ཨ དོན་ཉི། ༼ཨ་རི༽
ཨ་རི་བས་རང་གི་ཕྲུ་གུར་ཤེས་བྱ་སྦྱོང་རོགས་བྱེད། ཕ་མ་དང་ནང་མིས་ཕྲུ་གུ་བཙས་མ་ཐག་པའི་ངུ་འཛུམ་དང་འགུལ་སྐྱོད་ཕྲ་མོ་བྱེད་པ་ནས་བཟུང་སྟེ། མིག་ལ་རྩེད་ཆས་གཤོམ་པ་དང་རྣ་ལ་སྒྲ་འཇམ་པོ་མངགས་པ། རྩེད་ཆས་ཡང་མོ་ལུས་ལ་གླན་པ་སོགས་བྱས་ནས་ཤེས་བྱ་སློབ་པའི་སྟ་གོན་ལ་ཞུགས་པ་རེད། ཕྲུ་གུས་གྲ་སྒྲིག་སློབ་གྲྭ་འགོ་མ་བཙུགས་པའི་ཡར་སྔོན་ནས་ཀྱང་ཕ་མ་ཚོས། རང་གི་ཕྲུ་གུ་ལ་སློབ་སྦྱོང་ཞེས་པའི་དོན་ནི་སྤྲོ་སྣང་ཞིག་ཡིན་པའི་འདུ་ཤེས་སེམས་ངོར་གློན་ཅི་ཐུབ་བྱ་ཞིང་། ཕྲུ་གུ་རང་སྟེང་ནས་སློབ་ལ་འཇུག་པའི་སེམས་ཁམས་ཚགས་ཚུད་པོ་ཡོང་རྒྱུར་རེ་བ་འཛིན་པ་རེད། རེ་བ་དེའི་ཁུངས་སུ་ཕྲུ་གུ་ཁོ་རང་ཚོ་སྤྱི་ཚོགས་ཁྲོད་འགྲེང་ཚུགས་ཐུབ་པའི་རྩལ་ནུས་འདོན་ཕྱོགས་ཀྱི་ཐབས་ལམ་མང་བོ་འདུས་ཡོད།
ཡོངས་ཁྱབ་བྱས་ན། ཕ་མ་ཚོས་བུ་ཕྲུག་གི་ཤེས་ཚད་ཡར་རྒྱས་གཏོང་ཆེད། ཁ་བརྡ་འཇམ་པོ་དང་འཛུམ་དམུལ་དྲོན་པོ་སྟོན་ནས་ཕྲུ་གུ་ལ་ཉེ་འཁོར་གྱི་དངོས་པོའི་མིང་དང་མིའི་མིང་། གསལ་བྱེད་ཡི་གེ་དང་། ཨང་ཀི་སྒྲིག་རིམ། ཁ་དོག་དབྱེ་ཚུལ་སོགས་ཁ་དང་ལག་པ་འགུལ་བཞིན་རྩེད་མོའི་ཟོལ་གྱིས་ངོ་སྤྲད་ནས་ཤེས་བྱ་སྦྱོང་རོགས་བཅའ་བ་རེད། རི་མོ་འབྲི་གྲོགས་བྱེད་པ་རེད། ཕ་མས་ཕྲུ་གུར་ཁྱིམ་ཁྲིད་བྱས་པའི་རྒྱུ་མཚན་དེ་ལ་བརྟེན། ཁོ་པ་ཚོ་སློབ་གྲྭར་མ་ཞུགས་པའི་སྔོན་ནས་ཀྱང་ཡི་གེ་འབྲི་ཀློག་གང་འཚམས་ལ་ཐོགས་ཀྱི་མེད་པ་ཡོང་གི་ཡོད། ཡིན་ནའང་། ཕ་མ་ཚོས་རེ་བ་དེ་ལྟ་བུ་འཆར་ཅན་དུ་འགྲུབ་དགོས་བསམ་སྟེ། བྱིས་པ་ལ་ཁྲོ་ཚུལ་བསྟན་ནས་གནོན་ཤུགས་སྤྲོད་རྩ་བ་ཉིད་ནས་ཆོག་གི་མ་རེད།
