེང་བཏང་འདུག ང་ཡང་ད་ནང་སྔ་དྲོ་ཙམ་ན་འདུག་ཡུལ་ལྡི་ལིའི་ལ་དྭགས་བྷོ་དྷི་བྷེ་ཧར་གྱི་རྒྱ་སྒོའི་འགྲམ་ནས་གླ་འཁོར་རྐང་གསུམ་ཞིག་ལ་གཱཾངྷཱི་གཱཾངྷཱི་ཞེས་ལབ། ཁོས་ཀྱང་བརྡ་འཕྲོད་པའི་རྣམ་འགྱུར་བཅས་མགོ་བོ་འཕྲེད་དུ་གཡུག་ཙམ་གྱིས། ཧིན་སྒོར་བརྒྱད་ཅུ་ཡིན། ཡར་འགོས་ཟེར། དེ་ནས་ཤར་རེར་ཧ་ཅང་མི་རིང་བའི་སའི་ཆུ་བོ་ཡ་མུ་ནའི་ཉེ་འགྲམ། བདག་ཉིད་ཆེན་པོ་གཱཾངྷཱིའི་སྐུ་ཕུང་ཞུགས་འབུལ་ཞུ་ས་རཱཇ་གྷཊ་ལའམ། བདག་ཉིད་ཆེན་པོ་གཱཾངྷཱི་བང་སོའི་གནས་ཡུལ་དུ་ཕྱིན།

དེ་ནི་རྒྱ་གར་དུ་བསླེབས་ནས་ཐོག་དང་པོར་གཱཾངྷཱིའི་བང་སོར་མཇལ་བའང་ཡིན། མི་ཚོགས་ཀྱི་འགྲོ་འོང་ཆེན་པོ་དག་བརྒྱུད་དེ་རིམ་གྱིས་ནང་དུ་ཐལ། བང་སོར་ཕྱོགས་བཞིར་སྒོ་ཆེན་པོ་བཞི་དང་། ནང་དུ་ཡང་རྡོའི་ར་བ་ཆེན་པོས་བསྐོར་བ་ཐོག་བརྩེགས་གཅིག་ལས་མཐོ་བ་ཙམ་དང་། ཕྱོོགས་བཞི་ན་རྒྱས་སྤྲོས་དེ་ཙམ་མེད་པའི་འཛུལ་སྒོ་ཆེན་པོ་བཞི་དང་། ར་བའིིི་ཁ་ཁྱེར་ལ་རྡོ་གཅར་བཏིང་བའིི་རྐང་ལམ་དང་། ཕྱི་ངོས་ཐང་ཆེེན་གྱི་མཐའི་བར་གུར་ཐབས་སུ་གཞོལ་བའིི་ངོོས་དག་ཤིན་ཏུ་མཛེས་པའི་རྩྭ་ཐང་དུ་བཅོས་ཏེ་མཆིས། ནང་གི་ཁྱམས་ཡང་ཤིན་ཏུ་ཡངས། དེེ་ནས་བང་སོའི་མདུན་དུ་ལྷག་པ་ན་མེེ་ཏོག་སིིིལ་མ་བལ་སྟན་གྱི་སྲབ་འཐུག་ཙམ་པ་ཁ་དོག་དམར་སེར་ཤས་ཆེར་བྱས་པའིིི་དཀྱིིིལ་འཁོར་སྙོམས་པོར་བཀོད་པའི་འགྲམ་དུ་པུས་མོ་བཙུགས་ཏེ་མེ་ཏོག་གི་ཕྲེང་བ་དང་མེ་ཏོག་སིལ་མ་དག་ཕུལ། ད་དུང་པུར་སྒམ་གྱིི་བསྔས་ཀྱིིི་ཤེལ་སྒྲོམ་དུ་བཀལ་བའིིིི་མེ་སྒྲོན་གྱི་མེ་ལྕེ་རྣོ་བར་འབར་བཞིན་པ་དེར་ཡང་ཞིིིིབ་ཏུ་བལྟས།

