རྩོམ་པ་པོ། ཚེ་ལོ་ཐར། ༼བསྟན་འཇམ་གྱིས་འོས་སྦྱོར་བྱས།༽
གཉིས་པ།
མཚོ་སྐྱེས་རྡོ་རྗེ་ཡི་སྣང་བར་ཧབ་ཆ་དེ་ནི་བྲག་ཆ་ཞིག་དང་འདྲ་བར་ཡུན་རིང་དུ་ཁོའི་རྣ་དབང་ལས་ཡལ་མ་ཐུབ་པས། སེམས་སུ་འདྲེ་རྒན་འདི་དགའ་ཡོད་པར་བརྟགས་ན། ད་ལོར་ཡང་རོང་འབྲོག་མང་ཚོགས་མང་པོ་ཞིག་གི་མགོ་བོ་བརྡུངས་ཡོད་པ་འདྲ་སྙམ་སྟེ“ངའི་ཚུགས་ཀ་འུག་རྒན་ཞིག་དང་འདྲ་བར་སྐྱོན་ཆེན་པོ་མེད། དེ་ནི་ལོ་རྒས་པའི་རྟགས་རེད། ཁྱོད་ཀྱི་ལས་སྲོལ་ནི་འུག་རྒན་ལས་ཀྱང་སྡུག་པ་འདི་ནི་ཧ་ལས་དགོས་པའི་དོན་ཆེན་ཞིག་རེད”ཅེས་བཤད།
བཀྲ་ཤིས་རྒྱ་མཚོས“ད་ནངས་ནས་མགོ་བོར་ཟ་འཕྲུག་ལངས་ཏེ་མི་བཟོད་པ་དང་། ད་ལྟ་ཁྱོད་རང་ཁོང་ཁྲོ་ལངས་ཡོད་པར་བལྟས་ན། དོ་དགོང་ཡང་ཁྱོད་ཀྱིས་ང་ལ་མཇལ་ཁ་ལྕི་མོ་ཞིག་གནང་རྒྱུ་ཡིན་པ་འདྲ། ཡིན་ཡང་། ཁྱོད་ཀྱིས་མཇལ་ཁ་ཇི་ལྟར་གནང་ཡང་ང་རང་སྐྲག་དོན་སྤུ་ཙམ་ཡང་མེད། རྒྱུ་མཚན་ནི་འདི”ཞེས་སྦི་རག་གི་སྣོད་ལྕགས་ཀྲིན་ཡིན་པ་བསྟན་ཏེ་ཁ་ཕེག་སེ་ཕྱེས།
“སྦི་རག་གི་སྣོད་འདི་ལྕགས་ཀྲིན་ཡིན་པ་བདེན་མོད། ཁ་མ་ཕྱེས་པར་བརྒྱབ་ན། མི་ཞིག་གསོད་མི་ཐུབ་ཀྱང་འུག་རྒན་ཁྱོད་རང་འཆི་ལམ་དུ་བརྫང་ཁོ་ཐག་རེད།” མཚོ་སྐྱེས་རྡོ་རྗེ་ཡིས་སིར་སིར་སིར་འཕྱུར་བའི་སྦི་རག་ཉུང་ཙམ་འཐུངས་རྗེས་དེ་ལྟར་སྨྲས།
“གཞན་གྱི་མིག་ལམ་དུ་ང་ནི་སྦྱིན་བདག་ཆེན་མོ་དང་ཚོང་དཔོན་ཆེན་མོ། སྙིང་སྡུག་དགའ་ལོ་སོགས་ཡིན་མོད། ཁྱོད་ཀྱི་སེམས་སུ་ང་རང་ནམ་ཡང་འདྲེ་རྒན་དང་ཁྱི་རྒན། བླུན་རྒན། འུག་རྒན་སོགས་སུ་འགྱུར་དོན་ཅི་རེད།”
