སྐྱབས་མགོན་ལགས། མངོན་པར་བསྟོད།

རེབ་སྨད་ལྷའུ།

སྒང་བ་བོད་ཀྱི་ཕ་གཞིས་དེ། སེར་མིན་སྐྱ་མིན་གྱི་སྒེར་གཅོད་པ་ཚོས་ཡུན་རིང་ལོངས་སུ་སྤྱད་མཐར། ཁྱིམ་མཚེས་གཅན་གཟན་གཏུམ་པོས་གླགས་རྙེད་དེ་ཁྱུར་མིད་གཏོང་ལ་ཉེ་བ་ན། ཡུལ་མི་དང་ཕ་གཞིས་དགྲ་ལག་ཏུ་གཏད་པའི་ནག་ཉེས་ལས་གཡོལ་ཆེད་དུ། ཁོ་ཚོས་འགན་འཁྲི་ཡོད་ཚད་སྐུ་ན་མ་སོན་པ་ཁྱེད་ཀྱི་དབུ་ལ་གཡོགས།
དེ་ལྟ་ནའང་། རྒྱལ་ཕམ་དང་འཆི་གསོན་གྱི་འགག་འཕྲང་དོག་མོ་ནས། ཁྱེད་ཀྱིས་རང་ཉིད་ཀྱི་སྐུ་སྲོག་གཏའ་མར་བཞག་སྟེ། རྣམ་དཔྱོད་དང་ནུས་པ་ཡོད་རྒུ་གནངས་ཏེ་ཕ་གཞིས་དང་ཡུལ་མི་སྐྱོབ་པར་འབད།
ཡིན་ནའང་ཕྱི་ནང་གི་འགལ་རྐྱེན་ཆེ་བ་དང་། དགྲ་ནག་གི་གཡོ་སྒྱུ་དང་གདུག་རྩུབ་ཀྱི་དཔུང་ཁ་ཤིན་ཏུ་རྣོ་བས། དཔུང་མེད་དཔའ་བོ་ཁེར་རྒྱུག་གིས་ཕ་གཞིས་སྐྱོབ་ཐབས་བྲལ།
དེ་ནས་ཁྱེད་རང་ཕྱི་གཟིགས་དང་འཕྲང་སེམས་གྲངས་མེད་ཀྱི་ངང་ནས་བཙན་བྱོལ་གྱི་ལམ་བུ་འགྲིམས། དེའང་ཕ་གཞིས་སྐྱོབ་པའི་མཐའ་མཇུག་གི་གདམ་ག་ལོས་ཡིན་ཨང་།

བཙན་བྱོལ་གྱི་འགྲུལ་བཞུད་ལ་ནང་གི་འགལ་རྐྱེན་རུ་འཛིང་ནས་ཡོད་ཀྱང་། ཁྱེད་ཀྱིས་ཞུམ་པ་མེད་ཅིང་ཕུགས་རྒྱང་རིང་བའི་ ཐུགས་བསྐྱེད་དེ། གོ་མེད་ཚོར་མེད་ཀྱི་མི་རིགས་ཤིག་འཛམ་གླིང་གིས་མཐོང་བར་བྱས།
ཁྱེད་ཀྱི་བྱམས་བརྩེ་ནི་ཉི་ཚེ་བའི་རྒྱ་ལས་ཐོལ་གྱིས་བརྒལ་ཏེ་འཛམ་གླིང་ཡོངས་སུ་ཁྱབ། ཁྱེད་ཀྱིས་མ་ཐུལ་བ་སུ་ཡང་མེད་ནའང་། ཁྱེད་ཀྱི་སྐྱབས་འོག་ན། གཉིད་སད་ཀྱང་མ་སད་པའི་ཟོལ་གྱིས་ལྟོ་འབྲང་འབའ་ཞིག་དོན་དུ་གཉེར་བའི་བོད་མི་ཚོ་ནམ་ཡང་སྐྱོབ་ཐབས་མ་མཆིས། ཇི་ལྟར་ཡང་ཁྱེད་ཀྱིས་ཕ་གཞིས་ཀྱི་ཆེད་དུ། གནང་དགོས་པ་ཡོད་ཚད་གནངས་ཟིན།

དེ་རིང་ནི་ཁྱེད་ཀྱི་བྱམས་བརྩེའི་གཟི་བྱིན་ལ་གཟེངས་རྟགས་ཕུལ་བའི་ཉིན་མོ་ཡིན། སྐྱབས་མགོན་ལགས། མངོན་པར་བསྟོད། ཁྱེད་ཀྱི་སྐུ་ཚེ་ཡུན་རིང་བརྟན་པར་སྨོན།

རེབ་སྨད་ལྷའུ་ཡིས་བྲིས།