ཡ་མ་ཚེ་རིང་།
དེ་རིང་ཀིརྟིའི་བྱེས་པ་གྲྭ་ཚང་གི་ཆེས་མཐོའི་བོད་ཀྱི་རིག་གནས་སློབ་ཁང་གི་རིག་གནས་དང་དབུ་མ།ཕར་ཕྱིན་བཅས་ཀྱི་སློབ་ཐོན་པའི་མཛད་སྒོ་སྟེང་། སྐུ་མགྲོན་གཙོ་བོ་སྲིད་སྐྱོང་མཆོག་གིས་ཀིརྟི་དགོན་པ་དང་རང་ལུས་མེར་བསྲེགས། དོལ་རྒྱལ་བཅས་ཀྱི་སྐོར་ལ་གསུང་བཤད་གནང་སོང་།
དེ་རིང་སྔ་དྲོའི་ཆུ་ཚོད་ ༡༠།༠༠ པའི་སྟེང་དྷ་ས་ཀིརྟིའི་བྱེས་བ་གྲྭ་ཚང་གི་ཆེས་མཐོའི་བོད་ཀྱི་རིག་གནས་སློབ་གཉེར་ཁང་གི་ཚོམས་ཁང་དུ། གྲྭ་ཚང་དེ་གའི་ཆེས་མཐོ་བོད་ཀྱི་རིག་གནས་སློབ་གཉེར་ཁང་གི་སྐབས་དང་པོ་དང་གཉིས་པའི་དབུ་མ་སློབ་ཐོན་པ་དང་། སྐབས་གསུམ་དང་བཞི་པའི་ཕར་ཕྱིན་སློབ་ཐོན་པ།འབྲིང་རིམ་རིག་གནས་སློབ་ཐོན་པ་བཅས་ལ་མཐར་ཕྱིན་ཕྱག་ཁྱེར་འབུལ་བཞེས་ཀྱི་མཛད་སྒོ་ ཞིག་ཚོགས་ཡོད་ཅིང་། སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཕེབས་འདུག
མཛད་སྒོའི་ཐོག་མར་སྲིད་སྐྱོང་བློ་བཟང་སེང་གེ་མཆོག་གྲྭ་ཚང་གི་དཔེ་མཛོད་ཁང་དུ་ཕེབས་ཏེ་ཀིརྟིའི་བྱེས་པ་གྲྭ་ཚང་གིས་ ༡༩༩༢ ནས་ ༢༠༡༣ ལོར་བར་པར་སྐྲུན་བྱས་པའི་དཔེ་དེབ་ ༡༤༠ དང་། གྲྭ་ཚང་གི་ཡིག་རྒྱུགས་གཏོང་སྟངས་སོགས་ཀྱི་འགྲེམས་སྟོན་ལ་གཟིགས་ཞིབ་གནང་རྗེས་ ཚོམས་ཁང་དུ་ཕེབས་ཏེ་མཛད་སྒོ་དངོས་གཞི་དབུ་འཛུགས་གནང་སོང་། ཐེངས་འདིར་སྐབས་དང་པོ་དང་གཉིས་པའི་དབུ་མ་སློབ་ཐོན་པ་ ༡༦ དང་། སྐབས་གསུམ་པ་དང་བཞི་པའི་ཕར་ཕྱིན་སློབ་ཐོན་པ་ ༡༡། འབྲིང་རིམ་རིག་གནས་སློབ་ཐོན་པ་ ༤ བཅས་ཡོད་པར་སྲིད་སྐྱོང་མཆོག་གིས་ ཁ་བཏགས་དང་མཉམ་དུ་བཀའ་ཤོག་ཕྱག་འཁྱེར་རིམ་པར་གནང་སོང་།
སྐབས་དེར་སློབ་སྤྱི་སོ་རུ་བློ་བཟང་དར་རྒྱས་ལགས་ཀྱིས་སློབ་གཉེར་ཁང་དེ་གའི་ལས་དོན་ངོ་སྤྲོད་གནང་བ་ལྟར་ན། ཆེས་མཐོའི་ བོད་ཀྱི་རིག་གནས་སློབ་གཉེར་ཁང་དེ་བཀའ་ཟུར་ཀིརྟི་རིན་པོ་ཆེ་མཆོག་གིས་ ༡༩༩༠ ལོར་ཕྱག་བཏབ་ཅིང་ལོ་དེའི་ཕྱི་ཟླ་ ༤ པའི་ནང་དགེ་སྐོས་དང་དབུ་མཛད་སོགས་གསར་བསྐོས་ཀྱིས་གྲྭ་ཚང་གི་ངོ་བོ་དང་། ཕྱི་ཟླ་ ༨ པའི་ནང་བརྡ་སྤྲོད་རིག་གནས་སློབ་སྦྱོང་གི་མགོ་བཟུང་ཞིང་། སྐབས་དེར་སློབ་གཉེར་པ་གྲྭ་བ་ ༣༠ ཙམ་འཛིན་གྲྭ་གཅིག་བྱས་ཏེ་སུམ་རྟགས་དག་གསུམ་དང་གྲུབ་མཐའ། ཡིག་གཟུགས་བཅས་བསླབས་ཤིང་། རིམ་པས་གྲྭ་བ་ཇེ་མང་དུ་ཕྱིན་ཏེ་ ༡༩༩༢ ཟླ་ ༤ པ་ནས་སྔོན་འགྲོའི་འཛིན་གྲྭ་གཉིས་དང་དངོས་གཞིའི་འཛིན་གྲྭ་གཅིག་བཅས་བཟོས་ཏེ། དངོས་གཞིར་ལོ་གསུམ་བཅས་སློབ་ཚན་དང་རྒྱུགས་སྤྲོད་ཀྱི་འགྲོ་རིམ་ཆ་ཚང་བ་གཏན་འབེབས་བྱས་ཏེ་ཀིརྟིའི་བྱེས་པ་གྲྭ་ཚང་གི་ཆེས་མཐོའི་བོད་ཀྱི་རིག་གནས་སློབ་གཉེར་ཁང་དངོས་སུ་ཚུགས་ཡོད་འདུག་ཅེས་བརྗོད་སོང་།
ཀིརྟིའི་གྲྭ་ཚང་སློབ་གཉེར་ཁང་གི་སློབ་མའི་ཡོང་ཁུངས་དང་རྒྱུགས་སྤྲོད་སྐོར་ལ་ཁོང་གིས། སློབ་མའི་ཡོང་ཁུངས་ནི་ གཞིས་ཀྱི་ཀིརྟི་ཚང་གི་གདན་ས་ ཁག་དང་ཆོལ་ཁ་དང་ཆོས་ལུགས་རིས་སུ་མ་ཆད་པའི་གྲྭ་གཞོན་རྣམས་ཡིན། ད་ལྟའི་ཆར་གྲྭ་ཚང་འདིར་དགོན་སྡེ་ཁག་མ་འདྲ་བ་ ༡༠ གྲྭ་རྒྱུན་འདུས་ཡོད། རྒྱུགས་སྤྲོད་ཀྱི་རིམ་པ་ནི་ལོ་རེའི་ནང་རྒྱུགས་སྤྲོད་ཐེངས་བཞི་སྟེ་ཟླ་གསུམ་རེའི་མཚམས་དང་ལོ་འཁོར་རྒྱུགས་སྤྲོད་ བཅས་ཡོད་པར་མ་ཟད། མཐོ་རིམ་རིག་གནས་རབ་འབྱམས་པའི་ཕྱག་འཁྱེར་བཞེས་པར་ལོ་ལྔའི་རིང་སྦྱངས་པའི་གཞུང་རྣམས་རིགས་མཐུན་ ཕྱོགས་བསྡུས་ ཀྱིས་མཐར་ཕྱིན་རྒྱུགས་སྤྲོད་ཆེན་མོ་ཞེས་རྒྱུགས་སྤྲོད་ལེན་ཞིག་བྱེད་ཀྱི་ཡོད་པར་ཞུགས་མཁན་མི་གྲངས་ ༨༦ བྱུང་ཡོད། ད་བར་མཐོ་རིམ་རིག་གནས་རབ་འབྱམས་པའི་ཕྱག་འཁྱེར་བཞེས་མཁན་ ༧༩ དང་འབྲིང་རིམ་རིག་གནས་སློབ་ཐོན་པ་གྲངས་ ༤ བཅས་ཁྱོན་རིག་གནས་སློབ་ཐོན་པ་ ༨༣ བྱུང་ཡོད། ཅེས་དང་། ཁོང་གིས་མུ་མཐུད་དུ་ངོ་སྤྲོད་གནང་བར། ༢༠༠༡ ལོར་རིག་གནས་སྡེ་ཚན་ ལས་ལོགས་སུ་རིགས་ལམ་འཛིན་གྲྭ་ཞིག་བཙུགས་ཏེ་ད་བར་བསྡུས་གྲྭ་དང་། བློ་རིག་རྟགས་རིགས། གྲུབ་མཐའ། ས་ལམ་སོགས་ལོ་ཡུན་བཞི་དང་། ཕར་ཕྱི་ལོ་ཡུན་དྲུག དབུ་མ་ལོ་རིམ་གསུམ། མཛོད་ལོ་ཡིན་གསུམ། འདུལ་བ་ལོ་ཡུན་གསུམ་བཅས་གཞུང་ཆེན་བཀའ་པོད་ལྔ་ལ་སྦྱོང་བའི་ ལོ་ཡུན་བཅུ་དགུ་ཅན་གཏན་འབེབས་ཀྱིས་ད་བར་ཕར་ཕྱིན་སློབ་ཐོན་པ་སྐབས་བཞི་བྱུང་བར་མི་གྲངས་ ༢༩ དང་། དབུ་མ་སློབ་ཐོན་པ་ སྐབས་གཉིས་བྱུང་བར་མི་གྲངས་ ༡༦ ཡོད། སོགས་བརྗོད་སོང་།
