ཡེ་ཤེས་མགོན་པོ།

སྐྱོ་བྲག་དགའ་དབང་།

སྐྱེ་བའི་དངོས་པོ་མཐའ་དག་རྒྱུ་དང་འབྲས་བུའི་ཚུལ་གྱིས་མུ་མཐའ་མེད་པར་ཡོང་གི་ཡོད་ལ། འགྲོ་བ་མི་ཡང་སྐྱེ་བའི་དངོས་པོའི་ཆ་ཤས་ཤིག་ཡིན་པའི་ཕྱིར་ན་ཕ་མ་དང་བུ་རྒྱུད་ཀྱི་འབྲེལ་བས་ཐོག་མཐའ་མེད་པར་ཡོང་གི་ཡོད། ངའི་མི་རིགས་འདི་ཡང་དེ་བཞིན་ཡིན་ཕྱིར། ནང་ཆེན་མི་དམངས་སྨན་ཁང་དུ་འདན་མ་ལྷ་ཡི་གདུང་རྒྱུད་དུ་གྲགས་པ་ཕ་བཀྲ་ཤིས་ཉི་མ་དང་། མ་པདྨ་ཚེ་སྒྲོན་གཉིས་ལ་བོད་རབ་རྒྱན་ཤིང་རྟ་གྲོ་བཞིན་ཟླ་བའི་མར་ངོའི་བཅུ་བཞིའི་དགོང་མོར་བུ་ཞིག་སྐྱེས་འདུག །

སྐྱེ་བའི་ཉིན་མོ་འདི་ནི་དམིགས་བསལ་གྱི་ཉི་མ་ཞིག་སྟེ། མགོན་པོ་དང་ལྷ་མོ་རྒྱུ་བའི་དུས་ཆེན་ཡིན་པ་ཡོངས་སུ་གྲགས་ལ། རེས་གཟའ་མིག་དམར་ཡིན་པས་ཕྲུག་གུའི་བླ་གཟའ་ཡང་རེད། ངས་སྔ་དྲོའི་ཆ་ལ་འགྲོ་མགོན་ཀརྨ་ཆགས་མེད་ཀྱི་རི་ཆོས་སུ་བཞུགས་པ། སྙན་བརྒྱུད་ལྷོ་བྲག་མགོན་པོའི་གདམས་ངག །རང་ངོ་རང་གིས་ཤེས་པས་ཡེ་ཤེས་ཟེར། །དེ་རྟོགས་འཁོར་བའི་སྡུག་བསྔལ་ཐམས་ཅད་ལས། །སྐྱོབ་པའི་སྐྱབས་དང་མགོན་ནི་དེ་ཡིན་ཕྱིར། །ཡེ་ཤེས་མགོན་པོ་རང་གི་སེམས་ཉིད་ཡིན། །ཞེས་པ་ལ་སེམས་ཤོར་ནས་ཨ་ནས་ཡང་དུ་བལྟ་བཞིན་ཡོད་པ་ན། སྐད་འཕྲིན་བརྒྱུད་ནས། བཀྲ་ཤིས་ཉི་མས། པདྨ་ཚེ་སྒྲོན་སྐྱེ་ཟུག་བརྒྱབས་ནས་སྨན་ཁང་དུ་བསླེབས་ཡོད་པས། ཁྱོད་ཀྱིས་དཀོན་མཆོག་ལ་གསོལ་འདེབས་དང་། བླ་མ་གཞན་ལའང་སྐྱབས་འཇུག་ཞུ་རོགས་ཟེར་བ་བཞིན། གསོལ་དཔོན་བཀྲ་ཤིས་གཡུལ་རྒྱལ་བརྒྱུད་ནས་དཔལ་མ་མགོན་ལྕམ་དྲལ་གྱི་གྲུབ་པའི་རྣལ་འབྱོར་པ་ཆེན་པོ་གོ་ཤྲི་རྒྱལ་ཚབ་རིན་པོ་ཆེ་ལ་སྐྱབས་འཇུག་ཞུས་ཤིང་། རང་གིས་ཀྱང་མ་མགོན་ལྕམ་དྲལ་ལ་ཕྲིན་བཅོལ་ཅི་ནུས་སུ་བྱས་པ་ཡིན། ངའི་ཕ་མ་དང་ཕྲུག་གུའི་མེས་པོ་མེས་མོ་ཡིན་པའི་རྒས་འཁོགས་གཉིས་པོ་ལྷ་སའི་ཇོ་བོ་ཡིད་བཞིན་ནོར་བུ་སོགས་མཇལ་སྐོར་དུ་སོང་བ་མི་ཚེའི་རིང་གི་སྐྱིད་ཤོས་ཀྱི་ངང་ནས་ཉིན་འདི་ག་རང་གི་ཕྱི་དྲོར་རང་ཁྱིམ་དུ་བདེ་འབྱོར་བྱུང་ངོ་། །