སྐབས་འདིར་ལོ་ངོ་དྲུག་ཅུའི་ཡར་སྔོན་ཞིག་ལ་སྙིང་རྗེའི་བདེན་པ་བརྙེས་པའི་ཁ་བ་ཅན་གྱི་གཞོན་ནུ་ཞིག་ས་མིག་འདིའི་ཐོག་ཏུ་ཕེབས་ཏེ། ས་ཆ་འདི་དང་རྡོ་བཅལ་འདིའི་ཐོག་ནས་ཡར་འགྲེངས་ཏེ་བདག་ཉིད་ཆེན་པོའི་ཞལ་དངོས་སུ་མཇལ་བ་མ་བྱུང་བར་སྐྱོ་གདུང་དྲག་པོོ་ཐུགས་ལ་འཁྲུངས་ཏེེ་སྤྱན་ཆབ་བསིལ་གྱིན། རང་ཉིད་སྐུ་ཚེ་འདིར་འཚེ་མེད་ཞི་བའི་ལྟ་གྲུབ་འཛིན་པའི་གཱཾངྷཱིའི་རྗེས་འབྲངས་རྣལ་མ་ཞིག་བྱ་རྒྱུར་དམ་བཅའ་དང་སྨོམ་ལམ་གནང་བར་མ་ཟད། ཁོང་གིས། གནས་དེར་ངོས་ལངས་ཏེ་སྨོན་ལམ་བརྒྱབ་དུས་གཱཾངྷཱི་ངོ་མ་མཇལ་མ་ཐུབ་པར་བརྟེན་རང་ལ་སེམས་སྡུག་ཆེན་པོ་དང་། ཁོང་གི་ངོ་མཚར་ཆེ་བའི་མཛད་པའི་དཔེ་བཟང་དེ་ལ་དགའ་སྣང་ཆེན་པོ་གཉིས་ཀ་དུས་མཉམ་ལ་ཤར་བྱུང་། ཞེས་གསུངས་པ་དེ་ཡང་ཡིད་ལ་འཁོར།

ཡིད་དུ་འོང་བའིི་ཤིང་གིི་བསིལ་བའི་གྲིབ་མ་གདུགས་ལྟ་བུ་དག་གི་འོག་ན་ཚོ་དང་ཚོ་བྱས་པའི་མི་ཚོགས་ཀྱི་དཀྱིིིལ་ན་མི་རེེ་རེས་གཱཾངྷཱི་མཆོག་དང་འབྲེལ་བའི་ཅི་ཞིག་འཆད་བཞིན་པ་དང་། གཞན་པ་དག་མཐའ་ལ་རུབ་རུབ་ཀྱིིིས་རི་དྭགས་ལྟར་རྣ་བ་ཀྲོང་ངེར་ཉན་བཞན་པ་དག་ལའང་བལྟས། གདུགས་ཀྱི་དུས་ལ་ཉེ་བ་ན་ཁྱེའུ་དང་བུ་མོ་དག་རང་གི་མ་དང་རྗེ་བོ་དང་ལྷན་ཅིག་ཏུ་རྨ་བྱའི་མགྲིན་པ་ལྟར་སྔོ་ཞིང་འཇམ་པའི་རྩྭའི་ཐང་དུ་མཐའ་ཡས་པའི་བག་ཡངས་དང་རང་དབང་གི་བདེ་སྐྱིད་ཀྱི་དགའ་བར་ངོམས་པར་བརྩེན་པ་དག་ལའང་བལྟས། ཉེན་རྟོག་པ་ཉུང་ལ་གང་ཡོད་པ་དེས་ཀྱང་སྤྱིིིར་བཏང་སྤྱི་བའི་སྒྲིག་ཁྲིམས་ལ་ལྟ་རྟོག་བྱེད་པའི་རང་འཁྲིའི་ལས་དོན་ཙམ་སྒྲུབ་བཞིན་སོ་སོའི་ས་ན་འཁོད་པ་ལས་དཔོན་ཉམས་དང་དྲག་ཤུགས་ཀྱི་རྣམ་འགྱུར་རྩུབ་མོ་དག་མེད་པས་རྒྱ་གར་བའི་ཡུལ་མི་ཚོར་ཉེན་རྟོག་པ་ནི་མཐོང་ན་ཞེད་སྣང་སྐྱེ་ཡུལ་ཞིག་ཏུ་བརྩི་སྲོལ་མེད་པ་ལྟར་། འདིར་ཡང་ཚང་མ་རང་རང་གི་ས་ན་སོས་དལ་ཞིང་བག་ཡངས་ཀྱིས་སྤྱོད་པ་ནི་དེ་རིང་གི་རིན་ཐང་ཆེ་བའི་མཁའ་དབུགས་གཞན་ཞིིག་སྟེ། དེས་ཀྱང་ཁོར་ཡུག་འདི་ལ་ཡུག་གཅིག་ཏུ་ཁྱབ་སྟེེ་མཆིས།