གསལ་བོ་བཤད་ན། ཕྲུ་གུ་ཁོ་རང་ཚོར་བསླབ་འདོད་དང་རྩེད་འདོད་ཀྱི་མཚར་བློ་ཞིག་མེད་ན་བཙན་པོ་བྱེད་མི་ཉན་ཟེར་བ་དེ་རེད། དེ་བས་རིག་པ་འཚར་བྱེད་ཀྱི་རྩེད་ཆས་(educational toys) མང་བོ་ཉོས་ནས་བྱིས་པ་རང་ལ་དབང་བའི་ཁང་མིག་ནང་རྩེད་ཆས་ཀྱིས་འགེང་ལ་ཁད་ཅིག་བྱེད་ཀྱི་ཡོད། ཕ་མ་ཚོས་ཁྱིམ་དང་སྒོ་གང་ཡིན་ས་ནས་རྩེད་དགོད་ཀྱི་ཚུལ་དུ་ཕྲུ་གུར་ཤེས་བྱ་སྦྱོང་རོགས་བྱེད་པའི་དམིགས་ཡུལ་ནི། ཕྲུ་གུ་ཁོ་རང་ཚོ་སོ་སོར་འཚར་བ་དང་མཉམ་དུ་སྤྱི་ཚོགས་ལ་འབྲེལ་འདྲེས་བྱེད་པར་དངངས་པ་མི་སྐྱེ་བ་དང་། སོ་སོའི་སློབ་སྦྱོང་གི་ལམ་སྐབས་ནས་བག་འཁུམས་ཏེ་མི་སྡོད་པའི་ཞུན་བརྡར་ཐོབ་ཆེད་ཡིན་པས་ཕ་མའམ་ཁྱིམ་གྱི་སློབ་གསོ་ཧ་ཅང་གལ་ཆེན་ལ་བརྩི་བ་རེད།
ཕ་མའི་སློབ་གསོའི་ཟུར་ཞིག་ནི་སློབ་གྲྭའི་ནང་དང་སློབ་ཕྱི། སྒོ་ཕྱི་ཁྱིམ་གང་ཡིན་རུང་། རང་གི་ཡིན་པ་གང་ཞིག་སེར་སྣ་ཆེན་པོ་མི་བྱེད་པར་གཞན་ལ་སྐལ་བཅའ་བ་དང་། ངང་ཐུང་བྱེད་ན་མི་ལེགས་པ་དང་། རྐུབ་སྟེགས་ནས་བརྟན་པོ་འདུག་དགོས་པ་དང་། དྲི་བ་འདྲི་ཕོད་པ་དང་། བསམ་གཞིག་བྱེད་དགོས་པ་དང་། དགེ་རྒན་དང་མི་རྒན་པ་ཚོའི་བསླབ་ཁྲིད་ལ་ཉན་ལྟ་ཡག་པོ་བྱེད་དགོས་པ་དང་། ང་ཡིས་སྒྲུབ་ཐུབ་སྙམ་པའི་བསམ་པ་སྐྱེ་དགོས་པ་སོགས་ཀྱི་བསླབ་བྱ་འཛུམ་མདངས་དང་བསྡོངས་ནས་གཏོང་བ་རེད། ཕ་མ་ཚོས་ཕྲུ་གུ་ལ་དགའ་སྤྲོའི་རྣམ་འགྱུར་དང་བཅས་དྲི་བ་གཏོང་ཞིང་ཁ་བརྡ་གློད་པ་རེད། འགུལ་རིས་བརྙན་འཕྲིན་ལ་ལྟ་བའི་ཉི་མ་འདེམ་ཞིང་དུས་ཚོད་བཟོ་བ་རེད། ཕྲུ་གུའི་སྔུན་ནས་ཕ་མའི་གདོང་པ་འཛུམས་ཀྱིས་ཁེངས་རྒྱུ་དང་སྐད་ཆ་འཇམ་པོ་བཤད་རྒྱུ་ཞེ་དྲག་གལ་ཆེན་པོར་རྩི་ཡི་ཡོད།
