སྒང་ནེ་ཡེ་ཤེས་འཇིགས་མེད།
ཀྱེ་མ།
ལྟེ་ཁྲག་གངས་ལྗོངས་སུ་འཕོས་པའི་ཁེར་རྐྱང་གི་ད་ཕྲུག་བདག་དང༌།
ཕ་ཡུལ་གངས་ལྗོངས་སུ་འབོད་ཀྱང་ཕ་གཞིས་མིག་གིས་མ་མཐོང་བའི་ཁྱེད་ཚོ།
ཅིས་ཕྱིར།
རང་དབང་དང་བགོད་སྒྲའི་ལྷན་དུ་ཡུམ་ཆེན་གྱི་སྤང་དུ་མ་བཞུགས་པར།
སྡུག་ཡུས་དང་ཕམ་ཁ་སྟོང་གིས་མི་ཡུལ་དུ་གྱར་བ་ཡིན།
ཁ་སང༌།
དུང་ལྟར་དཀར་བའི་ཁ་བས་ཡོངས་སུ་གཏམས་པའི་ངའི་ཕ་ཡུལ་དུ།
བདེ་སྐྱིད་དང་བགོད་སྒྲ།
ལྷ་ཆོས་དང་མི་ཆོས།
རང་དབང་དང་དྲང་བདེན།
ཞི་བདེ་དང་བག་ཕེབས།
ད་དུང༌།
ཆེས་ཉམས་དགའ་ཞིང་ཀུན་གྱི་ཡིད་དབང་འཕྲོག་བའི་རང་བྱུང་གི་བཀོད་པས་ཕྱུག་ཅིང༌།
སྤྲེལ་རྒན་དང་བྲག་སྲིན་ལས་བསྐྱེད་པའི་གདོང་དམར་གྱི་མེས་པོ་རྣམ་པས།
མི་ལོ་སྟོང་ཚོ་བརྒལ་བར།
འདོད་དགུའི་དཔལ་ཡོན་ལ་ལོངས་སུ་སྤྱད་དེ།
ཡིག་དྲུག་གི་དབྱངས་རྟ་སྙན་མོ།
གངས་རིའི་མུ་འཁྱུད་ལས་འཕྱུར་ཏེ།
ཉི་འོད་དང་ལྷན་དུ།
ཕྱོགས་བཞིར་ཁྱབ།
དེ་ནི།
གཟི་བརྗིད་ཀྱི་ལོ་ཟླ་ཡིན་ལ།
ལོ་རྒྱུས་ཀྱི་ཆུ་འགོ་ཡིན།
མ་ཚད།
སེམས་ཤུགས་དང་མདུན་སྐྱོད་ཀྱི་སྣ་འདྲེན་ཡིན།
རྒྱལ་ཁབ་དང་མི་རིགས་ཀྱི་བདེན་དཔང་ཡིན།
སྤུན་ཟླ་ཚོ།
འདས་དོན་ལ་ཕྱིར་མིག་བལྟས་ནས།
བདེན་དོན་འཚོལ་སྒྲུབ་བྱེད་དགོས།
ང་ཚོ་སྐྱེས་པ་ནི་གཞན་དབང་ཡིན་ཞིང༌།
འཚོ་བ་ཀྱང་གཞན་དོན་ཡིན་པར་ཁྱེད་ཅག་གིས་ཨེ་དྲན།
ལྟོས་དང༌།
ཤར་དང༌། ལྷོ། ནུབ།
ད་དུང་བྱང་དང་བཅས་པའི་ཕྱོགས་ཀུན་ནས།
ང་ཚོར་ཕ་མེས་ཀྱི་ཤུལ་འཛིན་འཚོལ་རྒྱུར་སྐུལ་འདེད་གཏོང་བཞིན་མི་འདུག་གམ།
ན་ཟླ་ཚོ། ཨ་མའི་བུ།
ཕ་མེས་དང་བྷོ་ཊའི་བདེ་དོན་འཚོལ་བར།
མདུན་སྐྱོད་ཀྱི་གོམ་པ་སྤོ།
བློ་སྟོབས་ཀྱི་མགོ་བོ་བཏེགས་དང༌།
དྲང་བདེན་དང་སེམས་ཤུགས་ལ་ཅིས་ནས་རྒྱལ་ཁ་ཡོད་ངེས།
དེ་རིང༌།
མིའུ་གདུང་དྲུག་ལས་མཆེད་པའི་བོད་མི་ས་ཡ་དྲུག་གི་ཡུམ་ཆེན་དེར།
སྤྲིན་དམར་ས་ལ་ཟག་འདྲའི་གཞི་རྒྱ།
མེ་དམར་གྱེན་དུ་འབར་འདྲའི་ཚ་རླབས།
