ཧེ་ཧེ་ལྷ་མོའི་སྙན་ངག

——–སྙིང་མིག

ཁུད་ཁུད་གཅར་ནས་ཤ་གཅུས་རྒྱག་ཀྱང་ཡིད་འཕྲོག་མ་ཁྱོད་ཧེ་ཧེ་ཧེ།།
བྱོལ་བྱོལ་གྱེས་ནས་སོར་རྡེལ་འཕངས་ཀྱང་མཚར་སྡུག་མ་ཁྱོད་ཧེ་ཧེ་ཧེ།།
རྩ་སྒྱེ་དེ་ཚོས་བསྙད་ཅིག་བརྐོས་ཀྱང་གཤིས་འཇམ་མ་ཁྱོད་ཧེ་ཧེ་ཧེ།།
དོ་དོ་དན་དན་ཞིབ་ཞིབ་དཔྱད་དེ་ཧེ་ཧེ་ལྷ་མོ་མཚན་དུ་གསོལ།།

རྒྱ་མཚོ་ཆེན་པོ་རྩར་ལ་འཇོག་ནས་ཀོ་གྱོང་མཆི་མས་སྦོང་མཁན་ཚོ།།
བདུད་རྩི་བསིལ་མ་གློ་ལ་འདོགས་ནས་ཆུ་སྙོག་ཕོར་གང་འཐུང་མི་ཚོ།།
པགས་རྩག་དྲོན་པོ་རྒྱབ་ལ་བཟེད་ནས་གྲངས་བའི་འདར་སིག་རྒྱག་མི་ཚོ།།
ཧེ་ཧེ་ལྷ་མོ་མདུན་དུ་བཤམས་ནས་ལུས་ཕྲ་གཞན་ལ་སྨོན་མི་ཚོ།།

ཏོ་ཏོ་ལྷ་མོ་གནམ་ལ་འགྱོག་པའི་ཀ་དག་མཐོང་ན་ཁོང་དགོད་རེ།།
འབྲི་མོ་ཐོད་དཀར་ཞེ་ལ་བཏགས་པའི་ཨ་ཉོག་དྲན་ན་སྣ་ཤུ་རེ།།
ཤོག་སྒམ་ནང་ནས་སོ་མར་བཏོན་པའི་ནོམ་ཆེན་རྒྱུ་དང་འདྲ་བ་ཡི།།
ཨ་ཞེ་ཧེ་ཧེ་ལྷ་མོ་ཁྱོད་ནི་སེམས་ཀྱི་དྲོད་ཐིག་ཁེ་རུ་མ།།

འཛིན་ཁང་ནང་དུ་ཚུར་ལ་བྱོན་པའི་ལམ་ཕྲན་མར་ནས་དོད་བསྡད་གདའ།།
སྟེང་ནས་སྒུར་སྒུར་བལྟས་བལྟས་དེ་ཡིས་ཕོ་རིགས་ཀུན་གྱི་གཟུགས་པོ་སྒུར།།
ཉལ་ཁང་ནང་དུ་ཕར་ལ་ཕེབས་པའི་གསེང་ལམ་ཡར་ནས་རེད་བསྡད་གདའ།།
གཡོན་ནས་ཀེ་ཀེར་བལྟས་བལྟས་དེ་ཡིས་ཡོད་ཚད་མཇིང་པ་གཡོན་ལ་ཡོ།།

ཏོ་ཏོ་ལྷ་མོའི་སྙན་ངག་བཀླགས་རྗེས་ཞིབ་འཇུག་ནང་དུ་ཁ་རྩོད་ཤོར།།
ཧེ་ཧེ་ལྷ་མོ་ལོགས་སུ་བཏོན་ནས་ཏོ་ཏོ་ལྷ་མོ་ཅི་རེད་ཟེར།།
མཚམས་སྦྱོར་ཀ་ཁ་གཉིས་ཙམ་མིན་པ་དངོས་གཞི་སློབ་མ་མཆིས་སོ་ཅོག།
ཀ་དག་སྟེང་དུ་ལྐོག་ཁ་བྱས་པ་ཀུན་གྱི་སེམས་ལ་ཁྲིགས་སེ་ཡོད།།

དབུ་སྐྲ་རྒྱ་ལྕང་ལོ་མ་དེ་ལ་རླུང་བུས་དྲི་བསུང་སྣོམ་གྱིན་འགི།
ལན་བུ་ཆུན་པོ་གདོང་དུ་འཛར་བས་བདག་གི་སེམས་ཀྱི་རྟ་ཕོ་འདྲོག།
མ་གི་འཁོར་བའི་རྡོ་ལ་བརྡབ་སྟེ་མགོ་བོ་གཅག་ན་སྐྱིད་པ་ལ།།
ཁྱོད་ཀྱི་ཆེད་དུ་དམྱལ་ཁམས་འགྲིམ་ན་གླིང་ཁ་ཞག་མ་གསུམ་ལ་གཏོང་།།