དེ་གང་ལགས་ཟེར་ན། ཕ་མས་ཁྲོ་སྐད་ཆེན་པོ་དང་རྣམ་འགྱུར་བཙོག་པོ་སྟོན་པར་བྱས་ན། ཕྲུ་གུའི་སེམས་ཁམས་ལ་འཚེར་སྣང་བསྐྲུན་ནས་དྲི་གཞི་སྣ་ཚོགས་ཀྱིས་གང་བའི་ཕྲུ་གུའི་མཚར་སྣང་གི་སེམས་ཁམས་བདེ་ཐང་ལ་བཀག་རྒྱ་ཐེབས་པའི་ཉེར་ལེན་དུ་འགྱུར་བར་བཤད། དེ་ལྟར་འགྱུར་ན་ནི། ཕྲུ་གུས་ཕ་མ་ལ་དོགས་འཚེར་མེད་པར་དྲི་བ་འདྲི་བའི་སྤོབས་པ་ཞུམ་འགྲོ་ཞིང་། བྱིས་པའི་ཀླད་སྒྲོམ་ཆུང་ཆུང་ནང་ཚོད་ཚོད་དུ་འཚང་ཡོང་བའི་དྲི་གཞི་སྟོང་ཕྲག་མང་བོར་ཚོད་འཛིན་ཐེབས་ཏེ། ཁོ་པ་ཚོའི་རིག་པ་འཚར་སྟངས་ལ་གནོད་པ་འབྱུང་བར་དོགས་པའི་ལྟ་གྲུབ་ཡན་གར་བ་ཞིག་ཨ་རི་བར་ཆགས་ཡོད། ཕ་མ་ནི་ཕྲུ་གྲུ་ཚོའི་བསམ་པའི་འཚར་ལོངས་བརྒྱུད་རིམ་ཁྲོད་ཀྱི་མིག་ལྟོས་བྱེད་ས་འབའ་ཞིག་ཡིན་པས་ཕ་མ་རྣམས་ཕྲུ་གུའི་མདུན་ནས་སྤྲོ་མདོག་ཁ་བོ་དང་ཀུན་སྤྱོད་ལེགས་པོ་ཅན་ཞིག་ཡོད་དགོས་པ་རེད།
གལ་སྲིད་ཕྲུ་གུས་པྲ་ཚག་བྱས་པའམ་ཕ་མའི་འཇམ་བཤད་སློབ་གསོ་ལ་མི་ཉན་པ་ཡིན་ན། ཕ་མ་ན་རེ། ཕྲུ་གུ་པང་ཞིང་དེའི་གདོང་ལ་བལྟས་ནས་ངང་རྒྱུད་རིང་བོས། ཁྱོད་ཀྱིས་ངས་བཤད་པ་ལ་མ་ཉན་པས་ངས་ཁྱོད་ཀྱི་ཨོང་ཤ་ལ་ཐལ་ལྕག་གཞུ་དགོས་ཞེས་ཕྲུ་གུ་ལ་གཤེ་དགོས་པ་དང་གཅར་དགོས་པའི་རྒྱུ་མཚན་གསལ་བོ་བརྗོད་ནས་ལམ་ལ་འཇོག་པ་རེད། དེ་འདྲ་མ་གཏོགས་ཕ་མས་རང་གི་ཁྲོ་བ་མ་ནོན་ནས་གློ་རྡེག་དང་འཇབ་འཛུལ་གྱིས་ཕྲུ་གུ་ལ་གཞུ་རྐྱང་བྱེད་པ་མ་རེད། དེ་ལྟར་གཞུ་ན་ཁྲིམས་ནས་ཀྱང་ཆོག་པ་མ་རེད།
