དབྱངས་ཅན་མ་ལྟ་བུའི་གཞས་མ་ཞིག་ལ།

ཀླུ་སྨྱོན།

གལ་སྲིད་རང་སེམས་ཟེར་བའི་སྨུག་པ་འདྲ་བོ་འདི་རང་ལ་དབང་བ་ཡིན་ན།

གལ་སྲིད་སྐྱེ་འཆི་ཟེར་བའི་རྨི་ལམ་ལྟ་བུ་འདི་རང་ལག་ན་ཡོད་པ་བདེན་ན།

ངས་རང་གི་བྲང་ཁོག་དྲོན་མོ་ཚལ་བུར་གཤགས་ནས།

དྲག་ཏུ་ལྡང་བཞིན་པའི་སྙིང་དམར་པོ་དེ་ཕྱི་རུ་ཕྱུངས་ནས།

ཁྱེད་ལ་ང་རང་གི་བརྩེ་དུང་གཉོམ་པོ་དེའི་ལྗིད་ཚད་ངོ་མ་དེ་ཤེས་སུ་འཇུག་ན་འདོད།

གལ་སྲིད་དམྱལ་ཁམས་བཅོ་བརྒྱད་ཟེར་བ་ཞིག་མེད་པ་ཡིན་ན།

གལ་སྲིད་གཏམ་དང་མྱི་ཁ་ཟེར་བ་ཞིག་ལ་འཇིགས་མི་དགོས་པ་ཡིན་ན།

ངས་རང་གི་བཅོས་འཛུམ་ཡོད་ཚད་རྒྱབ་ཏུ་གཡུགས་ནས།

ལྷོག་ལྷོག་ཏུ་འཕྱུར་བཞིན་པའི་སེམས་ཁམས་དེ་ཞི་འཇགས་ཡོང་བའི་ཆེད་དུ།

ཁྱེད་ཀྱི་མགུལ་བར་འཁྱུད་ནས་བསྐལ་བ་མེ་ལྟར་འབར་བའི་བར་དུ་འདུག་ན་འདོད།

གལ་སྲིད་འཁོར་བ་ཟེར་བའི་སྡུག་བསྔལ་གྱི་ཕ་ས་ཞིག་མེད་པ་ཡིན་ན།

གལ་སྲིད་སྡོམ་པ་ཟེར་བའི་སེམས་ཁམས་སྡོམ་བྱེད་ཅིག་མེད་པ་ཡིན་ན།

ངས་རང་གི་ཆགས་སེམས་དྲག་པོ་དེ་ཕྲ་རགས་མེད་པར་བརྡོལ་དུ་བཅུག་ནས།

ཡུན་རིང་སེམས་སུ་ཉར་བའི་རྨི་ལམ་གྱི་གུར་ཁང་སྙིང་རྗེ་བོ་དེ་མངོན་དུ་འགྱུར་བའི་ཆེད་དུ།

ཁྱེད་ཀྱི་མཆུ་སྒྲོས་དམར་པོ་དེའི་བྲོ་བ་ངོ་མ་དེ་ཇི་འདྲ་ཞིག་ཡིན་མྱོང་ན་འདོད།

གལ་སྲིད་ཆོས་ལུགས་ཟེར་བའི་མི་རིགས་བར་དབྱེ་བ་འབྱེད་བྱེད་ཅིག་མེད་པ་ཡིན་ན།

གལ་སྲིད་རིག་གཞུང་ཟེར་བའི་བསམ་བློའི་བར་འགལ་ཟླ་བཟོ་བྱེད་ཅིག་མེད་པ་ཡིན་ན།

ངས་རང་གི་གཉུག་སེམས་ཀྱི་དྭངས་མར་འཕོས་པའི་རིག་སྟོང་རྗེན་པ་དེ།

ཁྱེད་ཀྱི་ནམ་མཁའ་ལྟ་བུའི་བརྩེ་སེམས་དེའི་ཀློང་དུ་ཇི་སྲིད་བར་དུ་བསྟིམ་ན་འདོད།

གལ་སྲིད་གྱོན་ཆས་ཟེར་བའི་གཟུགས་པོ་སྒྲིབ་བྱེད་ཅིག་མེད་པ་ཡིན་ན།

གལ་སྲིད་བག་ཡོད་ཟེར་བའི་བར་ཐག་འཇོག་བྱེད་ཅིག་མེད་པ་ཡིན་ན།

ངས་རང་གི་ཤ་ཁྲག་རུས་གསུམ་གྱི་འདུས་མདོར་གྱུར་བའི་བྲང་གཞུང་གྲུ་བཞི་འདི།

ཁྱོད་ཀྱི་དྲོད་འབར་བའི་མྱོས་བུམ་དཀར་པོ་ཟུང་ལ་ཉིན་མཚན་མེད་པར་སྦྱོར་ན་འདོད།

གལ་སྲིད་ས་གཞི་ཟེར་བའི་སྒང་གཞུང་མང་པའི་འཇིག་རྟེན་ཞིག་མེད་པ་ཡིན་ན།

གལ་སྲིད་ནམ་མཁའ་ཟེར་བའི་བར་སྟོང་མོད་པའི་ཁོར་ཡུག་ཅིག་མེད་པ་ཡིན་ན།

ངས་རང་གི་སེམས་པ་ཤོར་བའི་ཁྱོད་རང་ལུས་དང་གྲིབ་མ་བཞིན་དུ་ཁྲིད་ནས།

སྨྲ་བསམ་བརྗོད་མེད་ཀྱི་ཆོས་ཉིད་དག་པའི་ཀློང་ཞིག་ཏུ་སྤྱི་དང་བྱེ་བྲག་མེད་པར་འཐིམ་ན་འདོད།