རྔུལ་ཁྲག་གིས་བརླན་པའི་དབྱར་རྩྭ་དགུན་འབུ། གསུམ་པ།

རྩོམ་པ་པོ། ཚེ་ལོ་ཐར། ༼བསྟན་འཇམ་གྱིས་འོས་སྦྱོར་བྱས།༽
 

གསུམ་པ།

མཁའ་དབྱིངས་སུ་སྐར་མའི་ཚོགས་ཀྱིས་ཁོ་གཉིས་ལ་ཅེར་ཏེ་ཅི་ཞིག་བཤད་པར་རེ་སྒུག་བྱེད་པ་དང་འདྲ་ཞིང་། སྐར་མ་སྨེ་བདུན་གྱིས་ཅི་ཞིག་མ་གོ་བ་བཞིན་མགོ་བོ་འཁྱོགས་ཏེ་བལྟས་འདུག
“རེད། རེད། གྲོགས་མཆོག་དམ་པ་ཡིན་ན། སྐྱིད་ཡོད་ན་མཉམ་རོལ་དང་སྡུག་ཡོད་ན་མཉམ་འཁུར་བྱ་དགོས། ངས་ཁྱོད་ལ་བཤད་ན། ཁྱོད་ཀྱིས་ང་ལ་སྡིགས་མི་ཆོག་་་་་་ ”
“ང་ཁྱོད་ལ་སུན་ནི་ཞིག་རེད། སྐྱེས་ཕོ་རབ་ཅིག་ཡིན་ན། རང་གི་སྲོག་ལ་བབས་ཀྱང་བཤད་ཕོད་དགོས། དོ་དགོང་ཁྱོད་བུད་མེད་ཅིག་དང་འདྲ་བ་ཅི་རེད། ”
“ད་ལོ་ངས་ཀྱང་མགོ་ལོག་ནས་སྒོར་ཁྲི་བརྒྱ་དང་སུམ་ཅུ་ལྷག་གི་རྩྭ་ས་ཆེན་པོ་ཞིག་ཉོས་ཏེ་མ་རྩ་སྒོར་ཁྲི་དགུ་བཅུ་ལྷག་བརྡིབས་སོང་།”
“ཨ་ཧ་བོ། ཁྱོད་ཀྱིས་ཀུ་རེ་རྩེས་པ་མིན་ན། ད་ངོ་མས་ཁྱོད་རང་སྦྱིན་བདག་མ་རེད་སྐྱིན་བདག་རེད། དེ་ན་ཁྱོད་ལ་གསོག་དངུལ་ག་ཚོད་ཡོད།”
“གསོག་དངུལ་ཞིག་ག་ལ་ཡོད། རླངས་འཁོར་དང་ནོར་ལུག་ཡོད་ཚད་བཙོངས་ཀྱང་སྒོར་ཁྲི་བཞི་བཅུ་ཙམ་ལས་མེད་པས། དངུལ་ཁང་ལ་ད་དུང་སྒོར་ཁྲི་ལྔ་བཅུ་ཡི་སྐྱིན་པ་འཇལ་དགོས།”
“ཁྱོད་ཀྱི་གཟི་མིག་དགུ་པ་དང་གསེར་གྱི་སྐེ་རྒྱན་དེ་དག་མེད་དམ།”

“གཟི་མིག་དགུ་པ་དེ་ངོ་མ་ཞིག་ག་ལ་ཡིན། གསེར་གྱི་སྐེ་རྒྱན་དེ་དག་ངས་ཆུང་མ་ཚོར་བྱིན་ཚར། མ་རེད། འཕྱོན་མ་དེ་དག་གིས་འཕྲོག་ཚར་བ་རེད།”
“ཁྱོད་ཀྱི་གྲོགས་པོ་སྦྱིན་བདག་དེ་དག་ལ་སྒོར་མོའི་སྔ་གཞུག་བསྣུར་རྒྱུ་མེད་དམ།”
“ད་ལྟའི་དུས་འདིར་གྲོགས་པོ་ངོ་མ་ཞིག་གང་ན་ཡོད། ཁོ་ཚོ་ནི་ཟ་རོགས་འཆའ་རོགས་མ་གཏོགས་གནད་འགག་གི་སྐབས་སུ་གར་སོང་ཆ་མེད་རེད།”
“ང་ལ་ལོ་འདི་འགར་དབྱར་རྩྭ་བརྐོས་པ་དང་ནོར་ལུག་བཙོངས་པའི་སྒོར་ཁྲི་ཉི་ཤུ་ལྷག་ཡོད། ཁྱོད་ལ་བསྐྱིས་ཆོག་མོད། ད་དུང་སྒོར་ཁྲི་སུམ་ཅུ་དགོས་པས་གང་ནས་ཁྱེར་ཡོང་ངམ།”

