རྩོམ་པ་པོ། ཚེ་ལོ་ཐར། ༼བསྟན་འཇམ་གྱིས་འོས་སྦྱོར་བྱས།༽
ལྔ་བ།
ཚ་ཚ་འུར་འུར་གྱི་ལས་འགུལ་མཇུག་བསྒྲིལ་བ་ན། ཁ་པར་གྱི་སྐུད་ལམ་དང་ཁ་བརྡ་ལས། འབྲོག་ཁུལ་གཞན་དུ་དབྱར་རྩྭ་མ་ཡག་པར་ས་བདག་དང་སྦྱིན་བདག་བར་དུ་རྩོད་པ་བྱུང་སྟེ། སུ་ཞིག་ལ་རྨས་སྐྱོན་ཚབས་ཆེན་ཕོག་ཚུལ་དང་། སྦྱིན་བདག་དང་གླ་པའི་བར་ལ་འགལ་བ་བྱུང་སྟེ། གླ་པ་མང་པོས་སྟབས་མ་ལེགས་པར་སྦྱིན་བདག་བསད་ཚུལ་སོགས་ཐོས་ན་སྙིང་ལ་གཟན་པའི་དོན་དག་མང་པོ་རླུང་ལྟར་རྒྱུ་ཡོང་།
དབྱར་རྩྭ་དགུན་འབུ་རྐོ་མཚམས་བཞག་སྟེ་ཟླ་གཅིག་ལྷག་འགོར་མོད། ཁོའི་གྲོགས་པོ་བཀྲ་ཤིས་རྒྱ་མཚོ་ཕྱིར་ཡོང་རྒྱུ་ཕར་ཞོག ཁོའི་གནས་ཚུལ་ཙམ་ཡང་མ་གོ་བས། སྡེ་མི་ཡོངས་ཀྱིས་བཀྲ་ཤིས་རྒྱ་མཚོས་རྩྭ་ས་ཉོས་ཏེ་མ་རྩ་བརྡིབས་པས། ས་གཞན་དུ་བྲོས་པ་ཡིན་སྲིད། དེ་མིན་ན། དོན་རྐྱེན་ངན་པ་ཞིག་བྱུང་བ་གདོན་མི་ཟ། མྱུར་དུ་བཅའ་བ་རིམ་བྲོ་བསྒྲུབ་དགོས་ཚུལ་གྱི་ཁ་ཡན་ཞིག་མི་འདོད་བཞིན་དུ་བསྒྲགས་བྱུང་།
མཚོ་སྐྱེས་རྡོ་རྗེ་ཡང་དོགས་པ་ཟ་སྟེ་གསང་སྟབས་ཀྱིས་མོ་འདེབས་སུ་སོང་མོད། མོ་པས་ཤར་ལྷོའི་མཚམས་ཀྱི་གངས་རི་དཀར་པོའི་འདབས་དང་སྤང་ལྗོངས་སྔོན་མོའི་ཀླད་ཅིག་ན་འཚམ་པོར་བསྡད་ཡོད་པ་དང་། ཉིན་འགའི་རྗེས་སུ་ཕ་ཡུལ་དུ་བསླེབ་ཡོང་ཚུལ་བཤད་པས། ཁོའི་སེམས་ཀྱང་ཅུང་ཙམ་བདེ་ལ་བབས།
སྔོན་ཆད། དབྱར་ཟླ་དྲུག་པའི་ཚེས་ཆེན་བཅོ་ལྔའི་དགོང་མོར་རྒྱབ་རི་སྒང་ནས་ཁོ་གཉིས་ཐེངས་མང་པོར་ལྷན་འཛོམས་བྱུང་མྱོང་བས། ཁོའི་སེམས་ཀྱི་དྲུག་པའི་བཅོ་ལྔའི་དགོང་མོ་ནི་ཁོ་གཉིས་ལྷན་འཛོམས་བྱེད་ཐུབ་པའི་དུས་བཟང་ཡིན་ལ། རྒྱབ་རི་སྒང་དེ་ནི་ཁོ་གཉིས་ལྷན་འཛོམས་བྱེད་སའི་གནས་མཆོག་ཅིག་ཏུ་བསམས་ཡོད།
དུང་ཟླ་དཀར་པོ་མཁའ་རུ་འཕགས་པ་དང་མཉམ་དུ། མཚོ་སྐྱེས་རྡོ་རྗེ་ཡིས་སྦི་རག་ཤོག་སྒམ་གཉིས་བཟུང་སྟེ་རྒྱབ་རི་སྒང་དུ་ཐོན། སྟོང་ལྷང་ལྷང་གི་རྒྱབ་རི་སྒང་དེ་རུ་ཁོ་གཉིས་ཀྱི་དགའ་སྐྱོ་ཆགས་སྡང་གི་གཏམ་རྒྱུད་མང་པོ་ཡོད་པས། འདས་སོང་གི་རྣམ་པ་དག་གློག་བརྙན་ཇི་བཞིན་ཁོའི་མིག་ལམ་དུ་འཆར་ཡོང་ལ། བར་མཚམས་མེད་པར་གཡུགས་པའི་འཁྱག་རླུང་གིས་ཁོ་ནི་དར་ལྕོག་ལྟར་ཕར་གཡོ་ཚུར་གཡོ་བྱས་པས། དགའ་བ་དང་སྐྱོ་བ་གང་ཡིན་མི་ཤེས་པའི་མིག་ཆུ་རྡོག་པོ་གཉིས་མཁུར་མགོ་བརྒྱུད་དེ་ས་རུ་ཟགས།
ཅིའི་ཕྱིར་ཁོ་ལ་འཁྱག་བསིལ་བསིལ་གྱི་མིག་ཆུ་བཞུར་བ་ཡིན་ནམ། ཅིའི་ཕྱིར་ཁོ་ལ་ཁེར་རྐྱང་དུ་ལུས་པའི་སྐྱོ་སྣང་སྐྱེས་པ་ཡིན་ནམ། ཅིའི་ཕྱིར་ཁོ་ལ་གནས་དེ་རུ་སྡོད་མི་ཚུགས་པའི་བྲེད་ཤ་ལངས་པ་ཡིན་ནམ། རང་དབང་མེད་པའི་ཚོར་སྣང་འདི་དག་གིས་ཁོ་ལ་བཀྲ་ཤིས་རྒྱ་མཚོར་དོན་རྐྱེན་ངན་པ་ཞིག་བྱུང་བ་མིན་ནམ་སྙམ་པའི་དོགས་པ་ལངས་སུ་བཅུག
ཁོས་བཀྲ་ཤིས་རྒྱ་མཚོས་རྒྱུན་དུ་སྦི་རག་ཐུངས་དང་། བཟི་སོང་ན། ཅི་ཡང་དྲན་རྒྱུ་མེད་པས། དེ་ལས་སྐྱིད་པ་ཞིག་གང་ན་ཡོད་ཟེར་བ་དྲན་སྟེ། མྱུར་དུ་སྦི་རག་གིས་རང་སེམས་གནོན་ཐབས་བྱས། འོན་ཀྱང་། སྦི་རག་འཐུང་བ་ནི་ཆུ་འཐུང་བ་དང་འདྲ་བར་ཤོག་སྒམ་གང་ཚར་ཡང་ཁོ་རང་བཟི་བ་ལས་བློ་རིག་ཇེ་གསལ་ནས་ཇེ་གསལ་དུ་སོང་སྟེ་སེམས་ཁྲལ་ཇེ་ལྕི་ནས་ཇེ་ལྕི་རུ་གྱུར།
