འབའ་སྲས།
གངས་ཅན་ཡུལ་ནས་སྡོད་སྐལ་མ་བྱུང་བས།།
མི་ཡུལ་ས་མཐའི་སྐྱོ་བ་འཁུར་དགོས་ཀྱང་།།
བཙན་གྱིས་དབང་བསྒྱུར་རང་དབང་འཕྲོག་པ་ཡི།།
གཞན་བསྟུན་དཀའ་ངལ་མེད་པས་སྐྱིད་པོ་རེད།།
སྤུན་དང་གཉེན་ཉེ་དཔུང་རོགས་མེད་པའི་ཡུལ།།
ལྟ་བ་རིག་གཞུང་མི་མཐུན་ཕྱི་གླིང་ནས།།
མི་རིགས་མི་འདྲའི་གྲས་སུ་སྡོད་དགོས་ཀྱང་།།
གཞན་གྱིས་ཐུབ་ཚོད་མི་གཏོང་སྐྱིད་པོ་རེད།།
བག་མེད་ལོངས་སུ་སྤྱོད་པའི་ཅ་དངོས་དང་།།
རྒྱས་སྤྲོ་དཔལ་ལ་རོལ་སའི་ཁང་ཚོམས་སོགས།།
གཞན་ལ་འགྲན་ནུས་ནོར་གྱིས་ཕོངས་ན་ཡང་།།
འགྲིག་ཙམ་འཚོ་བར་རོལ་ན་སྐྱིད་པོ་རེད།།
ཆགས་སྲེད་མེ་ལྕེ་འབར་བའི་སྙན་ངག་དང་།།
ཞེ་སེམས་རོགས་ལ་ཤོར་བའི་སྙིང་གི་གཏམ།།
ཁ་གསལ་དེབ་ཀྱི་ཕྲེང་བར་བཀོད་ན་ཡང་།།
བཟའ་འཁོན་བཟའ་སྡུག་མེད་པས་སྐྱིད་པོ་རེད།།
བཅུ་ཕྲག་རིག་གནས་ཤེས་པའི་བློ་སྟོབས་དང་།།
ཁྱད་དུ་འཕགས་པའི་སྙན་ངག་མེད་མོད་ཀྱང་།།
ཉེ་རིང་མཐོང་ཐོས་མྱངས་པའི་འཚོ་བ་དག །
ཡི་གེ་ཕྲེང་བར་བསྡེབས་ན་སྐྱིད་པོ་རེད།།
གློ་བུར་སེམས་ལ་ཅི་ཞིག་དྲན་པ་གང་།།
ཡི་གེར་འགོད་ལ་བཙན་སྒྲིག་མི་དགོས་པར།།
བྲག་རིའི་རྦབ་ཆུ་ཐུར་དུ་འབབ་པ་བཞིན།།
སྙན་ངག་ལྷོད་ཀྱིས་བཞུར་ན་སྐྱིད་པོ་རེད།།
༡༨/༡༡/༡༤ མཚན་མོར།