མཚོ་སྐྱེས་རྡོ་རྗེ་ཡིས་མྱུར་དུ“བླུན་རྒན། མི་གཞན་གྱི་མིད་ཐག་ཕྲ་མོ་ཡན་གྱི་སྐད་ཆ་ལ་ཡང་ཡིད་ཆེས་སམ། ཁྱོད་རང་ངས་བཤད་པ་ལྟར་མིན་ན། ད་ལྟ་རོང་འབྲོག་མང་ཚོགས་སྡུག་བསྔལ་གྱི་རྒྱ་མཚོར་ལྷུང་ཡོད་མོད། ཁྱོད་གཅིག་པུ་འུག་རྒན་ཞིག་དང་འདྲ་བར་ཧབ་ཆ་རྒྱག་དོན་ཅི་རེད”ཟེར་བཞིན་སྦི་རག་ལྕགས་ཀྲིན་གང་འཐུང་ཐེངས་གཅིག་གིས་ཚར།
ཁོས་བཤད་པ་ལྟར། ད་ལོར་དངོས་ནས་རོང་འབྲོག་མང་ཚོགས་སྡུག་བསྔལ་གྱི་རྒྱ་མཚོར་ལྷུང་ཡོད། འབྲོག་པ་མང་ཚོགས་ལ་མཚོན་ན། སྔོན་ཆད་ནས་དབྱར་རྩྭ་དགུན་འབུ་ནི་གནམ་རྒན་མས་གནང་བའི་འཛད་མེད་རིམ་འབྱུང་གི་ལེགས་སྐྱེས་རེད་འདོད་དེ། གོས་གདན་བཏིངས་འདྲའི་རྩྭ་ས་ལ་སེར་སྣ་དང་ཕངས་སེམས་སྤུ་ཙམ་ཡང་མེད་པར་འཚོང་བཞིན་ཡོད། དབྱར་རྩྭ་དགུན་འབུའི་ཡོང་སྒོ་བཟང་དུས། ཁྱིམ་ཚང་རེ་ལ་སྒོར་ཁྲི་བཅུ་ནས་བརྒྱ་ཡི་ཡོང་སྒོ་ཡོད་པས་རིམ་གྱིས་རྟ་ནོར་ལུག་གསུམ་ཡང་འཚོ་འདོད་མེད་པར་ལ་ལས་བཙོངས་པ་དང་། ལ་ལས་རོང་ཁུལ་གྱི་མི་ལ་ལོ་རེར་སྒོར་ཁྲི་གཅིག་རེ་དང་ས་རིན་སྐར་གང་ཡང་སྟེར་མི་དགོས་པར་ཁོའི་ས་ཐོག་ནས་དབྱར་རྩྭ་དགུན་འབུ་བརྐོས་ཆོག་པའི་གན་རྒྱ་བཞག་རྗེས། རླངས་འཁོར་རེ་བསྐོར་ནས་གྲོང་ཁྱེར་གྱི་མགྲོན་ཁང་དང་ཟ་ཁང་། ཆང་ཁང་མྱུལ་ཏེ་རྒྱས་བཟའ་རྒྱས་འཐུང་བྱེད་པའི་ཕྱོགས་ལ་གོམ་ཆེན་སྤོས།
ཁ་དཔེ་ལ་ལས་ནས་འཆི་མཁན་མེད་ལ། བསྡད་དེ་རུལ་མཁན་མང་ཞེས་པ་ལྟར་ལོ་འགའ་བགོར་རྗེས། ཁོ་ཚོས་ལས་དོན་གང་ཡང་བསྒྲུབ་འདོད་མེད་པའི་ཚད་དུ་ལྷུང་། ཐ་ན་ཟ་མ་གཡོ་བསྐོལ་བྱེད་མཁན་ཡང་གླ་དགོས་པར་གྱུར། ཟོས་ན་རི་བོ་ཡིན་ཡང་འཛད་ཅེས་པའི་དཔེ་ལྟར་ལོ་མཇུག་ལ་ཐོན་དུས། རྩྭ་ས་བཙོངས་པའི་སྒོར་མོ་ཡོད་ཚད་ཚར་ཏེ་ཡིད་རྟོན་མཉམ་ལས་དངུལ་ཁང་གི་སྐུ་མགྲོན་གཙོ་བོར་གྱུར་