དུར་བྱང་།
སྐུ་ཞབས་སེང་རྡོར་ཟེར་བ་དེ་བོད་ཡིག་གིས་རྩོམ་འབྲི་མཁན་ཞིག་རེད། ཕྲན་ཁོམ་སྐབས་དང་བསྟུན་ནས་སེང་རྡོར་གྱི་བྲིས་རྩོམ་ལག་ཏུ་ཆུད་པ་དང་མིག་ཏུ་ཐོགས་པ་ཀུན་པོར་ཀློག་བཞིན་ཡོད། ཕལ་མོ་ཆེ་དེབ་ཏུ་བྱས་པ་དག་ལས་བཀླགས་པ་དང་། འབེལ་བོ་ཞིག་དྲ་ཐོག་ནས་བཀླགས་པ་ཡིན། ཕྲན་པས་བཀླགས་ཤིང་མྱངས་པའི་སེང་རྡོར་གྱི་རྩོམ་ཡིག་ཡིན་ནོ་ཅོག་སྙན་པ་ལ་ཚོད་ཅིག་མེད། ཞིབ་ཕྲ་བྱས་ནའང་། «གྲུ་ཟུར་གསལ་སྒྲིབ»ཀྱི་རྗེས་སུ་བྲིས་པའི་རྩོམ་ཡིག་དག་གཅིག་ལས་གཅིག་སྙན་པ་ལྟ་བུ་བྱུང་། ཡིན་རྒྱུ་ནི། སེང་རྡོར་གྱི་རྩོམ་ཡིག་འབེལ་བོ་ཞིག་འདྲ་འདྲའི་ནང་ནས་མ་འདྲ་བ་ཞིག་ཆགས་པ་དེ་ཡིས་ཏན་ཏན་ཡིན་སྲིད།
ངེས་དགོས་པ་ནི། ང་སེང་རྡོར་གྱི་རྩོམ་རྩལ་ལ་ཧང་སང་ཞིང་ཧོན་འཐོར་བ་ཡིན། རྒྱུ་མཚན་ཤིན་ཏུ་གསལ། སྐུ་ཞབས་སེང་རྡོར་གྱི་རྩོམ་མམ་རྩོམ་ལ་གཞན་ལས་འཕགས་པའི་ཁྱད་ཆོས་གསུམ་ཡོད་པས་ཡིན།
1. དྭངས་པ།
དྭངས་པ་ཟེར་ཡ་ནི་ནག་ནོག་གི་དྲི་མས་མ་སྦགས་པའི་གསལ་ཞིང་གསལ་བའི་ཆ་དེར་འབོད་པ་ཡིན། དྭངས་ལ་དྭངས་པའི་ཆུ་བོ་ལས་གཙང་ཞིང་གཙང་བའི་རྡེའུ་མངོན་པ་ལྟ་བུར་གོ་བ་ཡིན། བོད་ཀྱི་སྙན་ངག་གི་མཆོག་དང་ཕུལ་དང་རབ་ཏུ་འབོད་པ་ཞང་ཞུང་བས་བྱས་པའི«རཱ་མ་ཎའི་རྟོགས་བརྗོད།» སྒིས་སྟེང་གིས་བྱས་པའི«ཕོ་ཉ་གཞོན་ནུ་དོན་གྲུབ»ལྟ་བུའི་ཚིག་གིས་སྤྲས་པ་དང་སྤུད་པར་གཙིགས་སུ་འཛིན་པ་མིན། ད་དུང་། “ཚིག་གི་ལོ་མས་དོན་གྱིས་གོ་བ་བསྒྲིབས།།” ཏག་ཏག་དེའི་ལྡོག་ཕྱོགས་ལ་ཟེར་བ་ཡིན།
2. འཕྲོད་པ།
འཕྲོད་པ་ནི་ཚིག་རྐང་གི་ལྷུ་ལག་བསྒྲིགས་པ་ལ་ཟེར་བ་མིན། བསྒྲིགས་ནས་འགྲིག་པ་དང་། འགྲིག་ནས་འཕྲོད་པར་གོ་དགོས་ཡོད། ལྟོས་དང་། སེང་རྡོར་གྱིས་ཕྲེང་དུ་བརྒྱུས་པའི་ཚིག་རྐང་རེ་རེར་བསྒྲིགས་པའམ་བཙུར་བའི་རྣམ་པ་མི་མངོན་ལ། འགྲིག་པ་དང་བཞུར་བའི་ཁྱད་ཆོས་མངའ་བ་ཡིན། སེང་རྡོར་ལ་ཆ་མཚོན་ན། རྒྱན་ཚིག་དང་གྲོང་ཚིག་གི་བྱེ་བྲག་མེད་པར་ཕྲད་དང་རྣམ་དབྱེ་ཚུན་ཆད་ནས་རྒྱན་དང་བརྒྱན་གྱི་ཚུལ་དུ་ཡོད་པ་ཡིན། “སྙན་ངག་མཁན་ལ་ཅི་ཡང་རྒྱན”ཞེས་པར་སྐད་པའང་འདི་དང་འདི་ལྟ་བུ་ལ་ཏན་ཏན་ཟེར་བ་རེད།
3. བོད་སྐད།
བོད་སྐད་ཅེས་པ་ནི་བོད་སྐད་རྣལ་མ་དང་ངོ་མ་བོ་ཟེར་བ་ཡིན། ཞིབ་ཀློག་བྱོས་དང་། སེང་རྡོར་གྱི་བྲིས་རྩོམ་དུ་ཐོན་པ་དང་བཀོལ་བ་དང་སྤྱད་པའི་མིང་དང་ཚིག་ཅིག་ཡིན་ན། གནའ་བོའི་ཤོག་རལ་དང་། བསྟན་བཅོས་ཚད་མ། ཚིག་མཛོད་ཚད་མ། དམངས་ཁྲོད་ཀྱི་གླུ་དང་ལ་གཞས། ད་དུང་རོང་འབྲོག་གི་ཁ་ན་འབྱར་ལ་བྱང་བའི་མིང་ཚིག་ཅིག་ཡིན་པ་ཐག་གིས་ཆོད། སེང་རྡོར་གྱིས་རྒྱ་ཚིག་ཡིན་ལ་མིན་པ། དབྱིན་ཚིག་ཡིན་ལ་མིན་པ། བོད་སྐད་ཀྱང་ཡིན་ལ་མིན་པ། འདི་དང་དེ་ལྟ་བུའི་ཕུང་སུམ་པའི་མིང་བརྡ་དག་རྩོམ་ཡིག་ཏུ་མི་བཀོལ་བ་ཡིན། བོད་སྐད་ཡིན་ཤག་ཤག་ཅིག་མིན་ཚེ་སེང་རྡོར་གྱི་བློ་བདེ་བ་མིན། དེའི་ཆ་ནས། ཁོས་རྩོམ་ཡིག་ཏུ་བེད་སྤྱད་པའི་མིང་ཚིག་རྣམས་བོད་སྐད་ངོ་མ་ཞིག་ཡིན་མིན་ལ་བརྟགས་ཤིང་བརྟག་པ་ཡིན། དེ་ནི་ཁོ་བོར་སེང་རྡོར་གྱི་རྩོམ་ཡིག་གིས་བྱིན་པའི་བག་ཆགས་ཡིན་ལ་བླ་དང་བླ་རུ་འཕགས་པའི་ཁྱད་ཆོས་ཀྱང་ཡིན་དང་ཡིན།
ཁྱད་ཆོས་འདིའམ་རྩོམ་རྩལ་འདི་ནི་སེང་རྡོར་ཁོ་ནར་ངེས་པ་ཞིག་རེད་པས་ཟེར་ན་མ་རེད། ཁོ་བོར་རྒྱུས་དང་ཆ་ཅུང་ཙམ་ཡོད་པའི་སྔ་ཆད་མཁས་པའི་ཁྲོད་ན་མཛུབ་མོས་བགྲང་ཆོག་པ་རེ་འགའ་ཡོད་པ་ཡིན། དཔེ་བཞག་ན། རྫ་དཔལ་སྤྲུལ། གུང་ཐང་བསྟན་པའི་སྒྲོན་མེ། ཚངས་དབྱངས་རྒྱ་མཚོ། རྡོ་སྦིས་དགེ་བཤེས། དགེ་ཆོས། གླུ་དང་ལ་གཞས་སོགས་ཡོད་པ་རེད། འདི་རྣམས་ཀྱི་སྙན་ངག་ལ་ཁྱད་ཆོས་དེ་དག་སྣུམ་གྱིས་གོས་ཟིན་པ་ལྟ་བུའི་ཚུལ་དུ་ཡོད། ལྷག་ཏུ། དགེ་ཆོས་ཀྱི་སྙན་ངག་ཁོ་ན་མིན། རྩོམ་པ་ཕལ་མོ་ཆེར་ཁྱད་ཆོས་དེ་དག་ཡོད་པ་སྨོས་ཅི། ཤིན་ཏུ་ཆ་འདྲ་བ་ཡིན། འོན་ཏེ། སེང་རྡོར་དང་དགེ་ཆོས་གཉིས་ཀྱི་རྩོམ་ལའང་རྒྱབ་ན་འགུག་ཤུགས་མི་འདྲ་བ་ཡོད་ལ། མདུན་ན་འཐེན་ཤུགས་མི་འདྲ་བའང་ཡོད་པ་རེད། དེ་ནི་མྱོང་བ་དང་རོལ་བའི་སྐབས་སུ་ཤ་འདྲེས་ཁྲག་འདྲེས་སུ་སོང་བ་ལྟ་བུའོ་ཟེར་བ་ལས་བརྡ་སྐད་ཀྱིས་ངོ་འཕྲོད་པ་མིན། མེ་ལོང་མ་ལས། “བུར་ཤིང་འོ་མ་བུར་སོགས་ཀྱི།། མངར་བ་ཉིད་ཀྱི་ཁྱད་པར་ཆེ།། དེ་ལྟ་མོད་ཀྱི་དེ་བརྗོད་པར།། དབྱངས་ཅན་མས་ཀྱང་ནུས་མ་ཡིན།།”ཞེས་པ་དེ་ལས་འགོངས་པར་དཀའ། ད་དུང་། ངར་ཆ་རྒྱུས་མེད་པའང་དེ་དང་དེ་འདྲ་བ་མང་བོ་ཡོད་སྲིད་པ་རེད།
མཇུག་ཏུ། ཕྲན་གྱིས་སེང་རྡོར་གྱི་མི་གཞི་གླེང་གིན་མེད་ལ་དེ་ནི་གླེང་ཤེས་པའང་མིན། ཁོའི་ཞལ་ན་གནས་པའི་རྩོམ་ཡིག་གི་ཁྱད་ཆོས་དང་སྒྱུ་མའི་རྩལ་གླེང་གིན་ཡོད། དེའང་མི་སྒེར་གྱི་མྱོང་རོལ་ཁོ་ན་གཞིར་བཞག་པ་ལས་གཞན་དང་གཞན་ལ་འབྲེལ་བ་ཅི་ཡང་མེད། ཡང་། རྩོམ་པའི་རྩལ་གླེང་ཟེར་ཡ་འདིའང་སེང་རྡོར་གྱི་རྩོམ་སྤྱིའི་ཁོག་འབུབས་གླེང་བ་ལས་གཞན་མིན། ཚིག་གཅིག་ཏུ་དྲིལ་ན། ངས་སེང་རྡོར་གྱི་རྩོམ་ཡིག་སྤྱི་ཡིས་བྱེ་བྲག་ཚུར་འཐེན་པ་ལས་བྱེ་བྲག་གིས་སྤྱི་ལ་སྡོམ་བཀོད་པ་ལྟ་བུའི་བྱ་ལས་འར་བོ་དག་སྤངས་བཞག་ཡོད། ཡང་ན། མཚན་ཉིད་རིག་པས་ཁྱབ་མཐའ་བཅད་པ་དང་ཡེ་ནས་ཆ་འདྲ་བ་མིན་པ་གོ་བར་གྱིས།
2015.7.20
ང་ལ་ཡང་ཉམས་མྱོང་གཅིག་མཚུངས་བྱུང་།
བོན་ཀློག་པ་ནི་བོད་ཀློག་པའང་ཡིན། །
བོན་པོའི་དེབ་ཚོགས་ཤིག་གི་དཔེ་སྐྲུན་གསལ་བརྡ་ཐོས་རྗེས།
བོན་ནི་དུང་ཤོག་དཀར་པོའི་གངས་ཧྲག་སྟེ། །
བོན་ནི་གཡུ་རིས་སྔོན་པོའི་བྲག་གཡམ་སྟེ། །
དམུ་རྒྱུད་ཐིམ་པ་སྐས་ཀྱི་གཡུང་དྲུང་ཁར། །
ཕྱྭ་བཟའ་ངང་འབྲང་མ་ཡི་ཁྱུང་རུ་གདངས། །
