བསྟན་འཛིན་འཇམ་དཔལ་གྱིས་མཚམས་སྦྱོར་བྱས།
ཆབ་སྲིད་བཙོན་ཟུར་བསྟན་འཛིན་ཉི་མ་ལགས་ཀྱིས་བརྩམས་པའི་༼རེབ་གོང་ནས་བོད་ཀྱི་རྒྱལ་དར་བསྒྲེངས་པའི་སྔ་རྗེས༽ ཞེས་པའི་དཔེ་དེབ་ཅིག་པར་བསྐྲུན་འགྲེམས་སྤེལ་བྱས་འདུག
དེ་རིང་ཚེས་ ༡༣ ཉིན་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་ནས་ཁང་གིས། ཆབ་སྲིད་བཙོན་ཟུར་བསྟན་འཛིན་ཉི་མ་ལགས་ཀྱི་རང་དབང་རྩོད་ལེན་འོག་མནར་གཅོད་མྱངས་པའི་གནས་སྟངས། ༼རེབ་གོང་ནས་བོད་ཀྱི་རྒྱལ་དར་བསྒྲེངས་པའི་སྔ་རྗེས༽ཞེས་པའི་དཔེ་དེབ་པར་བསྐྲུན་འགྲེམས་སྤེལ་བྱས་ཡོད་འདུག
དཔེ་དེབ་འདི་ནི་ཆབ་སྲིད་བཙོན་ཟུར་བསྟན་འཛིན་ཉི་མ་ལགས་ཀྱིས་བརྩམས་པ་དང་། དེབ་དེའི་ནང་རྩོམ་པ་པོ་ཁོང་གིས་ཞི་བའི་ལམ་ནས་རང་དབང་རྩོད་ལེན་བྱས་རྗེས། རྒྱ་གཞུང་གིས་འཇུ་བཟུང་བཀག་བསྐྱིལ་དང་གཅར་རྡུང་འདྲི་གཅོད་བྱས་པའི་བརྒྱུད་རིམ་དང་། རང་ཡུལ་དུ་འདུག་བཟོད་བྲལ་ཏེ་རྒྱ་གར་དུ་བྲོས་བྱོལ་བྱས་པའི་ལམ་སྐབས་ཀྱི་དཀའ་སྡུག རྒྱ་གཞུང་གིས་བོད་ཐོག་འཛིན་པའི་དྲག་གནོན་དབང་སྒྱུར་གྱི་མི་སེར་སྤེལ་བའི་སྲིད་ཇུས་འོག བོད་མི་དཀྱུས་མ་ཞིག་གི་མྱངས་བའི་དཀའ་སྡུག་གི་མི་ཚེ་ལོ་རྒྱུས་བྲིས་ཡོད་འདུག
ད་དུང་ཁོང་གི་དཔེ་དེབ་ནང་། ༡༩༥༩ ལོ་ནས་ད་བར་རྒྱ་གཞུང་གིས་བོད་ཐོག་དྲག་གནོན་དབང་སྒྱུར་དང་མི་སེར་སྤེལ་བའི་སྲིད་ཇུས་ལག་བསྟར་བྱས་ཏེ། བོད་ས་ཡོངས་སུ་མི་རིགས་ཀྱི་ངོ་བོ་མཚོན་པའི་ཆོས་དང་རིག་གཞུང་རྩ་གཏོར་དང་། བོད་མིའི་ཆོས་དད་དང་འགྲོ་བསྐྱོད། གཏམ་བརྗོད། འདུ་འཛོམས་རང་དབང་སོགས་ཀྱིས་མཚོན་པའི་འགྲོ་བ་<མིའི་གཞི་རྩའི་ཐོབ་ཐང་ཁག་རྡོག་རོལ་བཏང་སྟེ། བོད་མི་སྐྱ་སེར་ཕོ་མོ་རྒན་གཞོན་དབྱེར་མེད་ཀྱིས་སོ་སོའི་འགྲོ་བ་མིའི་ཐོབ་ཐང་དང་རང་དབང་། མི་རིགས་ཀྱི་བདག་དབང་རྩོད་ལེན་ཆེད་རྒྱ་གཞུང་གི་དྲག་གནོན་དབང་བསྒྱུར་གྱི་སྲིད་ཇུས་ལ་ཞི་བའི་འཐབ་རྩོད་རབ་དང་རིམ་པ་གནང་དང་གནང་བཞིན་ཡོད་སྐོར་སོགས་ཞིབ་ཕྲ་བཀོད་ཡོད་འདུག