གློ་བུར་དུ། “ཨེ་མ། ཁྱེད་ནི་མི་རིགས་ཀྱི་ལ་རྒྱ་དང་མ་འོངས་པའི་རེ་བ་རེད”ཅེས་པའི་རོལ་དབྱངས་ཤིག་གིས་ཁོ་རང་ཡར་བསླངས། རོལ་དབྱངས་དེ་ནི་ཁོ་ལ་མཚོན་ན། རྨོངས་གཉིད་ལས་དཀྲོགས་པའི་དུང་བརྡ་དང་མུན་འཐོམས་ལས་འདྲེན་པའི་ཉི་འོད་ལྟ་བུ་ཡིན་པས། མྱུར་དུ་ཁ་པར་གྱི་ཁ་ཕྱེས་པ་ན། ཁོའི་རེ་འདོད་ལྟར“ཨ་རོགས། ང་བཀྲ་ཤིས་ཡིན། དོ་དགོང་ཡང་ཁྱོད་ཀྱིས་ཟླ་བའི་ལྷ་མོར་སེམས་གཏམ་བཤད་ཀྱིན་ཡོད་དམ”མི་ཟེར་བར། རྡོ་རྗེ་འཚོ་ཡིས་འཛར་སྐད་ཀྱིས“མཚོ་བྷེ། ཁྱོད་བཀྲ་ཤིས་ཚང་ལ་སོང་དང་། རེམ། རེམ”ཞེས་བོས། ཁོས་རྒྱུ་མཚན་ཅི་ཡིན་འདྲི་འདོད་ཀྱང་བཤད་དབང་མ་བྱིན་པར་ཁ་པར་གྱི་ཁ་གཏན་སོང་།
ཁོ་རང་མྱུར་དུ་བཀྲ་ཤིས་ཚང་ལ་སོང་བ་ན། བཀྲ་ཤིས་རྒྱ་མཚོའི་ཆུང་མ་དང་བུ་ཕྲུག་གཉིས་ཀྱིས་བཀྲ་ཤིས་རྒྱ་མཚོ་འབོད་པའི་ངུ་སྒྲས་གནམ་ས་སྒུལ་བར་བྱེད་ལ། སྡེ་མི་འགའ་ཡང་ཁོ་ཚང་ལ་ཐོན་འདུག་པས། དོན་རྐྱེན་ངན་པ་ཞིག་བྱུང་བ་རྟོགས་ཐུབ།
བཀྲ་ཤིས་རྒྱ་མཚོ་ཁོ་ཚང་གི་ཚ་ཐབ་སྟེང་དུ་བསྙལ་འདུག་ལ། མགོ་ལག་རྐང་གསུམ་ནི་ཁྲག་གིས་སྦགས་པའི་སེང་རས་ཀྱིས་ཡོངས་སུ་བཏུམས་ཤིང་། མིག་སྣ་ཁ་གསུམ་སྐྲངས་ཏེ་ཁྲག་བླུགས་པའི་གྲོད་པུ་ཞིག་དང་འདྲ་བས། མཚོ་སྐྱེས་རྡོ་རྗེ་གཙོ་བྱས་པའི་སྡེ་མི་ཚོའི་མིག་ཆུ་དབང་མེད་དུ་བཞུར།
ཁོ་ཚོས་ཅི་ཞིག་བཤད་འདོད་ཀྱང་བཤད་མ་ཕོད་ལ། ཅི་ཞིག་བྱ་དགོས་པའང་མ་ཤེས་པར་ཡུན་རིང་ལུས་པའི་སྐབས་སུ། བཀྲ་ཤིས་རྒྱ་མཚོའི་ལག་པ་འགུལ་ཙམ་བྱས་ཏེ“མཚོ་སྐྱེས། མཚོ་སྐྱེས་ཀྱིས་རྒྱབ་རི་སྒང་དུ་ང་ལ་བསྒུག་ཡོད། ང་དེར་ཁྱེར་རོགས”ཞེས་རྡབ་རྡིབ་ཀྱིས་ཚིག་འགའ་བཤད།