ཡུལ་ལུང་འདིའི་བཤད་རྒྱུན་ཞིག་ལ། སློབ་ལོ་མ་རན་པའི་བྱིས་པར་མཚོན་ན། ངལ་སྣང་མེད་པའི་ཕ་མའི་སྤྲོ་ཉམས་དང་རིགས་སྒྲེ་མིན་པའི་རི་མོའི་དེབ་ཚོགས་དང་། འགུལ་མེད་དང་འགུལ་བཅས་ཀྱི་རྩེད་ཆས་འདྲ་མིན་ནི་ཕྲུ་གུ་དམར་འབྱར་ནས་སློབ་གྲྭར་ཞུགས་རེག་དབར་གྱི་རྩ་ཆེན་སློབ་ཐུན་རེ་རེ་ཡིན་ཟེར་སྲོལ་ཡོད། བྱིས་པ་སློབ་གྲྭར་ཞུགས་པའི་ཕྱིན་ནས་བཟུང་། ཕ་མ་ཚོས་སྔོན་ལྟར་ཕྲུ་གུར་རང་ཁྱིམ་ནས་བཀོད་སྒྲིག་བྱེད་པའི་འཆར་ཅན་གྱི་ལས་གཞི་རྣམས་ཉུང་ངུར་གཏོང་བ་རེད།
དེའི་ཚབ་ལ་སློབ་གྲྭས་བཞག་པའི་ལས་བྱའི་ཐོག་བློ་རྩེ་ཡག་པོ་སྒྲིམ་དོ་བའི་སླད་དུ། ཕྲུ་གུ་སོ་སོ་རང་ལ་དབང་བའི་ཁང་མིག་གཙང་མར་འཇོག་པ་དང་། དུས་ཚོད་ལྷིང་འཇགས་སྤྲོད་པ་བཅས་བསམ་བློ་གཏོང་སའི་རང་དབང་གི་གླིང་ཡངས་པོ་གང་འཚམ་ཞིག་མཁོ་འདོན་བྱེད་པ་རེད། གལ་སྲིད་སློབ་གྲྭས་ཕ་མ་ལ་དམིགས་བསལ་སྦྱང་གཞི་རེ་འགའི་ཐོགས་བྱིས་པར་གསལ་ཁ་འདོན་དགོས་ཟེར་ན་མ་གཏོགས་ཕ་མའི་ཁ་དེ་ཙམ་མི་ཐོན། ༼འདི་ཁྱིམ་སྦྱོང་བྱེད་སྐབས་གཅིག་བུར་གོ་དགོས།༽ དེ་ནི་སྤྱིའི་ཆ་ནས་བྱིས་པའི་སློབ་སྦྱོང་གི་བྱང་ཚད་ག་འདྲ་ཡོད་མིན་སློབ་གྲྭ་དང་དགེ་རྒན་གྱི་ལག་ན་ཡོད་པས་རེད་མོད་། འོན་ཀྱང་ཕ་མ་རྣམས་ཀྱིས་རང་གི་བུ་ཕྲུག་གིས་ཅི་ཞིག་སྦྱང་ཡོད་པ་དང་། གང་ཕྱོགས་ན་མིག་སྔུན་གྱི་སྦྱོང་ཚན་ལ་སྟོང་ཆ་ཤོར་གྱི་ཡོད་མེད་ཐད་བློ་མིག་རྒྱུན་དུ་སྐོར་གྱི་ཡོད་པ་རེད།
ཕྲུ་གུ་སློབ་གྲྭར་ཞུགས་ཕྱིན་པ་ནས་ཕ་མ་ཚོར་ཧུར་བསྐྱེད་སློབ་གསོའི་འགན་འཁྲི་འདི་འདྲ་ཞིག་ཡོད་དེ། ཁྱོད་སྤྱི་ཚོགས་ཀྱི་འབྲེལ་འདྲེས་ཆེན་པོར་སིམ་དགོས་ཤིང་འཛམ་གླིང་གི་ཤེས་ཡོན་མི་སྣར་འགྱུར་དགོས་པས་ཁྱིམ་ནས་ཀྱང་དཔེ་དེབ་སྣ་མང་ཀློག་ཅིང་། རྩེད་མོ་འདྲ་མིན་རྩེ་བ། ལས་ཀ་གང་ཐུབ་བྱ་བ། བསམ་བློ་རང་གིས་གཏོང་བ་དགོས་ཞེས་ཀུ་རེ་དང་གདོང་འཛུམ་སྦྲགས་ནས་སྐུལ་ལྕགས་གཏོང་བ་རེད། གཟབ་ནན་དང་ཨ་མཚར་བསྲེས་ནས་གཅེས་ཉམས་སྟོན་པ་རེད། རང་དབང་དང་རྩེད་ཆས་སྤྲོད་ནས་རྒོད་ལ་ཡང་མངག་པ་རེད། མ་མཐའ་ཡང་རང་གི་འཚོ་བ་རང་གིས་འཁྱོང་བའི་མི་ཞིག་བྱ་དགོས་ཞེས་བཤད་པ་རེད། མ་ཟད་བྱིས་པའི་ཀློག་དེབ་ཁང་སོགས་ལ་དུས་རྒྱུན་དུ་འཁྱིད་པའམ་ཡང་ན་རང་འགུལ་སྒོས་དཔེ་མཛོད་ཁང་ལ་འགྲོ་དགོས་པའི་དྲན་སྐུལ་ནམ་དུས་ཡང་བྱེད་པ་རེད།
བྱིས་པ་ལ་བྱིས་པའི་རྩིས་ཐང་ཧ་ལས་པ་སྦྱིན་ནི་རེད། མྱི་གྲས་ལ་ཡ་མཚན་འཇོག་ནི་རེད། ཕྲུ་གུའི་ཁམས་དང་བསྟུན་ནས། བདུན་མཇུག་རེ་རེར་སློབ་ཕྱིའི་བྱ་འགུལ་སྣ་ཁ་སྟེ། བྱིས་པའི་ལུས་རྩལ་རྩེད་ཐང་དང་། ཞབས་བྲོ་གླིང་ག་དང་། གཏམ་རྩེད་ཤོད་སྡེ་དང་། རོལ་མོ་འཁྲོལ་ཚོགས་དང་། འགྲེམ་སྟོན་ཁང་པ་དང་། དཔེ་མཛོད་ར་སྐོར་དང་། རི་མོ་སྦྱོང་ཐང་སོགས་ལ་ཁྲིད་ནས་སྤྱི་ཚོགས་གོམས་བྱང་ལ་སྦྱོར་བརྡར་སྤྲོད་ཅིང་ཕྲུ་གུའི་བསམ་བློའི་མངའ་ཐང་རྒྱ་བསྐྱེད་པར། དྲི་བ་འདྲི་བ། སྙིང་ཕུར་བརྡབ་པ་བཅས་བྱས་ནས་ཤེས་བྱ་ལ་འཇུག་རོགས་བཅའ་བ་རེད།
ཨ་རིའི་ཕ་མ་ཚོས། རང་གི་ཕྲུ་གུ་རྣམས་གསར་གཏོད་ཀྱི་བསམ་བློ་བསྣམ་སྟེ་ལག་ཆགས་ན་འདོད་པ་ལས་གཞན་བརྟེན་གྱི་བྲན་གཤིས་སྒོས་ཏེ་འཚར་ལོངས་འབྱུང་བར་དགའ་བོ་ཡོད་པ་མ་རེད། ཨ་རི་བའི་གཞོན་ནུ་ཚོགས་ཀྱིས་སློབ་གྲྭའི་ནང་གི་སྦྱོང་ཚན་རྣམས་ལ་སློབ་གྲྭའི་ཁོར་ཡུག་ན་ཡོད་པའི་སྐབས་སུ་ནན་མོ་བལྟ་དགོས་པའི་སྒྲིག་སྲོལ་ཞིག་ཡོད། སློབ་གྲྭ་གྲོལ་ནས་ཕྱི་ལ་ཐོན་རྗེས་སློབ་གྲྭའི་སྦྱོང་ཚན་མིན་པའི་དཔེ་དེབ་གཞན་པ་བླུ་བ་དང་གཡར་བ་སོགས་བྱས་ནས་བལྟ་ཀློག་བྱེད་པའི་ནམ་ཚ་དགོས་པ་དང་། སོ་སོ་གང་ལ་དགའ་མོས་ཡོད་པ་གཞིར་བྱས་བྱ་འགུལ་གཞན་པར་མཉམ་ཞུགས་བྱེད་པའི་གོ་སྐབས་དམ་འཛིན་བྱེད་པའི་ལུགས་སྲོལ་ཡོད།
