སྐད་འཕྲིན་ཡིན་ནམ་རྐུན་འཕྲིན་ཡིན།

དེ་རིང་ངོ་དེབ་སྟེང་གི་རྩོམ་ཡིག་ཅིག་བཀླགས་ཚར་རྗེས་སླར་ཡང་གསར་འགྱུར་དེ་འཚོལ་དགོས་པར་གྱུར། ངས་རྩོམ་ཡིག་འདི་མཐོང་བ་ཐེངས་གསུམ་པ་དེ་ཡིན་བསམས་བྱུང་། ཐོག་མར་བསྟན་འཛིན་རྡོ་རྗེ་ལགས་ཀྱི་ངོ་དེབ་དང་དེའི་རྗེས་སུ་མཁས་པ་ཚེ་རིང་ཤཱཀྱ་ལགས་ཀྱི་ངོ་དེབ་གཉིས་རེད། ད་ཡང་བསྐྱར་བརྟགས་སྐབས་མཁས་པ་ཚེ་རིང་ཤཱཀྱ་ལགས་ཀྱིས་འདི་ལ་མཆན་ཐུང་ཞིག་ཀྱང་བཞག་འདུག མཆན་ཐུང་དེར། “བོད་མིའི་ནང་ཁུལ་དུ་སྐད་འཕྲིན་ནི་ཧ་ཅང་གྲགས་ཆེ་ཡིན་པ་དང་། བོད་ནང་གི་གྲོགས་པོ་དག་དང་ལྷན་དུ་སྐད་འཕྲིན་འདི་སྤྱོད་རྒྱུ་ལས་གཞན་པའི་འདམ་ཁ་མི་འདུག” ཅེས་བྲིས་འདུག ད་དུང་བོད་མི་འོད་ཟེར་ཚེ་རིང་ཞུ་བ་ཞིག་གིས་རྩོམ་ཡིག་འདི་བཀླགས་པ་ལ་བརྟེན་ནས་སྐད་འཕྲིན་སྒོ་བརྒྱབ་པ་ཡིན་ཞེས་ཀྱང་གསུངས་འདུག དེ་ལྟར་ན་རྩོམ་ཡིག་འདི་ནི་སྐད་འཕྲིན་གྱི་སྐོར་ལ་ཡིན་པ་དང་། རྩོམ་ཡིག་སྤེལ་ས་ནི་ Slate.com ཞེས་པའི་དྲ་རྒྱ་དེ་ཡིན་པ་རེད། རྩོམ་ཡིག་འདི་འབྲི་མཁན་ནི་ Nathan Freitas ཞུ་བ་ཡིན་པ་དང་། རྩོམ་ཡིག་འདི་ ཟླ་བ་འདིའི་ཚེས་ ༦ ཉིན་སྤེལ་འདུག

འདིར་བཤད་པའི་གནད་དོན་མང་པོ་ཞིག་ནི་ང་ཚོ་ལ་འབྲེལ་བ་ཆེ་བ་མ་ཟད། ང་ཚོས་སྐད་འཕྲིན་སྤྱོད་མཚམས་མ་བཞག་ཀྱང་སྐད་འཕྲིན་དུ་སྐད་ཆ་བཤད་སྐབས་གཟབ་གཟབ་བྱེད་རྒྱུར་ཕན་ངེས་པའི་ཆ་ནས་འདིར་རོབ་ཙམ་བསྒྱུར་ཡོད། འོན་ཀྱང་བྲེལ་སྟབས་ཀྱིས་བསྒྱུར་པ་དང་། འཕྲུལ་རིག་གི་བརྡ་ཆད་ལ་རྒྱུས་མངའ་མེད་སྟབས་འགྱུར་ནོར་བ་དང་གོ་མི་བདེ་བ་སོགས་ཡོད་ཚེ་དགོངས་འགལ་མེད་པ་ཞུ་ཞིང་། ཟུར་གསལ་འབྲེལ་ཐག་ལ་བསྣུན་ནས་མ་ཡིག་ལ་གཟིགས་པ་དང་བསྐྱར་བཅོས་ཡོང་བའི་རེ་བ་ཞུ་བ་ཡིན། མ་ཡིག་