ཁོའི་ཚིག་དེ་ནི་མཚོ་སྐྱེས་རྡོ་རྗེ་ལ་མཚོན་ན། ཕྱི་མའི་ཡུལ་ནས་ཐོན་པའི་སྙིང་གྲོགས་ཀྱི་འབོད་པ་དང་། གསོན་བྲལ་གྱི་སྡུག་བསྔལ་བསལ་བའི་སྙིང་གཏམ་ཡིན་པས། སྐད་ཅིག་ཉིད་ལ་བཀྲ་ཤིས་རྒྱ་མཚོར་འཐམས། སེམས་སྡུག་གིས་མནར་བའི་བཀྲ་ཤིས་རྒྱ་མཚོའི་ཆུང་མ་དང་བུ་ཕྲུག སྡེ་མི་ཚོའི་མཆི་མའི་བཀང་བའི་མིག་ལམ་དུ། ཁོ་གཉིས་ནི་ངོ་བོ་གཅིག་ཏུ་འཐིམ་པ་ལྟར་གྱུར།
“ང་མཚོ་སྐྱེས་ཡིན་ཡ། ཁྱོད་ལ་ཅི་བྱུང་བ་ཡིན་ནམ།” མཚོ་སྐྱེས་རྡོ་རྗེ་ཡིས་མིག་ཆུ་འབྱིད་ཀྱིན་གསལ་འདེབས་བྱས་མོད། བཀྲ་ཤིས་རྒྱ་མཚོ་སླར་ཡང་གྲགས་རྒྱུ་མེད་པར་གྱུར།
“དོན་དངོས་སུ་ཁོ་ལ་ཅི་བྱུང་བ་ཡིན་ནམ། སྨན་ཁང་ནས་ཁྱེར་ཡོང་བ་དང་འདྲ་བ་འདི་ཅི་ཡིན་ནམ། ཁོ་རང་སུས་ཁྱེར་ཡོང་བ་རེད།” ལོ་ལོན་ཞིག་གིས་སྡེ་མི་དང་མཚོ་སྐྱེས་རྡོ་རྗེ་སོགས་ཀྱིས་མྱུར་དུ་ཤེས་འདོད་པའི་དོགས་གཞི་གཙོ་བོ་འདི་དྲིས།
བཀྲ་ཤིས་རྒྱ་མཚོའི་བུ་ཕྲུག་ཆེ་བས་ངུ་ངག་འདྲེས་མས“མདང་དགོང་སྒོ་བརྡུངས་པའི་ཁྲོག་སྒྲ་གྲགས་པས། ང་རང་བལྟ་རུ་སོང་བ་ན། ཁོ་གཅིག་པུ་ཉལ་འདུག ད་ཅི་ཞིག་བྱ་དགོས་སམ། ཨ་ཁུ་མཚོ་སྐྱེས”ཟེར་བཞིན་མཚོ་སྐྱེས་རྡོ་རྗེ་ལ་ཅར་རེར་བལྟས།
མཚོ་སྐྱེས་རྡོ་རྗེ་ཡིས་བློ་ཐག་ཆོད་པོས་ “རེད། ད་འདི་ལྟར་འདུག་པའི་ཚོད་མ་རེད། འུ་ཚོས་ཟི་ལིང་གི་སྨན་ཁང་དུ་འཁྱེར་དགོས”ཞེས་བཤད་རྗེས་གསར་བུ་ཞིག་ལ“ཁྱོད་རང་རླངས་འཁོར་ལེན་དུ་སོང་། རེམ། ད་ནི་འཆི་བདག་དང་ང་ཚོས་སུ་མགྱོགས་ལ་བལྟ་དགོས། རེམ། རེམ”ཞེས་བཀོད་སྒྲིག་གནང་།
“རེམ། ང་རང་མཚོ་སྐྱེས་ཡོད་སར་ཁྱེར། ངས་ཁོ་ལ་འགྱོད་གཤགས་བྱ་དགོས།” བཀྲ་ཤིས་རྒྱ་མཚོས་ཁ་རུབ་པའི་མིག་ཟུང་བཙན་གྱིས་ཕྱེས་ཏེ་ཁོ་རང་བསྐོར་བའི་མི་ཚོགས་ལ་ཐེངས་གཅིག་བལྟས།