གོང་དྲུག་ལྷ་རྩེ་སྲིད་པའི་བོན་སྐད་ཡིན། །
ཆང་འགག་སྦང་མ་གཤེན་གྱི་བརྡ་ཆད་ཡིན། །
རག་ཤ་སྲིན་པོའི་རིགས་ཀྱི་མགོ་ཐོག་ཏུ། །
གཏོ་རྒྱལ་བོན་གྱི་སྒོ་མོ་རྔམས་ཀྱིས་ཕྱེས། །
མགོན་བཙུན་ཕྱྭ་ཡི་ཡུལ་དུ་བེའུ་ཙེ་ཡོད། །
ཤིང་གི་གཞའ་ཚོན་འོད་འབར་ཅི་ལ་མེད། །
འོལ་མོའི་གསས་མཁར་ནང་ན་བོན་སྒོ་ཡོད། །
འཕྲུལ་གྱི་རྒྱལ་རྟགས་ཡི་གེ་ག་ལ་མེད། །
སྤུ་ལོ་རྔུལ་ཤོད་ཅེས་པ་བོན་ལས་བྱུང་། །
བརྒྱ་ཤོང་ཁ་སྤྲོད་ཞེས་ཀྱང་བོན་ལ་གྲག །
ཕེ་ཤ་ཨེ་མའི་བོན་དྲི་ཐུལ་པ་ཡི། །
རྨང་པོའི་ངེས་ཚིག་གཟི་རྡོ་ཁྲ་བོ་འདྲ། །
སོག་ཀའི་འཇིག་རྟེན་ལྟ་བུའི་བོན་སྒོ་ལ། །
ཆབ་གྱི་གྲམ་པ་ཙམ་གྱི་བག་ཆགས་འཇོག །
འཁོར་པ་སྒྱུད་ལུག་ཡིན་པས་ད་དུང་བཤུམས། །
དྭངས་ཀྱི་ཐུན་སྐྱོགས་འཕེན་པ་རན་ཙམ་གྱིས། །
རྨ་བྱའི་ལྡེམ་རྒྱངས་ཅན་གྱི་བོན་སྒོ་ལ། །
སེམས་ཉིད་གཡུང་དྲུང་གློད་དེ་འཕྲུལ་ངག་སྨྲ། །
རྒོད་ཀྱི་འཕར་འདབ་ཅན་གྱི་བོན་སྒོ་ལ། །
སྣང་བ་གཡུང་དྲུང་བསྒྲིལ་ཏེ་གཤེན་སྐད་རྒྱག །
ཁྲོ་ལོ་གནམ་གྲགས་བསྐལ་བའི་མཐོ་བཅད་དང་། །
འཕར་བོ་འཕར་ཆུང་འཁོར་པའི་ཟུར་བསྙལ་ཏེ། །
གསེར་གྱི་སྦ་ཤད་ཡིན་པའི་བོན་སྒོ་ལ། །
དངུལ་གྱི་གཟར་བུ་དེ་ཡང་ཆེད་དུ་བྱ། །
དུང་གི་སོ་འཁོར་སྟོན་དང་ཕ་ཆོས་ལགས། །
ཡི་གེ་ཨ་དཀར་སྤྲོས་དང་མ་ཆོས་ལགས། །
ཀོང་ཡུལ་བྲེ་སྣའི་ཕྱོགས་སུ་ང་རང་ཡོད། །
ལང་ལིང་གྲོང་ཁྱེར་ཕྱོགས་སུ་ཁོ་ཡང་ཡོད། །
ང་ནི་ཁྱོད་ཀྱི་དཔྱད་བུ་ཁྲི་ཤེས་ཡིན། །
ང་ནི་ཁྱོད་ཀྱི་སངས་པོ་འབུམ་ཁྲི་ཡིན། །
གནམ་གྱི་ལྷུམས་རྩེར་གཤེགས་པའི་སྐྱིལ་ཀྲུང་དེ། །
རང་གི་གྱང་ལྡེབས་ངོས་ལ་ཕྱེད་ཙམ་བྲི། །
གཏོ་འདི་གཤེན་གྱི་སྦུབས་སུ་བརྫིས་པ་དང་། །
གླུད་འདི་སྲིད་པའི་བུག་ཏུ་བཅོས་པ་དང་། །
རྔ་འདི་བོན་གྱི་ཁོག་ནས་བརྡུངས་པ་སྟེ། །