འཛམ་གླིང་ཁྱོན་གྱི་མི་རྣམས་ཀྱིས་དྭང་བླང་གི་ཐོག་ནས་རྒྱ་ནག་གི་མེ་ཡི་ལྕགས་རི་ལ་མགོ་འབུལ་བྱེད། ཅིའི་ཕྱིར།
འདས་པའི་ལོ་ཤས་ནང་། རྒྱ་ནག་གི་བཟོ་གྲྭ་ཊེན་སེན་ཊི་ (Tencent)ཞེས་པས་བཟོ་སྐྲུན་བྱས་པའི་ལག་འཁྱེར་ཁ་པར་གྱི་འཕྲིན་གཏོང་མཉེན་ཆས་སྐད་འཕྲིན་(Weixin)ཞེས་པ་དེ་རྒྱ་ནག་ནང་ཁུལ་ཙམ་དུ་མ་ཟད་འཛམ་གླིང་ཁྱོན་ཡོངས་ལ་འཕེལ་རྒྱས་གནམ་ལ་སྙེག་པ་ཞིག་བྱུང་། རྒྱ་ནག་ནང་ཁུལ་གྱི་ལག་འཁྱེར་ཁ་པར་སྤྱོད་མཁན་ས་ཡ་ ༥༠༠ ལ་མཚོན་ན། འཕྲིན་གཏོང་མཉེན་ཆས་ WhatsAppདང་། Viber། Line། Twitter། Facebook བཅས་ནི་གཏན་འགོག་གམ་ཡང་ན་ཡང་ཡང་འགོག་རྐྱེན་སྤྲད་པ་ལ་བརྟེན་ནས། སྐད་འཕྲིན་མཉེན་ཆས་ནི་ལག་ཁྱེར་འཕྲིན་གཏོང་ཆེད་བེད་སྤྱོད་བྱེད་རྒྱུར་ལྷག་ཡོད་པའི་མཉེན་ཆས་ཁྲོད་ཀྱི་གཅིག་ཏུ་གྱུར་ཡོད། འཛམ་གླིང་ས་ཁུལ་གཞན་དུ་ཡོད་པའི་ལག་འཁྱེར་སྤྱོད་མཁན་ས་ཡ་ ༡༠༠ ལྷག་ལ་མཚོན་ན། ཧ་ཅང་སྤྱོད་བདེ་བའི་ཉམས་མྱོང་དང་། གྲགས་ཆེ་བའི་ཁྲོམ་བསྒྲགས། དེ་བཞིན་ “འཕྲིན་གཏོང་དང་ཁ་བརྡ་བྱེད་པ་རིན་མེད་ཡིན་པའི་”ཁས་ལེན་བྱས་པ་དེ་དག་ལ་བརྟེན་ནས་ཐག་རིང་ན་གནས་པའི་ཕྱི་སྡོད་རྒྱ་མི་རྣམས་ཀྱིས་མཉེན་ཆས་འདི་མ་ལེན་ཐབས་མེད་ལྟ་བུ་ཞིག་ཏུ་གྱུར་ཡོད། དེ་བཞིན་འཛམ་གླིང་ཁྱོན་གྱི་སྐད་འཕྲིན་འདིའི་རྟེན་གཞི་གཞན་ཞིག་ནི་བཙན་བྱོལ་བོད་མིའི་སྤྱི་ཚོགས་ཡིན་པ་དང་། ཁོང་ཚོས་སྐད་འཕྲིན་བརྒྱུད་ནས་སྔར་བྱུང་མ་མྱོང་བའི་ཚོད་ཅིག་ཏུ་ཧི་མ་ལ་ཡའི་རི་རྒྱུད་ཕན་ཚུན་དུ་ཧ་ལམ་དུས་མཚུངས་སུ་འབྲེལ་བ་མཐུད་པ་བྱུང་བ་རེད།