མཚོ་སྐྱེས་རྡོ་རྗེ་སྔོན་ལ་བུད་དེ“ང་མཚོ་སྐྱེས་ཡིན་ཡ། ལོ་གཅིག་ལ་མ་ཐུག་པར་ང་རང་བརྗེད་སོང་བ་ཡིན་ནམ”ཞེས་ཀུ་རེ་བརྩེས། དེ་ནི་ཁོ་ཡི་རྣམ་རིག་ཇེ་གསལ་དུ་ཨེ་འགྲོ་སྙམ་སྟེ་བཤད་པ་ཡིན་སྲིད།
ཁོས་མིག་རིག་རིག་གིས་མཚོ་སྐྱེས་རྡོ་རྗེ་ལ་ལྟ་ཡག་ཅིག་བྱས་ཏེ“རེད། མཚོ་སྐྱེས་རེད། ཁྱོད་རྒྱབ་རི་སྒང་དུ་མ་སོང་ངམ”ཟེར་བཞིན་མིག་ཆུ་ཤམ་ཤམ་དུ་བཞུར།
“ད་ཁྱོད་རང་ཡུལ་ལ་ཐོན་ཡོད་པས། ཁྱོད་ཀྱི་སེམས་སྡུག་མི་དགོས། རླངས་འཁོར་ཐོན་ན། ང་ཚོ་སྨན་ཁང་དུ་འགྲོ སེམས་ལ་ཡར་མར་མ་དྲན། དོན་དག་ཅི་ཞིག་ཡོད་ཀྱང་འུ་གཉིས་ཀྱིས་རྒྱབ་རི་སྒང་ནས་གླེང་ཆོག”
“སྨན་པས་ང་རང་བཅོ་ཐབས་མེད་ཟེར། ད་ཁྱོད་ཚོས་སྡུག་མ་མྱང་། ཧིན……དེ་ལས། ང་ལ་སྦི་རག་གཅིག་བྱིན་དང་། ངའི་ཁ་ལྕེ་སྐམ་སྟེ་གྱོང་འདུག”
“ཟི་ལིང་དུ་སྨན་ཁང་ཆེན་པོ་དང་སྨན་པ་གྲགས་ཅན་ཡོད། དེར་སོང་ན་ཁྱོད་རང་དྲག་ཁོ་ཐག་ཡིན། ཁྱོད་ཀྱིས་ཡིད་ཆེས་བྱོས། ཁྱོད་རང་ཡིན་གཅིག་མིན་གཉིས་སྨན་ཁང་དུ་འགྲོ་དགོས།”
“སྨན་པས་ངའི་རྩིབ་གུ་ཆག་རོ་ཡིས་མཆིན་པ་བསྣད་འདུག་ཟེར། ཧིན……ངས་ཀྱང་ང་རང་ཚད་ཅི་འདྲ་ཞིག་ཏུ་ལྷུང་ཡོད་པ་ཤེས།”
ཁོའི་དངན་པ་འདྲེས་མའི་ཚིག་འདི་ནི་གློག་ཞགས་ཤིག་དང་འདྲ་བར་ཁོ་ཚོའི་སྙིང་ལ་ཕོག་པས། སྐད་ཅིག་ཉིད་ལ་གནས་དེའི་ཡོད་ཚད་རི་མོར་བཀོད་པ་དང་འདྲ་བར་གྲག་མེད་འགུལ་མེད་དུ་གྱུར།
བཀྲ་ཤིས་རྒྱ་མཚོས་ཁོའི་མཐའ་སྐོར་གྱི་རེ་ཐག་ཆད་པའི་ངོ་གདོང་རེ་རེར་སྐོར་ལྟ་ཐེངས་གཅིག་བྱས་རྗེས“མཚོ་སྐྱེས། ངས་སེམས་ཐོགས་ས་ནི་སྙིང་རྗེ་བའི་ཆུང་མ་དང་གཅེས་ཕྲུག་གཉིས་རེད། ཁོ་གསུམ་པོས་ངའི་རྩིབ་ནས་སྐྱིད་ཅིག་རྒྱག་མ་ཐུབ། སྔོན་ཆད། ང་རང་གིས་སྒོར་མོ་མང་པོ་བསོགས་རྗེས་ཁོ་ཚོར་སྐྱིད་རྒྱག་ཏུ་འཇུག་འདོད་མོད། ད་ལྟ་ང་རང……”ཟེར་བཞིན་འགྱོད་གདུང་གི་མཆི་མ་ཆུ་མིག་བརྡོལ་བ་ཇི་བཞིན་བཞུར།
