སྨྲ་བའི་སེང་ཆེན་ཞིག་ནུབ་རིར་ཡོལ་བ།

བསང་ཆུ་འབྲུག་བྷེ།
___བོད་ཀྱི་ལོ་རྒྱུས་སྨྲ་བའི་མཁས་པ་ཨ་ཁུ་རྔོག་རྒྱུད་འཇམ་དབྱངས་འཕྲིན་ལས་ཚང་སྐུ་གཤེགས་པར།

 
དེ་རིང་ནས་བརྩིས་པའི་ལོ་ངོ་བཅུ་ཕྲག་གཅིག་གི་ཡར་སྔོན་ཞིག་ལ། ཕྲན་ཁོ་བོ་བོད་ཁམས་འགྲུལ་བཞུད་ལ་ཉུལ་པའི་སྐལ་བ་ལྡན་ཞིང་དུས་དེར་བོད་ནང་གི་སྐྱེས་བུ་མང་བོ་ཞིག་དང་ལྷན་དུ་མཇལ་འཛོམས་ཀྱི་གོ་སྐབས་བཟང་པོ་རེ་ཐོབ་མྱོང་བ་ལས། བགོ་སྐལ་དེ་དག་གི་ཁྲོད་ནས་བོད་ཀྱི་ལོ་རྒྱུས་སྨྲ་བ་རྔོག་རྒྱུད་འཇམ་དབྱངས་འཕྲིན་ལས་ཚང་ནི་ནམ་ཡང་ངའི་སེམས་ཀྱི་རྩིག་ལྡེབས་ངོས་སུ་དྲིན་ཆེན་དུ་ཚོར་དགོས་པའི་མི་སྣ་རླབས་ཆེན་ཞིག་ཡིན།

སྔོན་མར་ངས་རྒན་རྔོག་རྒྱུད་འཇམ་དབྱངས་འཕྲིན་ལས་ཚང་ཁོང་ངོ་ཙམ་ཡང་མི་ཤེས་མོད། འོན་ཀྱང་རྒན་ཧོར་གཙང་འཇིགས་མེད་ཀྱིས་ངོ་སྤྲོད་བྱས་པ་བཞིན་ཉིན་ཞིག་བླ་བྲང་བཀྲ་ཤིས་འཁྱིལ་གྱི་ཁོང་གི་གཟིམ་ཤག་ཏུ་མཇལ་བར་བཅར། སྐབས་དེར་ཁོང་ཚང་གིས་ཆེ་འདོད་དྲག་འདོད་དང་མི་ཆེན་མཁས་ཆེན་ཚོའི་ངང་ཚུལ་ལས་རིང་ལས་བརྒལ་ཏེ་ཕན་ཚུན་འཚམས་འདྲིའི་ནང་མོ་ལྷུག་པོ་གནང་བ་དང་། བློ་ཁོག་ཡངས་པོ་དང་སྙིང་སྟོབས་ཆེན་པོས་བཀའ་མོལ་ལམ་སྟོན་རྩ་ཆེན་སྨན་ངེས་ཡང་གནང་བྱུང་།

དེ་ནས་ཕྲན་རང་རང་གི་ལས་དོན་དང་ཁ་བརྡ་ཆེད་ཁོང་ཚང་ལ་ཐེངས་མང་བོ་བཅར་མྱོང་བ་དང་། ཨ་ཁུ་རྔོག་རྒྱུད་འཇམ་དབྱངས་འཕྲིན་ལས་ཚང་ནི་འདྲིས་ཀྱིན་འདྲིས་ཀྱིན་ཞིབ་བདེ་བ་དང་ཡོན་ཏན་གྱི་ཁྱད་ཆོས་ཧ་ཅང་མང་བོ་ཞིག་མཐོང་ངེས་པའི་སྐྱེས་བུ་ཞིག་ཡིན།
ཁོང་གིས་མདོ་སྨད་བླ་བྲང་བཀྲ་ཤིས་འཁྱིལ་དུ་སྐྱ་སེར་སློབ་བུ་མང་བོར་ཆོས་རིག་དང་ལོ་རྒྱུས་དཔེ་ཁྲིད་ཡུན་དུ་གནང་ནས་རིག་གནས་ཡར་དར་གྱི་ལག་རྗེས་རྨད་དུ་བྱུང་བ་བཞག་ཡོད་ལ། ལྷག་ཏུ་བོད་མི་རིགས་ཀྱི་སློབ་གསོའི་ལས་དོན་ཐད་ཐུགས་ཁུར་བརྩེ་སེམས་ཀྱིས་སྒོ་ཀུན་བསླངས་ཏེ་བསམ་བློ་ཡང་དག་གིས་ལག་ལེན་དངོས་ཀྱི་བྱ་གཞག་ཀྱང་མང་བོ་བསྒྲུབས་ཡོད།