ཆོད་དང་ལམ་ཕྱོད་ཨེ་འདུག་གཞན་གྱིས་ཤོད། །
2010.8.26ཉིན་ཕ་ཡུལ་ལ་བསྐྱོད་པའི་ལམ་དུ་བྲིས། སེང་རྡོར་ཀྱིས་བྲིས། །
སེང་རྡོར་ལགས་ཀྱིས་བྲིས་པའི་བོན་ཀློག་པ་ནི་བོད་ཀློག་པའང་ཡིན་ཞེས་པའི་སྙན་རྩོམ་འདིར་དག་བཅོས་བྱ་དགོས་པ་ཁ་ཤས་འདུག་སྙམ། དཔེར་ན། དམུ་རྒྱུད་ཐིམ་པ་སྐས་་་ཅེས་པ་དེ་་་དམུ་རྒྱུད་ཐེམ་པ་སྐས་ཡིན་ནམ་སྙམ།
གོང་དྲུག་ལྷ་རྩེ་་་ཞེས་པ་དེ་་་གུང་དྲུག་ལྷ་རྩེ་ཡིན་ནམ་སྙམ།
སོག་ཀའི་འཇིག་རྟེན་་་ཞེས་པ་དེ་་་སོག་ཁའི་འཇིག་རྟེན་་་ཡིན་ནམ་སྙམ།
འཁོར་པ་སྒྱུད་ལུག་ཡིན་པས་་་ཅེས་པ་དེ་་་འཁོར་བ་སྒྱིད་ལུགས་་་་ཡིན་ནམ་སྙམ།
སེམས་ཉིད་གཡུང་དྲུང་གློད་དེ་འཕྲུལ་ངག་སྨྲ་་་་ཞེས་པ་དེ་་་་ སེམས་ཉིད་གཡུང་དྲུང་ཀློང་དུ་འཕྲུལ་ངག་སྨྲ་་་ཡིན་ནམ་སྙམ།
ཁྲོ་ལོ་གནམ་གྲགས་་་ཅེས་པ་དེ་་་་ཁྲི་ལོ་གནམ་གྲགས་་་ཡིན་ནམ་སྙམ། སྤྱིར་སྟངས་ཁྲོ་ལོ་ཞེས་པ་དེ་དྲིལ་བུ་སོགས་ལ་གོ་ཡང་། བོན་ལུགས་ལ་་་གཤང་ལ་ཁྲི་ལོ་གནམ་གྲགས་་་ཅེས་པ་སྐད་གྲགས་ཅན་ཞིག་ཡོད་པ་རེད། །
དུར་བྱང་མཆོག་གི་རྩོམ་བཀླགས་གྲུབ་རྗེས་སེང་རྡོར་གྱི་སྙན་རྩོམ་ལ་བལྟ་འདོད་དབྱར་ཁའི་སྐོམ་པ་ལྟར་བྱུང་། །
ཡང་ཨ་མདོའི་སྐྱལ་སྟོང་ཞིག་གིས་ཕྱོགས་བསྟོད་མ་རུང་བ་ཞིག་བྱས་ཤག ཆབ་དཔལ་རིག་གསར་གཏོད་མེད་པའི་མི་བུ་དག་ནི་གཞན་གྱི་རྐང་རྗེས་འཚོལ་བའི་རྐུན་མ་རང་རེད།
སྐད་ཆ་འདི་ཡག་པ་འདྲ་བཤད་བཞགས་འདུག
༼༡༽སྐུ་ཞབས་སེང་རྡོར་གྱི་རྩོམ་མམ་རྩོམ་ལ་གཞན་ལས་འཕགས་པའི་ཁྱད་ཆོས་གསུམ་ཡོད་པས་ཡིན།
༼༢༽ཁྱད་ཆོས་འདིའམ་རྩོམ་རྩལ་འདི་ནི་སེང་རྡོར་ཁོ་ནར་ངེས་པ་ཞིག་རེད་པས་ཟེར་ན་མ་རེད། ཁོ་བོར་རྒྱུས་དང་ཆ་ཅུང་ཙམ་ཡོད་པའི་སྔ་ཆད་མཁས་པའི་ཁྲོད་ན་མཛུབ་མོས་བགྲང་ཆོག་པ་རེ་འགའ་ཡོད་པ་ཡིན། དཔེ་བཞག་ན། རྫ་དཔལ་སྤྲུལ། གུང་ཐང་བསྟན་པའི་སྒྲོན་མེ། ཚངས་དབྱངས་རྒྱ་མཚོ། རྡོ་སྦིས་དགེ་བཤེས། དགེ་ཆོས། གླུ་དང་ལ་གཞས་སོགས་ཡོད་པ་རེད།