“ངའི་ཆུང་མ་དང་བུ་ཕྲུག་གཉིས་ཀྱིས་ཀྱང་སྒོར་ཁྲི་བཅུ་ལྷག་བསོགས་འདུག་ལ། སྔོན་ཆད་གཞན་གྱིས་ང་ལ་བསྐྱིས་པའི་སྒོར་ཡང་ཁྲི་བཅུ་ཙམ་ཡོད་པས་སྒོར་སྐྱིན་སྟེར་ཐུབ་སོང་བ་རེད། ད་འགྲིག་སོང་། དངུལ་ཁང་ལ་སྔ་ལོ་བསྐྱིས་པའི་སྒོར་སྐྱིན་དང་བུ་ལོན་ཁ་ཚང་སྟེར་ཐུབ་སོང་ན། ཕྱི་ལོ་ཡང་ཕྱིར་བསྐྱིས་ཆོག་པས། མྱུར་དུ་ཁྱོད་ལ་འཕྲོད་དུ་འཇུག ད་འགྲིག་སོང་། ད་འགྲིག་སོང་། ”

མཚོ་སྐྱེས་རྡོ་རྗེ་ཡིས་བཀྲ་ཤིས་རྒྱ་མཚོ་དགའ་དྲགས་པ་མཐོང་སྟེ“བཀྲ་ཤིས། གློ་བུར་དུ་ཁྱོད་ལ་རྣམ་རིག་རྒྱས་པར་བལྟས་ན། ཁྱོད་རང་ཆང་གིས་བཟི་བ་མིན་པར་སྒོར་སྐྱིན་གྱིས་བཟི་སོང་བ་འདྲ། ཤོག ཤོག ཆང་ཐུངས། ཆང་ཐུངས”ཞེས་བཤད།

སྐྱ་རེངས་དང་པོའི་འོད་སྣང་རིམ་གྱིས་ཤར་བ་དང་མཉམ་དུ་ཁོ་གཉིས་ཀྱི་སྐད་སྒྲ་ཇེ་ཆེ་ནས་ཇེ་ཆེར་གྱུར། ཁོ་གཉིས་ཀྱིས“ཨེ་མ། མཚོ་སྔོན་པོ། ཁྱེད་ནི་མི་རིགས་ཀྱི་ལ་རྒྱ་དང་མེས་རྒྱལ་གྱི་གཟི་བརྗིད་རེད། རླབས་སྔོན་མོ་དགུང་ལ་འཕྱོ་དུས། ལུག་གཡང་དཀར་སེམས་པ་དགའ་སོང་། མཚོ་སྔོན་པོར་འགྲམ་དར་ཆགས་དུས། བྱ་ངང་བའི་སེམས་པ་སྐྱོ་སོང”ཞེས་མཚམས་རེར་མཉམ་ལེན་བྱེད་པ་དང་མཚམས་རེར་རང་མོས་སྙན་ངག་ལྟར་གྱེར་འདོན་བྱེད་པའི་སྐད་ཀྱིས་གནས་དེའི་ལྷིང་འཇགས་ཡོངས་སུ་བཅོམས།