ཞལ་རས་མེ་ཏོག་འདབ་མ་དེ་ལ་གཡུ་སྦྲང་སྐོར་བ་རྒྱག་གིན་གདའ།།
འཛུམ་ཀོང་གོར་གོར་འགྲམ་པར་གླན་པས་བདག་གི་སེམས་ཀྱི་མདའ་མོ་ཟུག།
ཕ་གི་མི་ཡི་སེམས་ཁམས་རྨས་ཏེ་རྐང་པ་གཅག་ན་དགའ་བ་ལ།།
ཁྱོད་ཀྱི་དོན་དུ་འཆི་རྒྱུ་བྱུང་ན་ལོ་སར་ཉི་མ་བཅུ་ལ་གཏོང་།།

སྒེག་ལྡེམ་འཁྲི་ཤིང་སར་པ་དེ་ལ་ལང་ཚོའི་མེ་ཏོག་སྨིན་གྱིན་འདུག།
འཕོང་ཚོས་ཟླུམ་ཟླུམ་གཡུག་ཐེངས་རེ་ཡིས་བདག་གི་དྲན་པ་དེ་རུ་འཐོར།།
རྣམ་ཤེས་རློན་པ་ཚུར་ལ་མ་འོང་ད་ལན་འཆི་ན་སྤྲོ་བ་ལ།།
ཁྱོད་ཕྱིར་ཕྱི་མར་ཆས་རྒྱུ་བྱུང་ན་ཞབས་བྲོ་བདུན་ཕྲག་བདུན་ལ་རྒྱག།

ལྷོད་ཅིང་འཇམ་པའི་གཤིས་ཀ་དེ་ལ་མཛེས་མའི་སྒེག་ཆོས་བསྣན་པ་མོ།།
ཐུབ་པ་རྣམས་ཀྱང་བསམ་གཏན་འཇིག་པའི་མིག་གི་བདུད་རྩི་སྟོབ་པ་མོ།།
ཕོ་བརྒྱའི་སེམས་པ་ཕར་ལ་འཕྲོག་སྟེ་ཚལ་གཏུབ་གྲི་ཡིས་གཙབ་པ་མོ།།
མོ་བརྒྱའི་ཞེ་ལ་སྙིང་རླུང་སློང་སྟེ་རོ་སྟོད་ཟུག་གཟེར་འགྱེད་པ་མོ།།

རྨ་བྱའི་སྒྲོ་གུར་ཕུབ་པར་འདྲ་བ་ཉིན་བཞིན་ཇེ་མཛེས་ཇེ་ཡག་རེད།།
དཔྱིད་ཀའི་མེ་ཏོག་བཞད་པར་འདྲ་བ་ཉིན་བཞིན་ཇེ་རྒྱས་ཇེ་སྨིན་རེད།།
མ་མཐོང་མ་ཐོས་ཉི་མ་རེ་རེ་ལོ་དང་ཟླ་བའི་གཟུགས་སུ་འོང་།།
མ་དྲན་མ་སྒོམ་སྐར་ཆ་རེ་རེ་ཞག་དང་ཟ་མའི་རྣམ་ཤེས་སྦྲུམ།།

སྙན་ངག་འབྲི་བཞིན་ཡོོད་ཁུལ་བྱས་ཏེ་ལྐོག་ལྟས་སྒུམ་བུ་ཞིབ་ཏུ་བཏུས།།
བྱིའུ་ཞིག་ཡིན་ན་མཆུ་ཟོར་འདེབས་ནས་སྐེ་ལ་རྨ་ཞིག་མི་བཟོ་རེ།།
གྱོད་དང་ཁ་མཆུའི་འདམ་ལ་ཚུད་དེ་སྒྲོ་གཤོག་བཏོག་ན་དགའ་བ་ལ།།
གཏམ་དང་མྱི་ཁ་གྲོང་ལ་མཆེད་དེ་རྒྱ་སྡེས་འཕྱ་ན་སྐྱིད་པ་ལ།།

ཕར་ཁ་སྐོར་ན་རྟ་བརྒྱ་རི་བའི་ཨོང་ཤ་དེ་ལ་ཞིམ་སྣང་ཤར།།
ཁྱོད་ཉིད་མཐོང་ཚེ་མཆིལ་མ་མིད་པའི་བུ་རེའི་འགྲམ་ན་ཁྲོག་སྒྲ་རེ།།
ཚུར་ཁ་སློག་ན་མཛོ་བརྒྱ་རི་བའི་འོ་འཛིན་དེ་ལ་མངར་སྣང་ཤར།།
ཁྱོད་ཉིད་ཐོས་ཚེ་ཧུ་རེ་ཧྲེང་བའི་བུ་རེའི་གམ་ན་ཐོ་ཡོར་རེ།།

