ང་ཁྲེལ་དགོད་ཅིའི་ཕྱིར་མི་ཤོར།

འཇམ་གཅེས།

 
དེ་རིང་གླེང་འདོད་པ་ནི་རིང་མིན་སླེབ་ལ་ཉེ་བའི་སྲིད་སྐྱོང་དང་སྤྱི་འཐུས་ཀྱི་འོས་བསྡུ་དང་འབྲེལ་བའི་བསམ་ཚུལ་འགའ་ཞིག་ཡིན། འོས་བསྡུ་ཆེན་མོ་འདི་གཉིས་ནི་མང་གཙོའི་རྒྱ་ཁབ་ཅིག་གི་ཁྱབ་འབངས་སུ་གཏོགས་པའི་མི་སེར་ཞིག་ལ་མཚོན་ན་བདག་དབང་བླ་ན་མེད་པ་ཞིག་ཡིན་པ་ནི་སྨྲོས་མེད་ཁར། དེ་དང་ལྷན་དུ་འགན་ཁུར་གྱི་བསམ་བློ་ནི་དེ་ལས་ཀྱང་གལ་ཆེ་བ་ཡིན།
ལྷག་པར་དུའང་བོད་མི་རིགས་ལ་མཚོན་ན། ཆེས་གཉེན་འཕྲང་ཅན་གྱི་དུས་སྐབས་འདི་ལྟ་བུའི་སྐབས་སུ་མང་ཚོགས་རང་ངོས་ནས་གོང་གསལ་འོས་བསྡུ་གཉིས་ལ་བཟང་སྤྱོད་དང་དྲང་བདེན་གྱི་ལམ་ནས་འགན་ཁུར་དགོས་པའི་དུས་ཤིག་ཡིན་མོད། ཆེས་ཡིད་མུག་དགོས་པ་ཞིག་ལ། རང་དོན་ཁོག་བཅངས་དང་སྤྱི་དོན་ཁ་འཁྱེར། ཆོལ་ཁ་དང་ཆོས་ལུགས་ཀྱི་སྐྲན་ནད་ཅན་མི་ཉུང་བ་ཞིག་གིས་བཙན་བྱོལ་བའི་ཁོར་ཡུག་གང་འཚམ་བཙན་བཟུང་བྱས་ཡོད་པར་བརྟེན། དེ་ལྟ་བུའི་བསམ་བློ་ཡོད་མཁན་ནི་ཧ་ཅང་དཀོན་པ་མ་ཟད། ད་དུང་དགྲ་དགའ་གཉེན་སྡུག་གི་འཐབ་རྩོད་དྲག་པོ་ཞིག་གིས་བཙན་བྱོལ་བོད་མིའི་སྤྱི་ཚོགས་ཀྱི་མགོ་གཞུག་ཡོངས་རྫོགས་ཟིན་མེད་དམ་སྙམ་པའི་ཚོར་སྣང་སྐྱུར་མོ་ཞིག་ཀྱང་རང་ཤུགས་ཀྱིས་སླེབས་ཀྱིན་འདུག

སྤྱིར་བཏང་བཙན་བྱོལ་བའི་སྤྱི་ཚོགས་འདིའི་ནང་དུ་རང་བཙན་ཁ་འཁྱེར་བ་དང་། དབུ་ལམ་ཁ་འཁྱེར་བའི་མི་ལྡོམ་ཚོས་སྐད་ཅོར་ནི་ལོ་མང་སྔོན་ནས་ད་ལྟའི་བར་དུ་རྒྱུན་ཆད་མ་མྱོང་བ་ལྟ་བུ་ཞིག་ཡིན་མོད། བདག་ལ་མཚོན་ན་དེ་དག་ལ་ཧ་ལས་ལས་ནམ་ཡང་བྱས་མྱོང་མེད། ཡིན་ཡང་དེང་སྐབས་ལེགས་ཉེས་དབྱེ་འབྱེད་ནུས་པའི་བློ་གྲོས་ཀྱི་མིག་ཟུང་མི་ལྡན་ཁར། རང་ཚུགས་རང་གིས་འཛིན་པར་སྙིང་སྟོབས་དང་ཆོད་སེམས་གང་ཡང་མེད་པའི་བྱབ་ཆུང་བ་མང་དག་ཅིག་ནི་སྐབས་འཚོལ་རིང་ལུགས་པ་ཚོས་འུར་གང་དུ་རྒྱག་ན་དེར་འདུར་རྐྱང་བྱས་རྗེས་སུ། ད་དུང་ཧ་ལས་ལས་དང་ཧོན་འཐོར་འཐོར་གྱི་སྒོ་ནས་ཕྱོགས་གང་སར་འུར་ཟིང་སློང་ཐབས་བྱེད་ཀྱིན་འདུག་སྟབས། འདི་དག་ལ་ལེ་ལན་རྔ་དང་དབྱུག་གུའི་དཔེ་ལྟར་དྲང་སྲོང་རྒན་པོའི་སྤྱན་སྔར་ནས་ཞུས་ཀྱང་མགོ་བོ་བར་གྱི་སྣང་བའི་དབྱིངས་སུ་དགྱེ་ནུས་པའི་གདེང་སྤོབས་དང་བཅས་སྟེ་བསྟན་སྲིད་སྤྱིའི་རྩ་དོན་དུ་དམིགས་ཏེ་མཐོང་བ་ལས་བྱུང་བའི་ཚོར་སྣང་དང་བསམ་ཚུལ་ངོ་མ་དག་ཅུང་ཟད་བརྗོད་ན་འདི་ལྟར་ཏེ།

