ནམ་མཁའི་མེ་འཁོར།

རིག་འབྱུང་དོན་གྲུབ་བཀྲ་ཤིས།

དེ་རིང་སང་ཉིན། ཨ་རིའི་ནང་དུ་ནམ་མཁའི་མེ་འཁོར་(Sky Train)ཞེས་བའི་དེབ་འདི་ལ་དོ་སྣང་ཆེན་པོ་བྱེད་ཀྱིན་འདུག དེབ་འདིའི་རྩོམ་པ་པོའི་མིང་ལ་ཁན་ཡོན་སམ་(Canyon Sam)ཟེར་ཞིང་། ཁོ་མོ་ནི་རྒྱ་མི་ཨ་རིར་གནས་སྡོད་མི་རབས་གསུམ་པའི་བུད་མེད་ཅིག་ཡིན་ཞིང་། ཁོ་མོས་ཨི་རིའི་སན་ཕུ་རན་སིས་སི་ཁོའི་མངའ་སྡེའི་གཙུག་ཁག་སློབ་ཁང་(San Francisoco State University )དུ་གསར་རྩོམ་སྒྱུ་རྩལ་མཁས་པའི་ལག་འཁྱེར( M.F.A)་བླངས་འདུག ཁོ་མོ་ལོ་རབས་བརྒྱད་ཅུའི་ནང་དུ་ཕྱིར་རང་གི་ཕ་ཡུལ་རྒྱ་ནག་ལ་བསྐྱོད་ཅིང་། ཞོར་ལ་བོད་ཡུལ་ལ་ཕྱིན་འདུག དེ་དུས།
བོད་ཁམས་ཀྱི་ཡུལ་ལྗོངས་དང་བོད་མིའི་འཚོ་བ་སྐྱེལ་སྟངས། བོད་མིའི་སྤྱི་ཚོགས་ཀྱི་རྣམ་པ་སོགས་ཀྱིས་། ཁོ་མོའི་ཡིད་དབང་རབ་ཏུ་འཕྲོག་ཅིང་། ཡུལ་ཁམས་དེ་དང་དེའི་མི་རིགས་ལ་་བརྩེ་དུང་དམིགས་བསལ་ཆགས་འདུག སྐབས་དེ་ནས་བཟུང་། བོད་དོན་ལ་དམིགས་བསལ་གྱིས་དོ་སྣང་དང་ཉམས་ཞིབ་ཀྱི་འགོ་བཙུགས་ཞིང་། བོད་རིགས་བུད་མེད་སྒེར་བ་ཁག་ཅིག་གི་མི་ཚེའི་མྱོང་ཚོར་གྱི་ལོ་རྒྱུས་འཁོད་པའི་དེབ་འདི་འབྲི་རྒྱུའི་འགོ་བཙུགས་འདུག་ ད་དུང་། ཁོ་མོ་བོད་རང་བཙན་ལས་འགུལ་དང་འགྲོ་བ་མིའི་ཐོབ་ཐང་གི་ལས་འགུལ་སོགས་ཀྱི་ནང་ལ་ཉམས་ཞུགས་བྱས་འདུག ནམ་མཁའི་མེ་འཁོར་ཞེས་བའི་དེབ་འདི་ནི། ཉེ་རབས་བོད་རིགས་བུད་མེད་ཁག་ཅིག་གི་དཀའ་སྡུག་གི་མྱོང་ཚོར་བཀོད་པའི་དེབ་ཅིག་ཡིན་ཞིང་། དེབ་འདིའི་ནང་དུ། བོད་རིགས་བུད་མེད་དེ་དག་གིས་། བོད་ཤོར་མཚམས་ཀྱི་སྐབས་སུ། སྤྱི་ཚོགས་ཀྱི་གནས་སྟངས་ཡ་ང་བའི་འོག་འཚོ་བར་གདོང་ལེན་ཇི་ལྟར་བྱས་ཡོད་མེད། ཆབ་སྲིད་དང་རང་དབང་འཐབ་རྩོད་ཀྱི་ཁོངས་སུ། འགན་ལེན་ཇི་ལྟར་བྱེད་ཡོད་མེད། རང་གི་མི་རིགས་དང་ལུང་བར་ཞབས་འདེགས་ཇི་ལྟར་བྱས་ཡོད་མེད་། བུད་མེད་ཅིག་གི་གནས་བབ་ལས་བརྒལ་ཏེ། བོད་མིའི་སྤྱི་ཚོགས་ལ་འགན་འཁྲི་ཇི་ལྟར་འཁུར་ཡོད་མེད་སོགས་བུད་མེད་སྒེར་བའི་མྱོང་ཚོར་འཁོད་ཡོད་འདུག་ཅིང་། ད་དུང་། བུད་མེད་དེ་དག་གི་ཞུམ་པ་མེད་པའི་བློ་སྤོབས་དང་སྙིང་སྟོབས། ཡ་རབས་དང་བཟང་སྤྱོད་ཀྱི་གཤིས་རྒྱུད་སོགས་ཀྱང་བཀོད་ཡོད་འདུག རྩོམ་པ་པོ་ཁན་ཡོན་སམ་(Canyon Sam)གྱིས་ཁྱོན་བསྡོམས་བོད་རིགས་བུད་མེད་༣༦ལ་བཅར་འདྲི་བྱས་ཤིང་། དེབ་འདིའི་ཁོངས་སུ་གཙོ་ཆེ་བ་བོད་རིགས་བུད་མེད་བཞིའི་མི་ཚེའི་མྱོང་ཚོར་གྱི་སྐོར་ལ་དམིགས་བསལ་བྲིས་ཡོད་འདུག བོད་རིགས་བུད་མེད་བཞི་པོ་དེ་ནི། ཕྲེང་རིང་རིན་ཆེན་སྒྲོལ་མ།(Rinchen Dolma Taring ) ཆོས་སྐྱིད་རྣམ་སྲས་གླིང་། (Choekyi Namseling )དཔལ་འབྱོར་ཁྱིམ་གསར།(Paljor Kyimsar) བསོད་ནམས་ཆོས་སྒྲོན(Sonam Choedron)་བཅས་ཡིན་འདུག དེབ་འདིའི་མིང་ལ་། ནམ་མཁའི་མེ་འཁོར་( Sky Train)ཞེས་འདོགས་དོན་ནི། ཕྱི་ལོ་༢༠༠༧ལོར་དེབ་འདིའི་རྩོམ་པ་པོ་ཡང་བསྐྱར་བོད་ལ་ཕྱིན་འདུག་ཅིང་། ཉེ་བའི་ལོ་ངོ་བཅུ་ཕྲག་འགའི་སྔོན་ནས་བཟུང་། རྒྱ་ནག་གིས་མདོ་དབུས་མཐོ་སྒང་དུ་ལྕགས་ལམ་འཐེན་ཏེ་བོད་ཀྱི་གཏེར་དངོས་ཕོན་ཆེ་རྒྱ་ནང་ལ་དབོར་འདྲེན་བྱེད་འགོ་ཚུགས་པ་དང་དེ་ནི་བོད་ཡུལ་ལ་བཙན་འཛུལ་གཉིས་པ་ཞིག་འགོ་བཙུགས་པའི་རྣམ་པ་མངོན་ཅིང་། རྣམ་པ་དེ་གཙོར་བཟུང་གིས་དེབ་ཀྱི་མིང་ལ་ཡང་ནམ་མཁའི་མེ་འཁོར་(Sky Train)ཞེས་བཏགས་འདུག་ཟེར།

