༼ངག་ལྡིབ་པ།༽
_______ སྨྱུག་མདའ།
རི་གཟར་རྦད་ཀྱིས་བཅད་དེ་མཆི་མ་དམར་ཐག་ཆོད།།
ཐ་སྙད་སླར་ཡང་བཙལ་ན་མུན་ནག་ང་རང་ཟེར།།
སྙིང་གཏམ་ཞུན་མའི་མངར་ཁ་ཅུང་ཟད་ཚ་བོ་རེད།།
སྐྲ་ལོ་རྟོག་བཟོ་བྱས་ཏེ་རྣམ་ཤེས་ཤ་ཡིས་སྦྲིད།།
དེ་རིང་ཉི་མ་འཐེན་ཞོར་ཁེར་མོ་ཡིན་པ་ཤེས།།
སྐབས་དེར་སྣང་བ་འཛུམ་བྱུང་འཇིག་རྟེན་ཆུང་ཆུང་གོ།
རླུང་གི་འབོད་པ་མཁོ་འང་མགོ་བོ་ག་ལེར་འགྱེལ།།
སྨོན་ལམ་ཐེངས་ཤིག་རྗེས་སུ་རྡོ་བའི་མལ་སྟན་དྲོས།།
འོད་ཟེར་འཇམ་པོ་ཞིག་ལ་དར་ཆ་མཐོ་རུ་འདེགས།།
ང་ལ་རྨ་བཤུལ་མ་འཇོག་ད་ཚོད་ཧ་ཅང་སྙི།།
རྩྭ་ལོ་ནེམ་པའི་ཐང་ལ་མགྲིན་པ་དཔར་བ་འོ།།
གཏམ་རྒྱུད་བརྐོས་མ་དེ་ལ་སེམས་ཀྱི་བག་ཆགས་འགོས།།
སྤྲིན་པ་བརྗེ་ཞོར་གྱེས་པ་ཡི་གེས་མཐེབ་གཞུང་སྒུལ།།
རྒྱང་ལ་འཐིམ་པ་ཤེས་མོད་སྙིང་ལ་གྲིབ་མ་ཆགས།།
རྨི་ལམ་དབྱངས་ལ་བརྒྱུས་ཏེ་ད་དུང་བཙལ་རྩིས་ཡོད།།
ཡིག་འབྲུ་འགའ་ཞིག་ཀློག་སྐབས་ཡིད་ངོས་མཚར་རེ་བྱུང་།།
ཚོར་བ་རྩིད་པ་ཡིན་ནམ་ཧུ་ཤུ་ཤུགས་ཀྱིས་འཐེན།།
དུས་ཚོད་ཡོར་ཙམ་བྱས་ཀྱང་སང་ཉིན་ཇེ་དལ་ཕྱིན།།
མི་རྣམས་ཅི་ལ་བྲེལ་བཞིན་ང་ནི་དྲན་པས་བཀྱིགས།།
ཆོས་ཉིད་རིག་པ་འདི་འང་ཅི་འདྲའི་ཞེ་གནག་ཅིག།
སྙན་ངག་དུམ་བུ་ཞིག་ལ་སྐྱོ་བ་བརྒྱ་ཕྲག་བཤད།།
གཞུང་ལུགས་སྐམ་པོའི་ངོས་ལ་མི་ཚེས་ད་ཚོད་ཟིན།།
འཚོ་བ་ཆུ་ལ་ལྡང་བའི་ཆོས་གོས་འཁྲུགས་སེ་འོ།།
ཟུག་ལངས་གན་ནས་འོང་པ་སུ་ལ་བཤད་བརྩིས་མེད།།
ས་སྲོད་འཁུར་བའི་ལྟད་མོ་མལ་ཁྲིའི་གྲུ་ག་འབྱར།།
མག་མོག་དེ་ཉིད་ཡིན་ནམ་ཉི་མ་ནུབ་ཁ་ཡིབ།།
སྤྲིན་པ་དམའ་སར་འཐིབས་པས་གཏམ་གྱི་ངོ་ཤ་བྲུག།