ཡོད། ད་ལོར་དབྱར་རྩྭ་དགུན་འབུ་སྐྱེས་པ་ཉུང་དྲགས་པས། སྦྱིན་བདག་ཏུ་འབོད་པའི་རྩྭ་ས་ཉོ་མཁན་ཡོད་ཚད་འུ་ཐུག་ཐབས་ཟད་ཀྱིས་རྫ་ལུང་རི་ལུང་བརྒྱུད་དེ་ཕ་ཡུལ་དུ་བྲོས་ཚར་བ་རེད། དེའི་ཕྱིར། ལོ་གཅིག་ལ་སྒོར་ཁྲི་ཕྲག་མང་པོའི་འགྲོ་གྲོན་གཏོང་བར་ལོབས་ཡོད་པའི་འབྲོག་པ་མང་ཚོགས་སྡུག་བསྔལ་གྱི་རྒྱ་མཚོར་ལྷུང་ཡོད་པ་ནི་སྨྲ་མི་དགོས་པའི་གནས་ལུགས་ཤིག་རེད།
རོང་པ་མང་ཚོགས་ལ་མཚོན་ནའང་། གྲོ་ནས་སྲན་གསུམ་དང་སྔོ་ཚོད་འདེབས་འཛུགས་བྱས་ན། རྒྱབ་མི་གྲང་བ་དང་ཕོ་མི་ལྟོགས་པ་ཙམ་ཡིན་ཞིང་། ཞོར་དུ་ལས་རིགས་གཞན་སྟེ། ལྷ་བཟོ་དང་ཤིང་བཟོ། རྡོ་བཟོ་དང་གྱོན་བཟོ། གོས་བཟོ་དང་གུར་བཟོ། ཟ་ཁང་དང་མགྲོན་ཁང་། ཚོང་ཁང་དང་དཔར་ཁང་སོགས་གཉེར་ན། ཡོང་སྒོ་ཇེ་མང་ནས་ཇེ་མང་དང་ལག་རྩལ་ཇེ་བཟང་ནས་ཇེ་བཟང་ཡིན་མོད། དབྱར་རྩྭ་དགུན་འབུ་རྐོ་སློག་དང་ཉོ་ཚོང་བྱས་པ་ནས། ཞིང་ལས་དང་ཞོར་ལས་ལས་པའི་འདུན་པ་མེད་པར་གྱུར་ཏེ། ཚོགས་ས་འདུ་ས་ཡོད་ཚད་དུ། སྦྱིན་བདག་སུ་ཞིག་གིས་རྩྭ་ས་ཉོས་ཏེ་སྒོར་ཁྲི་ག་ཚོད་བླངས་པ་དང་དེས་ཁྲི་ག་ཚོད་ཀྱི་རླངས་འཁོར་ཉོས་ཡོད་པ་ཏག་ཏག་བཤད་ཀྱིན་ཡོད།
ཡིན་ཡང་། ད་ལོའི་བར་ཆད་ཆེན་པོ་དེས་ཁོ་ཚོའི་ཁ་བརྡའི་གླེང་ཕྱོགས་ཀྱང་བསྒྱུར་ཏེ། སྦྱིན་བདག་སུ་ཞིག་གིས་གླ་པ(དབྱར་རྩྭ་རྐོ་མཁན་ལ་གོ)དག་ཁྲིད་དེ་ཉིན་ཞག་ག་ཚོད་ལ་བྲོས་ཏེ་ཡོང་ཚུལ་དང་། སྦྱིན་བདག་སུ་ཞིག་འབྲོ་གྲབས་བྱེད་སྐབས་ས་བདག་གིས་གཅར་རྡུང་བྱས་ཏེ་ད་དུང་ཡང་སྨན་ཁང་དུ་ཡོད་ཚུལ། སྦྱིན་བདག་སུ་ཞིག་གི་གླ་པ་བྲོས་ཏེ་ཡོང་དུས་གར་སོང་མ་ཤེས་པར་ད་དུང་བཙལ་བཞིན་ཡོད་པ་སོགས་ཡ་ང་བའི་གཏམ་རྒྱུད་བརྗོད་ལས་འདས་པ་ཞིག་ཡིན།
བཀྲ་ཤིས་རྒྱ་མཚོར་མཚོན་ན། ཁོའི་ཡོང་སྒོ་ནི་ཁ་པར་ཐེངས་འགའ་བཏང་བ་དང་། ས་བདག་དང་ཉོ་བདག་མཚམས་སྦྱོར་བྱས་ཏེ་ཐོབ་ཀྱིན་ཡོད་པས། དབྱར་རྩྭ་དགུན་འབུ་སྐྱེས་པའི་མང་ཉུང་དང་རིན་གོང་གི་མཐོ་དམར་འབྲེལ་བ་གཏན་ནས་མེད། དེའི་ཕྱིར། མཚོ་སྐྱེས་རྡོ་རྗེ་ཡིས་ཁོའི་ལས་སྲོལ་ནི་འུག་རྒན་ལས་ཀྱང་སྡུག་ཅེས་སྨྲས་པ་ཡིན་སྲིད།
ཡིན་ཡང་། ཁོས་ཀྱང་ཡིད་སྐྱོ་བའི་རོང་འབྲོག་མང་ཚོགས་ཀྱི་གཏམ་རྒྱུད་འདི་དག་ཐོས་པས་ཡིན་ནམ། དབྱར་རྩྭ་དགུན་འབུའི་རྐོ་སློག་དང་ཉོ་ཚོང་གི་དཀའ་སྡུག་སོགས་རྟོགས་པས་ཡིན་ནམ། གང་ལྟར་ལན་ཅི་ཡང་མ་བཏབ་པར་མཚོ་སྐྱེས་རྡོ་རྗེ་ཡི་གཡས་ནས་སྦི་རག་འཐུང་བཞིན་བསྡད།སྐབས་དེར། ནམ་མཁའི་སྤྲིན་ནག་གིས་བཅོ་ལྔའི་དུང་ཟླ་ཡོངས་སུ་བཏུམས་ལ། སྦི་རག་གིས་ཀྱང་ཅི་ཞིག་ལ་ཉན་པ་ལྟར་སིར་སིར་གྱི་སྒྲ་མ་བསྒྲག་པར་དལ་ཅག་གེར་གྱུར་པས། ནག་ཡོར་ཡོར་གྱི་ཁོ་གཉིས་ནི་དོན་དངོས་ཀྱི་འུག་རྒན་གཉིས་སུ་གྱུར། ཤར་ཕྱོགས་ནས་ནུབ་ཕྱོགས་སུ་འཐེན་པའི་མཚོ་འགྲམ་གྱི་གཞུང་ལམ་སྟེང་དུ། རླངས་འཁོར་ཆེ་འབྲིང་ཆུང་གསུམ་ནི་སྐར་མདའ་ལྷུང་བ་ལྟར་བརྒྱུགས་ཏེ་སྐད་ཅིག་ཉིད་དུ་ཡལ་འགྲོ་བས། ཁོ་གཉིས་ལ་གནས་དེ་རུ་སྡོད་མི་ཚུགས་པའི་བྲེལ་འཚུབ་བསླངས།
ལྷག་པར། ཁོ་གཉིས་ཀྱི་ཚིག་མཚམས་གཅོད་མཁན་མཚོ་སྐྱེས་རྡོ་རྗེ་ཡི་སེམས་སུ། རོང་འབྲོག་མང་ཚོགས་ཀྱི་སྡུག་བསྔལ་ནི་དབྱར་རྩྭ་དགུན་འབུས་བསྐྱེད་པ་ཡིན་པས། རྒྱུན་དུ་བཀྲ་ཤིས་རྒྱ་མཚོ་ལ་ཟུར་ཟ་བྱས་ན་ག་ལ་རུང་སྙམ་སྟེ། འགྱོད་པ་དང་བཅས་དངན་པ་རིང་མོ་ཞིག་འཐེན་རྗེས“ཨ་རོགས་བཀྲ་ཤིས། ཉིན་མཚན་མེད་པར་བརྒྱུགས་པའི་རླངས་འཁོར་ཀན་ཚོས་ཅི་ཞིག་འདྲུད་ཀྱིན་ཡོད་དམ”ཞེས་ཚིག་སྣེ་གཞན་ལ་སྒྱུར་ཐབས་བྱས།