ཉི་མ་གཞོན་ནུ་མཚོ་སྔོན་པོ་ལས་ཡར་འཕགས་པ་ན། ཁོ་གཉིས་ནི་པྲ་ཚག་བྱས་ཏེ་ལུས་ཐང་ཆད་པའི་བྱིས་པ་གཉིས་དང་འདྲ་བར་མཚོ་སྐྱེས་རྡོ་རྗེ་ཚང་ལ་ཆས། ཁོའི་ཆུང་མ་རྡོ་རྗེ་འཚོ་སྔ་མོ་ནས་ཡར་ལངས་ཏེ་ནང་ལས་ལ་བྲེལ་བཞིན་ཡོད་མོད། བཀྲ་ཤིས་རྒྱ་མཚོ་རྗེས་ན་ཡོད་པ་མཐོང་སྟེ “མདང་ཞག་གང་བོར་རྒྱབ་རི་སྒང་དུ་ཁྱི་རྒན་གཉིས་ཀྱིས་ཟུག་རེས་བྱེད་པ་ཨེ་གོ བདག་པོ་མེད་པའི་ཁྱི་རྒན་དེ་དག་སྙིང་མ་རྗེ”ཞེས་སྨྲ་ཞོར་དུ་མིག་ལོག་གིས་ཐེངས་གཅིག་བལྟས།

བཀྲ་ཤིས་རྒྱ་མཚོས་བཤད་ས་བུ་མོ་དང་ཉན་ས་མནའ་མ་ཞེས་པའི་དོན་གོ་སྟེ“བདག་པོ་མེད་པ་མ་རེད། བདག་པོ་མང་དྲགས་པས་རེད། ཨ་ལ་ཀུ་རེ་ཡིན། ཁྱོད་དང་ངའི་ཆུང་མ་གཉིས་ཀྱིས་ངེད་གཉིས་མཐོང་མ་ཐག ཚིག་མཚོན་མདའ་འདྲ་བ་དང་མདུང་འདྲ་བ་འཕངས་ཏེ་ཁྱིམ་དུའང་ལོག་མི་འདོད། དེ་ལས་ཟླ་བའི་ལྷ་མོར་སེམས་གཏམ་བཤད་ན་རང་སེམས་སྐྱིད”ཅེས་བཤད།

རྡོ་རྗེ་འཚོ་ཡིས་ཟླ་བའི་ལྷ་མོ་ཞེས་པའི་དོན་མ་གོ་བ་འདྲ་སྟེ“ཁྱོད་གཉིས་ལ་ལྷ་མོ་དང་སྒྲོལ་མ་མང་སོང་བས། ངེད་གཉིས་དགོས་སམ། ད་ལྟ་ལས་ཀ་དང་ལོ་ཡིས་ཐུ་སྟེ་ཁྱོད་གཉིས་ཀྱི་སེམས་ནང་གི་འདྲེ་མོར་གྱུར་འདུག་མོད། སེམས་ཆུང་བྱོས། སྒོར་མོའི་ཆེད་དུ་འདྲེ་མོ་ཡོད་ཚད་ལྷ་མོར་སྤྲུལ་འདུག་པ་རེད། ནམ་ཞིག་གི་ཚེ་ཁྱོད་གཉིས་ཀྱི་ཤ་ཁྲག་ཡོད་ཚད་འཇིབ་ཚར་ན། ཁྱི་ལྡོམ་ཁྱེད་གཉིས་གང་ལ་འགྲོ”ཞེས་བཤད་རྗེས་ལུས་པོ་གཡས་གཅུས་གཡོན་གཅུས་བྱས་ཏེ་འབྲི་མོ་བཞོ་རུ་སོང་།