ལྷམ་རྩི་འོད་ལ་འཁྲུལ་པ་ཀུ་རེ་རྩེད་སྲོལ་ཞིག་གམ།།
༼རི་སུལ་ལ་ཅེར་བ།༽
གནམ་ས་དམར་པོ་རེད་ཚེར་མའི་ལྗོན་པ་བརྒྱངས།།
དམངས་ཀྱི་ཤེས་བཅུད་རྒུད་མེ་ཏོག་རྩེ་ཁ་གས།།
སྟོད་པའི་གྲོང་ཚོ་ནས་བྱང་ཁོག་ཆགས་པས་བཟི།།
མཆུ་ཏོས་རྨི་ལམ་བརྡར་བཟོ་ཚོང་མགོ་བོ་དུད།།
ངག་གི་ཇུས་འགོད་ལ་ཐོད་པ་ས་ལ་དཔར།།
ཡ་གིའི་མཆོད་སྟེགས་ནས་སྤྱན་ཆབ་ཤར་ཤར་བབས།།
ཁྱི་ཕག་ངང་གིས་འཕེན་རྐུབ་སྐྱགས་ཚ་ངད་ཕོག།
ཇ་ཕོར་གཡར་མ་འདི་ཟས་ཀྱི་ལྷག་མ་བཅུགས།།
རྒྱལ་སྤྱིའི་ཁྲོམ་ར་ན་གངས་རི་བྲིན་ཏེ་འོ།།
ལོ་རྒྱུས་གོད་ཆག་ལ་ལྷོད་ཤ་སུ་ཡིས་སྟེར།།
ལོ་འདིའི་ཆུ་ལོག་ལ་འུར་གྱི་སྨུག་འགོ་ལངས།།
རྨི་ལམ་ཐེད་པོ་ཞིག་རི་བོའི་སྐེད་ལ་བྱིབས།།
ཆབ་སྲིད་སུག་པ་འང་ངག་གིས་སྐྱོར་གྱིན་ན།།
ཡུགས་མའི་སྐྲ་ཉག་ཀྱང་ན་བཟའ་བསྡོམས་ཐག་རེད།།
ང་ཚོས་ད་དུང་ཡང་རུལ་མའི་གྱོད་ཁ་ནས།།
ཐ་སྙད་ལྗིད་པོ་རེར་རྣ་བུག་བསྐྱལ་ཏེ་འོང་།།
དབེན་པའི་མལ་ཁྲི་འང་མུན་པར་འདྲེས་སོང་ངོ་།།
གཟན་འོག་མདེའུ་དེ་གནའ་བོའི་གཏམ་རྒྱུད་མོད།།
དུས་ཀྱི་མདའ་རྩེ་ལ་ཤེས་རབ་མ་ཟུག་པས།།
ཕལ་གཤིས་སྐོར་བྲོ་ཞིག་མིག་ཁར་ཕབ་ལ་སྐྲག།
ད་ནི་ཅིས་ཀྱང་ནས་རྣམ་རིག་རྒོད་དགོས་འདུག།
ལྕག་སྒོ་སྐྱ་བོ་ན་ཙིར་སྒྲ་མང་ཙམ་གདའ།།
ལྷིང་འཇགས་རི་ཁྲོད་ཚོས་ཏིང་འཛིན་མ་སྒོམ་ན།།
ལམ་གྱི་བཞི་མདོ་འདིར་ཟེད་ཀ་ན་བུན་བཅས།།
དངོ་ཁ་རུམ་ལ་བསྡུས་ཁ་དོག་མདོག་ཅན་ཡིན།།
སྒོ་བྱང་མཐོ་པོའི་ངོས་སེམས་ཀྱིས་དྲན་གསོ་བྱོས།།
གདོང་གི་གྲིབ་ཡོར་ལ་དཀར་རྩི་ཡང་ཡང་བྱུགས།།
ཤཱཀྱའི་དབུ་འཕང་འདི་ང་ལ་རིན་ཐང་ཆེ།།
༢༠༡༥/༨/༢༧ ཉིན།