ཁོང་ཚང་གིས་སྐྱ་ཟད་སྔོ་སྡུག་གི་དུས་འདིར་བོད་ཀྱི་ལོ་རྒྱུས་ཀྱི་ནང་སྙིང་རིན་ཐང་བྲལ་བ་མང་བོ་ཞིག་ཁོང་དུ་ཆུབ་པ་སྟེ། ཁོང་གིས་བོད་ཁུལ་གྱི་ཚོ་བ་ཁག་ལ་རྒྱ་ནག་མན་ཇི་གཞུང་དང་། དེའི་རྗེས་མ་པོ་ཧྥང་། ད་ལྟའི་གུང་ཁྲན་སྲིད་གཞུང་སོགས་ཀྱིས་ལོ་རྒྱུས་རིམ་པའི་ནང་བཅད་བགོས་བྱས་ནས་ཆབ་སྲིད་ཀྱི་ཐོག་ནས་བོད་མིའི་གོང་བུའི་ནུས་པ་གཏོར་བཤིག་དང་ནུས་མེད་གཏོང་འཆར་གྱི་བསམ་བློའི་སྔ་རིམ་བཞིན་ཡོད་པའི་འཚོལ་ཞིབ་འབྲས་རྟགས་ཀྱི་རྩོམ་ཡིག་མང་དུ་མཆིས་པ་དང་། དཔེར་ན་ད་ལྟའི་རྒྱ་ནག་གཞུང་གིས་སྲིད་འཛིན་ས་ཁོངས་ཀྱི་བཅད་དགོས་འོག་གི་ཀན་སུའུ་ཞིང་ཆེན་ཟེར་བའི་ཀན་ལྷོ་བོད་རིགས་རང་སྐྱོང་ཁུལ་ལ། ཀན་ལྷོ་ལས་མདོ་ལྷོ་བོད་རིགས་ས་ཁུལ་ཞེས་འདོགས་དགོས་པའི་བློ་འདོན་དང་གསར་གཏོད་པ་དེ་ཡང་ཁོ་ཚང་ཡིན། གཞན་ད་ལྟ་བོད་ཕྱི་ནང་གི་སྐྱེས་པོ་ཚང་མའི་ཁ་འདོན་དུ་བཏོན་བཞིན་པའི་ཞལ་འདོན་ཕྱོགས་བསྒྲིགས་ཞེས་པ་དེ་ཐེངས་དང་བོ་ཁོང་ཚང་གིས་བློ་འདོན་གནང་ནས་བོད་ཁམས་ཡོངས་ལ་གྲགས་པར་སྐད།

ཁོང་ནི་གཞན་ཕན་གྱི་ལྷག་བསམ་ཀུན་ནས་ཕྱུག་པའི་སྐྱེས་བུ་ཞིག་ཡིན་རྐྱེན། བོད་ཀྱི་མཁས་པ་འགའ་ལྟར་བདག་འཛིན་ལ་དགའ་ནས་ལོ་རྒྱུས་རྒྱུ་ཆ་དང་དཔེ་རྙིང་དཀོན་པོ་རེ་ཡོད་ཚེ་ཡི་དྭགས་བཞིན་རང་ཉིད་ལ་རྔམ་ནས་ནས་མི་འདུག་པར་རང་ཉིད་ལ་གང་ཡོད་པའི་རྒྱུ་ཆ་དང་ཡོན་ཏན་དེ་རྣམས་ཕྱི་རབས་པར་སྤྲོད་འདོད་ཀྱི་ཀུན་སློང་རྨང་ནས་ཡོད་མཁན་ཞིག་ཡིན། ཉིན་ཞིག་བླ་བྲང་བཀྲ་ཤིས་འཁྱིལ་དུ་སློབ་གཉེར་གནང་བཞིན་པའི་དཔལ་འབར་སྤྲུལ་སྐུ་བསྟན་འཛིན་ངག་དབང་རྒྱལ་མཚན་མཆོག་གིས<<གངས་ལྗོངས་ཀུན་གསལ་མེ་ལོང་།>>ཞེས་པའི་ལོ་རྒྱུས་དེབ་ཅིག་བརྩམས་ཡོད་པར་ཁོང་ཚང་གིས་དགྱེས་ཚོར་ཆེན་པོས་ལམ་སྟོན་དང་བསྔགས་བརྗོད་ཚད་མེད་གནང་བ་དང་། ཕྱིས་སུ་ཡང་བོད་ཀྱི་སྤྲུལ་སྐུ་ཆུང་ཆུང་ཚོས་བོད་ཀྱི་ལོ་རྒྱུས་ཐད་ལ་སློབ་གཉེར་གནང་ན་དགེ་མཚན་ཆེ་བའི་བཀའ་མོལ་ཟབ་མོ་གནང་བ་དངོས་སུ་གོ་ཐོས་བྱུང་།