སོ་རི་བློ་བཟང་དར་རྒྱས་ལགས་ཀྱིས་མུ་མཐུད་དུ། བོད་ཀྱི་འདས་པའི་ལོ་རྒྱུས་ནང་གཅིག་ཡོད་ལ་གཅིག་མེད་པ། ཐུན་མོང་བའི་རིག་གནས་སྦྱོང་བའི་ཁོར་ཡུག་ཡོད་ཀྱང་ཐུན་མོང་མ་ཡིན་པའི་རིག་གནས་ཀྱི་དབུལ་བ། ཐུན་མོང་མ་ཡིན་པའི་ རིག་གནས་ཡོད་ཀྱང་ཐུན་མོང་ བའི་རིག་གནས་མེད་པ། རྩོད་ཤེས་ཀྱང་རྩོམ་མི་ཤེས་པ། རྩོམ་ཤེས་ཀྱང་རྩོད་མི་ཤེས་པ། འཆད་ཤེས་ཀྱང་རྩོམ་མི་ཤེས་པ་སོགས་ཀྱི་ བར་སྟོང་ཡོད་པ་ དེ་ཁ་གསབ་ཐུབ་ཆེད། ཀིརྟིའི་བྱེས་པ་གྲྭ་ཚང་ འདིར་བོད་ཀྱི་ཐུན་མོང་དང་ཐུན་མོང་མ་ཡིན་པའི་རིག་གནས་ཆ་ཚང་ལ་འཐུས་སྒོ་ཚང་བ་དང་། འཆད་རྩོད་རྩོམ་གསུམ་གང་ཞིག་གནང་ནའང་རང་གི་རིག་པས་རྩལ་བཏོན་ནས་སྦྱངས་ན་འཆད་རྩོད་རྩོམ་གསུམ་གྱི་ཡོན་ཏན་རིས་སུ་མ་བོར་བའི་གྲྭ་པ་ཤེས་ཡོན་ཅན་ཞིག་ཡོང་བའི་ཁོར་ཡུག་དང་མཐུན་རྐྱེན་གཞན་དང་མ་འདྲ་བ་ཞིག་བསྐྲུན་དང་སྐྲུན་བཞིན་ཡོད། ཅེས་སོགས་བརྗོད་སོང་།
སྐུ་མགྲོན་གཙོ་བོ་སྲིད་སྐྱོང་བློ་བཟང་སེང་གེ་མཆོག་གིས་གསུང་བཤད་གནང་དོན། ང་རང་སྲིད་སྐྱོང་གི་འགན་འཁུར་ནས་ཀིརྟིའི་དགོན་པ་ཡོང་བ་ ཐེངས་དང་པོ་ཡིན་དུས་བཀའ་ཤག་སྐབས་ ༡༤ ཚབ་ཞུས་ཏེ་སྙིང་ཐག་ནས་ཚང་མར་འཚམས་འདྲིའི་བཀྲ་ཤིས་བདེ་ལེགས་ཞུས་པ་ཡིན། ཀིརྟིའི་དགོན་པ་རྔ་པ་ཁུལ་གྱི་ཡན་ལག་མང་པོ་ཡོད་པའི་དགོན་ཆེན་ཞིག་དང་། དེའི་ནང་མདོ་སྔགས་རིག་གནས་གཙོས་གསོ་བ་རིག་པའི་ སྡེ་ཚན་སོགས་ཡོད་པ། དམིགས་བསལ་རིག་གནས་ཐོག་ལ་དོ་སྣང་ཡོད་པའི་དགོན་སྡེ་ཞིག་ཆགས་ཡོད། བཙན་བྱོལ་ནང་དུའང་རིག་གནས་ཐོག་དཔེ་དེབ་ ༡༤༠ ལྷག་པར་སྐྲུན་བྱས་པ་བྱས་རྗེས་ཆེན་པོ་ཡིན་པར་ངོས་འཛིན་དང་བསྔགས་བརྗོད་ཞུ་རྒྱུ་ཡིན། འདིར་བསླབ་པ་མཐར་སོན་གྱི་དགེ་འདུན་པ་ཚོས་ དབུ་མ་དང་ཕར་ཕྱིན་ལ་ཐོས་བསམ་སྒོམ་གསུམ་གནང་རྒྱུ་དང་དམིགས་བསལ་རིག་གནས་ཐོག་ཐུགས་སྣང་བྱས་པ་དེས། ཆོས་ཕྱོགས་དང་དམིགས་ བསལ་སྤྱི་ཚོགས་ནང་དུའང་ཐུགས་ཕན་སོས་པ་ཡོང་གི་ཡོད། ད་རེབ་ཕྱག་འཁྱེར་གནང་ས་དེ་བོད་ཀྱི་རིག་གནས་ཐོག་སློབ་གཉེར་གནང་མཁན་དང་ དབུ་མ་དང་ཕར་ཕྱིན་སློབ་ཐོན་རྣམ་པར་ང་རང་དངོས་སུ་བཅར་ནས་མཇལ་བ་དང་ལག་འཁྱེར་གནང་བའི་གོ་སྐབས་བྱུང་བར་དགའ་བོ་བྱུང་སོང་། རྣམ་པ་ཚོས་སློབ་སྦྱོང་ཡག་པོ་གནང་སྟེ་ལག་འཁྱེར་རག་ཡོད་སྟབས། མུ་མཐུད་ནས་བསླབ་པ་སློབ་གཉེར་དང་རིག་གནས་ཐོག་ནས་སྤྱི་ཚོགས་ནང་ ཐུགས་ཕན་སོས་པའི་ཞབས་ཞུ་གནང་གི་རེད་ལ་ཞུ་རོགས་གནང་ཞེས་པའི་འབོད་སྐུལ་ཡང་ཞུ་རྒྱུ་ཡིན། ཞེས་གསུངས་སོང་།
