——–སྐྱོ་བྲག་དགའ་དབང་།
འདམ་ལྕོག་རྩེ་ལ། ཞེས་པའི་ས་མིང་འདི། ང་ཆུང་དུས་ཆེས་གོ་གྲངས་མང་བ་ཞིག་ཡིན། འོན་ཏེ་བོད་ཡུལ་གྱི་གཞི་བདག་གྲགས་ཅན་གཉན་ཆེན་ཐང་ལྷའི་གོང་བ་བརྒལ་བའི་ལ་ཆེན་པོ་ཡིན་པས་བོད་ཁམས་སུ་གྲགས་པ་ཞིག་ཡིན་ནའང་ང་ལ་ནི་དེ་མ་རེད།
ང་ལ་ཨ་ཕས་ཡང་ནས་ཡང་དུ་བཤད་མྱོང་བ་ནི། བོད་སྡེ་པ་གཞུང་གིས་གསེར་གདུང་འཛམ་གླིང་རྒྱན་གྱི་གཟུངས་གཞུག་ཆེད། མདོ་ཁམས་ཀྱི་སྐུ་གསུང་ཐུགས་རྟེན་བྱིན་ཅན་མང་པོ་ཞིག་ཁུར་ཡོང་དགོས་པའི་བཀའ་ནན། ཤར་རི་ཉི་མ་གྲགས་པ། ཟེར་བའི་གཏེར་སྟོན་ཞིག་ལ་གནང་བ་མ་སྒྲུབ་ན། ཁོང་ལའང་སྲོག་ཉེན་ཡོད་ཕྱིར། འཁོར་ཚོགས་རྒྱ་ཆེན་པོས་མདོ་ཁམས་སུ་ཡོང་སྟེ། དགོན་པའི་སྐུ་གསུང་ཐུགས་རྟེན་རྩ་ཆེན་དག་ལ་ཁྲུས་གསོལ་བྱིན་འབེབས་དང་། མཆོད་རྟེན་ཞིག་གསོ་སོགས་ལ་ཁ་བསྙད་དེ། རྟེན་བྱིན་ཅན་མང་པོ་ཞིག་རྐུ་ཐབས་ཀྱིས་ཁུར་སོང་བའི་གྲས་སུ། སྐྱོ་བྲག་གི་མཆོད་རྟེན་ནག་ཆུང་གི་ནང་ནས་ཀྱང་། གུ་རུ་རིན་པོ་ཆེའི་ཆིབས་སྒ་སོགས་ཁུར་སོང་བ། གཏེར་སྟོན་ཡོངས་དགེ་མི་འགྱུར་རྡོ་རྗེས་མཁྱེན་ཏེ། འདམ་ལྕོག་རྩེ་ལའི་ཡན་དུ་མི་གཏོང་བའི་དབུ་སྙུང་བཞེས་ནས་བཞུགས་བསྡད་པ་ན། ཉིན་ཞིག་ལྕམ་གྱིས་ཁྱོས་མནའ་ཟ་བ་ཡིན་ནམ། ཉི་གྲགས་འདམ་ལྕོག་རྩེ་ལ་ནས་བརྒལ་འགྲོ་གདའ། ཟེར་བས།
ཡོངས་དགེས། གློ་བུར་དུ་རང་གི་སེན་མོའི་གསེང་གི་ཟན་ལྷག་བླངས་པ་དམར་གཏོར་དུ་བཅོས་ཏེ། གྲོ་ལོད་ཀྱི་ཡས་ཟོར་བསྐོར་བས། གནམ་སྔོན་པོ་ནས་སེར་བ་བབས་པ་བསེ་ཞྭ་ལ་ཕོག་པའི་སིང་སྒྲས་རྟ་འདྲོགས། ཞབས་ཡ་གཅིག་ཡོབ་ལ་ཐོགས་ཏེ་དྲུད། སྐུ་ལུས་དུམ་བུ་བརྒྱད་དུ་སོང་བའི་ཤུལ་ན་མཆོད་རྟེན་བཞེངས་པ་ལ། འདམ་ལྕོག་རྩེ་ལའི་མཆོད་རྟེན་བརྒྱད་སྒྲིག །ཟེར་བ་ཞིག་ཡོད་རབས་བཤད་པ་དེ་ཡིན།
ཨ་ཕས་བཤད་པ་འདི་ནི་ང་ཚོའི་ཡུལ་མིར་གྲགས་ཚོད་ཙམ་ལས་གནས་ཚུལ་བདེན་པ་ཡིན་མིན་ཨ་ཕ་ཁོ་རང་གིས་ཅི་ཡང་ཤེས་ཀྱི་མ་རེད་ལ། ངས་ཀྱང་ཉམས་ཞིབ་བྱ་བའི་དགོས་གལ་མ་མཐོང་བས་ན་ད་དུང་ཡང་ལོ་རྒྱུས་དངོས་ཡིན་མིན་ཤེས་ཀྱི་མེད་ནའང་། འདམ་ལྕོག་རྩེ་ལ། ཞེས་ཐོས་པ་ཙམ་ན་ཨ་ཕས་བཤད་པ་རྣམས་ཡིད་ལ་འཁོར་ཡོང་བ་ཞིག་རེད།