“ངེད་མ་བུ་གསུམ་གྱི་དོན་དུ་སེམས་མ་སྡུག ད་ལྟ་ཁྱོད་རང་སྨན་ཁང་དུ་འགྲོ་དགོས། ཁྱོད་རང་དྲག་ན། ངས་ཁྱོད་ལ་བཟའ་འཁོན་ཡང་མི་བྱེད།” ཁོའི་ཆུང་མས་དེ་ལྟར་ཟེར་བཞིན་ཁོ་ལ་འཐམས།
“ཨ་ཕ། ཁྱོད་རང་དྲག་ན། ངེད་གཉིས་ཀྱིས་སློབ་སྦྱོང་ལ་ཧུར་བརྩོན་བྱེད་སྲིད། རྗེས་ནས་སློབ་གྲྭ་ཆེན་མོར་རྒྱུགས་འཕྲོད་ན། ཨ་ཕ་ཁྱོད་ཀྱིས་མ་བསྐྱལ་ན། ངེད་གཉིས་འགྲོ་མི་ཤེས་པས། ད་ཁྱོད་རང་སྨན་ཁང་དུ་འགྲོ ཨ་ཕ་ལེ་ལེ། ཁྱོད་སྨན་ཁང་དུ་འགྲོ” ཁོའི་གཅེས་ཕྲུག་གཉིས་ཀྱིས་ཀྱང་དེ་ལྟར་ཟེར་བཞིན་བཀྲ་ཤིས་རྒྱ་མཚོ་ཡང་ཡང་བསྒུལ།
“ཁྱོད་ཀྱིས་ཁོ་ཚོར་འདང་བརྒྱག་ན། ཁྱོད་རང་སྨན་ཁང་དུ་འགྲོ་དགོས། གལ་ཏེ། ཟི་ལིང་གི་སྨན་ཁང་ནས་མི་དྲག་ན། པེ་ཅིན་གྱི་སྨན་ཁང་དུ་འགྲོ ད་རག་བར་དུ་ཁྱོད་ཀྱིས་ངའི་ཁ་ལ་ཉན་མ་མྱོང་། ད་ཐེངས་ངའི་ཁ་ལ་ཉོན།”
“ངོ་མ་རེད། ཁྱོད་ཀྱི་ཁ་ལ་མ་ཉན་པར་ང་རང་ཚད་འདི་འདྲ་ཞིག་ཏུ་ལྷུང་བ་རེད། ཧིན་་་་་་ངས་ཀྱང་ཁྱོད་ཀྱི་ཁ་ལ་ཐེངས་གཅིག་ཉན་འདོད་མོད། ད་ནི་འཕྱིས་སོང་། ཧིན་་་་་་ སེམས་གཏམ་བཤད་ན། སྨན་ཁང་དུ་ཐོན་མིན་ཡང་མི་ཤེས་ལ། ཐོན་ཡང་ང་རང་སྨན་ཁང་ནས་འཆི་མི་འདོད།”
ཁོ་ཚོས་མིག་མཆི་མས་བརླན་ཏེ་ཇི་ལྟར་ཞུ་བ་བྱས་ཀྱང་། བཀྲ་ཤིས་རྒྱ་མཚོས་རེ་ཐག་ཆད་པའི་མགོ་བོ་ཕར་གཡོ་ཚུར་གཡོ་བྱེད་པ་ལས་ཁོ་ཚོའི་རེ་འདོད་དང་ལེན་མ་བྱས།
“སྙིང་རྗེ་མེད་པའི་མི་སུ་ཞིག་གིས་ཁྱོད་རང་འདི་ལྟར་བྱས་པ་རེད། འདི་འདྲའི་སྙིང་ནད་ཅིག་གང་ནས་བྱུང་བ་ཡིན་ནམ།” གསར་བུ་ཞིག་གིས་ལག་གཡས་པས་མིག་ཆུ་འབྱིད་ཀྱིན་སྨྲས།