ཀིརྟིའི་གྲྭ་ཚང་སྐོར་ལ་སྲིད་སྐྱོང་མཆོག་གིས། ཉེ་རབས་ལོ་རྒྱུས་ནང་བོད་འདི་རྒྱ་ནག་གིས་བཙན་བཟུང་བྱས་ནས་བཟུང་ བོད་ནང་གི་དགོན་པ་ དང་རིག་གནས་དང་འབྲེལ་བའི་སློབ་གྲྭ་ཁག ཐ་ན་དཔེ་ཆ་ཡན་ཆད་གཏོར་བཤིག་བཏང་ནས་རྩ་མེད་བཟོ་བར་འབད་བརྩོན་བྱས་པ་རེད། ཡིན་ནའང་། རྒྱ་ནག་གཞུང་གིས་རིག་གནས་གསར་བརྗེ་སྐབས་གནོད་སྐྱོན་དེ་འདྲ་བྱུང་ཡོད་པ་རེད་ཅེས་ཤོད་ཀྱི་ཡོད་ཀྱང་། པཎ་ཆེན་རིན་པོ་མཆོག་གིས་ ཡིག་ཐོག་ནས་རྒྱ་ནག་གཞུང་ལ་ཕུལ་བའི་སྙན་ཐོའི་ནང་ ༡༩༦༣ ལོའི་བར་བོད་ནང་གི་དགོན་སྡེ་ཁག་བརྒྱ་ཆ་ ༩༨ གཏོར་བཤིག་བཏང་འདུག་ ཅེས་ཁུངས་ལྡན་ཡིན་པ་པཎ་ཆེན་རིན་པོ་མཆོག་རང་གིས་ཡིག་ཐོག་ཏུ་བཀོད་པའི་གནས་ཚུལ་ཆགས་ཡོད། རྒྱ་ནག་གཞུང་གིས་ཀྱང་བོད་ནང་ཡོད་པའི་ཆོས་དང་རིག་གཞུང་། སྐད་ཡིག་དག་རྩ་མེད་གཏོང་ཐུབ་ན་བོད་རྒྱ་ཡུལ་ལ་བསྒྱུར་བ་དང་བོད་རིགས་ རྒྱ་རིགས་ལ་བསྒྱུར་བར་འབད་བརྩོན་བྱས་པ་རེད། ཡིན་ནའང་། ༧གོང་ས་མཆོག་གི་དབུ་ཁྲིད་འོག་བཙན་བྱོལ་ནང་གདན་ས་ཁག་དང་ ཆོས་བརྒྱུད་ཁག་གི་དགོན་ཆེན་སྡེ་མང་ཆེ་བ་རྒྱ་བལ་འབྲུག་གསུམ་ནང་བསྐྱར་གསོ་བྱེད་ཐུབ་ཡོད་པ་དང་། ད་ལྟའི་འཆར་འཛམ་གླིང་ནང་ངོམས་སུ་ ཆོག་པ་ང་ཚོའི་ཆོས་དང་རིག་གཞུང་། སྐད་ཡིག་བཅས་ཆགས་ཡོང་གི་ཡོད། ཅེས་གསུངས་སོང་།
བོད་ནང་གི་རང་ལུས་མེར་བསྲེགས་སྐོར་ལ། བཀའ་ཟུར་ཀིརྟི་རིན་པོ་ཆེ་མཆོག་ལ་མཚོན་ན། ད་ལྟའི་བོད་ཀྱི་ལོ་རྒྱུས་ཉག་ཕྲ་བའི་སྐབས་ཁོང་གིས་ ཆོས་སྲིད་གཉིས་ཐོག་ནས་མི་ཚེ་ཧྲིལ་བོའི་རིང་ཞབས་ཞུ་ཞུས་ཏེ་སྐུ་ངལ་བསྐྱོན་དང་སྐྱོན་མུས་རེད། ཉེ་འཆར་བོད་ནང་ཛ་དྲག་གནས་ཚུལ་བྱུང་སྐབས་ དམིགས་བསལ་ཀིརྟིའི་དགོན་པ་དང་ཨ་མདོ་རྔ་པ་ཁུལ་དུ་གནས་ཚུལ་བྱུང་བ་ཚང་མས་མཁྱེན་གསལ་རེད། ༢༠༠༩ ལོར་གྲྭ་བཀྲ་བྷེ་ལགས་ཀྱིས་ རང་<ལུས་མེར་བསྲེགས་བཏང་བ་དང་། ༢༠༡༡ ལོར་གྲྭ་ཕུན་ཚོགས་ལགས་ཀྱིས་རང་ལུས་མེར་བསྲེགས་བཏང་ཡོད། ད་ལྟའི་བར་བོད་ནང་དུ་ རང་ལུས་མེར་བསྲེགས་གནང་མཁན་ ༡༣༠ བྱུང་བའི་ནང་ནས་ ༡༡༢ འདས་གྲོངས་སུ་ཕྱིན་ཡོད། དེའི་ནང་ནས་མང་ཆེ་བ་ཀིརྟིའི་དགོན་པ་དང་ རྔ་པ་ཁུལ་གྱི་ཡིན་པ་གསལ་བོ་རེད། གནས་ཚུལ་དེ་དག་བྱུང་སྐབས་ཀིརྟིའི་དགོན་པ་འདིར་ཛ་དྲག་ཚོགས་ཆུང་བཙུགས་ཏེ་བོད་ནང་གི་ གནས་ཚུལ་བསྡུ་རུབ་གནང་བ་མ་ཟད། གནས་ཚུལ་ཁུངས་ལྡན་ཡིན་པ་ཚང་མ་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་ཁྱབ་བསྒྲགས་ཐུབ་ཡོད། དེས་ཀྱང་བོད་ཀྱི་བསྟན་སྲིད་ལ་ཕན་ཐོགས་ཆེན་པོ་བྱུང་ཡོད་པ་རེད། ཅེས་དང་། ཁོང་གིས་མུ་མཐུད་དུ་གསུངས་དོན། རང་ལུས་མེར་བསྲེགས་གཏོང་ དགོས་པའི་དངོས་ཡོད་གནས་སྟངས་ག་རེ་རེད་ཟེར་ན། བོད་འདི་རྒྱ་ནག་གི་མཁྲེགས་འཛིན་སྲིད་བྱུས་འོག་ཆབ་སྲིད་དམ་དྲག་དང་སྤྱི་ཚོགས་དབྱེ་འབྱེད། དཔལ་འབྱོར་དབྱེ་འབྱེད། ཁོར་ཡུག་གཏོར་བཤིག རིག་གཞུང་རྩ་མེད་འདི་དག་གཏོང་གི་ཡོད་སྟབས། བོད་ནང་གི་བོད་མི་ཚོས་འགན་འཁུར་ཏེ་སོ་སོའི་ རྩ་ཆེ་བའི་ལུས་སྲོག་བློས་བཏང་བ་རེད། རྐྱེན་འདི་ཡིན་བཞིན་དུ་རྒྱ་ནག་གཞུང་གིས་བོད་མིའི་སྒྲིག་འཛུགས་ལ་ཁ་མཆུ་རྒྱག་པ་དང་། དེའི་ནང་ནས་ ཀིརྟིའི་རིན་པོ་ཆེ་གཙོས་ཀིརྟི་དགོན་པ་སོགས་ལ་ནག་ཉེས་འཛུགས་ཐབས་ལ་འབད་བརྩོན་བྱས་ཡོད་ཀྱང་། རྒྱལ་སྤྱིའི་སྤྱི་ཡོངས་དང་ཨ་རིའི་ཕྱི་སྲིད་ལས་ ཁུངས། རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པ་ཁག་གི་སྙན་ཐོའི་ནང་བོད་མིའི་རང་ལུས་མེར་བསྲེགས་དང་ངོ་རྒོལ་རིམ་པ་ཡོང་དགོས་དོན་དེ་རྒྱ་ནག་ གཞུང་གིས་ནོར་འཁྲུལ་ཅན་གྱི་སྲིད་བྱུས་ལ་བརྟེན་ནས་བྱུང་ཡོད་པ་གསལ་བོར་གསུངས་པ་དེ་དག་རྒྱལ་སྤྱིའི་གཞུང་དང་གསར་འགྱུར་བརྒྱུད་ལམ་ཁག་ནང་ཐོན་ཐུབ་ཡོད་པའི་རྒྱུ་མཚན་གཙོ་བོ། བོད་ནང་དུ་རང་ལུས་མེར་བསྲེགས་གཙོས་ངོ་རྒོལ་བཅས་ཀྱི་གནས་ཚུལ་གང་བྱུང་བར་རྒྱ་ནག་གཞུང་གིས་ སྐྱོན་འཛུགས་བྱེད་པར་འབད་བརྩོན་བྱས་ཀྱང་། ཁུངས་ལྡན་མིན་པ་དང་གསལ་བོ་མེད་པ་སོགས་ལ་བརྟེན་ནས་བྱུང་བ་རེད།
བོད་ནང་དུ་ཡོད་པའི་རང་ལུས་མེར་བསྲེགས་གནང་མཁན་ཚོའི་ནང་མི་དང་སྤུན་མཆེད་ཚོར་ང་ཚོས་དུས་རྟག་ཏུ་ཐུགས་སྨོན་གནང་དགོས་པ་ཤིན་ཏུ་གལ་ཆེན་པོ་རེད། དེ་བཞིན། ང་ཚོ་ཚང་མའི་འགན་གཙོ་བོ་ག་རེ་རེད་ཟེར་ན། ཁོང་ཚོའི་མངོན་འདོད་༧གོང་ས་མཆོག་བོད་དུ་གདན་འདྲེན་དང་། བོད་མིར་རང་དབང་ དགོས་ཟེར་བ་སོགས་ཡིན་དུས་ང་ཚོ་ཕྱི་ལ་ཡོད་པའི་བོད་མི་ཚོ་ལ་དམིགས་བསལ་འགན་ཞིག་ཡོད། ཁོང་ཚོའི་མངོན་འདོད་ག་རེ་ཡིན་པ་འཛམ་གླིང་ སྡིངས་ཆའི་ཐོག་སྐྱེལ་རྒྱུ་ཤིན་ཏུ་གལ་ཆེན་པོ་རེད། དེའི་ཐོག་ཀིརྟིའི་རིན་པོ་ཆེ་མཆོག་ནས་ཀྱང་སྐུ་ངལ་འཛེམས་མེད་ཀྱིས་ ཕྱིའི་རྒྱལ་ཁབ་ཁག་ དང་ཨ་རིའི་གྲོས་ཚོགས་ནང་ཕེབས་ཏེ། གནད་ཡོད་མི་སྣ་མཇལ་འཕྲད་དང་གསར་འགྱུར་བརྒྱུད་ལམ་ཁག་ལ་དངོས་ཡོད་གནས་ཚུལ་གསུངས་པ་དེས་ ཡིད་ཆེས་དང་མཐོང་གཞན་ལས་ལྷག་པ་བྱུང་ཡོད། ཅེས་གསུངས་སོང་།
