གནས་ཚུལ་མཁོ་སྤྲོད་པ། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ཡིག་ཚང་།
དེ་ཡང་སྤྱི་ཟླ་བཞི་པའི་ཚེས་༢༥ ཡི་ཉིན་གུང་བལ་ཡུལ་ལྟེ་བར་བྱས་པའི་བོད་དང་འབྲུག་སོགས་ཚུད་པའི་ཧི་མ་ལའི་རི་བརྒྱུད་ཁུལ་དུ་རིམ་པ་བརྒྱད་ཅན་གྱི་ས་ཡོམ་ཤུགས་ཆེན་བརྒྱབས་ཏེ་མི་རྒྱུ་གཉིས་ལ་གྱོང་གུད་ཆེན་པོ་ཕོགས་བཞིན་པར་དམིགས་ནས། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པས་གོ་སྒྲིག་བྱས་ཏེ། མདང་ནུབ་(2015/4/27)རྒྱལ་ས་ཐའེ་པེ་རུ་གནོད་ཐེབས་མི་མང་གི་ཆེད་དུ་མཆོད་འབུལ་སྨོན་ལམ་ཧ་ཅང་གཞི་རྒྱ་ཆེ་བ་ཞིག་འཚོགས་ཡོད་ཅིང་། དེར་དམིགས་བསལ་དཔལ་ས་སྐྱའི་སྒྲོལ་མ་ཕོ་བྲང་གི་༸གདུང་སྲས་སྐུ་གཞོན་རིན་པོ་ཆེ་མཆོག་གདན་ཞུས་དབུ་ཞུགས་ཐོག མཛད་རིམ་དང་ལས་ཀའི་བྲེལ་ཟིང་ལ་མ་ལྟོས་པར་དུས་ཐུང་གི་དྲ་ལམ་ཁྱབ་བསྒྲགས་ཁོ་ན་བརྒྱུད་ཐའེ་བཞུགས་བོད་བརྒྱུད་གྲུབ་མཐའ་རིས་མེད་ཀྱི་མཁན་སྤྲུལ་དགེ་བཤེས་གཙོ་བོར་གྱུར་པའི་དགེ་འདུན་པ་བདུན་ཅུ་ལྷག་དང་། མི་མང་སུམ་བརྒྱར་ཉེ་བ་འདི་འཛོམས་བྱུང་ཡོད་པར་མ་ཟད། ཚང་མས་ཚོར་ཤུགས་ཆེན་པོས་གདུང་སེམས་མཉམ་བསྐྱེད་ཀྱི་རྣམ་འགྱུར་བསྟན་ཡོད།
དེ་ཡང་༸སྐྱབས་རྗེ་གདུང་སྲས་རིན་པོ་མཆོག་གིས་ཐོག་མར་དགེ་འདུན་པ་དང་མི་མང་ལ་ཚང་མ་མཉམ་དུ་འཛོམས་ནས་གསོལ་སྨོན་གནང་བའི་གལ་ཆེའི་རང་བཞིན་དང་དམིགས་ཕན་ཡོན་གྱི་སྐོར་དང་འབྲེལ་བའི་གསུང་བཤད་གནང་། དེ་བཞིན་ལས་འགུལ་གོ་སྒྲིག་མགྲིན་ཚབ་པས་ཀྱང་། མི་ཧ་ཅང་མང་པོ་ཞིག་རྐྱེན་ལམ་དུ་གྱུར་པ་དང་། མང་པོ་ཞིག་ལ་རྨས་སྐྱོན་ཚབ་ཆེན་ཕོག་པ། དེ་ལས་མང་བ་ཞིག་རྟེན་ཡུལ་མེད་པ་ཆགས་པ་སོགས་ཀྱི་ཧ་ཅང་ཡི་མུག་སྐྱེ་བར་འོས་པའི་དཀའ་སྡུག་གི་གནས་སྟངས་ལ་དམིགས་ནས་དུང་སེམས་མཉམ་བསྐྱེད་ཀྱི་རྣམ་འགྱུར་འདྲ་མིན་བསྟོན་རྒྱུ་ནི་འགྲོ་བ་མིའི་ཀུན་སྤྱོད་ཀྱི་ངོས་དང་། ཐེག་པ་ཆེན་པོའི་མཉམ་ལེན་གྱི་ངོས་གཉིས་ཆར་ནས་གལ་ཆེན་ཡིན་པ་དང་། ཞིབ་ཚོགས་ཀྱི་ངོས་ནས་ཀྱང་། ནུས་ཚོད་དང་བསྟུན་ནས་སྔར་འཇར་པན་མཚོ་འཁྱོམས་ཆེན་མོ་དང་། ཡུལ་ཤུལ་ས་ཡོམ། ཐའེ་ཝན་གྱི་བརླངས་རྫས་གས་འཐོར་སོགས་རང་བྱུང་གི་གནོད་འཚེ་ཕོག་སྐབས་ཀུན་ལ་གདུང་སེམས་མཉམ་བསྐྱེད་མཚོན་པའི་མཆོད་འབུལ་སྨོན་ལམ་ཞུས་པ་ལྟར། ད་ཐེངས་ཡང་བལ་ཡུལ་མཚོན་པའི་གནོད་ཐེབས་མི་མང་གི་ཆེད་དུ་སྨོན་ལམ་འདི་གོ་སྒྲིག་འདི་ཞུས་པ་ཡིན། ཞེས་དང་། རྗེས་སོར་ཡང་དགོས་གལ་ནམ་བྱུང་ལ་ཐའེ་བཞུགས་དགེ་འདུན་པ་དང་དད་སློབ་ཚང་མ་དམ་ཚིག་དང་མཐུན་ལམ་འོ་ཆུ་གཅིག་འདྲེས་ཀྱིས་ལས་འགུལ་ག་འདྲ་ཞིག་ཡིན་ཡང་མཉམ་ཞུགས་བྱ་གལ་ཆེན་པོ་ཡིན་ཞེས་གསུངས།
དེ་རྗེས། ཚང་མས་ཐུབ་ཆོག་བྱིན་རླབས་གཏེར་མཛོད་དང་། ཐུགས་རྗེ་ཆེན་པོའི་སྒྲུབ་ཐབས། གུ་རུ་སིདྡྷི། བཟང་སྤྱོད་སྨོན་ལམ། མར་མེའི་སྨོན་ལམ་བཅས་གསུངས་མཐར་ངག་བསྡམས་མྱ་ངན་སྐར་མ་གཅིག་གི་རིང་ལ་བྱས་མཐར་ཐེངས་འདིའི་ལས་འགུལ་ཡོངས་སུ་གྲུབ།
ཐེངས་འདིའི་ལས་འགུལ་ལ་ཐའེ་ཝན་དད་སློབ་དག་གིས་ཀྱང་ཐའེ་བཞུགས་དགེ་འདུན་པ་དག་གིས་དཀའ་ངལ་ཅན་ལ་སེམས་གསོ་གནང་བའི་ལས་དོན་གྱི་བྱེད་ཕྱོགས་ལ་སེམས་འགུལ་ཐེབས་པའི་རྣམ་འགྱུར་ཤུགས་ཆེན་བསྟན་ཡོད་ལ། འདིས་ཐའེ་ཝན་མི་མང་གིས་བོད་བརྒྱུད་ནང་བསྟན་དང་བོད་མིའི་ཀུན་སྤྱོད་འདུ་ཤེས་ལ་སྔར་ལས་མཐོ་བའི་ངོས་འཛིན་གང་ལེགས་འབྱུང་བའི་བཟང་ཕྱོགས་ཀྱི་རྒྱུ་རྐྱེན་གལ་ཆེན་ཤིག་བསྐྲུན་ཐུབ་པ་བྱུངཡོད། །
འབྲེལ་མཐུད། 00886-963017508