དང་པོ་སྤྱི་འཐུས་ནི་གྲོས་ཚོགས་ལམ་ལུགས་ཀྱི་སྲིད་གཞུང་ཞིག་ལ་མཚོན་ན། བླང་དོར་ལམ་སྟོན་གྱི་སྣེ་འཁྲིད་མཁན་དང་རྒྱབ་སྐྱོར་མཁན་གྱི་དཔུང་སྡེ་ནུས་མཐུ་ཅན་གཅིག་པུ་དེ་ཡིན་དགོས་སྟབས། ཤེས་འབྱོན་དང་ལྷག་བསམ། དྲང་ཚུགས་དང་བཟང་སྤྱོད་ལྡན་པའི་སྒོ་ནས་སྲིད་གཞུང་ལ་ལམ་སྟོན་དང་བཀོད་འདོམས་ཐུབ་མཁན་ཞིག་ངེས་པར་དུ་དགོས། དེ་ལྟ་བུའི་སྐྱེ་བོ་དེ་དག་ལ་མཚོན་ན། རྒྱལ་སྤྱིའི་ཆབ་དཔལ་རིག་གསུམ་གྱི་གནས་ཚད་དམ་གོ་རྟོགས་ཡོད་མཁན་ཞིག་དགོས་པ་མ་ཟད་། གཞིས་བྱེས་གཉིས་ཀྱི་གནས་ཡུལ་སོ་སོའི་ཁོར་ཡུག་དང་གནས་སྟངས། ཡུལ་ཁྲིམས་སོགས་ཀྱི་གནས་སྟངས་ཀྱང་ངེས་པར་དུ་ཤེས་དགོས་མོད། དེང་སྐབས་སྤྱི་འཐུས་ཀྱི་འོས་ཆོས་ལ་གཞིག་སྐབས་ཡ་མཚན་དགོས་པ་དང་། སེམས་ཤུགས་ཆགས་དགོས་པའི་སྣང་ཚུལ་མང་པོ་ཞིག་ཡོང་བཞིན་པ་ནི། དཔེར་ན། ངས་ཞལ་འདོན་སྐྱོར་ཤེས་ཚུལ་དང་། སྤྱི་ཚོགས་ག་གེ་མོའི་ནང་དུ་ལས་རིགས་ཙག་ཙིག་གཉེར་རབས། ཐ་ན་ཕྱུགས་རྫི་དང་། དཀོན་གཉེར། མ་བྱན་བྱས་ཚུལ་གྱི་མཛད་རྣམ་དག་ཀྱང་འོས་ཆོས་སུ་གཤམས་ཡོང་བའི་སྐབས་འདིར་ང་ཁྲེལ་དགོད་ཅིའི་ཕྱིར་མི་ཤོར།