“ཧིན……དོན་འདི་ང་རང་ལན་པ་ཡིན། ན་ནིང་ངས་རྩྭ་ས་ཉོས་ཏེ་མ་རྩ་སྒོར་ཁྲི་དགུ་བཅུ་ལྷག་བརྡིབས་སོང་། ད་ལོ་ཕྱིར་ཨེ་ལོན་འདོད་དེ་ཡང་བསྐྱར་ཉོས་པ་ཡིན། ཧིན……མཚོ་སྐྱེས་ཁྱོད་ཀྱིས་དབྱར་རྩྭ་དགུན་འབུ་ཉོ་ཚོང་བྱེད་པ་ནི་ཤོ་རྒྱག་རྒྱན་འཇོག་བྱེད་པ་ལས་ཀྱང་སྡུག་ཟེར་བ་ངོ་མ་རེད། ད་ལོ་ཡང་སྒོར་ཁྲི་བརྒྱ་ལྷག་བརྡིབས་སོང་། ཧིན……ངས་ཀྱང་རང་སྲོག་གཅོད་འདོད་པའི་དུས་སུ། ཁོ་ཚོ་ཡོང་སྟེ་ང་རང་འདི་ལྟར་བྱས་པ་རེད། ཁོ་ཚོའི་བཀའ་དྲིན་གྱིས་ང་རང་ཡུལ་ལ་ཐོན་ཐུབ་སོང་། དེ་མིན་ན། ངའི་རོ་ཏོ་འདི་ཁྭ་སྐྱག་དང་ཁྱི་སྤྱང་གི་ཁ་ཟས་སུ་གྱུར་ཚར་སོང་། ཧིན……དེའི་ཕྱོགས་ལ་ཁྱོད་ཚོས་རྩད་གཅོད་ཅི་ཡང་མ་བྱེད། རྩད་གཅོད་བྱས་ན། ང་ཡི་བླ་སྒུལ་བ་དང་ཁྱད་པར་མེད། ཧིན……སྔོན་ཆད་རྩྭ་ས་རྩོད་གླེང་གི་མི་ཤི་རྟ་འགྱེལ་བྱས་པ་རེད། ད་ལྟ་དབྱར་རྩྭའི་ཆེད་དུ་མི་ཤི་རྟ་འགྱེལ་བྱེད་པ་རེད། ཧིན……རྩྭ་ས་ནི་ང་ཚོས་འཚོ་ཤེས་ན་རིན་ཆེན་འབྱུང་གནས་ཡིན་མོད། འཚོ་མ་ཤེས་རང་གི་གཤེད་མ་རེད། ཧིན……ཁྱོད་ཚོས་ངའི་ཆུང་མ་དང་གཅེས་ཕྲུག་གཉིས་ལ་ཁ་ལྟ་མིག་ལྟ་རེ་བྱ་རྒྱུ་མ་བརྗེད། ཁོ་ཚོ་ནི…… ཧིན……ཧིན……ཧིན……”
བཀྲ་ཤིས་རྒྱ་མཚོས་ལག་ཟུང་གིས་ཆུང་མ་དང་གཅེས་ཕྲུག་གཉིས་བསྡམས་ཏེ་མིག་གིས་མཚོ་སྐྱེས་རྡོ་རྗེ་ལ་ཅེར་འདུག
འདི་ནི་བཀྲ་ཤིས་རྒྱ་མཚོས་མི་ཡུལ་ལ་བཞག་པའི་གཏམ་རྒྱུད་ཅིག་གི་རྫོགས་ཚིག་ཡིན་ལ། རྔུལ་ཁྲག་གིས་བརླན་པའི་དབྱར་རྩྭ་དགུན་འབུ་ཡིས་རོང་འབྲོག་མང་ཚོགས་ལ་གནང་བའི་སྡོམ་ཚིག་ཀྱང་རེད། །