སྲིད་སྐྱོང་མཆོག་གིས་དོལ་རྒྱལ་སྐོར་གསུངས་དོན། རྣམ་པ་ཚོ་ཆོས་ཕྱོགས་དང་འབྲེལ་བ་ཡོད་སྟབས། དོལ་རྒྱལ་དང་འབྲེལ་བའི་ཚིག་འགའ་ཞུ་དགོས་ བསམ་བྱུང་། ཉེ་བའི་འཆར་༧གོང་ས་མཆོག་གང་དུ་ཆིབས་བསྐྱར་བསྐྱངས་ན་དོལ་རྒྱལ་རྗེས་འབྲང་པ་ཚོས་གཞི་མེད་སྐྱོན་འཛུགས་དང་ངོ་རྒོལ་ བྱེད་ཀྱི་ཡོད་པ་རེད། ད་ལྟའི་བར་༧གོང་ས་མཆོག་གིས་དོལ་རྒྱལ་བསྟེན་གསོལ་དང་འབྲེལ་བའི་ཐོག་ནས་དོལ་རྒྱལ་བསྟེན་ཆོག་གི་མ་རེད་ཅེས་ དམ་དྲག་གནང་མེད་པར་མ་བསྟེན་རོགས་ཞེས་བཀའ་སློབ་ལམ་སྟོན་གནང་ཡོད་པ་རེད། དོལ་རྒྱལ་བསྟེན་པ་ཡིན་ན་བོད་བསྟན་སྲིད་ལ་གནོད་ཀྱི་ འདུག་པའི་བཀའ་སློབ་གནང་བ་དེ་༧གོང་ས་མཆོག་ལ་འགན་དབང་ཆ་ཚང་ཡོད་པ་རེད། ཡིན་ནའང་། དོལ་རྒྱལ་རྗེས་འབྲང་པ་ཚོས་གཞི་ མེད་སྐྱོན་འཛུགས་བྱས་ཏེ། ཁོ་ཚོར་དབྱེ་འབྱེད་དང་བརྙས་བཅོས་གཏོང་གི་ཡོད་སྐོར་ཤོད་ཀྱི་ཡོད། དེར་བོད་མིའི་སྒྲིག་འཛུགས་ཀྱིས་གསར་འགྱུར་ བརྒྱུད་ལམ་ཁག་དང་གང་ཅིར་གདོང་ལེན་བྱེད་ཀྱིན་ཡོད། བདེན་པ་ང་ཚོར་ཡོད་པ་གསལ་བོ་རེད། རྒྱ་བལ་འབྲུག་གསུམ་ནང་ཡོད་པའི་ དོལ་རྒྱལ་རྗེས་འབྲང་པ་ཚོར་བོད་མིའི་སྒྲིག་འཛུགས་ཀྱི་ངོས་ནས་དབྱེ་འབྱེད་བྱེད་ཀྱི་ཡོད་པ་མ་རེད། གང་ཡིན་ཟེར་ན། ༧གོང་ས་མཆོག་ནས་དོལ་རྒྱལ་ བསྟེན་ཆོག་གི་མ་རེད་ཅེས་དམ་དྲག་གནང་བ་ཡིན་ན་དེ་ལ་དཔག་པའི་བོད་མིའི་སྒྲིག་འཛུགས་ཀྱི་ངོས་ནས་སྲིད་བྱུས་ཤིག་འཛིན་དགོས་ཀྱི་ཡོད། ཡིན་ནའང་། དེ་བཀའ་སློབ་ལམ་སྟོན་རང་ཡིན་དུས་བོད་མིའི་སྒྲིག་འཛུགས་ཀྱི་ངོས་ནས་སྲིད་བྱུས་འཛིན་སྟངས་དང་ལག་བསྟར་བྱེད་སྟངས་ལ་ ཁྱད་པར་གང་ཡང་ཕྱིན་ཡོད་པ་མ་རེད། ཅེས་སོགས་གསུངས་སོང་།
མཛད་སྒོ་མཇུག་བསྡོམས་སྐབས་སློབ་སྤྱིའི་ལས་རོགས་ཀླུ་ཆུ་དཀོན་མཆོག་རྒྱ་མཚོ་ལགས་ཀྱིས་ཐུགས་རྗེ་ཆེ་ཞུའི་གཏམ་བཤད་གནང་དོན། དེ་རིང་འདིར་ཆེས་མཆོག་ཏུ་བཀུར་བར་འོས་པའི་དཔལ་ལྡན་རང་གཞུང་བོད་མིའི་སྒྲིག་འཛུགས་ཀྱི་སྲིད་སྐྱོང་མཁས་དབང་བློ་བཟང་སེང་གེ་མཆོག་ང་ཚོའི་ མཛད་སྒོར་དངོས་སུ་ཕེབས་ཐུབ་པ་བྱུང་བ་རེད། ང་ཚོ་ཚང་མར་ཤིན་དུ་སྐལ་བ་བཟང་པོ་བྱུང་། ཚང་མས་མཁྱེན་གསལ་ལྟར་མི་རྗེ་སྐུ་ངོ་སྲིད་སྐྱོང་ མཆོག་ཁོང་ལྟ་བུ་ཡིན་ན། འཇིག་རྟེན་འདི་ན་ཆེས་སྐད་གྲགས་ཆེ་བའི་ཨ་རིའི་ཧར་ཝར་ཌི་གཙུག་ལག་སློབ་གྲྭ་ཆེན་མོའི་ནང་ནས་ཁྲིམས་ལུགས་སྐོར་ གྱི་འབུམ་རམས་པ་དང་། ཆེས་མཐོའི་ཁྲིམས་ཀྱི་སློབ་ཐོན་པའི་ལག་འཁྱེར་བཞེས་པ་དེ་ནི། འདས་པའི་ལོ་རྒྱུས་ནང་ང་ཚོ་བོད་མི་<ས་ཡ་དྲུག་ཙམ་མ་ཟད། ཧི་མ་ལ་ཡའི་ས་ཁུལ་གྱི་རྒྱལ་ཁབ་འབྲུག་དང་། བལ་ཡུལ། སོག་པོ་སོགས་ནས་འདི་འདྲའི་མཁས་དབང་ཐོན་པ་དེ་ཁོང་ཐོག་དང་པོ་དེ་ཆགས་ཡོད་པ་རེད།
ད་དུང་སྟོབས་འབྱོར་ལྡན་པའི་ཨ་རིའི་རྒྱལ་ཁབ་དེ་ལྟ་བུ་ཞིག་ནས་སྒེར་གྱི་ཁེ་ཕན་མང་པོ་ཞིག་བློས་གཏོང་གནང་སྟེ་འདིར་ང་ཚོ་བཙན་བྱོལ་བོད་མིའི་གནས་ བབ་ལ་དགོངས་པ་རྒྱ་ཆེར་བཞེས་ཏེ་ང་ཚོ་དང་སྐྱིད་སྡུག་མཉམ་མྱོང་གི་ལྷག་བསམ་ཆེན་པོའི་ཐོག་ནས་བཀའ་བློན་ཁྲི་པའི་འོས་མིའི་ཁོངས་སུ་དང་བླངས་ ཀྱི ས་ཞུགས་པ་རེད་ལ། ང་ཚོས་ཀྱང་རྒྱབ་སྐྱོར་ཆེན་པོ་ཞུས་ཏེ་ཁོང་བཀའ་བློན་ཁྲི་པའམ་སྲིད་སྐྱོང་དུ་བདམས་ཐོན་བྱུང་པ་རེད། ཅེས་སོགས་བརྗོད་སོང་།
མཇུག་ཏུ་སྲིད་སྐྱོང་མཆོག་གིས་སློབ་མཐར་ཕྱིན་པའི་དགེ་འདུན་པ་རྣམས་དང་དྲན་རྟེན་འདྲ་པར་བསྐྱོན་པ་དང་ཉིན་གུང་རྗེས་ཀིརྟིའི་རིན་པོ་མཆོག་གིས་ཀྱང་ སློབ་ཐོན་པ་རྣམ་པར་བཀའ་སློབ་གནང་ཡོད་འདུག
བཀྲིས་བདེ་ལེགས་ཞུ་ ད་བདེ་མོ་དང་བདེ་པོ་གཉིས་ཀར་བྱེད་
ཀིརྟིའི་རིན་པོ་མཆོག་༡༩༦༠་མཇུག་ཙམ་ནས་༡༩༧༠དོན་གྲངས་ཕལ་ཆེར་མགོ་སྟོད་བར་དུ། ཝཱ་རཱ་ཎ་སཱི་བོད་ཀྱི་མཐོ་རིམ་སློབ་གྲྭར་སློབ་སྦྱོང་མཛད། དགེ་ཆོས་ཀྱི་སྐོར་ལ་འཚོལ་སྒྲུབ་ཀྱིས་ལོ་རྒྱུས་ཁུངས་དག་ཡོད་པ་ཞིག་བརྩམས་། ད་རེས་ཁོང་གིས་བཙུགས་པའི་ཀིརྟིའི་བྱེས་པ་གྲྭ་ཚང་གི་ཆེས་མཐོའི་བོད་ཀྱི་རིག་གནས་སློབ་ཁང་དུ་སློབ་ཐོན་པ་མང་པོ་བྱུང་བ་ལ་རྗེས་སུ་ཡི་རང་དང་། རིན་པོ་ཆེ་མཆོག་ཞབས་པད་བརྟན་པར་གསོལ་འདེབས་ཞུའོ།
ཀིརྟིའི་འཁྲིས་ཀྱི་ས་རའི་མཛད་སྒོ།
http://www.tibettimes.net/news.php?showfooter=1&id=9182
ཀིརྟིའི་གྲྭ་ཚང་གིས་ལབ་གླེང་སྣ་ཚོགས་ཀྱི་ཁྲོད་ནས་གྲུབ་འབྲས་ཀྱང་གང་འཚམས་ལོན་ཡོད་པ་འདྲ་འོན་ཀྱང་ད་དུང་འུར་སྒྲོགས་ཀྱི་ཆ་མང་པོ་འདུག་ལ་ཁྲབ་མཁས་པ་ལ་ནི་ཚད་མི་འདུག
བཀྲ་ཤིས་བདེ་ལེགས་ཞུ།