ཡང་མཚམས་རེར་ཁོང་གིས་རྩོམ་བྲིས་གནང་བའི་དཔྱད་རྩོམ་དུས་དེབ་ལ་འཁོད་པ་དེ་དག་ཁོང་རང་གིས་ཚོར་ཤུགས་དྲག་པོས་བཀླགས་ཏེ་ང་ཚོར་ཉན་གི་བཅུག་པ་དང་། ཁོང་གིས་བྲིས་གནང་བ་དེ་དག་གི་རྒྱབ་ལྗོངས་རྣམས་འགྲེལ་བཤད་ཟབ་མོ་རེ་ཡང་རྒྱག་ངེས། ཉིན་ཞིག་ལ་མདོ་སྨད་རྨ་ཆུ་ཡུལ་གྱི་དུས་དེབ་<<རིག་གནས་ཡར་སྤེལ>>ཟེར་བ་ཞིག་གི་ནང་དུ་ཁོང་ཚང་གིས་བོད་ཡུལ་དུ་སོག་པོ་རྣམས་གཞིས་ཆགས་ཚུལ་གྱི་ལོ་རྒྱུས་དཔྱད་རྩོམ་རིང་མོ་ཞིག་བྲིས་འདུག་པ་དེ་ཉིན་གུང་ཁོང་ཚང་གི་གཟིམ་ཤག་གི་འཁྱམ་རྭ་ནས་ངེད་གཉིས་ཀྱི་གསོལ་ཚིགས་མཉམ་དུ་རོལ་སྐབས་ཤིག་ལ། ཁོང་ཚང་གིས་དཔྱད་རྩོམ་དེ་ཆ་ཚང་བཀླགས་ཤིང་རྒྱབ་ལྗོངས་ཀྱི་འགྲེལ་བཤད་མང་བོ་ཞིག་ང་ལ་བརྒྱབ་བྱུང་།
དུས་དེར་ཁོང་ཚང་གིས་སོག་པོ་བོད་ལ་གཞིས་ཆགས་ཚུལ་གྱི་དཔྱད་རྩོམ་འདི་གནད་འགག་ཙམ་དུ་མ་ཟད། ད་དུང་ཁོང་གིས་ཁ་ཆེ་དག་བོད་ལ་གཞིས་ཆགས་ཚུལ་གྱི་དཔྱད་རྩོམ་ཡག་པོ་ཞིག་འབྲི་ཨེ་ཐོབ་ལ་སྟ་གོན་གནང་གི་ཡོད་ཟེར། དེ་ཙམ་མ་ཟད་ཁོང་གིས་གྲགས་ཆེན་ལས་གྲགས་ཆུང་བའི་བོད་ཀྱི་ས་གནས་ལོ་རྒྱུས་མང་བོར་འཚོལ་ཞིབ་དང་དོ་སྣང་དཔྱད་ཞིབ་ཤིན་ཏུ་ཞིབ་ཚགས་གནང་ནས་དེའི་ཐད་ལོ་རྒྱུས་རིག་པའི་ལྟ་བུའི་ཐོག་ནས་དཔྱད་དེ་བཏོན་པའི་ལྟ་ཚུལ་གང་མང་ནི་ཕྱི་རབས་པའི་བསམ་བློའི་བློ་འབྱེད་ཐད་ཕན་ཐོགས་བླ་མེད་བྱུང་གི་ཡོད་སྙམ།

གཞན་ཁོང་ཚང་གིས་བླ་བྲང་བཀྲ་ཤིས་འཁྱིལ་དུ་རིག་གནས་སློབ་ཁྲིད་ཀྱི་དཀའ་བ་སྤྱད་དེ་སློབ་རྒྱུན་མང་བོ་སྐྱེད་བསྲིངས་བྱས་པ་དང་། བོད་ཁུལ་གྱི་དུས་དེབ་དང་ཚགས་པར་ཁག་ཏུ་སྙན་རྩོམ་དང་དཔྱད་རྩོམ་མང་བོ་སྤེལ་ནས་རིག་གནས་ཡར་དར་གྱི་མཛད་རྗེས་མངོན་དུ་མཐོང་བ་གནང་པའི་བཀའ་དྲིན་ནི་དྲན་འོས་པ་ཞིག་ཡིན།