བང་སོའི་ཐང་ཆེན་གྱི་ལྗོན་ཤིང་དག་གི་གྲིབ་མ་དང་སྐྱིལ་ཆུ་དང་ཤིང་ལྗོན་པ་དག་གི་ཡལ་ག་བཅས་ན་དེ་རིང་བྱིས་པ་དག་གཱཾངྷཱི་རྗེ་ཡི་བང་ཁ་ན་རྩེད་མོ་བརྩེ་བ་བཞིན་ཅ་ཅོ་དང་བཅས་པར་འཁོད། ཕྱི་མ་རེད་ཀྱིི་དུས་ན། བག་ཀྱིས་གཞོལ་བའིི་རྩྭ་ལྗང་གི་ངོས་སུ་བུ་གཞོན་ནུ་དག་གིིས་འགྱེལ་ལོོག་རྒྱག་པ་དག་གིས་ཆུང་དུས་རྩྭ་ཐང་གིིི་རང་བྱུང་གི་པང་ན་བརྩེན་པའིི་ཕྱུགས་རྫི་དག་གི་འཚོ་བའང་དྲན་ཡུལ་དུ་འདྲེེེན། ཁྱད་པར་དུ། ཕྱི་ཁྱམས་ཀྱི་ལོགས་གཞན་ཞིག་ཏུ་གུར་ཕིབས་པའི་ནང་དུ་གཱཾངྷཱི་མཆོག་གིས་སྐུད་པ་འཁེལ་བཞིན་པའི་འདྲ་པར་ཆེན་པོ་ཞིག་བཤམས་པའི་མདུན་དུ་སྐྱེ་བོ་མང་པོ་ཚོགས་ཤིང་། མངོན་པར་འབེལ་བའི་གཏམ་དང་། དབྱངས་སྙན་པ་དག་དང་བཅས་ཚང་མ་འཁེལ་འཁོར་འགྲམ་དུ་ལྷོད་པོར་བཞུགས་ཏེ་སྐུད་པ་འཁེལ། སྐུད་པ་འཁེལ་བྱེད་དག་ཀྱང་གན་དྷི་མཆོག་གིས་དངོས་སུ་བེད་སྤྱོད་གནང་བ་དེ་དང་བཟོ་དབྱིབས་སོགས་མང་ཆེ་བ་གཅིག་པ་ཁོ་ནར་འདུག
རྗེས་དྲན་བྱེད་སྟངས་འདི་ནི་ཧ་ཅང་ཡིད་དུ་འོང་བ་ཞིག་ཀྱང་ཡིན་ཏེ། གན་དྷི་མཆོག་གིས་《རྒྱ་གར་རང་སྲིད་རང་སྐྱོང་》ཀྱི་གཞུང་ལས་བཏོན་གནང་བའི་བབ་ཆགས་དང་ཆོག་ཤེས་པ། རང་བྱུང་སྣོད་ཀྱི་བཀོད་པ་དང་མཐུན་པའི་འཚོ་གནས་ཀྱི་གཏན་ཚིགས་ཁྱད་པར་ཅན་དག་བསྐྱར་དུ་བཟློ་བཞིན་པ་ལྟར་མཆིས། རྒན་གཞོན་ཚང་མས་བློ་རྩེ་གཅིག་སྒྲིམས་ཀྱིས་སྐུད་པ་དོག་པ་ཆེན་པོ་རེ་བཟོས་ཚར་རྗེས་དོག་པ་དེ་དག་གཱཾངྷཱི་ཡི་སྐུ་པར་གྱི་དྲུང་དུ་བསྒྲིགས་ཏེ་འཇོག ཆབས་ཅིག་གདངས་ཤིན་ཏུ་སྙན་པའི་བཞས་ཀྱང་གཏོང་། དེ་ནི་ལྷག་ཏུ་ཡིད་ལ་འབབ་པ་ཞིག་སྣང་།

