<<གྲྭ་ཆུང་དང་རྫ་རྒན་ནག་རྡང་།>>

ཚེ་རིང་།
—-སློབ་གྲོགས་ཤིག་གི་སྐད་ཆ་ལ་གཞི་བཅོལ་ནས་བྲིས།

ངའི་ཕ་ཡུལ་གྱི་ལུང་མགོ་ན
རྫ་རྒན་ནག་རྡང་ཞིག་ཡོད་ལ དེའི་རྐེད་པ་ནི
དུས་བཞིར་ན་བུན་གྱིས་དཀྲིས་ཡོད
ངག་རྒྱུན་དུ་གྲགས་པ་ལྟར་ན
དེ་རུ་སྲིན་མོ་འཇིགས་སུ་རུང་བ་ཞིག་ཡོད་པས
རྫ་རྐེད་དེར་སོང་ནས་ཕྱིར་ལོག་ཐུབ་མཁན་གཅིག་ཀྱང་མེད་ཟེར
ལ་ལས་བཤད་ན དེ་ནི་ཡུལ་ལྷ་མཐུ་བོ་ཆེ་ཚོའི་གཞལ་ཡས་ཁང་ཡིན་པས
སུས་ཀྱང་འགྲོ་མི་ཐུབ་སྐད
ལོ་ལོན་ཁ་ཤས་ནས རྫ་རྒན་གྱི་ཕར་ཕྱོགས་ནི
མེ་མཚོ་ཆུ་རྒོད་ལྟར་གདུས་པའི་ཡུལ་ཁམས་ཤིག་ཡིན་པས
སུས་ཀྱང་འགྲོ་ས་མེད་ཟེར
དེ་ལྟར་མི་ལོ་དུ་མ་ཞིག་འདས་ཤིང་ལོ་ངོ་དེ་དག་གི་རིང་ལ
སུས་ཀྱང་རྫ་རྐེད་དེར་འགྲོ་མ་ཕོད་ལ
སུས་ཀྱང་རྫ་ཕར་ཕྱོགས་ཀྱི་འཇིག་རྟེན་དེ་མཐོང་མ་མྱོང

མི་ལོ་བཅུའི་ཡར་སྔོན་གྱི་དབྱར་ཁ་སྟེ
ཆར་ཤོད་ཆེ་བའི་ཉིན་མོ་ཞིག་ལ
ང་ཚོ་སྡེ་བའི་གྲྭ་ཆུང་ཞིག་རྫ་འདབས་དེར་ཕྱིན་ཏེ
ཕྱིར་ཡོང་མེད་པར་གྱུར་བས
ཡུལ་མི་ཚོས་གཏམ་རྒྱུད་རྙིང་བ་དེ་དག་ད་ལྟའི་བར་དུ་བཤད་མྱོང

ད་ལོའི་སོས་ཀར་ང་ཚོའི་སྡེ་བར
རྒྱུས་མེད་པའི་ཡི་གེ་ཞིག་འབྱོར་ཞིང
ཡི་གེ་དེ་རུ་རྫ་འདབས་ནས་བོར་སོང་བའི་གྲྭ་ཆུང་དེས
<ཡུལ་ཁམས་>གཞན་ཞིག་འགྲིམས་པའི
ལམ་ཡིག་དང་ལོ་རྒྱུས་གསལ་བོ་བརྗོད་འདུག་མ་ཟད
ད་དུང་<ཡུལ་ཁམས>གཞན་དེ་ལས་ཀྱང
<ཡུལ་ཁམས>གཞན་ཞིག་འགྲིམས་པའི་གནས་ཚུལ་བརྗོད་འདུག
ཡི་གེ་དེ་ང་ཚོ་སྡ་བའི་ནང་ཁྱབ་བརྡལ་དུ་ཕྱིན་རྗེས་སུ
སྔོན་གྱི་གཏམ་རྒྱུད་ལ་འབྱམས་པའི་ལོ་ལོན་ཚོའི
ཐོད་པའི་རྒས་གཉེར་གྱི་གསེབ་ཏུ
ཧ་ཅང་ཐང་ཆད་པའི་དྲི་བ་ཞིག་དང
ཉི་ཟེར་གྱིས་གཙེས་པའི་མིག་མཐའ་རུ
ནོངས་འགྱོད་དང་ཡ་མཚན་འདྲེས་མའི་འོད་ཟེར་ཞིག་འཁྱུག་འདུག

གཏམ་རྒྱུད་དེ་དེ་ལྟར་མཇུག་རྫོགས་མ་ཐག
སུས་ཀྱང་སྐུལ་བ་མེད་པར
སྡེ་བའི་གཞོན་ནུ་ཚོ་མཉམ་རུབ་ཀྱིས
རྫ་རྒན་ནག་རྡང་གི་རྐེད་པ་ནས་ལམ་བུ་ཞིག་འཕྲད་དུ་དྲས

2014/07/18 སྲོད་ཁར།