ཞི་མི་བཞུད་པའི་བཞུད་སྟངས་མ་རེད་དེ་ཕོ་འགྲོ་སྟངས་འདྲ་བ་ལ།།
སུ་གེ་སྤོ་བའི་འདེགས་འཇོག་རེ་ལ་ལྡེམ་ལྡེམ་ཡག་མོ་གསུམ་རེ་འགི།
ཟླ་བ་བཞད་པའི་བཞད་སྟངས་མ་རེད་མེ་ཏོག་འཛུམ་སྟངས་འདྲ་བ་ལ།།
དུང་སོ་ངོམ་པའི་དགོད་ཐེངས་རེ་ལ་མཚར་མཚར་ལྟད་མོ་བརྒྱད་རེ་འགི།

གཤིས་ཀ་ཡག་མོ་དེ་ཡི་སྒང་ལ་བརྩོན་འགྲུས་མེ་ལས་ཚ་བ་ལ།།
ཤེས་རབ་རྣོན་པོ་དེ་ཡི་ཐོག་ཏུ་གུ་ཡངས་མཚོ་ལས་ཟབ་པ་ལ།།
གསུང་སྐད་འཇེབས་མོ་དེ་ཡི་ཞོར་དུ་དག་གཙང་བལ་ལས་འཇམ་པ་ལ།།
ཞིབ་ཞིབ་ནན་ནན་ཇི་ཙམ་བརྟག་ཀྱང་ཉིན་བཞིན་ཇེ་དགའ་ཇེ་མགུ་རེད།།

ཁ་རྩང་ལག་རྩེད་ཕོ་ལོང་ཐང་ནས་ཏོ་ཏོ་ལྷ་མོས་ཁྱོད་ལ་ལྟ།།
ད་ནངས་འཛིན་ཁང་སྒོ་རྭའི་ནང་ནས་ཐོད་དཀར་འབྲི་མོས་ཁྱོད་ལ་སྒུག།
སྒེག་འགྲོས་ངོམ་སྟངས་བརྐུ་སེམས་མིན་ན་ཨོང་དོ་གཡུག་གིན་གཡུག་གིན་ཤོག།
མཚར་སྡུག་ལང་ཚོ་བསྡུར་འདོད་ཡིན་ན་བློ་བཟང་དབང་རྒྱལ་སྐད་ཅིག་ཐོངས།།

ང་ནི་ངོ་ཚ་སྨིན་ཐག་ཆོད་ནས་ཚུར་ལ་གཟིགས་ན་ཟ་འུ་ལངས།།
ལྕགས་ཀྱི་འབག་ཅིག་གཡར་རྒྱུ་རྙེད་ན་ཕར་ལྟ་ཚུར་ལྟ་མི་བྱེད་རེ།།
ཁྱོད་ནི་གཤིས་ཀ་ཡག་ཐག་ཆོད་ནས་ཕར་ལ་བལྟས་ན་འཛུམ་མདངས་ཕྱུངས།།
ཐིམ་ཐིམ་ནེམ་ནེམ་བརྩེ་བ་འདྲེས་ན་ཚེ་གཡོག་མགོ་ནག་མི་བྱེད་རེ།།

ཧེ་ཧེ་ལྷ་མོ་ལྷ་ཞིག་མིན་པ་སྟག་ཤར་འདི་ཚོ་བསོད་བདེ་རེད།།
ཧེ་ཧེ་ལྷ་མོ་མི་ཞིག་མིན་པ་ཁོ་བོའི་སེམས་ཀྱི་འཆར་སྒོ་རེད།།
ཧ་ཧ་ཧེ་ཧེ་ཧུ་ཧུ་འདི་ཡང་ཁྱོད་ཀྱི་དངོས་གྲུབ་རྣལ་མ་ཡིན།།
ཧོ་ཧོ་ཧི་ཧི་ཧང་ཧང་འདི་ཡང་ཁྱོད་ཀྱི་བྱིན་རླབས་དག་མ་ཡིན།།

༢༠༡༥།༡།༡༩

ས་རཱ་བོད་ཀྱི་ཆེས་མཐོའི་གཙུག་ལག་སློབ་གྲྭ་རུ་སྦྱར།

མཆན། ༡ ཀ་དག་ཅེས་པའི་རྩོམ་པ་པོ་ཞིག་གིས་ཏོ་ཏོ་ལྷ་མོ་ཟེར་བའི་བུ་མོ་ཞིག་ལ་ཏོ་ཏོ་ལྟ་མོའི་སྙན་ངག་ཅེས་པ་ཞིག་འབྲི་མྱོང་།

༢ ཨ་ཉོག་ཅེས་པའི་རྩོམ་པ་པོ་ཞིག་གིས་འབྲི་མོ་ཐོད་དཀར་མ་ཟེར་བའི་བུ་མོ་ཞིག་ལ་འབྲི་མོ་ཐོད་དཀར་མ་ཟེར་བ་ཞིག་འབྲི་མྱོང་།