“སུ་ཞིག་གིས་མཁྱེན། གང་ལྟར་དབྱར་རྩྭ་དགུན་འབུ་མིན་པ་ཐག་གིས་ཆོད། དབྱར་རྩྭ་དགུན་འབུ་མིན་ན། ང་ཚོས་ཁ་ཡ་བྱ་མི་དགོས།”འདི་ནི་བཀྲ་ཤིས་རྒྱ་མཚོའི་སེམས་གཏམ་ཡིན་མིན་མི་ཤེས་མོད། བོད་རིགས་ས་ཁུལ་གྱི་རོང་འབྲོག་མང་ཚོགས་ཚོས་ཉིན་མཚན་དུས་དྲུག་ཏུ་དབྱར་རྩྭ་དགུན་འབུ་ཁོ་ན་ལས་བསམ་རྒྱུ་གཞན་མེད་པའི་སེམས་ཁམས་ངོ་མ་ཞིག་རེད།
མཚོ་སྐྱེས་རྡོ་རྗེས་མྱུར་དུ“རེད། རེད། ད་ལྟ་རོང་འབྲོག་མང་ཚོགས་ཀྱིས་དབྱར་རྩྭ་དགུན་འབུ་མ་གཏོགས་ཅི་ཡང་ཤེས་ཀྱིན་མེད། གོ་ཐོས་ལྟར་ན། མགོ་ལོག་ནས་མ་རྩ་བརྡིབས་པའི་སྦྱིན་བདག་ཅིག་གིས་རང་སྲོག་བཅད་ཟེར་བ་བདེན་ནམ”ཞེས་དྲིས།
“སྦྱིན་བདག་གཅིག་གིས་ག་ལ་ཚར། བསྡོམས་པས་གསུམ་རེད། གོ་ཐོས་བདེན་ན། མི་རེ་རེར་སྒོར་ཁྲི་བརྒྱ་ལྷག་བརྡིབས་སོང་བས། མགྲོན་ཁང་ནས་མཉམ་དུ་ཆང་རག་ཡིད་ཚིམ་པ་འཐུངས་རྗེས་རང་སྲོག་བཅད་པ་རེད་ཟེར། ང་ལྟ་བུའི་སྦྱིན་བདག་ཚོ་ནི་སྟབས་ལེགས་ན། སྦྱིན་བདག་ཆེན་མོ་ཡིན་མོད། སྟབས་མ་ལེགས་ན། མཇུག་འབྲས་འདི་འདྲ་རེད།” བཀྲ་ཤིས་རྒྱ་མཚོའི་མགོ་བོ་འཕྲེད་དུ་གཡུག་གཡུག་བྱེད་ཀྱིན་སྨྲས།
སྤྱིར་བཀྲ་ཤིས་རྒྱ་མཚོ་ནི་སྤྲོ་སྣང་ཅན་གྱི་མི་ཞིག་ཡིན་ལ། ཁ་ན་དགོད་གཏམ་དང་མཚར་གཏམ་མ་གཏོགས་ལེ་བདའ་དང་སྡུག་གཏམ་ཅི་ཡང་མེད། མ་བསམ་ས་ནས་ཁོས་ཀྱང་སྡུག་གཏམ་བཤད་བྱུང་བས། ཁོ་ལའང་བཤད་མི་ཤེས་པའི་ན་ཟུག་ཅིག་དང་སྡུག་བསྔལ་ཞིག་ཡོད་པ་གདོན་མི་ཟ།
“ཨ་རོགས། འུ་གཉིས་གྲོགས་པོར་གྱུར་པ་ནས་ད་རག་བར་དུ་དགོད་གཏམ་རྐྱང་རྐྱང་ལས་སྡུག་གཏམ་ཞིག་མེད་མོད། དོ་དགོང་ཁྱོད་ལ་ཅི་བྱུང་བ་ཡིན་ནམ།”