དེར་བརྟེན་དགེ་རྒན་རྣམ་པས་ཀྱང་། སློབ་ཕྱི་ནས་གཞོན་ནུ་སློབ་མ་ཚོར་རང་དབང་གི་དུས་ཚོད་དང་གླིང་ཡངས་ཀྱི་ནམ་མཁའ་ཡོད་པར་བྱ་ཆེད་ཁྱིམ་སྦྱོང་དང་ལས་བྱ་མང་བོ་སྤྲོད་པར་མི་བྱ། དུས་སྐབས་དེ་འདྲར་སླེབས་དུས། གཞོན་ནུའི་ཚོགས་ལའང་སྤྱིའི་ཆ་ནས། རང་གི་བསམ་པ་ནང་བཞིན་གྱི་དུས་ཚོད་བཀོད་སྒྲིག་གི་རང་སྟོབས་དང་བྱ་བའི་ལེགས་ཉེས་འབྱེད་བྱེད་ཀྱི་མིག་ཟུང་ཐོགས་ཡོད་པས། རང་གིས་ཅི་ཞིག་སྒྲུབ་པའི་ཕྱོགས་ལ་ཏན་ཏན་རང་གཤིས་ཆགས་ཤིང་བསམ་བློ་སྨིན་ནས་ཡོད་པ་རེད།
རྒྱུན་སྲོལ་ལྟར་ན་གཞོན་ནུ་རྣམས་ཚོ་ཆུང་དང་གྲོགས་པོ་མཉམ་དུ་ཡུལ་ལུང་ཁྱིམ་མཚེས་ས་ཁུལ་སོགས་སུ་རིག་གནས་ལྗོངས་སྐོར་ལ་འགྲོ་བ་རེད། རི་ཁ་མཚོ་འགྲམ་ལ་འཆམ་པ་རེད། གློག་བརྙན་ཁང་དང་ལུས་རྩལ་ཁང་ལ་འགྲོ་བ་རེད། སྐབས་འདི་འདྲའི་དུས་ན། ཕ་མ་རྣམས་ཀྱིས་གྲོས་ཀྱི་ཚུལ་དུ་ཁ་བརྡ་གློད་ཅིང་བསམ་ཚུལ་འདོན་རེས་བྱེད།
དཔེར་ན་ངས་བསམ་ན་འདི་བྱས་ན་དང་དེ་སྒྲུབ་ན་ཡག་པོ་ཡོད་ཀི་འདོད། འོན་ཀྱང་ཁྱོད་རང་གིས་བལྟས་ན་ག་རེ་བསམ་ཡོད། གཙོ་བོ་རང་གིས་བསམ་བློ་ཐོངས། དགའ་ཕྱོགས་འདེམས། གྲ་སྒྲིག་བྱོས། ཚོད་བལྟ་བགྱིས། ལག་ཏུ་ཕོབས་སོགས་ཟེར་ནས་སྤོབས་པ་ཁ་སྣོན་གྱི་ཚུལ་དུ་སྐུལ་འདེད་བྱེད་ཅིང་རང་དབང་གི་བསམ་བློ་གཏོང་བའི་བར་སྟོང་བུ་ཕྲུག་ལ་བསྐྲུན་དཔེ་བ་རེད། དེ་མ་གཏོགས་ཕ་མས་ངས་བཤད་པ་མི་འཕྱུག་དང་། ཁྱོད་ངའི་བུ་ཕྲུག་ཡིན་པས་ངའི་ཁར་མ་ཉན་ན་མི་ཆོག་སོགས་ཟེར་ནས་དབང་ཆ་ལོག་སྤྱོད་དང་། དྲག་ཤུལ་སློབ་གསོ། བཙན་གཅུན་ལམ་སྟོན་བྱེད་པ་མ་རེད།