ཁྲག་དམར་འགོས་པའི་དར་དམར་གྱི་དཔུང་ཁྱུ་དེས།
ཡ་ང་དང་སྙིང་རྗེ།
སྔ་བསམ་དང་ཕྱི་འདེང་མེད་པར།
མི་ལོ་སྟོང་ཕྲག་རིང་གི་ལོ་རྒྱུས་ཀྱི་དྲན་རྟེན་བཤིགས།
དགོས་འདོད་ཀྱི་ནོར་དང་འདྲ་བའི་སངས་རྒྱས་ཀྱི་བསྟན་པ་བསྣུབས།
སྟོང་གསུམ་གྱི་ནོར་ལས་ལྷག་པའི་རིན་ཆེན་གྱི་གཏེར་དངོས་འཕྲོག།
ལོ་རྒྱུས་ཀྱི་རང་བཞིན་ལྡན་པའི་ཐུན་མིན་གྱི་ལེགས་སྦྱང་རྩ་བརླག་བཏང༌།
ད་དུང༌།
ཆེས་ཡིད་མུག་པ་ཞིག་ལ།
རྒྱལ་གཅེས་ལྷག་བསམ་གྱིས་ཕྱུག་པའི།
ཕུལ་བྱུང་དཔའ་བོ་དཔའ་མོ་ཁྲི་སྟོང་མང་པོས།
བསྟན་སྲིད་མི་རིགས་ཀྱི་ཆེད་དུ།
ཡོད་ཚད་གངས་ལྗོངས་ལ་ཕུལ་བ་དྲན་ནམ།
སྐབས་དེར།
ད་གཟོད་མཆོག་གསུམ་གྱིས་ཁེངས་པའི་མི་ཡུལ་གྱི་ཞིང་མཆོག་དེར།
ཁྲག་དྲི་ལྗན་ལྗིན་གྱིས་ཁྱབ་པའི་བོད་མིའི་དུར་ས་ཞིག
དམར་པོ་རི་ནས་འོ་འདོད་ཀྱི་བྲག་ཆ་འཁཽར།
ཡར་ལུང་གཙང་པོ་ཡང་དཔའ་བའི་ཟུང་ཁྲག་གིས་དམར་མདངས་སུ་བསྒྱུར།
རེད་ཡ།
ས་ལ་ཟག་པའི་དཔའ་བོའི་ཟུང་ཁྲག་གི་ཐིག་པ་རེ་རེ་ནི།
ནམ་ཡང་བརྗེད་ཐབས་མེད་པའི་ལོ་རྒྱུས་ཀྱི་དྲན་རྟེན་རེ་རེ་རེད་ཨང༌།
ཀྱེ་མ།
སྲིན་མོ་བྲག་ལས་ཤོར་འདྲའི་མི་གཟན་སྤྱང་ཀི་མདར་མོའི།
གདུག་རྩུབ་དང་གཡོ་སྒྱུ།
མཐོང་ཆུང་དང་ཁྱད་གསོད།
མགོ་སྐོར་དང་བླུ་བྲིད།
ད་དུང༌། འཐབ་རྩོད་དང་མནར་གཅོད་དུ་མས།
འུ་ཚོའི་ཕ་མ་དང་ཕ་མེས།
ཕུ་ནུ་དང་སྤུ་ཟླ།
ན་ཟླ་དང་རྩེད་གྲོགས་སྟོང་ཕྲག་བརྒལ་བར།
གསོན་པོར་ཤ་པགས་བཤུས།
འདྲེན་བྱེད་ཐུར་མས་བཏོན།
མ་ཤི་དམྱལ་བར་བརྫངས།
ཨ་ཁ།
དེ་ནི་གནས་འདིར་སྔ་མ་གྲགས་པའི།
མི་ཡུལ་གྱི་དམྱལ་ཁམས།
བོད་མིའི་གཤས་ར།
ལོག་སྤྱོད་པའི་བསྟི་གནས་ཤིག་ཏུ་བསྒྱུར།
འོང་ཀྱང༌།
དུས་གསུམ་ལ་འགྱུར་བ་མེད་པའི་ལྷ་བྱ་ཁྲུང་ཁྲུང་དཀར་མོ་དང༌།
ཤ་གཅིག་ལས་མཆེད་པའི་སྤུན་ཟླ་སྟོང་ཚོ་བརྒྱད་ཅུ།
ལོག་སྤྱོད་དང་ཁ་བྲལ་གྱི་མིང་ངན་འོག
འབྱུང་འགྱུར་གྱི་བདེ་དོན་འཚོལ་ཕྱིར་མི་ཡུལ་དུ་བསྙེག་དགོས་བྱུང༌།