མཚོ་སྐྱེས་རྡོ་རྗེ་ཡིས“ཁྱོད་རང་མི་སུན་ནམ། ངས་ཚུལ་མཐུན་ཡ་རབས་བྱས་ཏེ་ངེད་ཚང་གི་སྒོར་མོའི་དབང་ཆའང་མོ་ལ་སྤྲད་ཡོད་མོད། ང་རང་ས་ཆ་གཞན་ཞིག་ཏུ་སོང་བ་ན། ཁོ་མོས་ཁ་པར་བཏང་སྟེ་ས་གོམ་པ་གང་ལ་ཡང་འགྲོ་རུ་མི་འཇུག ཕྱིར་ཡུལ་ལ་ཐོན་མ་ཐག སུ་དང་འགྲོགས་ཏེ་གང་ལ་སོང་བ་དང་ཅི་ཞིག་བཤད་པ། ཅི་ཞིག་ཉོས་པ། ཐ་ན་སེམས་ལ་ཅི་ཞིག་དྲན་པ་སོགས་ཀྱང་དྲིས་ཏེ་ཞག་གང་བོར་གཉིད་དུ་མི་འཇུག དོ་དགོང་ཡང……” ཟེར་བཞིན་མགོ་བོ་འཕྲེད་དུ་གཡུག་གཡུག་བྱས།

“ཁོ་མོས་བཤད་པ་ངོ་མ་རེད། སྒོར་མོའི་དོན་དུ་ཡོད་ཚད་འདྲེ་རུ་གྱུར་འདུག ངས་འདྲེ་མོ་དེ་དག་ལ་བླུད་པའི་ཟ་མ་དང་ཉོས་པའི་གྱོན་གོས་ཕར་ཞོག གསེར་གྱི་རྒྱན་ཆ་དང་ལག་འཁྱེར་ཁ་པར་ཉོས་པའང་སྒོར་ཁྲི་བཅུ་ཕྲག་གཅིག་ལོས་ཡོད།”“ཁྱོད་ཚང་གི་བདག་མོར་ཁག་མེད་མོད། མོ་ལ་ཅི་བྱུང་བ་ཡིན་ནམ། མོ་ནི་ཁྲོས་ན་རྟ་མགྲིན་དམར་པོ་དང་མ་ཁྲོས་ཐུགས་རྗེ་ཆེན་པོ་ཡིན། ད་ཁྱོད་ཀྱིས་མོ་ལ་ཁོང་ཁྲོ་མ་སློང་། བཤད་རྒྱུ་མང་ན། འུ་གཉིས་ཀྱི་ལག་ཏུ་དངུལ་བྱང་ཡང་མི་འཇོག་པས། གཡུང་ལ་ཕབ་དགོས། དེ་ནི་ངས་ལོ་མང་རིང་བསགས་པའི་ཉམས་མྱོང་ཡིན།”

སྐྱེ་བོ་སུ་ཞིག་ཡིན་རུང་། ཁྱོད་རང་བདེན་ལ། ང་ལ་ཡང་ཁག་མེད་ཚུལ་བཤད་དེ་རང་གཞན་གཉིས་ལ་བདེན་ཁ་བྱིན་པ་ན། འགལ་བ་ཐག་གཅོད་བྱེད་ཐུབ་པར་མ་ཟད། རང་སེམས་ཀྱང་སྙོམས་སྒྲིག་བྱེད་ཐུབ་པས། བཀྲ་ཤིས་རྒྱ་མཚོས“ཁྱོད་ཀྱིས་དངུལ་བྱང་ཡང་མོའི་ལག་ཏུ་བཞག་ཡོད་དམ། ཁྱོད་ནི་ངོ་མས་ཡ་རབས་རེད། ཨ་ལ་ཀུ་རེ་ཡིན། སྐྱེས་པའི་ལག་ཏུ་སྒོར་མོ་བཟུང་ན། མི་དྲན་དགུ་དྲན་དང་མི་ལས་དགུ་ལས་བྱས་ཏེ་ངའི་ཚད་འདི་འདྲར་ལྷུང་འགྲོ་བས། ཁྱོད་ཀྱི་བྱེད་ཐབས་དེ་ཧ་ཅང་འགྲིག ཡིན་ཡང་། སྐྱེས་པ་ཚོས་དབྱར་རྩྭ་དགུན་འབུའི་དོན་དུ་རང་སྲོག་འབེན་ལ་འཇོག་དགོས་པ་སྐྱེས་མ་ཚོས་ག་ལ་ཤེས”ཞེས་ཀུ་རེ་འདྲེས་མས་སྒོར་མོའི་བདག་གཉེར་གྱི་ལྟ་ཚུལ་ཡང་དག་པ་ཞིག་བཤད་རྗེས། གནམ་འོག་གི་སྐྱེས་པ་ཡོངས་ཀྱི་ཚབ་བྱས་ཏེ་སྡུག་སྨྲེ་ཞིག་ཀྱང་བཏོན།

“རེད་ཡ། རེད་ཡ། མོ་རང་ཕྱིར་ཐོན་ན། ཁ་ཡག་ངོ་དགའ་བྱ་རྒྱུ་མ་བརྗེད། དེ་མིན་ན། འུ་གཉིས་ཀྱི་ཁ་ནང་དུ་ནངས་ཇ་ཡང་ཡོང་རྒྱུ་མ་རེད།”
རྡོ་རྗེ་འཚོ་ཡིས་འོ་ཟེའུ་ཐོགས་ཏེ་ནང་དུ་བསླེབས། ཁོ་མོས་སྒྲོལ་མ་ཁོག་འདོན་བྱེད་པ་ལས་ཁ་ཅི་ཡང་མ་གྲགས་པས། བཀྲ་ཤིས་རྒྱ་མཚོས་ཁོ་མོ་གཡུང་ལ་ཕབ་པའི་བྱ་ཐབས་ལག་བསྟར་བྱས།
“མཚོ་སྐྱེས། ཁྱོད་ཚང་ལ་བཞོན་མ་དུ་ཡོད།”

“ད་ལྟ་བཞོས་ཆོག་པའི་འབྲི་མོ་གསུམ་དང་མཛོ་མོ་གཅིག་ཡོད། ཚང་མ་འོ་ཡོད་ཏག་ཏག་ཡིན།”
“ཨ……ཨ……ཨ། མིག་རྡེབ་དབང་ཙམ་ལ་བཞོན་མ་བཞི་བཞོས་ཚར་སོང་། རྡོ་འཚོ་ཀན་ངར་བ་ཞིག་མིན་ན། དཀོན་མཆོག་གསུམ”ཟེར་བཞིན་མིག་བརྡ་ཞིག་བྱས།
“ལོས་ཡིན། ད་དུང་མོས་འོ་ཇ་བསྐོལ་ན་ཁྱོད་ཀྱིས་ཐུངས་དང་བ་མོའི་འོ་མ་འདྲ་བ་གཏན་ནས་མིན།”
“ངོ་མ་རེད། རང་གི་ཆུང་མས་བསྐོལ་བའི་འོ་ཇ་དང་ལས་པའི་ཟ་མ་ནི་ས་ཆ་གང་ལ་སོང་ཡང་བརྗེད་དཀའ་བ་ཞིག་རེད།” བཀྲ་ཤིས་རྒྱ་མཚོས་སྐད་གདངས་མཐོན་པོས་བཤད་མོད། རྡོ་རྗེ་འཚོ་ཡིས་ཁ་ཡའང་མ་བྱས།

མཚོ་སྐྱེས་རྡོ་རྗེ་ཡིས་མྱུར་དུ“རེད་ཡ། ང་ལ་མཚོན་ནའང་དེ་འདྲ་རེད། རང་ལ་ཤ་ཚ་བ་ནི་རང་གི་ཆུང་མ་ལས་གཞན་སུ་ཡོད། ལྟོགས་དུས་ཟ་མ་སྟེར་མཁན། གྲང་དུས་ཉལ་གོས་གཡོག་མཁན། ད་དུང……”ཞེས་ཚིག་་་་་་་ མཚམས་བསྐྱུར།

བཀྲ་ཤིས་རྒྱ་མཚོས“ད་དུང་ཅི་ཞིག ཤོད་ཡ། ཤོད་ཡ”ཞེས་བཤད་པ་ན། རྡོ་རྗེ་འཚོ་ཡིས“ཁྱོད་གཉིས་ལ་དངོས་ནས་ངོ་ཚ་ཞིག་མི་འདུག ཕོ་བ་ལྟོགས་ན་ད་གཟོད་ཆུང་མ་དང་འོ་མ་དྲན། ད་དུང……ཧོ་ཧོ་ཡ”ཟེར་བཞིན་ནངས་ཇ་བསྐོལ་མགོ་བརྩམས།