རྒྱ་ནང་གི་མཉེན་ཆས་སྤྱོད་མཁན་རྣམས་ཀྱིས་མེ་ཡི་ལྕགས་རི་ལ་འགོས་ནས་ཕྱིར་ཐོན་ཐབས་བྱེད་པ་དེའི་དོད་དུ། འཛམ་གླིང་ཕྱི་རོལ་གྱི་མི་རྣམས་ཀྱིས་ཕར་སྒོ་འགྲམ་དུ་བཅར་ནས་སྒོ་བརྡུངས་བཞིན་ནང་དུ་འཇུག་རོགས་ཞུ་བཞིན་ཡོད། WhatsAppདང་། Twitter ལྟ་བུའི་མཉེན་ཆས་ཀྱིས་བྱེད་པ་ཇི་བཞིན། ཁྱེད་ཀྱིས་སྐད་འཕྲིན་(Wechat)བརྒྱུད་ནས་བརྡ་འཕྲིན་གཏོང་ཐེངས་རེ་རེ་ལ་བརྡ་འཕྲིན་དེ་དག་རྒྱ་ནག་གི་བཟོ་གྲྭ་ཊེན་སེན་ཊི་ (Tencent)ཡིས་བཀོད་འདོམས་བྱས་པའི་ཡིག་མཛོད་མ་སྒམ་དེ་བརྒྱུད་ནས་འགྲོ་བཞིན་ཡོད། གནད་དོན་ཕལ་མོ་ཆེ་ལ་ཆ་བཞག་ན། ཡིག་མཛོད་མ་སྒམ་ནི་རྒྱ་ནག་ནང་ཁུལ་དུ་གནས་བཅས་ཡོད་ཅིང་། སྐབས་མང་པོར་ཧྲང་ཧེར་རྟེན་གཞི་བྱས་པའི་ཡིག་མཛོད་ལྟེ་གནས་དག་ན་ཡོད། ཡིན་ན་ཡང་། རྒྱལ་ཁབ་འགའ་ཞིག་ལ་ཡུལ་ལུང་དེའི་ནང་ས་གནས་ཀྱི་མ་སྒམ་དེ་འཛུགས་གཉེར་བྱས་ཡོད། ཡིག་མཛོད་མ་སྒམ་འདི་དག་ནི་རྒྱ་ནག་གི་ཁྲིམས་དང་སྒྲིག་གཞི། ཤུགས་རྐྱེན་བཅས་ཀྱིས་བསྙབས་ཆོག་ཆོག་ཏུ་ཡོད་ལ། མ་སྒམ་འདི་དག་བརྒྱུད་ནས་བསྐྱོད་བཞིན་པའི་ཡིག་ཚགས་ཚང་མ་ལ་རྒྱ་ནག་གིས་ལྟ་རྟོག་དང་སྟངས་འཛིན་བྱེད་ཆོག་ཆོག་ཏུ་ཡོད་པ་རེད།

སེམས་ཁྲལ་ཐོག་མ་དེ་གང་རེད་ཟེར་ན། རྒྱ་ནག་གིས་བརྗོད་གཞི་བྱེ་བྲག་པ་དང་ཚིག་འབྲུ་བྱེ་བྲག་པ་ཞིག་ལ་སྟངས་འཛིན་བྱེད་དགོས་པའི་དགོས་འདུན་དེ་རྒྱ་ནག་གི་ས་མཚམས་བརྒལ་ནས་འགྲོ་རྒྱུའི་མགོ་ཚུགས་གི་རེད། The Citizen Lab ཞེས་པའི་ཚོགས་པ་འདིའི་ཨེ་ཤ་ཡའི་འཕྲིན་གཏོང་གླེང་མོལ་སྐོར་ལ་ཞིབ་འཇུག་བྱས་ནས་བསྟན་དོན་ལྟར། སྟངས་འཛིན་བྱེད་པའི་གལ་གནད་ཀྱི་ཚིག་འབྲུ་དེ་དག་ནི་ས་ཁམས་ལ་ལྟོས་ཏེ་སྣ་ཚོགས་པ་ཞིག་ཡིན། གལ་སྲིད་ཁྱེད་རང་གིས་ཧོང་ཀོང་སློབ་མའི་ལས་འགུལ་གྱི་མིང་ཚིག་ “Occupy Central”དེ་བརྗོད་བྱར་བྱས་ཏེ་པེ་ཅིང་ནས་སྐད་འཕྲིན་བརྒྱུད་ཁྲིན་ཏུའི་ཁུལ་གྱི་མི་ཞིག་ལ་བཏང་བ་ཡིན་ན་དེ་ཕལ་ཆེར་འགོག་གི་རེད་ལ། དེ་མཚམས་ཁྱེད་ཀྱི་ལོ་རྒྱུས་ལའང་རྟགས་བརྒྱབ་ཡོད་པ་རེད། གལ་སྲིད་ཁྱེད་ཀྱིས་བརྗོད་བྱ་དེ་ག་རང་སྐད་འཕྲིན་བརྒྱུད་དེ་ཁེ་ན་ཌའི་གྲོང་ཁྱེར་ཊོ་རོན་ཊོ་ནས་ཨ་རིའི་གྲོང་ཁྱེར་ནིའུ་ཡོག་གི་མི་ཞིག་ལ་བཏང་བ་ཡིན་ན། ཁྱེད་རང་གི་སྐད་དེ་ཕལ་ཆེར་འཕྲོད་འགྲོ་གི་རེད། འོན་ཀྱང་ཁྱེད་ཀྱི་ལོ་རྒྱུས་ལ་རྟགས་འདེབས་རྒྱུ་ཧ་ལམ་གཏན་འཁེལ་བ་ཞིག་རེད།

སེམས་ཁྲལ་གཉིས་པ་དེ་ག་རེ་རེད་ཟེར་ན། རྒྱ་མིའི་མི་སེར་ཡིན་མིན་གང་ལྟར་ཡང་རྒྱ་ནག་ཕྱི་རོལ་ན་ཡོད་པའི་སྐད་འཕྲིན་སྤྱོད་མཁན་རྣམས་ཀྱི་ཁ་བརྡ་རྣམས་ནི་ཟིན་ཐོར་འདེབས་པའམ་རྟོག་ཞིབ་བྱེད་ཆོག་ལ། མ་འོངས་པར་དེ་དག་ནི་སྤྱོད་མཁན་ཁོ་རང་ཚོ་ལ་རྒོལ་ཆེད་བེད་སྤྱོད་བྱེད་ཀྱི་རེད། གལ་སྲིད་ཁྱེད་རང་ཨ་རིའི་གྲོང་ཁྱེར་ སཱན་ ཧྥ་རན་སི་སེ་ཁོ་(San Francisco)ཞེས་པའི་ནང་ཡོད་པར་ཆ་ཞོག ཁྱེད་ཀྱིས་ བོད་ཀྱི་རང་ལུས་མེར་སྲེག་གམ་ཡང་ན་ཡུ་གུར་བའི་སྡེ་ཁག་ལ་ཤ་ཞེན་བྱེད་མཁན་གྱི་སྐད་འཕྲིན་ཚོགས་པ་ཞིག་ལ་ཞུགས་པ་དང་། ཚོགས་པ་དེའི་ཚོགས་མི་འགའ་ནི་བོད་དམ་ཡང་ན་ཤིན་ཅང་། རྒྱ་ནག་བཅས་སུ་ཡོད་པ་ཡིན་ན། དེ་ནས་ཁྱེད་ཀྱི་སྐད་འཕྲིན་བཏང་བ་ཡོད་ཚད་དང་། ཁྱེད་རང་ཚོགས་པ་དེའི་ནང་ཞུགས་བཞིན་པ་བཅས་ནི། རྒྱ་ནག་གཞུང་གི་དབང་འཛིན་པ་རྣམས་ཀྱིས་བཀའ་ཁྲོལ་ལག་འཁྱེར་སྤྲད་པའི་ཊེན་སེན་ཊི་ (Tencent)ཞེས་པ་འདིས་སྟངས་འཛིན་བྱས་པའི་ཡིག་མཛོད་མ་སྒམ་ལྟེ་བ་དེ་ལ་བརྒྱུད་སྤྲོད་བྱེད་ཀྱི་རེད། ཁྱེད་ཀྱི་སྐད་འཕྲིན་ཁ་བྱང་རྩིས་ཁྲ་དེ་ནི་ཁྱེད་ཀྱི་ཁ་པར་ཨང་གྲངས་ངོ་མ་དང་། སིམ་འཛིན་བྱང་(SIM card)ལ་མཐུད་ཡོད་པའི་རྒྱུ་མཚན་གྱིས། ཁྱེད་ཀྱི་ཁ་པར་ནང་གི་ཁ་བྱང་ལག་དེབ་དེ་སྐད་འཕྲིན་མཉེན་ཆས་ཀྱིས་སྔོག་བཤེར་བྱེད་ཐུབ་ཅིང་། དེ་ནས་ཁྱེད་ཀྱི་མིང་ངོ་མ་དང་། ཁྱེད་ཀྱི་སྡེ་ཁག་ཚང་མ་ནི་ རྒྱ་ནག་གིས་ ཨ་ཡེ་སི་ (Islamic State) དང་ (al-Qaida) ཨལ་ཁེ་དྷ་ལྟར་གནོད་ཅན་དུ་བརྩི་བའི་གོང་གསལ་ཚོགས་པ་དག་ལ་ཤ་ཞེན་བྱེད་མཁན་ཡིན་པར་རྟགས་རྒྱག་གི་རེད། ད་རྒྱ་ནག་གི་ཐོངས་མཆན་ཐོབ་རྒྱུ་བཀྲ་ཤིས་བདེ་ལེགས་རེད།

སེམས་ཁྲལ་གསུམ་པ་དེ་ག་རེ་རེད་ཟེར་ན། མཉེན་ཆས་འདིའི་རིགས་ནི་དམིགས་འབེན་དུ་བཟུང་བའི་ཡོ་ཆས་དེའི་ནང་གི་ཡིག་ཚགས་ཡོད་ཚད་སྡེབ་འདོན་དང་ཡང་ན་དྲ་བའི་ནད་འབུ་ནང་འཇུག་ཆེད་སྤྱད་ཆོག་པ་དེ་རེད། སྤྱི་ཚོགས་བརྒྱུད་ལམ་གྱི་མཉེན་ཆས་ཕལ་མོ་ཆེ་ཇི་བཞིན། ཀུ་ཤུའི་ཁ་པར་( iPhone)དང་ཨན་ཌི་རིའོ་ཌི་(Android)ནང་བཅུག་པའི་སྐད་འཕྲིན་མཉེན་ཆས་ལ་ཡང་། ཁྱེད་རང་གི་ཁ་པར་གྱི་སྒྲ་འཛིན་ལྡེ་མིག་(microphones)དང་པར་ཆས་ཁ་འབྱེད་པ། ཁྱེད་ཀྱི་སྡོད་གནས་རྗེས་འདེད་གཏོང་བ། ཁྱེད་ཀྱི་ཁ་བྱང་ལག་དེབ་དང་པར་རིགས་ལ་སྔོག་བཤེར་བྱེད་པ་བཅས་ལ་ཆོག་མཆན་ཆ་ཚང་ཡོད་པ་རེད་ལ། ཁྱེད་ཀྱི་ཡིག་ཚགས་འདི་ཚོ་ཚང་མ་ག་དུས་ཡིན་ཡང་ཁོང་ཚོའི་ཡག་ཚགས་མ་སྒམ་ནང་ཕབ་བཤུ་བྱེད་ཆོག་ཆོག་ཡོད་པ་རེད། འདི་ལྟ་བུའི་ནུས་པ་ནི་དྲ་འབུའི་གནོད་འཚེ་ ཪེ་ཊེ་(RAT) ཟེར་བ་(Remote Access