ངོ་མ། དྲང་པོར་བཤད་ན།
ང་ཚོའི་མ་ཡུམ་ནི།
ཕོ་བརྒྱའི་སེམས་པ་འཕྲོག་པའི།
སྐྱོན་ཟད་ཡོན་ཏན་རྫོགས་པའི།
ཇི་འདྲའི་ལང་ཚོ་མ་ཞིག་རེད་ཨང༌།
གཟིགས་དང༌།
སྟོད་ན་གངས་རིས་མཛེས་ཞིང༌།
གངས་ན་གངས་སེང་རང་འཁོར།
བར་ན་རྐང་འཐུང་སྟུག་ཅིང༌།
ནགས་ན་སྟག་གཟིགས་ཁ་སྤྲོད།
སྨད་ཀྱི་སྤང་ཐང་ཡངས་པོར།
རྐང་བཞིས་སྐར་ཚོགས་འགྲན་པ།
མདའ་ཡི་མཚོ་དང་གཙང་པོར།
ཉ་སྲམ་ཡར་འཁྱུག་མར་འཁྱུག
དེ་ལས་ཀྱང་ཉམས་དགའ་བ་ནི།
དཀར་ཞིང་གཙང་བའི་གངས་རི།
མཐོ་ཞིང་རྔམ་པའི་རྫ་རི།
བརྗིད་ཅིང་ལྷུན་པའི་སྤང་རི།
ཡངས་ཤིང་རྒྱ་ཆེ་བའི་ས་གཞི།
མུ་མཐའ་མེད་པའི་རྩ་ཐང༌།
སྔོ་ཞིང་དངས་བའི་ནམ་མཁའ།
གཙང་ཞིང་བསིལ་བའི་འབབ་ཆུ།
ཕུན་སུམ་ཚོགས་པའི་གཏེར་ཁ།
རོ་བཅུད་ལྡན་བའི་བཟའ་བཏུང༌།
མདོར་ན།
བརྗིད་ཆགས་ཤིང་ལྟ་ན་སྡུག་པ།
སྡེ་བཞིའི་ནོར་གྱི་འབྱུང་ཁུངས།
འཛམ་གླིང་ས་ཡི་ཡངས་རྩེ།
སངས་རྒྱས་བསྟན་པའི་བཞུགས་གནས།
དར་བརྒྱད་འབྱོར་བཅུའི་ཕ་ས།
གླུ་གར་རིག་པའི་བང་མཛོད་ཏེ།
མཐོ་སྒང་ཤམ་བྷ་ལ་ཡི་གནས་མཆོག་འདི།
ཇི་ལྟར་འཕོངས་ཕྱིས་པའི་རྡོ་བཞིན།
བློས་གཏོང་བྱ་ཕོད་དམ།
ཅི་སྟེ།
ན་གཞོན་སྤུན་ཟླ་རྣམ་པར།
སྙིང་ལ་རུས་པ།
བོད་མིའི་ལ་རྒྱ།
འགྲོ་བ་མིའི་འཐོབ་ཐང་དང༌།
བདེ་སྐྱིད་དང་རང་དབང༌།
དྲང་བདེན་དང་འདྲ་མཉམ་འཚོལ་སྒྲུབ་དགོས་ན།
སྙིང་རུས།
སྤོབས་པ།
སེམས་ཤུགས།
ལྷག་བསམ།
ཤེས་ཡོན།
འགན་ཁུར།
ད་དུང་འགྱུར་མེད་ཀྱི་ཆོད་སེམས་དང༌།
ཞུམ་མེད་ཀྱི་སྙིང་སྟོབས།
བླང་དོར་འབྱེད་པའི་རྣམ་དཔྱོད།
ཕུགས་བསམ་སྐྱོང་བའི་བློ་གྲོས་སོགས་དགོས་པ་མ་ཡིན་ནམ།
དེའི་ཕྱིར།
ང་ཚོར་དགོས་པ་ནི་སང་ཉིན་གྱི་བདེ་སྐྱིད་ཡིན་ལ།
ཕྲག་པར་ཡོད་པ་ནི་བདེ་སྐྱིད་ཉི་གཞོན་བསུ་བའི་ཕོ་ཉ་ཡིན།
རྩམ་ཟས་ཚོ།
ཆུ་ཚོད་ཉེར་བཞིའི་འཚོ་བའི་ནང༌།
མིག་ཆུ་དང་རྔུལ་ཆུའི་ཐིག་པ་དེ་དག
དཔའ་བོའི་ཟུང་ཁྲག་དང་ལྷན་དུ།