བོད་ནས་ཕྲན་ལ་རྩ་ཆེན་ཡིག་ཆ་མཁོ་འདོན་དང་། ནང་མོལ་ལམ་སྟོན་ཟབ་མོ། དངོས་ཤུགས་གང་རུང་ནས་རྒྱབ་སྐྱོར་བླ་མེད་གནང་བའི་བཀའ་དྲིན་དེ་ངས་མི་ཚེ་འདིར་ནམ་ཡང་བརྗེད་ཐབས་མེད།
ཉིན་ཞིག་ཕྲན་ཁོ་བོ་གློ་བུར་དུ་ཕ་ཡུལ་དང་གྱེས་ཁ་འཇོག་པའི་མཚན་མོ་ཞིག་ལ་ཨ་ཁུ་རྔོག་རྒྱུད་འཇམ་དབྱངས་འཕྲིན་ལས་ཚང་ལ་གྱེས་ཁའི་ཐོན་ཕྱག་བྱས་པར་བཅར། དུས་དེར་ཁོང་ཚང་གིས་དགོང་ཟས་གྲ་རྒྱས་པོ་ཞིག་གྲ་སྒྲིག་གནང་ཡོད་པ་མ་ཟད། སྒོ་ཐོན་ཁར་ཁོང་ཚང་གཟིམ་སྒོའི་ཕྱི་ལ་བུད་ནས་ང་ལ་ཁ་དོག་དཀར་བོ་ཞིག་འཐེན་བཞིན་ཕན་ཚུན་གྱེས་མཚམས་འཇོག་དུས་ཀྱི་ཡིད་སེམས་སྐྱོ་ལྷང་ལྷང་གི་ཚོར་བ་དང་མིག་ཆུ་དེ་དུས་ནམ་ཡང་བརྗེད་དེ་བས་ཐབས་བྲལ།

དེ་ནི་ངེད་གཉིས་ཀྱི་མཐའ་མའི་གྱེས་མཚམས་ཞིག་ཡིན་པ་དྲན་མ་མྱོང་། ཕྲན་རང་ཕྱི་ཡུལ་དུ་ཡོང་ནས་བོད་ནང་དུ་དམ་པ་གང་གི་མཛད་འཕྲིན་དང་བདེ་འཇགས་ལྟ་བུའི་ཕྱིར་ཁ་པར་ཞིག་ཀྱང་གཏོང་ལོང་མེད་པར་དུས་འདིར་ཁོང་གློ་བུར་དུ་སྐུ་གཤེགས་པའི་གནས་ཚུལ་མི་སྙན་པ་དེ་ཐོས་འཕྲལ་ཕངས་སེམས་དང་འཁང་ར་མི་མནོན་པ་ཞིག་ལས་གཞན་ཅི་ཞིག་ཨང་།

ཉེ་བའི་འཆར་ཟླའི་ནང་དུ་བོད་ཀྱི་ལོ་རྒྱུས་སྨྲ་བའི་མཁས་པ་རྔོག་རྒྱུད་འཇམ་དབྱངས་འཕྲིན་ལས་ཁོང་ཚང་（2015.6.2）<<བོད་ཟླ་4 ཚེས་15 >>དང་། བོད་ཀྱི་ཤེར་རྟོགས་རིག་པ་སྨྲ་བ་འབྲོང་བུ་ཚེ་རིང་རྡོ་རྗེ།（2015.6.18) བོད་ཀྱི་ལོ་རྒྱུས་རིག་པའི་མཁས་པ་གུ་གེ་ཚེ་རིང་རྒྱལ་བོ་(2015.6.29)བཅས་གློ་བུར་རེ་སྐུ་གཤེགས་པའི་སྐྱོ་གར་འདི་དག་ནི་བོད་ཀྱི་ཤེས་རིག་ངོས་ནས་ལྟོས་ཚེ་ཧ་ཅང་གྱོན་གུན་དང་རྨ་ཁ་སུབ་ཐབས་བྲལ་བ་ཞིག་ཡིན་པ་སྨྲོས་ཅི་ལ་དགོས་སོ།

བསང་ཆུ་འབྲུག་བྷེ་འབོད་པས། 2015.7.14ཉིན་ཨོ་སི་ཁྲི་ལི་ཡ་ནས་བྲིས།