ངས་ཀྱང་བགྲེས་སོང་ཞིག་གི་འགྲམ་གྱི་ས་ཁར་བསྡད་དེ་སྐུད་པ་འཁེལ་བའི་ཚུལ་ལ་ལད་མོོ་བྱས། བགྲེས་སོོང་དེས་ཀྱང་སེམས་ཐག་ཉེེ་པོས་རོབས་ཙམ་བསླབས། ལག་མ་བྱང་བས་ལོབ་དཀའ་བ་ལས་བྲམ་ཟེ་སྐུད་པ་འཁེལ་བའི་དཔེ་དེ་ཡང་ཡིད་ལ་འཁོར། འདི་ལའང་གྲིམ་ལྷོད་ཤིན་ཏུ་རན་པའི་སེམས་ཁམས་ཁ་ལག་འཕྲོད་པ་ཞིག་དགོས་པ་རྟོགས། ཤིན་ཏུ་གཡང་དུ་ཆགས་པའི་ཁོར་ཡུག་དེར་ཐོན་མ་ཐག་རང་ཉིད་སྐད་ཅིག་ལ་གཱཾངྷཱིདྲུང་དུ་སླེབས་པ་ལྟར་གྱུར། ཉམས་སྤྲོ་བ་ལ་ཚད་མ་མཆིས། ཁོང་ཚོས་གང་སྨྲས་པ་དག་ལས་དངོས་སུ་གོ་ཐུབ་པ་ནི་མ་ཧཱ་ཏ་མ་གཱཾངྷཱི་ཞེས་པའི་ཚིག་འདི་ཁོ་ན་ཙམ་ལགས་མོད། ཁོང་དག་གི་འདར་འདུར་གྱི་དབྱངས་དང་བསྡེབས་པའི་མིག་དང་གདོང་གི་རྣམ་འགྱུར་ཤིན་ཏུ་རྣོན་པོ་དེས་འཛད་མཐའ་མེད་པའི་གཱཾངྷཱི་མཆོག་གི་ལོ་རྒྱུས་དང་རླབས་ཆེན་འཆད་པར་བྱེད་ཅིང་། སྐབས་དེར་ང་ལ་ཧིན་དྷུ་སི་ཐན་གྱི་ལོ་རྒྱུས་ཀྱི་ཆུ་བོ་ཆེན་པོའི་ནང་ན་གཱཾངྷཱི་ཅི་ཙམ་དུ་གལ་ཆེ་བ་དང་མེད་ཐབས་མེད་པ་ཡིན་པའི་ཚུལ་དེ་གསལ་བོར་ངེས་སུ་བཅུག

བོད་རིགས་ཀྱི་གདོང་བ་ཅན་དང་གྲྭ་ཆས་གོན་མཁན་ང་གཅིག་པུ་ཡིན་པའི་གུར་འདབས་དེར་ང་རང་མུ་མཐུད་དེ་བསྡད། ཧིན་རྡིའི་བུ་མོ་སྔོ་བསེང་མ་ཞིག་གིས་རང་ཉིད་ཀྱི་དྲོས་ཟས་ཀྱི་ཐ་ལེ་ང་ལ་སྤྲད་དེ་ཁོང་མོས་གྲོགས་པོ་གཞན་དག་དང་ཐུན་མོང་དུ་ཟ་མ་མཉམ་དུ་ཟ་ཆོག་པའི་བརྡ་བསྟན། ད་དུང་ཁོང་ཚོའི་གྲལ་དུ་བོས་ཏེ་ ཆུ་འགྱིགས་དམ་གང་བསྐོར་བ་བརྒྱབ་ནས་འཐུང་རེས་བྱེད་དུ་བཅུག་པ་སོགས་ཧ་ཅང་སྙིང་ཉེ་བར་བྱས་པས་རང་ཉིད་གཱཾངྷཱི་བུ་དང་བུ་མོ་འདི་དག་དང་མཉམ་དུ་བདག་ཉིད་ཆེན་པོ་དེའི་འཁྲུངས་སྐར་གྱི་དུས་སྟོན་སྲུང་བརྩི་བྱེད་ཀྱིན་ཡོད་པའི་འཕྲུལ་སྣང་ཡིད་ཚིམ་པ་ཞིག་བྱུང་།

ཐ་མ་དེར་ང་རང་བདག་ཉིད་ཆེན་པོ་གཱཾངྷཱིའི་སྐུ་པར་གྱི་མདུན་ནས་ཡར་གོམ་པ་བརྟན་པོར་འགྲེངས་ཏེ་ཐལ་མོ་སྦྱར་ཏེ་སྐུ་པར་ལ་མིག་གིས་ཡིད་ཚིམ་པ་ཞིག་བལྟས། ངས་ངག་ནས་གང་ཡང་མ་བཏོན་ཞིང་། ཡིད་ལ་གང་ཡང་མ་དྲན་པ་ལྟར་མཆིས་ཏེ། འགྲེལ་བཤད་མེད་པའི་མིག་ཆུའི་ཐིགས་པ་གཉིས་ཤིག་གིས་མིག་མཐའ་བརླན་པར་གྱུར། དུས་དེར་ངས་རང་ཉིད་དང་རང་ཉིད་ཀྱི་ཁོར་ཡུག་ཡོད་ཚད་ཤིན་ཏུ་ལྷིང་འཇགས་ལྟ་བུ་ཞིག་ཏུ་ཚོར་ཞིང་། ལྷིང་འཇགས་དེ་ནི་རྫོགས་མཐའ་མེད་པའི་བྱམས་བརྩེ་དང་འདྲེས་པ་ཞིག་རེད།

དེ་དང་ཆབས་ཅིག རྒྱ་གར་གྱི་མི་དག་གི་སྙིང་གི་འཕར་རྩ་རེ་རེ་དང་། ཟུངས་ཁྲག་གི་རྒྱུ་བ་རེ་རེ། རང་དབང་དང་བདེ་སྐྱིད་ཀྱི་འོད་སྣང་རེ་རེ་བཞིན་དུ་མི་རྒན་གཅེར་བུ་མ་འདིའི་ཡ་མཚན་ཆེ་བའི་ནུས་པའི་ཀློང་ན་ཐིམ་ཞིང་གནས་པ་ལྟ་བུ་ཞིག་ཏུ་ཚོར། འཛད་མཐའ་མེད་པའི་འོད་ཀྱི་རྦ་རླབས། འཇགས་པ་མེད་པ་སྙིང་རྗེའི་རོལ་མཚོ། ཀུན་ལ་སྙོམས་པའི་ནམ་མཁའ་དང་ས་གཞི་ཆེན་པོ་སྟེ། མདོར་ན། བདག་ཉིད་ཆེན་པོ་ཁོང་ནི་སྲིད་བློན་ནེ་རུ་ཡིས་བྲིས་པའི་མ་ཧཱ་ཏ་མ་གཱཾངྷཱིའི་རྗེས་དྲན་གྱི་རྩོམ་ཡིག་ཅིག་ཏུ།

ལོ་སྟོང་གི་རྗེས་སུ་འོད་སྣང་དེ། །
ཡུལ་འདི་ཡི་ནང་ན་མཐོང་འགྱུར་ཞིང་། །
ཕྱི་འཛམ་བུ་གླིང་གིས་མཐོང་བར་འགྱུར། །
དེས་གྲངས་མེད་བརྒྱུད་ལ་བདེ་བ་སྟེར། །
ཞེས་དང་།

ཁོང་རྟག་པའི་སྐྱེས་མཆོག་དམ་པ་དེ། །
དཔལ་གཡུང་དྲུང་བདེན་པ་ཉིད་དང་བཅས། །
ངེད་རྣམས་ཀྱི་ཁྲོད་དུ་རྟག་བཞུགས་ནས། །
ལམ་ཡང་དག་བསྟན་ཅིང་འཁྲུལ་བ་འཇོམས། །