གོང་འོག་གཉིས་ནང་འགལ་རེད་ལགས། དུར་བྱང་ལགས། རྩོམ་ཡིག་ཅིག་འབྲི་བ་ལ་གཙོ་བོ་ནང་འགལ་་མེད་ལ་ཞིག་བཤད་དགོས་པ་གལ་ཆེན་པོར་མཐོང་།
སེང་རྡོར་གྱི་རྩོམ་ཡིག་དེང་སང་གི་བོད་ཀྱི་རྩོམ་པ་པོ་རྣམས་ཀྱི་ཁྲོད་ནས་ལེགས་གྲས་སུ་མཐོང་། འོན་ཀྱང་དགེ་ཆོས་དང་བསྡུར་བ་ནི་གད་མོ་ཤོར་སྐྱེད་རེད། རྩོམ་ཡིག་གི་སྙན་ཆ་དང་ནང་དོན་སྒྱུ་རྩལ་གང་གི་ཆ་ནས་ཀྱང་སེང་རྡོར་དང་དགེ་ཆོས་གཉིས་གནམ་སའི་ཁྱད་པར་ཡོད།
སྐུ་ཞབས་སེང་རྡོར་གྱི་རྩོམ་ལ་དགའ་སྣང་མང་པོ་ཡོད་པ་ནི། ཆོས་ལུགས་དང་གྲུབ་མཐའ་མི་རིགས་ཀྱིས་བཟི་བའི་ཚིག་མེད་ཙང་མི་ཚོས་དགའ་སྣང་ཆེན་པོ་བྱེད་ཀྱི་རེད། དེ་མིན་ཚིག་སྙན་སྙན་ཅི་ཙམ་བྲིས་ཀྱང་དོན་ཁོག་ཏུ་ཕྱོགས་ཞེན་གྱིས་བཟི་ཙང་ལྟས་པ་ཙམ་གྱིས་སྐྱུག་མེར་ལང་ཡོང་གི་འདུག དཔེར་ན། རིགས་ཅིག་གིས་བཙན་བྱོལ་སྒྲག་འཛུགས་ལ་རྒྱབ་སྐྱོར་བྱེད་ཁུལ་གྱིས་བོད་མི་རིགས་རྣམས་གཅིག་བསྒྲིལ་དགོས་ལུགས་བཤད་རུང། དོན་དུ་དེ་ལས་ལྡོག་སྟེ་ཆོས་ལུགས་ཀྱི་ཕྱོགས་ཞེན་ཆེ་བས་མི་དེའི་རིགས་ལ་དགའ་བོ་མེད། དེ་ཡིས་བྲིས་པ་དག་ལའང་སྣང་བར་འགྲོ་གི་མི་འདུག
བཙན་བྱོལ་སྒྲིགས་འཛུགས་ཞེས་བཅོས་རོགས།
དགེ་འདུན་རྒྱ་མཚོ་ལགས། ཡག་པོ་གསུངས་འདུག འོན་ཀྱང་གོ་ཤག་བྱས་པ་ཡིན། ངེས་ངེས་ཡིན། རྫུན་མིན། ཤོབ་མིན། དེང་སང་གསོན་པོར་ཡོད་པ་དག་གི་ཁྲོད་ནས་སེང་རྡོར་ལ་ཁྱད་ཆོས་དེ་ཀུན་ཡོད་པ་ལས་གཞན་མ་མཐོང་བ་ཡིན། ཕྱིར་ལ་བལྟས་ན། རེ་འགའ་ཡོད་པ་རེད་ཅེས་གསལ་ལ་གསལ་བའི་ཚུལ་དུ་བྲིས་ཡོད། གང་ལྟར་ཁ་གསལ་བ་ཞིག་མིན་ནའང་ཞར་དང་ཞོར་ཚིག་གི་འགྲོས་ནས་གོ་ཤག་བྱས་པ་ཡིན་མོད། སྐུ་ཉིད་ཀྱིས་མ་གོ་བ་འདྲ། འོ་རེད། ཁོ་དང་ཁོ་ལྟ་བུའི་ཚིག་འགྲོས་ཞིབ་ཚགས་མ་བྱས་པ་དག་ལ་ལན་འདི་བཏབ་པ་ཡིན་ལགས།