དེབ་འདིའི་སྒྲོམ་གཞི་ནི།
སྔོན་གླེང་།
གླེང་བརྗོད།
ངོ་སྤྲོད།
དང་པོ། ནམ་མཁའི་མེ་འཁོར།
གཉིས་པ། བྱང་ཐང་གི་ཞོགས་པ།
གསུམ་པ། ལྷ་ས།
བཞི་བ། ཧི་མ་ལ་ཡ་འཕྲེད་ཀྱིས་བཅད་པ།
ལྔ་བ། རྡ་ལམ་ས་ལ།
མཇུག་བྱང་།
མཆན་འགྲེལ།
ཚིག་ཚོགས།
ཆེད་བརྗོད།
རྩོམ་པ་པོའི་སྐོར། བཅས་ཡིན་འདུག

དེབ་འདིར་ཨ་རིའི་ནང་དུ་དོ་སྣང་ཇེ་ཆེར་འགྲོ་གིན་ཡོད་པ་ནང་བཞིན། བརྙན་འཕྲིན་ལས་ཁུངས་དང་རླུང་འཕྲིན་ཁང་། ད་དུང་ཚོགས་པ་སྒེར་བ་དང་མི་མང་འདུས་འཛོམས་སོགས་ཀྱིས་རྩོམ་པ་པོ་གདན་ཞུས་ཀྱིས་དེབ་ཀྱི་སྐོར་ལ་གླེང་མོལ་བྱེད་ཀྱི་ཡོད་འདུག
ཡོང་རྒྱུར་བསྡད་པའི་གླེང་མོལ་གྱི་དུས་ཚོད་རེའུ་མིག་གཤམ་གསལ།

02/28/10 in New York, NY at Rubin Museum of Art,4pm
03/03/10 in New York, NY at Tibet House,7pm
03/04/10 in Amherst, Mass at Hampshire College,7pm
03/05/10 in Cambridge, MA at 7pm
03/08/10 in Cape Cod, 7pm at Cape Cod Community College
03/22/10 in San Francisco at 7pm at CCSF Mission campus
03/25/10 in Mountain View at Books, Inc,7:30pm
03/29/10 in San Francisco at U.S.F Center for the Pacific Rim, 5:30pm
04/14/10 in Palo Alto, CA, 6:30pm at Stanfor University, Old Union Common Rm.
04/17/10 In Grass Valley, 7pm at No. Columbia Schools Cultural Central
04/18/10 in Grass Valley, 1pm at Book Seller Strore

འདི་རུ་བསྣུན་ནས་རྩོམ་པ་པོ་སྒེར་གྱི་ཟིན་བྲིས(http://www.canyonsam.com/index.html)