མི་བུ་ཆུང་ཆུང་ཡིན་དུས་ནས་སོ་སོ་རང་གི་ནུས་པ་དང་བསམ་བློ་བཀོལ་སྤྱོད་གྱིས་ལས་ཀ་བཅའ་སྟངས། འགྲོགས་འདྲེས་བྱེད་སྟངས། སྒེར་ཚུགས་རང་གཤིས། ཤེས་ཡོན་ལྟ་གྲུབ་སོགས་ཚུགས་ཐུབ་པོ་ཡོང་བའི་ཕྱིར་དུ། ཨ་རིའི་གཞུང་ཁྲིམས་རྒྱུན་ཤེས་ནའང་བུ་ཕྲུག་ལ་ཕ་མས་བཙན་བཀའ་གཏོང་ཞིང་དབང་གཅུན་བྱེད་མི་ཆོག་པ་གཏན་ལ་ཕབ་བཟོ་བྱས་ཡོད་པ་རེད། སྤྱི་དམངས་སོ་སོའི་ངོས་ནས་ཀྱང་གཞུང་ཁྲིམས་དང་རྒྱུན་ཤེས་དེ་སོགས་སྤྱི་ལྡོག་ནས་ཤ་རྩ་རུས་རྩར་འཇགས་ཤིང་འཚོ་བར་གོམས་ནས་ཡོད་པ་ཞིག་རེད་དོ།།
༢༠༡༥ ༨ ༡༡
ཐུགས་རྗེ་ཆེ། ཕན་ཐོགས་ཡོད་པའི་ཆེད་རྩོམ་རྩ་ཆེན་ཞིག་བྲིས་འདུག ཡང་ནས་ཡང་དུ་འདིའི་རིགས་འབྲི་རོགས།
ཨ་རིའི་ཡོད་ཚད་ཀྱི་རྗེས་སུ་མ་རྒྱུགས། ཨ་རི་བས་ཕྲུ་གུར་སློབ་གསོ་དེ་འདྲ་ཡག་པོ་རྒྱག་གིན་ཡོད་ན་ཆེན་པོ་ཆགས་དུས་བྱ་ཁ་ཏའི་ཕྲུ་གུ་གསོ་བ་ནང་བཞིན་ཤོག་ཐོཔ་་དུས་་ཕ་མ་བྱུགས་ནས་འགྲོ་བ་ཇི་ལྟཅི་ཡིན། ཕ་མས་ཤེད་བཤད་བཏང་་ན་ཕྲུ་གུའི་ཀླད་པ་པ་གནོད་ཀྱི་ཡོད་ན་ཤར་ཕྱོགས་པའི་མི་ཡོད་ཚད་ཀླད་པ་མཚར་ལོངས་ཡག་པོ་བྱུང་ཡོད་པ་གཙིག་ཀྱང་མེད་དམ། ད་དུང་དེ་ལས་ཟློག་ནས་ཤར་ཕྱོགས་པའི་སེམས་་ལ་ཞི་བདེ་དང་ཕ་མ་ལ་བརྩི་མཐོང་ཆེ་བ་ཡོད་པ་མིན་ནམ། ཤེས་ཚད་ནི་ནུབ་ཕྱོགས་ལས་ཤར་ཕྱོགས་པ་ལྡབ་འགྱུར་གྱི་ཆེ་བ་ཡོད་པ་གཞི་ནས་གསེར་ས་འོག་ན་འོད་གནམ་འཁར་འཕྲོ་འགོ་ཚུགས་ཚར་བ་རེད།
ངོ་མ་རེད། འཛམ་གླིང་སྟོབས་ཆེན་རྒྱལ་ཁབ་ཁག་གི་ནང་མ་འོངས་སོན་རྩ་དེ་ལྟར་གསོ་སྐྱོང་བྱེད་ཀྱི་འདུག