Trojan)ཐག་རིང་ནས་ལས་འཇུག་བྱེད་ཐུབ་པ་དེ་གཏོང་བ་ལ་ཧ་ཅང་སྟབས་བདེ་པོ་ཡོད་པ་རེད། ནམ་རྒྱུན་དེ་དག་ནད་ཡམས་འགོས་ཟིན་པའི་པི་ཌི་ཨེ་ཧྥི་ (PDF) ཡིག་ཆ་བརྒྱུད་ནས་གློག་ཀླད་ནང་སིམ་འཛུལ་བྱེད་ཀྱི་རེད། སྐད་འཕྲིན་ལ་ཆ་བཞག་ན། སྤྱོད་མཁན་གྱིས་ ནུས་པ་འདི་དག་ལ་དང་ལེན་ཞུ་བ་དང་། དེ་བཞིན་“དཀོན་མཆོག་གི་རྣམ་པ་”ཅན་གྱི་སྤྱི་ཚོགས་བརྒྱུད་ལམ་ཀུན་སློང་བཟང་པོ་ཡིན་སྲིད་པ་གང་ལ་ཡིད་ཆེས་བྱས་པ་དང་མཉམ་དུ་མ་ཤེས་པའི་ཐོག་ནས་རང་རང་གི་ཁ་པར་ཐོག་ནས་དགྲ་ཟླ་མཐོ་ས་རྒྱ་ནག་གི་དྲ་དམག་འཁོར་བཅས་ལ་ལྟག་སྒོ་སླ་མོ་ཞིག་ཕྱེས་ཡོད་པ་རེད།

ཁ་པར་བཟོ་གྲྭ་ Huawei དང་ Xiaomi ནས་ཐོན་པའི་ལག་ཁྱེར་ཁ་པར་གོང་ཁེ་པོ་དང་སྙིང་རྗེ་པོ་ཡིན་པ་དེ་དག་རྒྱ་གར་དང་ས་ཁུལ་གཞན་དུ་བཙོང་བཞིན་ཡོད་ལ། དེ་དག་གི་ནང་དུ་རྒྱ་ནག་གི་་གློག་ཀླད་མཉེན་ཆས་མཁོ་ལག་སྤྲོད་ཆས་(cloud services)ཡོད་ཡོད་ཡིན་པ་རེད། དེ་ལྟར་ཁ་པར་དང་མཉེན་ཆས་མཉམ་རུབ་ཀྱི་ཐོག་ནས་ ད་ཆ་རྒྱ་ནག་གི་རྒྱང་བསྲིངས་འཕྲིན་གཏོང་འདིའི་སྙོབ་ཚད་དང་ཤུགས་རྐྱེན་དེ་ཧ་ཅང་རྒྱ་ཆེར་བསྐྱེད་པ་ཞིག་འཛམ་གླིང་གིས་མཐོང་བཞིན་ཡོད་ལ། དེ་ཡང་སྤྱོད་མཁན་རྣམས་ཀྱིས་རང་མོས་ཀྱིས་འདམས་ནས་དེའི་ཆ་ཤས་བླངས་པ་ལ་བརྟེན་ནས་སྟོབས་ཅན་དུ་གྱུར་པ་ཞིག་རེད། ད་དྲི་བ་ཨ་མ་དེ་ནི། རྒྱ་ནག་གི་མཉེན་ཆས་ལྟེ་གནས་འདི་དག་གི་རྒྱབ་ན་ཡོད་པའི་རྒྱ་ནག་གི་བཟོ་གྲྭ་དག་ལ་རྒྱའི་མི་སེར་མིན་པའི་འཛམ་གླིང་གི་བཀོལ་སྤྱོད་པ་རྣམས་ཀྱི་སྒེར་གྱི་ཐོབ་དབང་སྲུང་སྐྱོབ་བྱེད་པའི་ཁྲིམས་མཐུན་གྱི་འོས་འགན་དང་ཁྲོམ་རྭའི་འདུ་ཤེས་ཤིག་ཡོད་དམ། ཁོང་ཚོས་མ་བསྐུལ་དྭང་བླངས་སམ་ཡང་ན་རང་འགུལ་གྱི་ཐོག་ནས་ཡིག་ཚགས་ཡོད་ཚད་རྒྱ་ནག་སྤྱི་བདེ་ལས་ཁུངས་སམ་ཆ་འཕྲིན་ལས་ཁུངས་ལ་སྤྲོད་རྒྱུ་ཡིན་ནམ། ང་ཚོས་གང་མགྱོགས་ སྐད་འཕྲིན་ལ་བཀྲམས་པའི་ “སྒེར་བདག་གི་”ཡིག་ཚགས་ཀྱི་རྐྱེན་བྱས་ཏེ་ཕྱི་རྒྱལ་བའི་བཀོལ་སྤྱོད་མཁན་རྣམས་འབེན་དུ་བཟུང་བའམ་ཁྲིམས་ལ་སྦྱར་པ་དེ་འདྲ་མཐོང་རྒྱུ་ཡིན་ནམ། མཐའ་མ་དེར་རང་སྐྱོན་ཤེལ་སྒོར་འཆར་བའི་དཔེ་ཐོག་ནས་ཞུས་ན། རྒྱའི་མི་སེར་ཞིག་གིས་ WhatsApp དང་ Google བེད་སྤྱོད་བྱེད་པ་དང་། ཨ་རིའི་མི་སེར་ཞིག་གིས་ སྐད་འཕྲིན་བེད་སྤྱོད་བྱེད་པ་གཉིས་བསྡུར་ན། སྒེར་གྱི་ཐོབ་དབང་ལ་ཕོག་པའི་ཤུགས་རྐྱེན་ཐད་གཞི་རྩའི་མི་མཚུངས་ས་དེ་འདྲ་ཡོད་དམ།

མི་ཚང་མ་ལ་ཕན་ཚུན་འབྲེལ་མཐུད་ཆེ་བ་ཡོང་བ་དང་དེ་བཞིན་ཤེས་བྱ་རྣམས་ལ་རིན་མེད་དང་ཚད་བཀག་མེད་པའི་སྒོ་འབྱེད་བྱེད་དགོས་པར་འདོད་པ་དང་ཆབས་གཅིག་ཏུ། ཁོང་ཚོའི་སྒེར་གྱི་ཐོབ་དབང་དང་བརྩི་མཐོང་ཡང་སྲུང་སྐྱོབ་བྱེད་རྒྱུ་ལ་བདག་གཅེས་བྱེད་རྒྱུར་འདོད་པ་ཡོད་མཁན་གྱི་འཛམ་གླིང་གི་སྤྱི་ཚོགས་ཁྲོད་དུ་ཡོད་པའི་ང་ཚོ་ལ་ཆ་བཞག་ན། གཞི་རིམ་གྱི་གནད་དོན་འདི་དག་ལ་ངེས་པར་དུ་སློབ་སྦྱོང་བྱེད་པ་དང་གོ་རྟོགས་འཕེར་བ། ལས་འགན་སྒྲུབ་པ་བཅས་བྱེད་དགོས། སའི་གོ་ལའི་སྟེང་གི་འབྱུང་འགྱུར་གྱི་མི་དུང་ཕྱུར་ ༥༠ ནི་རང་དབང་གི་ས་ཁུལ་ལས་བཙན་གནོན་འོག་གི་ས་ཁུལ་ཞིག་ཏུ་འཚོ་གནས་བྱེད་པར་ཁ་ཕྱོགས་ཡོད་ལ། ང་ཚོས་ཏན་ཏན་ཁོང་ཚོ་ “རང་དབང་དང་ཚད་བཀག་མེད་པའི་ཁ་ཕྱོགས་”ཤིག་ལ་འབྲེལ་འདོད་པའི་འདུན་པ་དེས་ཁོང་ཚོ་སྣང་བརྙན་གྱི་ལྟ་སྲུང་བཙོན་ཁང་ཞིག་ཏུ་མི་ཆུད་པ་ངེས་པར་བྱེད་དགོས།