འཚོ་བའི་ནང་གི་བཟའ་འཁོན་མང་ཆེ་བ་ནི་འདི་ལྟར་འགྲིག་འགྲོ་བས། མཚམས་རེར་བལྟས་ན། བཟའ་འཁོན་ནི་བྱིས་པའི་རོལ་རྩེད་དང་འདྲ་ལ། མཚམས་རེར་བལྟས་ན། བཟའ་འཁོན་ནི་བཟའ་འདང་བསྐྱེད་པར་ངེས་པར་མཁོ་བའི་གོ་རིམ་ཞིག་ཏུ་སྣང་།

ཁོ་མོའི་ཧབ་ཆ་དེ་ནི་ཁོ་གཉིས་ལ་མཚོན་ན། གཉིད་སྨན་ཞིག་དང་འདྲ་བར་སྐད་ཅིག་ཉིད་ལ་གཉིད་དུ་ཡུར། ཁོ་གཉིས་ཀྱིས་སྔུར་བ་གཅིག་འཐེན་གཉིས་འཐེན་བྱེད་པར་བལྟས་ན། དོན་དག་གལ་ཆེན་ཞིག་གྲུབ་སྟེ་འགྲུབ་གླུ་ལེན་པ་དང་མཚུངས་པས། ཁོ་མོས་གོ་རེ་ཚ་མོ་དང་འོ་ཇ་ཁོལ་མ་ཅོག་ཙེ་གྲུ་བཞིའི་སྟེང་དུ་བསྒྲིགས་ཀྱང་། ཁོ་གཉིས་གཉིད་ལས་བསླང་མ་ཕོད།

ཉིན་གུང་ཡོལ་ཏེ་ཅུང་ཙམ་བགོར་བའི་དུས། ཁོ་གཉིས་ཀྱིས་མིག་ཟུང་འཕུར་འཕུར་བྱེད་ཀྱིན་མགོ་བོ་ཡར་དགྱེ་སྟེ་དྲོས་ཇ་འཐུང་། བཀྲ་ཤིས་རྒྱ་མཚོས་འོ་ཇ་མངར་མོ་འཐུང་ཞོར་དུ“གྲོང་ཁྱེར་གྱི་བ་མོའི་འོ་མ་དང་ལས་སྣོན་བྱས་པའི་འོ་མ། ད་དུང་འོ་ཕྱེ་སོགས་འཐུང་མ་ཐག གྲོད་པ་བཤལ་སྟེ་སྤྱོད་ཁང་ཡང་མི་རྙེད། དེ་ལས་རང་ས་རང་ཡུལ་གྱི་ཤ་མར་ཐུད་གསུམ་དང་འོ་ཞོ་སྤྲི་གསུམ་ནི་ཁ་ལ་ཞིམ་ཞིང་ཁོག་ལ་བདེ་བ་ཞིག་རེད” ཅེས་སྨྲས།

“ལོས་ཡིན། གོ་ཐོས་ལྟར་ན། འོ་མ་དེ་དག་ལས་སྣོན་བྱེད་དུས། མི་རུལ་བའི་ཆེད་དུ་དུག་རྫས་བསྲེས་ཡོད་པ་རེད་ཟེར་བ་མ་གོའམ། དངོས་ནས་དུག་རྫས་ཡིན་ན། གྲོད་པ་བཤལ་བ་དོན་དག་ཆུང་ཆུང་རེད། གྲོད་པ་རུལ་སོང་ན། ང་ཚོས་ཇི་ལྟར་བྱ།” མཚོ་སྐྱེས་རྡོ་རྗེ་ཡིས་བརྙན་འཕྲིན་ལས་ཤེས་རྟོགས་བྱུང་བའི་གསར་འགྱུར་བཤད།