ངས་ད་བར་ཀིརྟི་ཚང་གི་ཕྱོགས་ནས་དེབ་ཡག་པོ་ཞིག་མཐོང་བ་ནི་སྒོ་ཤེས་རབ་ཀྱི་ང་ཚོ་སད་རན་དང་རྒྱུན་ཤེས་གཉིས་ཡིན། ཡིན་ཡང་སྒོ་ཤེས་རབ་ནི་དགོན་པ་ནས་ཕྱིར་ཕུད་སོང་ད།ད་ལྟ་རྡ་སའི་ཀི་རྟི་གྲྭ་ཚང་དུ་མཁས་པ་ཞིག་ཡོད་པ་ངོ་མ་མཐོང་མ་སོང་། ལྷག་པར་ས་རྭ་སློབ་གྲྭའི་་སློབ་མ་ཚོས་ཀིརྟི་དགེ་རྩ་ཚོགས་ཁང་ནས་བོད་ཀྱི་སྐད་ཡིག་ཚོགས་འདུ་ཞིག་ཚོགས་པར། འབྲེལ་ཡོད་མི་སྣས་སློབ་མ་ཚོར་ཁྱེད་ཚོའི་སྐུ་མགྲོན་རྣམས་སུ་ཡིན་དྲིས་པར་ཨ་ཚོགས་ཀླུ་མཁར་བྱམས་སྐུ་མགྲོན་དུ་ཡོད་པར། ཁྱེད་ཚོས་ཀླུ་མཁར་བྱམས་སྐད་གཏོང་ཡོད་ཚེ་ང་ཚོའི་ཚོགས་ཁང་མི་གཡར་ཞེས་ལན་བཏབ་འདུག དེ་ནས་ང་ནི་ངོ་མ་ཡ་མཚན་སོང་།
བསོད་ནམས་ལགས། ཁྱེད་རང་གི་བསམ་ཚུལ་བཤད་པའི་ནང་དུ་ཀིརྟིའི་དགེ་རྩ་ཚོགས་པས་ཚོགས་ཁང་ནང་དུ་ཀླུད་མཁར་བྱམས་ཡོང་མ་བཅུག་པ་དེ་དཔེ་ལེགས་པོ་རེད་བསམ་གི། ཚོགས་པ་དང་མི་སུ་ཡིན་རུང་རང་ཚུགས་བརྟན་པོ་དང་ལྟ་བ་དང་ལངས་ཕྱོགས་ཤིག་དགོས་པ་རེད་མ་གཏོགས་མགོ་ལ་རྭ་ཅོ་བཙུགས་ནས་ཤ་བའི་གྲས་ལ་སོང། ཕོང་མགོར་རྩམ་སྐྱ་བཤུས་ནས་ཤ་མོ་གོང་གི་འཁྲིས་ལ་འགྲོ་བ་ནང་བཞིན་ཆགས་མཁན་ཚོར་མཐོང་མེད། གང་ལྟར་ཨ་མདོ་ཚང་ལ་ཚོགས་པ་དང་སྒྲིག་འཛུགས་མགོ་སྔ་ཡོད་པ་ཞིག་ཡོད་པ་ནི་ཀིརྟི་བྱེས་པ་གྲྭ་ཚང་རེད་མ་གཏོགས་གཞན་ཅི་ཡོད། ཡོད་ན་ཡོད་ལུགས་ཤིག་བཤད་རོགས།
ལ་ཕུག་ལགས། མདོ་སྨད་ལ་ཀིརྟི་བྱེས་པ་གྲྭ་ཚང་མ་གཏོགས་ཅི་གང་མེད་ལབ་ན་མི་ཚོ་གད་མོ་གཏིང་ནས་འཆོར་གི་རེད། མདོ་སྨད་འབྲས་སྤུངས་སྒོ་མང་གྲྭ་ཚང་སོགས་མང་ནི་རེད། རང་ཉིད་མ་གཏོགས་མི་འདུག
མ་གསུངས་རོགས། སུ་དང་གང་ཡོད་མེད་ཤེས་ལེ་རེད།
གྲོགས་བསོད་ནམས་ལགས་ཀྱི་མཆན་ལ་གནས་ལུགས་ཅུང་ཙམ་འདུག་ཀླུ་མཁར་བྱམས་ཡོང་མ་བཅུག་པ་ངོ་དགོད་སྤྲོ་བ་རང་རེད་འོན་ཀྱང་ཀིརྟིའི་གྲྭ་ཚང་ལ་མཁས་མེད་ཟེར་བའི་སྙན་ཚིག་འདི་ངོ་མ་རང་གི་དེ་ཉིད་གསལ་བའི་གཞད་གད་ལས་གཞན་མཐོང་མ་སོང་།
གྲོགས་བསོད་ནམས་འབྲས་སྤུངས་སྒོ་མང་གྲྭ་ཚང་ཨ་མདོ་ཡིན་པའི་ཁུངས་ལུང་ཅི་ཡོད་ཡིག་ཆ་མཛད་པ་པོ་ཨ་མདོ་ཡིན་ན་གྲྭ་ཚང་དེའི་ཕྱོགས་ཡིན་དགོས་སོང་བ་ཡིན་ནམ་གཞན་རྒྱུ་མཚན་ཅི་ཡོད་གནས་སྟངས་ཚང་མ་ལ་གཟབ་དགོས་བ་གལ་ཆེ་རང་ཉིད་ཕྱི་ལོག་ཏུ་ཐར་སོང་བ་ཡིན་ན་ཁ་ནས་ཡོང་བརྗོད་ཐུབ་ན་དེ་ནི་གཟི་བརྗིད་རེད་མ་འདོད།