ཆབ་སྲིད་བཙོན་ཟུར་བསྟན་འཛིན་ཉི་མ་ལགས་ནི། ཕྱི་ལོ་ ༡༩༦༩ ལོར་རྨ་ལྷོ་རེབ་གོང་རྒྱལ་པོ་རླངས་ཚང་གི་རོང་སྡེའི་ནང་ཚན་ཕ་ལུང་སྡེ་བའི་ཕ་འཕགས་པ་སྐྱབས་དང་མ་མཁའ་མོ་བྱམས་གཉིས་ཀྱི་ཁྱིམ་དུ་སྐྱེས་པ་དང་། རང་ལོ་ ༨ ཀྱི་སྟེང་ངོ་མོ་སྡེ་བའི་སློབ་ཆུང་དུ་ཞུགས་ཡོད་འདུག རང་ལོ་ ༡༤ སྟེང་རོང་བོ་དགོན་པའི་རྒྱུད་པ་གྲྭ་ཚང་དུ་ཆོས་ཞུགས་གནང་སྟེ་འདོན་རྟ་དབྱངས་གསུམ་དང་། ཐིག་ས་ཆོག གར་ཕྱག་རྒྱ་དང་བཅས་པའི་ཕྱག་ལེན་ཆ་ཚང་སྦྱངས་འདུག ༡༩༩༧ ལོའི་ཟླ་ ༣ པའི་ཚེས་ ༢༠ ཉིན་གྱི་དགོང་མོར་རེབ་གོང་དུ་བོད་ཀྱི་རྒྱལ་དར་བསྒྲེངས་འཛུགས་བྱས་སྟབས། རྒྱ་ནག་གཞུང་གིས་ཁོང་དང་རོགས་པ་གཉིས་འཛིན་བཟུང་གིས་གཅར་རྡུང་འདྲི་གཅོད་རིམ་པ་བྱས་ཡོད་པ་དང་། རྗེས་སུ་ཉེན་རྟོག་པས་དམེ་ཤུལ་ནགས་རྫོང་བརྒྱུད་ནས་ས་གཞན་དུ་འཁྲིད་འགྲོ་སྐབས་བྲོས་བྱོལ་བྱས་ཏེ་བཙན་བྱོལ་དུ་འབྱོར་ཐུབ་པ་བྱུང་ཡོད་འདུག
གསར་འགོད་པ། དོན་གོ
༼བོད་ཀྱི་དུས་བབ་ནས་དྲངས།༽
དེབ་འདི་ལ་གང་མགྱོགས་བལྟ་འདོད་འདུག རྩོམ་མཁན་ལ་བཀའ་དྲིན་ཆེ།
རྒྱལ་གཅེས་དཔའ་བོ་ཁོང་ལ་སྙིང་ཐག་པ་ནས་ཡི་རང་ཞུ།
དེའི་སྐབས་ཀྱི་གནས་ཚུལ་སབ་སིབ་ཅིག་གོ་ཐོས་མྱོང་ནའང་རྒྱུད་རིམ་གསལ་བོ་ཞིག་གོ་མ་མྱོང་། དེའི་རྗེས་ལོ་དུས་གང་ཡིན་མ་ངེས་ཀྱང་ཁོང་བཙན་བྱོལ་དུ་འབྱོར་རྗེས་རྡ་སར་ང་ཚོ་ཁ་ཤས་ཤིག་མཉམ་དུ་ཁ་བརྡ་གློད་པའི་གོ་སྐབས་བྱུང་ལ། གནས་ཚུལ་དེའི་སྔ་རྗེས་དང་བཙན་བྱོལ་ལ་འབྱོར་རྗེས་༧གོང་ས་མཆོག་གི་བཀའ་སློབ་ག་རེ་གནང་མིན་གྱི་ཁ་བརྡ་ལྷུག་པོར་གནང་། དེའི་རྗེས་ཡུན་རིང་མ་འགོར་བར་ཁོང་ཡོ་རོབ་ཏུ་སོང་བའི་གནས་ཚུལ་ཞིག་ལས་ད་བར་ཁོང་གི་སྐོར་ཐོས་རྒྱུ་མ་བྱུང་། མཚམས་འདི་ནས་ཁོང་ལ་བཀྲ་ཤིས་བདེ་ལེགས་ཞུ་བ་དང་ཆབ་གཅིག་རང་ཉིད་ཀྱི་བྱུང་རབས་དེབ་གཟུགས་སུ་བཀོད་པ་སྙིང་ནས་ཐུགས་རྗེ་ཆེ་ཞུ་ཀི་ཡོད། གང་ཡིན་ཟེར་ན། དེས་རྗེས་རབས་པ་ཚོར་གང་ཟག་རང་ག་བ་ཞིག་གིས་རང་གི་མི་རིགས་དང་རང་གི་རྒྱལ་ཁབ་ལ་བརྩེ་སེམས་ག་འདྲ་ཡོད་མེད་ཀྱང་བསྟན་ཡོད།