མཚན་མོའི་ནམ་སྟོད་དུ་སྐྱེས་པ་ནི་སྐྱེ་དུས་བཟང་བ་སྟེ་དཔའ་བོ་དང་མཁའ་འགྲོ་ཐམས་ཅད་འདུ་བའི་དུས་ཡིན་པར་ཆགས་མེད་རི་ཆོས་ལས། མུན་རུག་ནས་ནི་ནམ་ཕྱེད་བར། །དཔའ་བོ་མཁའ་འགྲོ་ཀུན་འདུ་བས། །གཏོར་བསྔོས་ཚོགས་འཁོར་ལ་སོགས་བཟང་། །དྲག་པོའི་སྔགས་ཀྱང་གང་བཟླས་འགྲུབ། །ཅེས་གསུངས་ཡོད།
དིང་གི་དུས་ན་ལག་རྩལ་དང་ཆ་རྐྱེན་ལ་བསྙད་དེ་ཕྲུག་གུ་མང་པོ་བཤག་བཅོས་ཀྱི་ལམ་ནས་འདོན་བཞིན་ཡོད་མོད། བུ་ཕྲུག་འདི་ནི་རང་བྱུང་གཤིས་ཀྱིས་གྲུབ་པའི་སྐྱེ་ལམ་བརྒྱུད་ནས་ཡོང་བ་ལས་གཞན་ཅི་ཡང་བྱས་པ་མེད་པས་ན་དུས་ཚེས་གཟའ་སྐར་རྣམས་ཀྱང་མ་སྒྲིག་ལྷུན་གྲུབ་ཡིན་པ་རེད།

ཉིན་འདིའི་ཕྱི་ཉིན་ཏེ་ཆགས་མེད་རི་ཆོས་ལས། གནམ་གང་མགོན་པོ་ལན་གསུམ་རྒྱུ་བའི་ཉིན། །ཞེས་པའི་ཞོགས་པར་བཀྲ་ཤིས་ཉི་མས་སྐད་འཕྲིན་བརྒྱུད་ནས། མདང་དགོང་བུ་ཞིག་བདེ་བླག་ངང་སྐྱེས་པའི་ཅུང་ཙམ་ན་མགོ་བོ་འགུལ་སྐྱོད་བྱ་ཞོར་ཡར་མར་མིག་ཀྲབ་ཀྲབ་ཀྱིས་བལྟ་ཡི་འདུག་ཟེར་བ་ཞིག་བཏང་གདའ། ངས་ཁ་པར་བརྒྱུད་ནས་པདྨ་ཚེ་སྒྲོན་ལ་སྐད་ཆ་བྱས་པ་ན། མོ་ལ་བུ་བཞི་དང་བུ་མོ་གཉིས་སྐྱེས་པའི་ནང་ནས་དཀའ་ངལ་ཆུང་ཤོས་དེ་བྱུང་བས་བདེ་ཐང་ཡིན། བུ་ཡང་སྐྱིད་པོར་ཉལ་གདའ་ཟེར། བུའི་མིང་ལ་ངས། ཡེ་ཤེས་མགོན་པོ། ཞེས་བཏགས་ཏེ་མ་མགོན་ལྕམ་དྲལ་ལ་ཡང་དུ་ཕྲིན་བཅོལ་གཟབ་ནན་བགྱིས་པ་ཡིན།
ད་དུང་ཕ་མ་གཉི་གར་བུ་འདི་ང་ལ་སྦྱིན་དགོས་པའི་རེ་སྐུལ་ཞུས་པ་ན། ཡ་དང་ཡ། ཞེས་དྭང་ལེན་གནང་སོང་བས་སེམས་གཏིང་ནས་དགའ་ཡོད། གང་ཡིན་ཟེར་ན། སྐྱེ་བའི་གཟའ་སྐར་དུས་ཚེས་ཀྱི་རྟེན་འབྲེལ་གྱིས་མ་འོངས་པར་བུ་དཔའ་རྩལ་རྒོད་ལ་ནུས་པ་ཡོད་པ་ཞིག་འཚར་ལོངས་ཡོང་བའི་རེ་བ་ཆེ་བས་ཏེ། མི་ནུས་མེད་ཅིག་གིས་ཆོས་འཇིག་རྟེན་གང་ཡང་འགྲུབ་ཐབས་མེད་ཕྱིར་བུ་བློ་སྟོབས་ཅན་ལ་ཁོ་བོ་རྒྱུན་པར་ཡིད་སྨོན་སྐྱེ་བའི་གོམས་གཤིས་ཤིག་ཡོད།