གཉིས་པ་སྲིད་སྐྱོང་གི་འོས་མི་དག་ལ་མཚོན་ན་ཡང་། འདས་མ་ད་གསུམ་གྱི་གནས་སྟངས་གང་གི་ཐད་ནས་ཕུགས་རྒྱང་རིང་པོའི་སྒོ་ནས་བསམ་བློ་འཁོར་ནུས་མཁན་ཞིག་དགོས་པ་ནི་ཞུ་ལ་དགོས། ད་དུང་གང་ཟག་རང་ཉིད་ཀྱི་སྟོབས་ཤུགས་འབྱུང་ཁུངས་ངོ་མ་དེ་ནི་མི་མང་ཡིན་སྟབས། ངེས་པར་མི་མང་གི་མངོན་འདོད་དང་མཐུན་པའི་སྲིད་ཇུས་ཤིག་མིག་སྟོན་དགོས་པ་ལས། དཔེར་ན་སྲིད་སྐྱོང་འོས་མི་ཀླུ་མཁར་བྱམས་ནང་བཞིན་ཁ་བདེ་ལྕེ་བདེའི་ལམ་ནས་མི་མང་གི་སེམས་ཁམས་དང་། སྤྱི་ཚོགས་ཀྱི་གནས་བབ། རྩ་ཁྲིམས་ཀྱི་དགོངས་དོན་སོགས་དང་ཡོངས་སུ་འགལ་བའི་ཁར། ད་དུང་སེམས་ཚོར་ཁོ་ནའི་སྒོ་ནས་སྨྲ་ར་གཡས་བྱིལ་གཡོན་བྱིལ་གྱི་ཐོག་ནས་ངར་ངར་རྒོད་རྒོད་ཀྱིས་རང་དབང་གི་སྤྱི་ཚོགས་ཤིག་གི་ནང་ནས་སོ་ཁ་རྡིབ་པའི་གྲི་ཆག་ཞིག་ཡར་གཡུགས་མར་གཡུགས་ག་ཚོད་བྱས་ཀྱང་། ལུང་པ་སྟོང་པའི་ནང་ནས་དགྲ་འདུལ་གཉེན་སྐྱོང་གི་གློག་བརྙན་འཁྲབ་སྟོན་པའི་ཚུགས་ཀ་ཞིག་ལས་མཁས་མཛངས་དང་སྙིང་ཁམས་ཅན་གྱི་བྱེད་སྟངས་ཤིག་ནམ་ཡང་ཡིན་མི་སྲིད།

མཚམས་འདི་ནས་གསལ་བཤད་དགོས་པ་ཞིག་ལ། སྤྱིར་བཏང་ཀླུ་མཁར་བྱམས་སྲིད་སྐྱོང་འོས་མིར་ལངས་པ་ནི་མང་གཙོའི་ཁེ་དབང་དང་ཐོབ་ཐང་ཡིན་སྟབས་སུས་ཀྱང་དགག་བྱ་མེད། ཡིན་ནའང་ཀླུ་མཁར་བྱམས་སྲིད་སྐྱོང་འོས་མིར་ལངས་རྒྱུའི་དྲིལ་བསྒྲགས་མགོ་མ་བཙུགས་པའི་གོང་ནས་དུས་རྒྱུན་དུ་བཙན་བྱོལ་བོད་མིའི་སྒྲིག་འཛུགས་ལ་མོས་པ་མེད་མཁན་དང་། མི་རིགས་ཀྱི་རྩ་དོན་ལ་སེམས་ཁུར་གང་ཡང་མེད་པ་ཙམ་དུ་མ་ཟད་ལོ་རེའི་གསུམ་པའི་ཚེས་བཅུའི་དུས་དྲན་ལ་ཡང་མཉམ་ཞུགས་མི་འདོད་པའི་སྐྱེ་བོ་དག་གིས་ཀླུ་མཁར་བྱམས་ལ་དཔའ་རྒོད་དང་། མཁས་དབང་སོགས་ཀྱི་མཆོད་བསྟོད་འབུལ་མགོ་བརྩམས་སོང་བ་མ་ཟད་། དུས་དེ་ནས་བཟུང་ཁོང་ཚོས་ཁ་ནས་བོད་མི་རིགས་དང་རྒྱལ་ཁབ་ཀྱི་ལས་དབང་མ་ཎི་བགྲང་བགྲང་ཡང་བྱས་སོང་།

ཅིའི་ཕྱིར་དུས་རབས་ཕྱེད་ལྷག་ཙམ་གྱི་བྱུང་རབས་ནང་དུ་བྱུང་མ་མྱོང་པའི་ལ་རྒྱ་དང་སེམས་ཤུགས་འཕར་མ་དེ་འདྲ་ཞིག་ལྷ་ཡི་དངོས་གྲུབ་དང་བདུད་ཀྱི་ཆོ་འཕྲུལ། ཡང་ན་བཙན་བྱོལ་སྒྲིག་འཛུགས་ལ་རིང་ནས་སྙིང་དུ་བཅངས་བཞིན་པའི་མནར་སེམས་དེ་བཞིན་བེད་སྤྱོད་ཀྱི་གོ་སྐབས་ཤིག་མཐོང་བ་ཡིན་ནམ།
ལྷག་པར་དུ་དེང་སྐབས་གློ་སྙིང་བྲང་གསུམ་ཡོངས་རྫོགས་དགྲ་བོ་དམར་པོའི་སྲིད་གཞུང་ལ་བཅངས་མཁན་གྱི་དོལ་ཚོགས་མི་སྣས་ཀྱང་སྐྱལ་ཁྲལ་ལག་དངུལ་བཙན་བྱོལ་སྒྲིག་འཛུགས་ལ་སྤྲད་རྗེས་ཀླུ་བྱམས་ལ་རྒྱབ་སྐྱོར་དགོས་ལུགས་ཀྱི་གཏམ་བཤད་སྤེལ་མགོ་བཙུགས་ཡོད་ཚུལ་སྐད་འཕྲིན་དྲྭ་ལམ་དག་ནས་བགྲོ་གླེང་འགྲོ་བཞིན་པ་ཐོས་ཚེ་ངས་ཀླུ་བྱམས་དང་འབྲེལ་བའི་དཔྱད་གླེང་དགོས་དོན་ཡང་དེ་ལྟར་ཡིན།