ཆེས་རྙིང་པའི་སྲོལ་ལྡན་ཡུལ་སྡེ་འདི། །
མཆོག་རང་དབང་ལམ་དུ་དྲངས་པ་ཡིན། །
ཞེས་གསུངས་པ་དེ་ཁོ་ན་ལྟར་ལགས།

ཁོང་གིས་ནི་དེ་ལྟར། འཛམ་བུ་གླིང་འདིར་ཆོག་ཤེས་དང་བརྩེ་བའི་རིན་ཐང་བཟང་པོ་མངོན་པར་མཛད་ཅིང་། ནུབ་ཕྱོགས་དཔལ་ཡོན་ཡར་ཐོན་དང་དེའི་བསྐྱེད་པའི་རྙོགས་འཛིང་ཆེ་བའི་མཇུག་འབྲས་མང་པོ་ཞིག་ལ་དོན་གནས་ཀྱི་སྔོན་དཔག་གནང་། ཁོང་ཉིད་ཧ་ཅང་བརྩེ་བ་དང་། ཧ་ཅང་ཆོག་ཤེས་པ། ཧ་ཅང་ཤེས་རབ་དང་ལྡན་པ། ཧ་ཅང་འགན་འཁྲི་ཕྲག་ཏུ་བསྣམས་ཏེ་ཡུལ་གྱི་སྐྱེ་བོ་དག་གི་བདེ་དོན་ལ་གཞོལ་བ་བཅས་ནི་ད་ལྟའང་འཛམ་བུ་གླིང་པ་དག་གིས་ཤིན་ཏུ་གསལ་བོར་ངེས་བཞིན་ཡོད།

ཁོང་གིས་ཨ་ཧྥི་རི་ཁ་ནས་རྒྱ་གར་དུ་ལོག་མཁན་གྱི་གྲུ་རྫིང་ཞིག་གི་ནང་ནས་དུས་རབས་ཉི་ཤུ་པའི་ནང་གི་རྒྱ་གར་གྱི་འབྱུང་འགྱུར་གཏན་འབེབས་གནང་བར་མ་ཟད། དུས་རབས་ཉེར་གཅིག་གི་སའི་གོ་ལའི་སྣོད་བཅུད་རྟེན་འབྲེལ་གྱི་ཆོས་ཉིད་ལའང་འཆུགས་པ་མེད་པའི་སྔོན་དཔག་གནང་ཡོད། དེ་ནི་ངས་ཁྱེད་རང་རླབས་ཆེན་དུ་བརྩི་བའི་རྒྱུ་མཚན་གཉིས་པ་ཞིག་རེད། རྒྱུན་མཚན་འདིས་ཁྱེད་རང་ད་ཆའང་འཛམ་བུ་གླིང་ལ་གལ་ཆེན་ཆགས་ཡོད། འོན་ཀྱང་ཁྱེད་རླབས་ཆེན་དུ་གྱུར་པའི་རྒྱུ་མཚན་ཨང་དང་པོ་ནི་ཁྱེད་ལ་མངའ་བའི་ལག་ལེན་གྱི་བདེན་པ་དེ་ཡིན།

དེས་ན་ཁྱེད་ནི་རྒྱ་གར་བ་རྣམས་ཀྱི་ཡབ་དང་། ཤར་ཕྱོགས་པ་རྣམས་ཀྱི་ནང་སེམས་ཀྱི་རིག་གནས་ཀྱི་མཚོན་རྟགས་ཡིན་པ་ཙམ་དུ་མ་ཟད། བོད་དང་འཛམ་བུ་གླིང་གི་ཞི་བདེ་ལ་དགའ་བ་ས་ཡ་མང་པོའི་སེམས་གཏིང་གི་རེ་བ་དང་སྤོབས་པ་འོད་སྣང་བཅས་ཡིན་ནོ།།
འཚེ་བ་མེད་པ་རྒྱལ་བར་གྱུར་ཅིག
མ་ཧཱ་ཏ་མ་གཱཾངྷཱི་རྒྱལ་བར་གྱུར་ཅིག