སྐབས་དེར། རྡོ་རྗེ་འཚོ་ཡིས་ཆུ་ཁུར་ཏེ་ཐོན་བྱུང་བས། ཁོ་གཉིས་ཀྱིས་བློ་རྩེ་གཅིག་ཏུ་བསྒྲིམས་པའི་རྣམ་འགྱུར་ལ་བརྟགས་ན། ཕལ་ཆེར་མོའི་ལག་ནས་དངུལ་བྱང་ཇི་ལྟར་ལེན་པའི་ཕྱོགས་ལ་བསམ་བློ་གཏོང་བ་འདྲ། སྔོན་ལ་མཚོ་སྐྱེས་རྡོ་རྗེས་ཁ་གྲགས་བྱུང་། “རྡོ་འཚོ། ལས་བྱེད་པ་ཚོ་ཁོམ་སོང་ན། ཅི་ཞིག་ལས་པ་ཤེས་ཀྱིན་མེད་པ་འདྲ། ན་ནིང་ཐོབ་ཐང་ལག་ཁྱེར་བརྗེས། ད་ལྟ་ཡང་དངུལ་བྱང་བརྗེ་དགོས་ཟེར། མྱུར་དུ་མ་བརྗེས་ན། དངུལ་བྱང་སྟེང་གི་སྒོར་མོ་ཡོད་ཚད་གཞན་གྱིས་བླངས་འགྲོ་ཟེར་བས། ཕྱི་དྲོ་ང་རང་ཁུལ་ཐོག་ལ་འགྲོ་དགོས”ཞེས་སྨྲས། བྱེད་ཐབས་དེ་ནི་བཀྲ་ཤིས་རྒྱ་མཚོའི་བློ་ཡིད་དུའང་ཤར་མེད་པས། ཡུན་ཙམ་ལ་བསྡད་རྗེས“ཨིན……ཁྱེད་ཚང་གིས་ད་དུང་བརྗེས་མེད་དམ”ཞེས་བཤད་དེ་རྡོ་རྗེ་འཚོ་ཡིས་ཅི་ཞིག་བཤད་པར་བསྒུགས།

རྡོ་རྗེ་འཚོས་ཆུ་རྫ་མའི་ནང་དུ་བླུགས་རྗེས“ངོ་མས་ལས་བྱེད་པ་ཚོར་བསྣོག་རྒྱུ་མང་། ཁོ་ཐག་ལ་ཡང་དངུལ་བྱང་གི་རིན་ལེན་འདོད་པ་རེད། དེ་མིན་ན། ན་ནིང་ངེད་གཉིས་ཀྱིས་དངུལ་བྱང་གི་གསང་གྲངས་དེ་བརྗེད་སོང་བས། སྒོར་མོ་ཕར་ཞོག་སྒོར་ཟུར་གཅིག་ཀྱང་ལེན་དུ་མ་བཅུག་པ་མིན་ནམ”ཞེས་བཤད།

མཚོ་སྐྱེས་རྡོ་རྗེ་ཡིས་མྱུར་དུ“དོན་དེ་ངས་བཀྲ་ཤིས་ཁྱོད་ལ་བཤད་མྱོང”ཞེས་ལྕེ་བསྣར་ཞིག་བྱས་རྗེས“གོ་ཐོས་བདེན་ན། རྩིས་འཁོར་ལ་མཁས་པའི་མིས་གཞན་གྱི་གསང་གྲངས་བརྟོལ་ཏེ་དངུལ་བྱང་སྟེང་གི་སྒོར་མོ་ཡོད་ཚད་ལེན་ཐུབ་ཟེར། གསར་འགྱུར་ནང་དུ་གྲོང་ཁྱེར་ཆེ་ས་ནས་དེ་ལྟར་སྒོར་མོ་ཁྲི་ཁྲི་འབུམ་འབུམ་བླངས་ཚར་བ་རེད་ཟེར། དཀོན་མཆོག་གསུམ་པོ། ངེད་ཚང་གི་སྒོར་མོ་བླངས་མེད་པར་སྨོན”ཟེར་བཞིན་ལག་ཟུང་ཐལ་མོ་སྦྱར།

༼མུ་འགོད།༽