དགུ་བརྒྱའི་རྗེས་དྲན་གྱི་སྙན་ཚིག

ཀརྨ་པ་ཨོ་རྒྱན་ཕྲིན་ལས་རྡོ་རྗེ།

ཁྱོད་ནི་གངས་རིའི་ངོས་ཀྱི་བདུད་རྩིའི་ཆུ་མིག་ཞིག་དང་འདྲ་བར།
ཀུན་ལས་མཐོ་མཐོ་བའི་རྒྱལ་ཁམས་ཤིག་ནས།
འབད་མེད་ཀྱི་རྩོལ་བ་དང་རྒྱུ་མེད་ཀྱི་དུངས་སེམས་ཟབ་མོས།
ལོ་ཟླ་བརྒྱ་ཕྲག་གི་རི་ཐང་ཡོངས་སུ་བརྒལ་ཏེ།
ངེད་ཅག་གི་རེ་བའི་ཞིང་སར་ལྷུང་ལྷུང་དུ་བབས།
ཁྱོད་ཀྱིས་སྐྱེ་བའི་ཕྲེང་བ་དུ་མའི་རིང་བཅངས་བཅངས་པའི་སྨོན་ལམ་ཟབ་མོས།
ང་ཚོར་ཆེས་མི་མངོན་པའི་ས་ནས་དྲོད་འཇམ་དང་འཚོ་བཅུད་བྱིན་ཏེ།

དགེ་སེམས་ཀྱི་ལྗང་མྱུག་གཞོན་ནུ།
དུས་དེ་ནས་ལོ་འདབ་དང་འབྲས་བུ་བཞད་ཅིང༌།
ཐན་སྐམ་དུ་གྱུར་པའི་ས་གཞི་གཡུ་མདོག་གི་ལང་ཚོར་བསྒྱུར།
གངས་དཀར་ཀྱི་རི་བོའི་རྩེ་ནས་དུང་སེང་གི་ངར་སྐད་སྒྲོགས་མ་ཐག
སྐྱ་སིལ་སིལ་གྱི་ཁ་བའི་རྡུལ་ཕྲན་དགུང་དུ་འཕྱུར།

ཆིག་སྟོང་ཆིག་བརྒྱ་བཅུ་ཡི་ལོར་བཞད་པའི་ཁྱོད་ཀྱི་མཚན་སྙན་གདོང་ལྔ་འབར་བའི་གད་རྒྱངས་དེ།
འགྱུར་མེད་ཀྱི་གཟི་བྱིན་དང་མཚུངས་མེད་ཀྱི་བྱིན་རླབས་རྒྱས་བཞིན་དུ།
ལོ་ངོ་དགུ་བརྒྱའི་དུས་ཀྱི་འཁོར་མོ་ཡུག་ཏུ།
དད་སེམས་ཀྱི་སྙིང་ཁ་འགུལ་ཞིང་མ་རིག་པའི་རྨོངས་གཉིད་ལས་དཀྲོག་པས།
རྣམ་རྟོག་གི་རྦ་རླབས་འཁྲུགས་པའི་ཡིད་ཀྱི་མཚོ་མོ་འཇམ་ཐིང་ངེར་སོང་ཞིང༌།
སྐྱེ་འཇིག་གི་ཆོམ་སྒྲས་ཁེངས་པའི་འཇིག་རྟེན་ཡང་ཁུ་སིམ་མེར་གྱུར།

ཁྱོད་ཡོད་པས་ང་ཚོས་ངམ་གནག་གི་འཁོར་བའི་རྒྱ་མཚོར་གདོང་གཏད་ཕོད་ལ།
ཁྱོད་ཡོད་པས་ང་ཚོར་སྡུག་བསྔལ་གྱི་ཐ་མ་ཞིག་ཡོད་པར་རྟོགས།
ཁྱོད་ཀྱི་མཛད་པ་ནི་མཐོན་མཐིང་གི་དབུ་ཞྭའི་མདངས་དང་མཚུངས་པའི་ནམ་མཁའ་དང་ཡོངས་སུ་འདྲེས་ལ།
ཁྱོད་ཀྱི་སྙིང་ཆེན་པོ་ནི། རྔམ་ཆེ་བའི་རླུང་གི་དཀྱིལ་འཁོར་ལྟར་
མི་མཇེད་ཀྱི་ཞིང་འདིར་བར་མེད་དུ་གཡོ་འགུལ་བྱེད།

ཀྱཻ་ཀརྨ་པ། ཕྲིན་ལས་པ།
ང་ནི་ཁྱོད་ཀྱི་ཡོད་ཚད་ཡིན་ལ། ཁྱོད་ནི་ང་ཡི་ཡོད་ཚད་ཡིན།