ཤིང་མོ་ལུག

རབ་བྱུང་དང་པོའི་ཤིང་མོ་ལུག་གི་ལོར།། (1055)
རིན་བཟང་འདས་ཤིང་པ་ཚབ་ཉི་གྲགས་དང་།།
ཞང་སྟོན་ཆོས་འབར་འཁྲུངས་ཞེས་ཚེ་ཏན་གསུངས།།
མ་གཅིག་ལབ་སྒྲོན་འཁྲུངས་པའི་གཏམ་ཡང་རྙེད།།

རབ་བྱུང་གཉིས་པའི་ཤིང་མོ་ལུག་གི་ལོར།། (1115)
དར་མ་མདོ་སྡེ་འདས་ཞེས་བཤད་སྲོལ་སྣང་།།
དེས་ན་མི་ལ་མར་པའི་དྲུང་བཞུགས་ནས།།
སློབ་གཉེར་གནང་དགོས་བརྟགས་ཞེས་དུང་དཀར་གསུངས།།

རབ་བྱུང་གསུམ་པའི་ཤིང་མོ་ལུག་གི་ལོར།། (1175)
དགེ་བཤེས་འཆད་ཀ་བ་དང་ཁམས་ལུང་འདས།།
སྤྱན་སྔ་གྲགས་པ་འབྱུང་གནས་འཁྲུངས་གྱུར་ཅིང་།།
བླ་མ་ཞང་གིས་ཚལ་དགོན་བཏབ་ཅེས་བཤད།།

རབ་བྱུང་བཞི་པའི་ཤིང་མོ་ལུག་གི་ལོར།། (1235)
འགྲོ་མགོན་ཆོས་རྒྱལ་འཕགས་པ་འཁྲུངས་པ་དང་།།
རྒྱལ་བ་ཐོག་རྡུགས་གྲགས་པ་བརྩོན་འགྲུས་ཞབས།།
ཕག་གྲུའི་གདན་སར་ཕེབས་ཞེས་ཚེ་ཏན་གསུངས།།

རབ་བྱུང་ལྔ་པའི་ཤིང་མོ་ལུག་གི་ལོར།། (1295)
དཔང་ལོ་བློ་གྲོས་བརྟན་པ་བལ་ཡུལ་ཕེབས།།
དངུལ་ཆུ་ཐོགས་མེད་བཟང་པོ་འཁྲུངས་ཞེས་བཤད།།
ཅོ་ནེ་དཔོན་གྱིས་ཅོ་ནེ་དགོན་ཆེན་བཏབ།།
རྒྱ་ཡི་ཡུལ་དུ་ཡེ་ཤུའི་ཆོས་ལུགས་དར།།

རབ་བྱུང་དྲུག་པའི་ཤིང་མོ་ལུག་གི་ལོར།། (1355)
རྒྱལ་ལྷ་ཁང་པ་བློ་གྲོས་སེང་གེ་ཡིས།།
བསྟན་རྩིས་མདོ་རྒྱུད་ལུང་གསལ་བརྩམས་ཞེས་བཤད།།

རབ་བྱུང་བདུན་པའི་ཤིང་མོ་ལུག་གི་ལོར།། (1415)
ཀརྨ་དེ་བཞིན་གཤེགས་པ་འདས་པ་དང་།།
ཙོང་ཁ་པ་ཡིས་ལམ་རིམ་ཆུང་ངུ་བརྩམས།།
རྒྱལ་བ་དགེ་འདུན་གྲུབ་ཀྱིས་རྗེ་ལ་མཇལ།།

རབ་བྱུང་བརྒྱད་པའི་ཤིང་མོ་ལུག་གི་ལོར།། (1475)
པཎ་ཆེན་བྱམས་གླིང་བསོད་ནམས་རྣམ་རྒྱལ་དང་།།
ཟུར་མཁར་མཉམ་ཉིད་རྡོ་རྗེ་འདས་ཞེས་བཤད།།
ཟུར་མང་བདེ་ཆེན་རྩེ་ཡི་སྒྲུབ་སྡེ་བཏབ།།

རབ་བྱུང་དགུ་བའི་ཤིང་མོ་ལུག་གི་ལོར།། (1535)
རྒྱ་ར་ཆོས་རྒྱམ་དགའ་ལྡན་ཁྲི་ལ་ཕེབས།།
གྲུབ་ཆེན་ཐར་པའི་རྒྱལ་མཚན་འཁྲུངས་ཞེས་གསུངས།།

རབ་བྱུང་བཅུ་པའི་ཤིང་མོ་ལུག་གི་ལོར།། (1595)
སྨན་ལུང་ཁྲ་ཚང་བློ་མཆོག་རྡོ་རྗེ་དང་།།
སྡེ་སྲིད་བསོད་ནམས་རབ་བརྟན་འཁྲུངས་ཞེསགསལ།།
རིན་སྤུངས་འཇིགས་གྲགས་གྲོངས་སྙམ་དུང་དཀར་གསུངས།།