སྒྲུང་བཤད་མ་སྡོད།
ཁ་བརྡའི་དྲ་གྲོགས་ཡོངས་ལ་འཚམས་འདྲི་ཞུ།
སྐྱོ་བྲག་དགའ་དབང་ལགས། ཉིད་ལྟ་བུའི་ཤེས་ཡོན་ཅན་གྱི་མི་སྣས་གལ་ཆེན་གྱི་གནས་ཚུལ་འདི་ལྟ་བུ་གོ་སོང་། གྲགས་ཚོད་ཟེར་བ་ཙམ་ཐུགས་གཏད་དེ་ཁྱབ་བརྡལ་མི་གཏོང་པར་ཞུ། །ཉིད་གྱིས་གཏམ་འདི་ཕྲན་གྱིས་སྔ་མོའི་དུས་ནས་གོ་བས་ཁྱོད་ཀྱིས་བརྩམས་སྒྲུང་མིན་པ་ཤེས་མོད། ལོ་རྒྱུས་དང་གཏན་ནས་མི་མཐུན། ཀརྨ་བཀའ་བརྒྱུད་ཕྱོགས་དང་གཏེར་སྟོན་ལ་འགལ་བ་ཅུང་ཟད་བྱུང་བས་ལོ་རྒྱུས་རྫུན་མ་བཟོས་པ་རེད། ཁོང་གི་ལོ་རྒྱུས་གཏེར་མཛོད་གཏེར་བརྒྱའི་ལོ་རྒྱུས་སུའང་ཅུང་ཟད་ཡོད། གུ་བཀྲའི་ཆོས་འབྱུང་སོགས་རྙིང་མའི་ལོ་རྒྱུས་མང་པོར་གཏེར་སྟོན་ཚད་ལྡན་དུ་བཞེད། རྫོགས་ཆེན་ཀོང་སྤྲུལ་གྱི་ལོ་རྒྱུས་སུ་ཀྃ་ཚང་ནས་གནོན་ཤུགས་སྤྲད་པས་ཀོང་སྤྲུལ་ཡོན་ཏན་རྒྱ་མཚོས་སྐུ་ཚེ་དེ་ཉིད་ལ་ཉི་གྲགས་གཏེར་ཆོས་སྤེལ་མ་ཐུབ་པས་སྐུ་སྐྱེ་པྱི་མས་བསྟན་པ་སྤེལ་ཕྱིར་བསམ་བཞིན་སྐྱེ་བ་བཞེས་པ་ཡིན་ཚུལ་གསུང་རྒྱུན་ཡོད། གཏེར་ཆེན་ཉི་མ་གྲགས་པའི་ཆོས་རྒྱུན་རྫོགས་ཆེན་རེར། ད་ལྟའི་རྫོགས་ཆེན་དགོན་མ་ལག་སུམ་བརྒྱ་པོ་ཐམས་ཅད་མཁའ་འགྲོ་སྙིང་ཐིག་དང་ཉི་གྲགས་ཀྱི་ཆོས་རྒྱུན་འཛིན་པར་བཤད་ཀྱང་ཆོག ༧གོང་ས་སྐུ་ཕྲེང་རིམ་བྱོན་གྱིས་ཀྱང་ཉི་གྲགས་གཏེར་ཆོས་ལ་ཉམས་ལེན་མཛད་པའི་ལོ་རྒྱུས་བཞུགས། ཀརྨ་16་པ་དང་རྫོགས་ཆེན་དཔོན་སློབ་སྐབས་ཀརྨ་བཀའ་བརྒྱུད་དང་གྲུབ་དབང་རྫོགས་ཆེན་པའི་བར་ཀྱི་འགལ་བ་ཕལ་ཆེར་ཞི་བར་བྱས་པས་ངཽ་མཚར་ཆེ། ད་གནས་ཚུལ་སྐྱར་སློང་བྱས་ན་མི་ལེགས་པས་ཐུགས་བསམ་བཞེས་ནས་གཏམ་འཆལ་རྫུན་མ་དེ་རིགས་ངོམ་ཁྱེར་མི་གནང་བར་ཞུ། ། འདམས་ལྕོག་རྩེ་ལའི་མཆོད་རྟེན་ཆ་བརྒྱད་ཉི་གྲགས་ཀྱིས་མཐའ་མིའི་ཁ་གནོན་དུ་བཞེངས་པ་རེད། རྗེས་སུ་ཕ་ཝོང་ཁས་གུ་རུ་མཚན་བརྒྱད་ཀྱིས་གཟུངས་བཏོན་ནས་སྐྱར་བཞེངས་བྱས་པ་ཧ་ལམ་1956་ཡས་མས་སུ་ས་ཡོམ་གྱིས་གཏོར་བ་རེད། སྐྱར་བཞེངས་སྐབས་ད་ལྟའི་ཀརྨ་པའི་སྐུ་ཉེ་རྡོ་རིང་ཀརྨས་ཀྱང་ཞལ་འདེབས་གནང་ཡོད་ཚོད་ཡིན། ལྷག་བསམ་ཀྱིས་རེ་བསྐུལ་ལོག་འགྲེལ་མི་གནང་བར་ཞུ། སྐུ་ཚེ་རིང་།