བཀྲ་ཤིས་རྒྱ་མཚོས་སྦི་རག་ལྕགས་ཀྲིན་གང་འཐུང་ཐེངས་གཅིག་གིས་འཐུངས་པ་དང་ལག་ཟུང་གིས་ལྕགས་ཀྲིན་དེ་བཙུར་གནོན་བྱས་ཏེ་ཕར་ལ་གཡུགས་རྗེས“སྦི་རག་ཐུངས་དང་། བཟི་སོང་ན། ཅི་ཡང་དྲན་རྒྱུ་མེད་པས། དེ་ལས་སྐྱིད་པ་ཞིག་གང་ན་ཡོད”ཟེར་བཞིན་ཡང་བསྐྱར་སྦི་རག་ཅིག་གི་ཁ་ཕེག་སེ་ཕྱེས།
“ཨ་ལས་ངན་པོ། ད་ལོ་ཁྱོད་ཀྱང་མ་རྩ་བརྡིབས་སོང་བ་མིན་ནམ།”
“མ་རེད། མ་རེད། རང་སྲོག་བཅད་པའི་གཏམ་རྒྱུད་འདི་དག་ཐོས་ན། སྐྱོ་བའི་མིག་ཆུ་མི་འདོན་པའི་མགོ་ནག་མི་ཞིག་ཡོད་དམ།”
“ངའི་སེམས་སུ་ཁྱོད་ཀྱི་ཧམ་སེམས་མེ་ལྕེ་ལྟར་འབར་ཏེ་རྩྭ་ས་ཉོས་པ་རེད་འདོད་བྱུང་། འདོད་ཆུང་ཆོག་ཤེས་བྱས་ན་རང་སེམས་སྐྱིད་ཅེས་པ་བརྗེད་མི་ཉན། ཤོག ཤོག ཨ་རག་ཆང་གིས་བཟི་ན་སྣང་བ་ལྷ་ཡུལ་ཁམས་རེད། རང་སྤུན་ཟླ་གཉིས་ཀྱིས་ཆང་ཐུངས།” མཚོ་སྐྱེས་རྡོ་རྗེས་དེ་ལྟར་བཤད་ཞོར་དུ་ལག་གི་ལྕགས་ཀྲིན་བཀྲ་ཤིས་རྒྱ་མཚོའི་ལྕགས་ཀྲིན་ལ་ཡང་ཡང་གཏུགས། སྦི་རག་གི་སྣོད་དེ་ཤེལ་དམ་ཞིག་ཡིན་པས་ན་སེང་སེ་གྲགས་ཏེ་ཁོ་གཉིས་ཀྱི་ངར་སེམས་དེ་མཚོན་ཐུབ་མོད། ལྕགས་ཀྲིན་གཏུགས་པའི་ཁྲོག་སྒྲ་དེ་ཡིས་ཆང་འཐུང་གི་རྣམ་པ་ཙམ་ཡང་ཕྱིར་མངོན་ཐབས་བྲལ།
སྦི་རག་གི་ཁ་འབྱེད་པའི་ཕེག་སྒྲ་དང་སྦི་རག་ཐོད་གཏུགས་པའི་ཁྲོག་སྒྲ་གཉིས་ནི་རྒྱུན་མི་ཆད་པར་ལྷིང་འཇགས་ཀྱི་དེའུ་འབུར་ལས་གྲག་བཞིན་ཡོད་ལ། གཞུང་ལམ་སྟེང་གི་ཆེ་ཞིང་རིང་བའི་ཟོང་སྐྱེལ་རླངས་འཁོར་དག་གིས་ཁོ་གཉིས་ལ་ཅོ་འདྲི་བ་ལྟར་དུང་བརྡ་ལྷང་ལྷང་སྒྲོག་བཞིན་ནུབ་ཕྱོགས་ནས་ཤར་ཕྱོགས་སུ་བཞུར་གྱིན་གདའ།