རབ་བྱུང་བཅུ་གཅིག་ཤིང་མོ་ལུག་གི་ལོར།། (1655)
གཏེར་སྟོན་སྟག་ཤམ་བསམ་གཏན་གླིང་པ་འཁྲུངས།།
མཁས་གྲུབ་ཤཱཀྱ་ལྷ་དབང་འདས་ཞེས་བཤད།།
འབྲི་གུང་སྨན་པ་ཚེ་དབང་བསྟན་པ་ཡིས།།
གསོ་རིག་གཅེས་བསྡུས་བརྩམས་ཞེས་དུང་དཀར་གསུངས།།

རབ་བྱུང་བཅུ་གཉིས་ཤིང་མོ་ལུག་གི་ལོར།། (1715)
ཀུན་མཁྱེན་འཇམ་དབྱངས་བཞད་པས་བསྟན་རྩིས་བརྩམས།།
པཎ་ཆེན་དང་ནི་ས་སྐྱ་བདག་ཆེན་གྱིས།།
བོད་འབྲུག་དབར་གྱི་ཆིངས་འགྲིག་མཛད་ཅེས་བཤད།།

རབ་བྱུང་བཅུ་བཞིའི་ཤིང་མོ་ལུག་གི་ལོར།། (1775)
པཎ་ཆེན་དཔལ་ལྡན་ཡེ་ཤེས་ཞབས་ཀྱིས་ནི།།
ཤམ་བྷ་ལ་ཡི་ལམ་ཡིག་བརྩམས་པ་དང་།།
ཧལ་ཧ་རྗེ་བཙུན་དམ་པ་འཁྲུངས་ཞེས་བཤད།།

རབ་བྱུང་བཅོ་ལྔའི་ཤིང་མོ་ལུག་གི་ལོར།། (1835)
ཀུན་མཁྱེན་གསུམ་པས་ཐུའུ་བཀྭན་རབ་ཏུ་བྱུང་།།
སྤོ་བོ་ཀ་གནམ་སྡེ་པར་འཁྲུག་ཅེས་བཤད།།

རབ་བྱུང་བཅུ་དྲུག་ཤིང་མོ་ལུག་གི་ལོར།། (1895)
ཧོས་འཁྲུག་ཕྱི་མ་ལངས་ཞེས་ཚེ་ཏན་གསུངས།།
བཅུ་གསུམ་པ་ཡིས་ལུགས་གཉིས་ཐུགས་འགན་བཞེས།།
མི་ཕམ་ཞབས་ཀྱིས་ལུགས་ཀྱི་བསྟན་བཅོས་བརྩམས།།

རབ་བྱུང་བཅུ་བདུན་ཤིང་མོ་ལུག་གི་ལོར།། (1955)
རྒྱལ་བ་པཎ་ཆེན་རྒྱ་ནས་བོད་དུ་ཕེབས།།
ཚེ་ཏན་ཚང་གིས་མཐུ་བ་དགོན་པ་རུ།།
བླ་མའི་གསུང་འབུམ་པར་དུ་བརྐོས་པར་བཤད།།

མི་ལོ་སྟོང་ཕྲག་ཡུན་གྱི་ལོ་རྒྱུས་ལས།།
ཤིང་མོ་ལུག་གི་བྱུང་བ་འདི་འདྲ་གདའ།།
བསྟན་རྩིས་ཡིག་ཆ་ཁག་ལ་གཞི་བཅོལ་ནས།།
ཡིག་ཆུང་ཐོ་རུ་བཏབ་པ་དགེའོ་ཤིས།།

སྔ་ལོ་དང་འདི་ལོར་འདི་གའི་སློབ་གྲྭ་རུ་རྟེན་འབྲེལ་མཚོན་བྱེད་ཙམ་གྱི་བོད་ལུགས་ལོ་སར་མཛད་སྐབས་ལོ་རྒྱུས་སློབ་དཔོན་སྤེར་ལིང་གིས་རབ་བྱུང་གཅིག་གི་ནང་འཁེལ་བའི་ལོ་ཁམས་འདིའི་བྱུང་བ་རྣམས་ལ་གསལ་བཤད་བྱེད་ཀྱིན་བོད་ཀྱི་ལོ་སར་ངོ་སྤྲོད་བྱས་བྱུང་བ་དེ་ནི་བཟང་བའི་སྲོལ་ཞིག་ཏུ་མཐོང་སྟེ་ཚེ་ཏན་ཞབས་དྲུང་རིན་པོ་ཆེའི་བསྟན་རྩིས་དང་དུང་དཀར་ཚིག་མཛོད་གཉིས་སུ་ཤིང་མོ་ལུག་གི་ལོའི་རེའུ་མིག་ཏུ་གང་བཀོད་རྣམས་ལས་བཏུས་ནས་འདི་ཉིད་བསྒྲིགས་ཤིང་། འདིར་དཔྱད་ཞིབ་དགོས་ངེས་སྣ་ཚོགས་སྣང་མོད་བསྐྱུར་འཇོག་གིས་བཀོད་པ་ཡིན་ནོ།། ཁ་བྲོ་བཀྲ་ཤིས། ལན་གཅིག་ཞུས།