མདོར་བསྡུས་ནས་ཞུས་ན། ཀླུ་མཁར་བྱམས་དཀར་ནག་གང་ཡིན་མི་ཤེས་མོད་རྒྱབ་སྐྱོར་བྱེད་མཁན་དང་། ཀླུ་བྱམས་ཀྱིས་བསྒྲགས་གཏམ་སོགས་དཔྱད་ཞིབ་མཐིལ་ཕྱིན་པ་ཞིག་དགོས་པ་ནི་དགོས་མེད་ཀྱི་བྱ་བ་ཞིག་གཏན་ནས་མིན་པར་འདོད། དེ་བཞིན་སྲིད་སྐྱོང་གི་ནུས་ཤུགས་འབྱུང་ཁུངས་ངོ་མ་དེ་ནི་མི་མང་གི་རྒྱབ་སྐྱོར་ཡིན་སྟབས་དོན་དངོས་ཐོག་ཀླུ་བྱམས་ཀྱིས་༸གོང་ས་མཆོག་ལ་ཟུར་ཟའི་རྩོམ་ཡིག་དང་གཏམ་བཤད་དག་གིས་མི་མང་གི་སེམས་ཁམས་ལ་རྨ་ཁ་ཆེན་པོ་བཟོས་ཟིན་པ་དེས་ཀླུ་བྱམས་ཀྱི་དབང་རླུང་ཡོངས་རྫོགས་རྒུད་པར་བྱས་ཡོད།
མ་གཞི་ནས་གོང་གསལ་གནད་དོན་དེ་དག་ཀླུ་བྱམས་རང་ཉིད་ཀྱིས་ཀྱང་གསལ་པོ་ཤེས་ཀྱིན་ཡོད་ལ། ལྷག་པར་དུའང་མི་མང་གི་རྒྱབ་སྐྱོར་ལམ་ནས་སྲིད་སྐྱོང་དུ་ལངས་མི་ཐུབ་པ་དེ་ཡང་ཀླུ་བྱམས་ཀྱིས་གསལ་པོ་ཤེས་ཀྱིན་ཡོད། འོན་ཀྱང་ད་དུང་ཨུ་ཚུགས་རྒྱག་དགོས་པའི་དོན་ཆེན་གཞན་ཞིག་ཡོད་དམ། ཡང་ན་མིང་ཙམ་གྱི་དོན་དུ་ཡིན་མིན་སོགས་ནི་དེང་སྐབས་དྲྭ་ལམ་དག་ལ་འགྲོ་བཞིན་པའི་བགྲོ་གླེང་འདི་དག་ཁ་སྣོན་གྱི་ཚུལ་དུ་བཀོད་པ་ཡིན།

མཐའ་དོན་བསྟན་སྲིད་དང་མི་རིགས་ལ་དོན་དམ་པའི་ལྷག་བསམ་དང་ཤ་ཚ་ཡོད་ན། ང་དང་ང་ཡི་ལུང་ཚན་གྱི་ཆོས་ལུགས་དང་ཆོལ་ཁའི་ཞེན་ལྟ་ཡོངས་རྫོགས་གད་བདར་གཙང་དག་ཅིག་གནང་བའི་རྗེས་སུ་སྲིད་སྤྱིའི་འོས་བསྡུར་ཞུགས་རོགས་ཞུ་རྒྱུ་དང་། དེ་བཞིན་དགྲ་གཉེན་གཉིས་ཀའི་དྲྭ་འབུ་དག་གིས་ཀུན་སྤྱོད་ལ་དུས་ཀུན་ཏུ་ཡིད་གཟབ་དགོས་གལ་ཆེ།