“མཚོ་སྐྱེས། སྔོན་ཆད་ངའི་སེམས་སུ་ཁྱོད་ཀྱིས་ང་ལ་ཕྲག་དོག་བྱེད་པ་རེད་འདོད་ཡོད། ད་ལྟ་བསམས་ན། ཁྱོད་ཀྱིས་བཤད་པའི་སྐད་ཆ་ཚང་མ་ནི་ཤ་ཚ་བའི་གཏམ་རེད། ལྷག་པར། འདོད་ཆུང་ཆོག་ཤེས་བྱས་ན་རང་སེམས་སྐྱིད་ཅེས་པ་ནི་ཉམས་མྱོང་རྒན་པོའི་སེམས་གཏམ་རེད། ལོ་འདི་དག་ལ། ངས་རྒྱས་བཟའ་རྒྱས་འཐུང་དང་མགོ་གཡོག་མགོ་བསྐོར། ཤེས་མེད་ཚོར་མེད་ཀྱི་འཚོ་བ་རོལ་ཏེ་རང་ཉིད་ནི་གཞན་ལས་ལྷག་པ་ཞིག་རེད་འདོད་ཡོད། ད་ལྟ་བསམས་ན། ངའི་བཅའ་སྲོལ་ལས་སྲོལ་ཡོད་ཚད་ནི་བྱིས་པ་བསམ་མེད་ཅིག་དང་ཨ་ན་མ་ན་རེད། ང་ནི་དངོས་ནས་འདྲེ་རྒན། ཁྱི་རྒན། བླུན་རྒན། འུག་རྒན་རེད།”
“ཨ་རོགས། ཁྱོད་ནི་ཆང་གི་རྫ་མ་མིན་ནམ། སྦི་རག་ལྕགས་ཀྲིན་འགའ་ཡིས་བཟི་སོང་ན། སྦྱིན་བདག་གི་མཚན་སྙན་བརླགས་པ་མ་རེད་དམ། གཞན་གྱི་སྔུན་ནས་སྦྱིན་བདག་བཀྲ་ཤིས་ཁྱོད་ཀྱིས་མགོ་བོ་ཇི་ལྟར་དགྱེ།”
“ཨ་ཁུ་ལེ་ལེ། ད་ཁྱོད་ཀྱིས་ང་ལ་ངོ་ཚ་མ་གཏོད། ང་ནི་སྦྱིན་བདག་མ་རེད་སྐྱིན་བདག་རེད།”
“ཅི་ཟེར། སྔོན་ཆད་མི་མང་ས་ནས་ངས་ཀྱང་ཁྱོད་ལ་སྦྱིན་བདག་ཅེས་མ་བོས་ན། ཁྱོད་ཀྱིས་ཆང་སྐྱོན་བྱས་པ་དེ་བརྗེད་སོང་ངམ། ད་ལྟ་གློ་བུར་དུ་སྐྱིན་བདག་ལ་གྱུར་དོན་ཅི་རེད།”
“བཤད་སྲོལ་མེད་ལ། ངས་བཤད་ན་ཡང་ཁྱོད་ཀྱི་སྙིང་ན་སྟེ་ང་ལ་མཇལ་ཁ་འཇོག་སྲིད་པས་སྐྱུར་ཞོག”
“ཁྱོད་ལ་སྡུག་གཏམ་ཞིག་ཡོད་པ་ཁོ་ཐག་རེད། ཁ་དཔེར་ཆང་ཁ་ནས་འཐུངས་ན་གཏམ་སྙིང་ནས་ཤོར་ཟེར་མོད། ཁྱོད་ཀྱིས་མ་གཅིག་སྤུན་ལས་ལྷག་པའི་གྲོགས་པོ་ང་ལའང་སེམས་གཏམ་མི་བཤད་ན་བསྐྱུར་ཆོག རྗེས་ནས་ངའི་སེམས་གཏམ་ཡང་ཁྱོད་ལ་བཤད་པའི་རེ་བ་མ་འཛིན།”
༼མུ་འགོད།༽
རྩོམ་ཡག་པོ་བྲིས་འདུག་མ་མཐུད་སྤེལ་རོགས་གནང།