སེང་རྡོར་ཟེར་བ་དེ་མང་པོ་ཞིག་གིས་གོ་མྱོང་ཞིང་ཡི་གེ་བའང་གང་ཙམ་རེས་གླེངས་པ་བདེན་པ་རེད། དེ་འདྲར་སྐད་གྲག་ཅན་ཟེར་བ་ཡིན་ན། སེང་རྡོར་སྐད་གྲག་ཅན་ཞིག་ཀྱང་རེད། ངས་བསམས་པ་ལ་སེང་རྡོར་སྤྱིར་བཏང་གི་བོད་ཀྱི་རྩོམ་པ་པོའི་མིང་ཡོད་སའི་ཡི་གེ་བ་ཞིག་རེད། དེའི་ཁར་ཁོ་རང་ངོས་ནས་བཤད་ན། སྨྱོ་ཟེར་གཟའ་ཟེར་བྱེད་པར་དགའ་ཞིང་བྱེད་མཁན་ཞིག་ཀྱང་རེད། དེ་ནས་ཁོ་ཅི་ཞིག་ལ་མང་པོས་གོ་ཞིང་རེ་འགས་གླེང་རྒྱུ་ཞིག་ཆགས་པ་རེད་ཅེས་ན། ཡང་། ངས་བསམས་པར་ཁོ་རང་གི་རིགས་མཐུན་ནམ་དྲ་གྲོགས་རེ་འགས་རྒྱུ་མཚན་ཡོད་མེད་ལ་མ་ལྟོས་ནས་ཁོར་ཕུ་བརྒྱབ་ཅིང་། ཁོས་ཀྱང་སྐབས་དེ་དག་ཏུ་དོན་དག་ཆ་བེ་ཆོབ་བེ་རེ་བརྗོད་བྱར་བཟུང་བའི་བོད་ཡིག་ཏག་ཏག་རོལ་རྩེད་བྱས་པས་རེད་ལ། ཁོས་བྲིས་པའི་བོད་ཡིག་དེ་ཚོ་ནི་བཅད་ལྷུག་གཉིས་ཀར་གཏོགས་ཀྱང་། ངར་མཚོན་ན་དེ་ཚོ་སྤྱིར་བཏང་བ་ཞིག་ལས་དམིགས་བསལ་རྩོམ་རིན་ཟེར་ནས་བཤད་རྒྱུ་མེད། དེ་མིན་ཕྱོགས་གཞན་ཞིག་ནས་བཤད་ན། སེང་རྡོར་མང་པོས་གོ་ཞིང་མཐོང་རྒྱུ་ཡོད་པ་དེ་འུར་བ་ཚོས་བཀའ་དྲིན་རེད་ཟེར་འདོད། ངས་མཚམས་རེར་སེང་རྡོར་ནི། སྤྱིར་བཏང་བོད་ཡིག་པ་ཞིག་གིས་ཐུབ་རྒྱུའི་ཚིག་སྦྱོར་དང་དག་ཆའང་མི་འཁྱོང་མཁན་ཞིག་རེད་འདོད་ཀྱི་ཡོད། དེ་ནི་ཁོས་བྲིས་པ་ལ་ལར་ལྟ་སྐབས་འདོད་པ་ཡིན། འོ་རེད། ངས་སེང་རྡོར་ངོ་མི་ཤེས་ལ་ཅི་ཞིག་བྱེད་ཀྱིན་ཡོད་མེད་ཀྱང་མི་ཤེས། ངའི་བསམ་ཚུལ་ལ་ནོར་བ་ཡོད་ན། དགོངས་དག
བོད་ཀྱི་གྲྭ་ལོག་ཚོའི་ཁྲོད་དུ་མི་སྐྱེས་པ་ནི་དགེ་ཆོས་དང་སེང་རྡོར་རེད། ད་མ་ཡིན་པའི་ད་ཅང་མི་དགོས།
གྲྭ་ལོག ལྟ་ལོག སྤྱོད་ལོག་སྟེ། ལོག་གསུམ་བསྟན་པའི་ཞབས་འདྲེན་གྲགས། དགེ་ཆོས་སེང་རྡོར་ལོག་གསུམ་དངོས། ཧཧཧཧ།