སྤྱན་ཆེན་པོ།
དེ་རིང་རྒྱལ་སྟོན་དུས་ཆེན་ཡིན་པས
ཕ་ཡུལ་གྱི་ཡུལ་མི་རྣམས་གྲོང་ཁྱེར་ལ་འགྲོ་བཞིན་འདུག
ངས་ཀྱང་སྒམ་ནང་ན་ཡོད་པའི་བོད་ལྭ་དེ་གྱོན་ནས
གྲོང་ཁྱེར་ལ་སྤྲོ་འཆམ་དུ་སོང་བ་ཡིན
ངོ་གདོང་ལ་སྐག་ཚོས་བྱུག་པའི་ཨ་ཡེ་རྒན་མོ་དེས
“ཁྱོས་ཞོགས་ཇ་ཨེ་འཐུང ཉིན་གུང་གི་ཟ་མ་ཨེ་ཟོས
སྙིང་མ་རྗེ འདིས་ཉིན་ཁ་ཤས་ལ་ཟ་མ་ཟོས་ཡོད་ས་མ་རེད་”ཟེར་བཞིན
སྒོར་རྡོག་བཅུ་ང་ལ་གཏད་ནས་”ཟ་མ་ཟ་སྤྱད་བྱོས་”ཟེར
ད་དུང་མི་ཚོགས་འཛོམས་ས་ནས
མི་མང་བོས་ང་ལ་ཅེར་བཞིན་ང་རང་གླེང་གིན་འདུག
རྒྱ་ཁོག་ནས་ཐོན་པའི་ལྗོངས་རྒྱུ་བ་དེས
པར་ཆས་ཀྱི་སོ་ཁ་ང་ལ་གཏད་འདུག
མཐོ་སྒང་ནས་ཐོན་པའི་འབྲོག་པ་ཚོས་ཀྱང
མཛུབ་གུའི་གཏད་ས་དེ་ང་ཁོ་ན་རེད་འདུག
དོན་ངོ་མ ང་ནི་སུ་ཞིག་ཡིན་ནམ
ངས་ཅི་ཞིག་བྱས་སོང་བ་ཡིན་ནམ
རང་ཉིད་ཀྱིས་ལན་མི་ཐེག་པའི་དྲི་བ་ཁ་ཤས་རང་ཉིད་ལ་འདྲི་ཞོར
ཕྱིར་ཕ་ཡུལ་ལ་ལོག་པ་ཡིན
༢༠༡༥-༨-༢༡
སྙན་ངག་འདི་ངོ་མ་ཡག་ཐ། བསམ་བློའི་བསྟན་དོན་གྱི་ཕྱུག་པའི་སྙན་ངག་ཅིག་རེད། ངོ་མ་ཀློག་རིན་ལྡན་གི།
མུ་མཐུད་ཡིན་ད།
མཐོ་སྒང་ནས་ཐོན་པའི་འབྲོག་པ་ཚོས་ཀྱང་་་ཟེར་བ་དེ
མཐོ་སྒང་ནས་ད་སོ་མ་གྲོང་དུ་ཕབ་པའི་འབྲོག་པ་ཚོས་ཀྱང་་་་ཟེར་ན་འབྲོག་པ་དེ་ཚོ་གྲོང་བརྡལ་གསར་བའི་གཡོ་འཕྲུལ་དང་། ལད་ཟློས་ཀྱིས་རྣམ་པ་གཞན་ཞིག་ང་ཚོས་ཚོད་དཔག་བྱེད་ཐུབ་པས་ན། ཁྱོད་ཀྱིས་བོད་ལྭ་དེར་དེ་བས་རིན་ཐང་ཆེ་རུ་འགྲོ་ཡོད། སྙན་ངག་འདི་མཚོན་དོན་ཟབ་ཅིང་དེང་གི་གནས་བབ་ལ་གཞོལ་འདུག་པས། ངོ་མ་བཀླག་རིན་ལྡན་པ་ཞིག་རེད།
རྕོམ་འདི་སྙན་ངག་དང་སྒྲུང་གཉིས་ལས་སྒྲུང་གི་ཉམས་ཤུགས་ཆེ་བ་ཙམ་མ་གཏོགས་རྩོམ་ཡག་པོ་བྲིས་འདུག་པས་དགའ་བསུ་ཞུ།
ཁྲག་འཐུང་དང་བྱ་སྨྱོན་པ། གཡུ་སྒང་དགེ་འདུན་སོགས་ཀྱིས་ལམ་སྟོན་དང་སེམས་ཤུགས་སྦྱིན་པར་བཀའ་དྲིན་ཆེ་ཞུ།