ས་དྲུག་སྤུན་ཟླ་ཚོའི་ཆེད་དུ་འབུལ་དགོས།
དེ་ནི།
མི་རབས་གོང་མའི་རྒྱལ་གཅེས་དཔའ་རྒོད་ཚོའི་རེ་བཞག་ཡིན་ལ།
དུས་རབས་ཉེར་གཅིག་པའི་སེང་ཆུང་གི་ལས་འགན་ཡང་ཡིན།
མ་ཟད་ཕྱི་རབས་བུ་ཚ་རྣམས་ཀྱི་མདུན་ལམ་ཡང་དེ་བས་ཡིན།
ཨེ་མ།
ཁ་སང་གི་ལ་རྒྱ།
དེ་རིང་གི་གཟི་བརྗིད།
སང་ཉིན་གྱི་བླ་སྲོག
བོད་མིའི་རྒྱལ་ཁ།
འགྲོ་བའི་བདེ་སྐྱིད།
ཞི་བདེའི་རྨང་གཞི།
ད་དུང་
འདི་ནི་ཡོད་ཚད་ཀྱི་ཡོད་ཚད་ཡིན་ཏེ།
ཆོས་དོན་གྱི་རྒྱལ་སྲུང་ཡིན་ལ།
རྒྱལ་དོན་གྱི་ཆོས་སྲུང་ཡང་ཡིན་དེ་བས་ཡིན་པས།
དགོས་འདོད་ཀྱི་ནོར་ལས་ལྷག་པའི་དོན་ཆེན་འདི།
ཇི་སྲིད་མ་འགྲུབ་ཀྱི་བར་དུ།
ང་ཚོ་ནམ་ཡང་མ་ཤི་གསོན་པོར་གནས་དགོས་ལ།
ནམ་ཡང་མ་གཉིད་པར་མིག་ལྡང་ནས་ཁ་ཕྱོགས་འཚོལ་དགོས།
དེས་ན།
འདི་ནི་ཁོག་མིན་གྱི་ཁ་བཤད་མ་ཡིན་ལ།
དོན་མེད་ཀྱི་སྨོས་གཏམ་ཡང་དེ་བས་མིན།
འདི་ནི།
གངས་ཕྲུག་ངའི་གངས་ལྗོངས་ལ་ཕུལ་བའི་བརྩེ་དུང་ཡིན།
མི་རིགས་ལ་བསྐྱང་པའི་ལ་རྒྱ་ཡིན།
ཨ་མའི་དྲིན་གྱིས་བསྐྱང་པའི་ནུ་རིན་ཡིན་ལ།
རང་དབང་དང་འདྲ་མཉམ་ལ་དགའ་བའི་འབོད་སྒྲ་ཡང་ཡིན།
འབོད་སྒྲ་འདི་ནམ་ཡང་གངས་རིའི་མཁའ་དབྱིངས་སུ་རྒྱལ་གྱུར་ཅིག
སྒང་ནང་ཟེར་ན་གང་ཡིན་མི་ཤེས་མོད། ཡེ་ཤེས་འཇིགས་མེད་ཟེར་ཡོང་ན་ངའི་ཉལ་ཁང་གཅིག་པའི་སློབ་གྲོགས་ཤིག་དྲན་ཡོང་གིས
སྙན་ངག་རིང་པོ་ཞིག་བྲིས་འདུག་གཱ དགའ་བསུ་བྱེད་དགའ་བསུ་བྱེད།
འབོད་སྒྲ་འདི་ནམ་ཡང་གངས་རིའི་མཁའ་དབྱིངས་སུ་རྒྱལ་གྱུར་ཅིག རྒྱལ་དང་རྒྱལ། རྒྱལ་གྱུར་ཅིག
མྱུར་དུ་་རྒྱལ་གྱུར་་ཅིག །
ཧ་ཧ། གནད་ལ་འབིགས་པའི་འབོལ་རྩོམ་རེད་འདུག དགའ་བསུ་ཞུ
ཡག་པོ་འདུག
མི་རིགས་ལ་ཤ་ཞེན་དང་འགན་ཁུར་གྱི་བསམ་པ་ཡོད་པར་རྗེས་སུ་ཡི་རང་ཞུ་རྒྱུ་དང་། སྙན་ངག་ཡང་རང་དབང་ནས་སྲོལ་རྒྱུན་དང་། སྲོལ་རྒྱུན་ནས་འབྲས་དཀར་ལ་མཆོངས་འགྲོ་བའི་རྩོམ་སྲོལ་འདི་ཡིས་མགོ་བོ་ཡང་ཅུང་ཟད་ཉོག་སོང་།