རྗེས་སུ་གཅུང་ལེགས་མཐོང་རྣམ་རྒྱལ་བརྒྱུད་ནས་རྒྱལ་མཆོག་ཀརྨ་པ་ལའང་ཚེ་ལུས་འདི་དང་མ་འོངས་པའི་སྐྱེ་བ་རྣམས་སུ་ཡག་པོ་ཡོང་བའི་ཐུགས་སྨོན་སྐྱབས་འཇུག་ཞུས་པ་ཡིན། ཁྲུམས་སྟོད་ཟླ་བའི་ཡར་ངོའི་ཚེས་པ་གཉིས་ཀྱི་ཕྱི་དྲོའི་ཆར་མ་བུ་སྨན་ཁང་ནས་དོན་ཏེ་ངོ་ཤེས་གྲོགས་པོ་ཡག་འཛོང་ཚང་གི་སར་བསྡད།
ཡང་བསྐྱར་མ་བུ་བདེ་ཐང་ཡོད་མེད་བརྟགས་དཔྱད་བྱས་འབྲས་ལེགས་པ་བྱུང་བས་ཁྲུམས་ཟླའི་ཚེས་པ་དྲུག་དང་བུའི་བླ་གཟའ་མིག་དམར་ཉིན་གྱི་སྔ་དྲོར་གནས་སྐྱོ་བྲག་ཏུ་གྲགས་པའི་ཡུལ་གྱི་སྟོད། ས་ཇག་ལྡི་ལུང་པའི་དབྱར་མཚེས་ཁ་ཞེས་མིང་དུ་ཐོགས་པ། བྱ་བྱིའུ་རི་དྭགས་ཀྱི་རིགས་མང་པོ་བག་ཡངས་སུ་རྒྱུ་ཞིང་། སྤང་དང་ནགས་ཚལ་འདྲེས་པའི་རི་ཆེན་གནམ་འདེགས་ཀྱི་ཀ་བ་འདྲ་བའི་གཤམ་དུ་རང་བྱུང་ས་ཡི་སྟེགས་བུ་རང་ཆས་སུ་ཡོད་པ། མེ་རྩི་དང་རྩྭ་གྲུང་འཇམ་པོས་ལྟེམ་གྱིས་གང་བའི་ལྟེ་བར་གནས་བཅས་པ། འདན་མ་བུ་ཆུང་ཚང་གི་རང་ཁྱིམ་དུ་བདེ་ལེགས་ངང་འབྱོར་ནས་མེས་པོ་བུ་ཆུང་དང་མེས་མོ་ཨོར་ཆོས་སོགས་བཟའ་ཚང་ལྷན་འཛོམས་ཀྱི་སར་གསོ་སྐྱོང་དང་འཚར་ལོངས་ཀྱིས་མི་ཚེའི་འཕེལ་འགྱུར་རིང་མོ་འགོ་འཛུགས་བྱ་བཞིན་ཡོད་པ་ཡིན་ནོ། །