བོད་རེ་བས་ཕོངས།

ཁྱོད་སུ་ཡིན།

ང་རི་དྭགས་ར་བ་དེར་འགྲོ་ཐེངས་རེར།
དུས་རྒྱུན་ལྕགས་ཟམ་མཐོན་པོ་དེའི་འོག་ན་ཁ་གནམ་ལ་འཁོར་ཏེ་འགྲེང་བཞིན་པའི་དོན་དྲེད་དེ་དག་མཐོང་ཡོང་།
མི་རྣམས་ཀྱིས་གཅན་གཟན་གཏུམ་པོ་དེ་རྣམས་ཀྱི་འཚེ་བར་གཡོལ་ཆེད་དང་།
དེ་དག་གི་འགུལ་སྐྱོད་ལ་ལྟད་མོར་བལྟ་ཆེད་ར་བའི་ཕྱོགས་ཤིག་ཏུ་རྣོ་ལྕགས་དང་ཨར་འདམ་གྱིས་གྲུབ་པའི་ཟམ་པ་མཐོ་ལ་རིང་བ་ཞིག་བསྐྲུན་ཡོད།
རི་དྭགས་ར་བ་དེར་དུས་རྒྱུན་དུ་ལྟད་མོ་བ་ཧ་ཅང་མང་ཞིང་།
ལྟད་མོ་བ་མང་བོ་ཞིག་གིས་རི་དྭགས་དང་གཅན་གཟན་དེ་དག་ལ་རང་རང་གི་ལག་ཏུ་གང་འཛོམས་ཀྱི་ཤིང་ཏོག་སོགས་ཟས་རིགས་སྣ་ཚོགས་སྦྱིན་པར་བྱེད།
སྣང་ཚུལ་དེ་མཐོང་རྗེས་ར་སྐོར་གྱི་ལྟ་སྲུང་བ་རྣམས་ལ་བསམ་བློ་ཞིག་འཁོར་བྱུང་།
ཁོ་ཚོས་སྲོག་ཆགས་དེ་དག་གི་འཕྲོད་བརྟེན་དང་བདེ་འཇགས་ལ་བསྙད་དེ་ཟས་རིགས་ལ་ཚད་བཀག་དང་སྦྱིན་ཡུལ་ལ་བཀོད་འདོམས་བདག་འཛིན་བྱས།
ཟམ་སྟེང་བདག་ཏུ་ཐོབ་པའི་རྒྱ་རྒན་དར་གཡོལ་དེས་ཁོ་རང་ཉིད་ཀྱིས་བཙོང་བཞིན་པའི་ལ་ཕུག་སྐམ་པོ་ཁོ་ན་ལས་ལྟད་མོ་བ་རང་ངོས་ནས་ར་སྐོར་ཕྱི་རོལ་ལས་ཁྱེར་ཡོང་བའི་ཤིང་ཏོག་སོགས་ཟས་རིགས་སྦྱིན་མི་ཆོག་པའི་འགོག་བསྡོམས་བྱས།
མཚམས་ལ་རེར་དོམ་དྲེད་དེ་དག་ཟམ་པ་དེ་ལས་ཁ་ཐག་རིང་བོར་ཡང་བུད་འགྲོ་བས།
སྐབས་དེ་དག་ཏུ་ལྟ་སྲུང་བའི་ལ་སྐམ་གྱི་ཚོང་ལ་ཡང་ཤུགས་རྐྱེན་ངེས་ཅན་རེ་ཐེབས་འགྲོ།
དེ་བས་ལྟ་སྲུང་བས་བསླུ་བྲིད་ཀྱི་རིག་པ་གཞན་ཞིག་བཏང་བྱུང་།
ཁོས་ཀུ་ཤུ་གཅིག་སྐུད་པ་རིང་བོ་ཞིག་ལ་བཏགས་ཏེ་ཟམ་པའི་སྟེང་ནས་ཐུར་དུ་དཔྱངས།
དོམ་དྲེད་དག་གིས་ཀུ་ཤུ་དེ་མཐོང་རྗེས་རང་ཉིད་ལ་སྟེར་བར་སྙམ་སྟེ།
ཀུ་ཤུའི་ཐད་སོ་ནས་ཙོག་བུར་ཁ་གནམ་ལ་ཕྱོགས་ཏེ་དུས་རྒྱུན་རེ་བས་ལྟོས་ལ།
ཐ་ན་རྟུག་པ་གཏོང་བར་ཡང་ཀུ་ཤུ་དཔྱངས་སའི་གནས་དེ་ལས་ཐག་རིང་དུ་འགྲོ་བར་མི་སྤོབས།
དོམ་དྲེད་དེ་དག་ཟམ་འོག་དང་ཁ་མ་བྲལ་བས།
ལྟ་སྲུང་བའི་ལ་ཕུག་སྐམ་པོའི་ཚོང་དེ་ཡང་སླར་བྲིན་པོ་བྱུང་སོང་།