བསེ་བློ་བཟང་དཔལ་ལྡན་མཆོག་གིས་དུས་འཁོར་དབང་ཆེན་གནང་རྒྱུ་རེད།
སང་ཉིན་ཧོར་ཟླ་་༥ ཚེས་༡༢ ཉིན་ནས་བཟུང་མདོ་སྨད་གཙོད་དགོན་པའི་ནང་བསེ་ཚང་བློ་བཟང་དཔལ་ལྡན་མཆོག་གིས་དཔལ་དུས་ཀྱི་འཁོར་ལོའི་དབང་ཆེན་བསྐུར་རྒྱུ་ཡིན་འདུག
དེ་རིང་བོད་ནས་གནས་ཚུལ་འབྱོར་བ་ལྟར་ན། སང་ཉིན་ཕྱི་ལོ་༢༠༡༤ ཟླ་༦ ཚེས་༩ ཉིན་དང་ཧོར་ཟླ་༥ ཚེས་༡༢ ཉིན་ནས་ཚེས་༡༥ བར། མདོ་སྨད་ཀན་ལྷོ་གཙོད་གྲོང་ཁྱེར་ཉེ་འདབས་སུ་ཡོད་པའི་གཙོད་དགོན་པ་དགེ་ལྡན་ཆོས་གླིང་དུ། བསེ་ཚང་བློ་བཟང་དཔལ་ལྡན་མཆོག་གིས་དཔལ་དུས་ཀྱི་འཁོར་ལོའི་དབང་ཆེན་བསྐུར་རྒྱུ་ཡིན་པ་དང་། གནས་ཚུལ་མཁོ་སྤྲོད་པའི་བརྗོད་པ་ལྟར་ན། ཐེངས་འདིར་གཙོད་ཚོ་བ་ཉེར་གཅིག་གིས་བསྟན་པའི་སྦྱིན་བདག་དང་གོ་སྒྲིག་གནང་བའི་འོག ཀན་ལྷོ་ཁུལ་དང་གཙོད་གྲོང་ཁྱེར་བཅས་ཀྱི་མགོ་ཁྲིད་ཚོའི་རྒྱབ་སྐྱོར་དང་། ལྷག་པར་དུ་ས་གནས་བོད་རིགས་ལས་བྱེད་ཚོའི་རོགས་འདེགས་ལ་བརྟེན་ཏེ་སྲིད་གཞུང་གིས་ཆོག་མཆན་སྤྲད་པ་ཞིག་ཡིན་འདུག
ཐེངས་འདི་ནི་བསེ་བློ་བཟང་དཔལ་ལྡན་མཆོག་གིས་དུས་འཁོར་དབང་ཆེན་གནང་ཐེངས་བཞི་པ་དེ་ཆགས་ཡོད་ཅིང་། སྔ་ལོའི་ཕྱི་ཟླ་ ༦ པའི་ནང་སི་ཁྲོན་རྔ་པ་ཁུལ་མཛོད་དགེ་ཐང་སྐོར་དུ་དུས་དབང་ཐེངས་གསུམ་པ་གནང་སྐབས་ཆོས་ཞུ་བ་འབུམ་ ༣ ལྷག་འདུ་འཛོམས་བྱུང་བའི་གནས་ཚུལ་ཐོན་ཡོད། ཐེངས་འདིར་ཀན་ལྷོ་ཁུལ་གྱི་ཁུལ་དཔོན་གྱིས་དུས་དབང་སྟེང་ས་ཆའི་རྒྱ་ཁྱོན་གྱི་དབང་གིས་ཆོས་ཞུ་བ་འབུམ་གཉིས་ལས་ལྷག་འདུ་འཛོམས་བྱེད་མི་ཆོག་ཚུལ་བཀའ་བཏང་ཡོད་ཀྱང་། ས་གནས་མང་ཚོགས་ཚོས་ཐེངས་འདིར་མཚོ་སྔོན་དང་སི་ཁྲོན། ཀན་སུའུ་བཅས་ཞིང་ཆེན་གསུམ་ནས་དད་ལྡན་ཆོས་ཞུ་བ་འབུམ་ ༣ ནས་ ༤ བར་འདུ་འཛོམ་ཡོང་སྲིད་པའི་ཚོད་དཔག་བྱེད་ཀྱིན་ཡོད་འདུག
དུས་དབང་གོ་སྒྲིག་གནང་མཁན་ཚོས་གཙོད་གྲོང་ཁྱེར་ཡོངས་ཀྱི་ཚོང་ཁང་ཟ་ཁང་དང་མགྲོན་ཁང་། སྤྱི་སྤྱོད་རླངས་འཁོར་དང་གླ་གཏོང་འཁོར་ལོ་ཡོངས་རྫོགས་ཀྱི་གོང་ཚད་རྒྱུན་ལྡན་ལྟར་གནས་དགོས་པ་ལས། ཐེངས་འདིར་མི་མང་འདུ་འཛོམས་དང་བསྟུན་ཏེ་གོང་ཚད་སྤར་བ་རིགས་བྱེད་མི་ཆོག་པ་དང་། གཙོད་གྲོང་ཁྱེར་ཡོངས་ཀྱི་བོད་པའི་ཁྱིམ་ཚང་ཚོས་ཐག་ཉེ་རིང་གི་ཆོས་ཞུ་བ་སུ་ཞིག་གིས་གནས་ཚང་ཡར་ན་རིན་མེད་ཐོག་སྣེ་ལེན་ཞུ་དགོས་པ་སོགས་ཀྱི་ཐད་སྒྲིག་ཁྲིམས་བཟོས་ཏེ། གཙོད་ཚོ་བ་ཉེར་གཅིག་དང་གཙོད་དགོན་པ་བཅས་ཀྱི་ལྟ་རྟོག་རུ་ཁག་ཆེད་འཛུགས་ཀྱིས་ཆོས་ཞུ་བ་ཚོའི་འགྲོ་སྐྱོད་བདེ་འཇགས་དང་། ཟ་ཁང་ཚོང་ཁང་དང་མགྲོན་ཁང་། གླ་གཏོང་རླངས་འཁོར་སོགས་ལ་ལྟ་རྟོག་སྟངས་འཛིན་བྱེད་བཞིན་ཡོད་འདུག
བསེ་ཚང་བློ་བཟང་དཔལ་ལྡན་ཆོས་ཀྱི་རྡོ་རྗེ་མཆོག་ནི། བོད་ཀྱི་རིག་མཛོད་ནང་། ༡༩༣༨ ལོའི་ཟླ་ ༡ བོའི་ཚེས་ ༡༩ ཉིན་མདོ་སྨད་རེབ་གོང་ཐེ་བུ་རུ་སྐུ་འཁྲུངས་ཤིང་། ཀུན་གཟིགས་པཎ་ཆེན་བློ་བཟང་ཐུབ་བསྟན་ཆོས་ཀྱི་ཉི་མ་མཆོག་གིས་བསེ་སྐུ་ཕྲེང་ལྔ་པ་བློ་བཟང་བཀྲ་ཤིས་འཕྲིན་ལས་རྒྱ་མཚོའི་སྤྲུལ་སྐུར་ཐུགས་ཐག་བཅད་དེ། དགུང་ལོ་བཞི་བར་གཏེར་ལུང་ཡིད་དགའ་ཆོས་འཛིན་གླིང་གི་གདན་སར་བཀོད། དགུང་ལོ་བདུན་པ་ནས་ཡོངས་ཀྱི་བཤེས་གཉེན་ཆེན་མོ་ཀུན་དགའ་དཔལ་བཟང་བོ་ཡོངས་འཛིན་དུ་བསྟེན་ཏེ་ཀློག་བྲིས་རིག་གནས་དང་བཅས་པ་བསླབ། སྐྱབས་མཆོག་ཨ་རོལ་རིན་པོ་ཆེ་ལས་དགེ་བསྙེན་དང་བར་མ་རབ་བྱུང་། དགེ་ཚུལ་རྣམས་དཀྱུས་གཅིག་ཏུ་བསྒྲུབས། དབང་ལུང་ཁྲིད་གསུམ་དང་མན་ངག་ཞལ་ལུང་ཐམས་ཅད་བུམ་པ་གང་བྱོའི་ཚུལ་དུ་གསན་ཏེ་སྐྱབས་རྗེ་དམ་པ་དེ་ཉིད་ཀྱི་སྲས་ཀྱི་ཐུ་བོར་གྱུར།
༡༩༤༧ ལོ་སྟེ་དགུང་ལོ་བཅུ་བར་རབ་འབྱམས་པ་འཇམ་དབྱངས་གྲགས་པ་མཚན་ཉིད་དགེ་རྒན་དུ་བསྟེན་ཏེ་བསྡུས་གྲྭ་དང་བློ་རྟགས་སོགས་གསན། ༡༩༥༡ ལོར་དབུས་སུ་ཆིབས་ཁ་བསྒྱུར་ཏེ་རྒྱལ་དབང་ཐམས་ཅད་མཁྱེན་པ་མཆོག་གི་གཟིམ་ཆུང་མཇལ་ཁ་ཐོབ་ཅིང་། འབྲས་སྤུངས་ཚོགས་ཆེན་དུ་ཆོས་བཞུགས་གནང་སྟེ་ཚོགས་ཆེན་སྤྲུལ་སྐུའི་མཚན་བཏགས་བཞེས། སྒོ་མང་གྲྭ་ཚང་དུ་ཞུགས་ཏེ་དགེ་བཤེས་དབལ་ཤུལ་འཇམ་དབྱངས་རྒྱ་མཚོ་ཚང་བླ་མར་བསྟེན་ཏེ་སློབ་གཉེར་གནང་། ༧གོང་ས་རྒྱལ་བའི་དབང་བོ་མཆོག་ལས་སྐྱེས་རབས་སོ་བཞི་དང་ཐུགས་རྗེ་ཆེན་པོ་བཅུ་གཅིག་ཞལ་གྱི་དབང་སྟ་གོན་དང་བཅས་པ། རྒྱན་འཇུག་གཉིས་དང་བླ་མའི་རྣལ་འབྱོར་བཅས་ཀྱི་ལྗགས་ལུང་གསན།
༡༩༥༣ ལོར་གཙང་བཀྲ་ཤིས་ལྷུན་པོར་ཀུན་གཟིགས་པཎ་ཆེན་རིན་པོ་ཆེ་མཆོག་གི་མདུན་ནས་དགའ་ལྡན་ལྷ་བརྒྱ་མ་དང་ཡོན་ཏན་གཞིར་གྱུར་མའི་ལྗགས་ལུང་གསན། ནོ་མོན་ཧན་གྱི་བཀའ་ཤོག་དང་ཐམ་གའི་ཆོ་ལོ་བསྩལ་ཏེ་དམིགས་བསལ་གྱི་གཟེངས་བསྟོད་རྒྱ་ཆེར་གནང་། ༡༩༥༤ ལོར་འབྲས་སྤུངས་སྒོ་མང་གྲྭ་ཚང་དུ་ཕར་ཕྱིན་དམ་བཅའ་བཞག ༡༩༥༥ ལོར་རོང་བོ་དགོན་ཆེན་གྱི་དུས་ཞབས་པ་མཁས་དབང་སྟག་ལྷའི་མདུན་ནས་རྒྱ་བོད་ཀྱི་རྩིས་གཞུང་གསན་བསམ་མཛད། ༡༩༥༦ ལོར་བྲག་དཀར་སྤྲེལ་རྫོང་དུ་བྱོན་ཏེ་ཨ་རོལ་རིན་པོ་ཆེ་ལས་དུས་འཁོར་དབང་ཆེན་དང་མི་ཊ་རྡོར་ཕྲེང་སོགས་དབང་ལུང་གསན། དབུས་ཀྱི་བཤེས་གཉེན་ཆེན་པོ་འཇམ་དབྱངས་རྒྱ་མཚོ་ཚང་སྤྲེལ་རྫོང་དགོན་པའི་དགེ་རྒན་དུ་ཕེབས་ཡོད་པ་གཏེར་ལུང་དུ་གདན་དྲངས་ཏེ། གྲུབ་མཐའ་ཆེན་མོ་རྩ་འགྲེལ་སྦྲགས་པ་དང་མཛོད་རྩའི་དཔེ་ཁྲིད་ཞུས། ༡༩༥༧ ལོར་སླར་སྤྲེལ་རྫོང་དུ་ཕེབས་ཏེ་ཨ་རོལ་རྡོ་རྗེ་འཆང་མཁན་སློབ་སྦྲགས་མ་དང་། འདུལ་འཛིན་ཆེན་པོ་སྐྱབས་རྗེ་མི་ཉག་རིན་པོ་ཆེ་གསང་སྟོན་མཁན་པོ་མཛད་དེ་དད་པའི་དགེ་འདུན་གྲངས་ཚང་བའི་དབུས་སུ་བསྙེན་རྫོགས་ཀྱི་སྡོམ་པ་བཞེས། དུས་འཁོར་དབང་ཆེན་སོགས་དབང་ལུང་རྗེས་གསུམ་མང་དུ་གསན་པ་གཙོས། མི་ཉག་རིན་པོ་ཆེའི་དྲུང་དུ་བདེ་གསང་འཇིགས་གསུམ་གྱི་བསྐྱེད་རྫོགས་དང་། དམིགས་བརྩེ་མའི་བེའུ་བུམ་སོགས་ལུང་རྐྱང་གི་རིགས་མང་དུ་གསན།
༡༩༥༨ ལོའི་དུས་འགྱུར་སྐབས་རྒྱ་ནག་གི་ཁྲིམས་ལ་ཚུད་དེ་ཟི་ལིང་དུ་བསྐྱལ། བཙོན་ལས་སྐྱབས་མགོན་ཤར་སྐལ་ལྡན་བདུན་པ་ཆེན་པོ་དང་མཇལ་ཏེ་གསང་ཐབས་ཀྱིས་དཔལ་རྡོ་རྗེ་འཇིགས་བྱེད་ལ་བརྟེན་པའི་ལུས་སྲུང་གི་གསང་བའི་མན་ངག་བཀའ་རྒྱ་མའི་ཁྲིད་དང་། ཏིང་ངེ་འཛིན་གྱི་དབང་བཞི་ཐུན་མོང་མ་ཡིན་པའི་ལུང་བཅས་མནོས། རྐྱེན་ངན་གྲོགས་ཤར་གྱིས་བཙོན་ཁང་དུ་བདེ་གསང་འཇིགས་གསུམ་དང་། དུས་འཁོར་རྩ་སྔགས་འབུམ་ཕྲག་ལྔ་བཅུ་རེ་དང་། འཇམ་དཔལ་མཚན་བརྗོད་དག་ཚར་ལྔ་བརྒྱ་ལྷག་གསང་ཟློས་གནང་། ༡༩༦༢ ལོའི་ཟླ་ ༩ བར་བཙོན་གྲོལ་ཐོབ་སྟེ་བླ་བྲང་བཀྲ་ཤིས་འཁྱིལ་དུ་ཕེབས་ནས་འཇམ་བཞད་དྲུག་པ་ཆེན་པོར་དངོས་མཇལ་དང་། ཚོགས་ཆེན་འདུ་ཁང་ཆེན་མོའི་འདུས་པ་རྒྱ་མཚོར་མཆོད་མཇལ། ཀུན་མཁྱེན་གོང་མ་ཡབ་སྲས་ཀྱི་སྐུ་གདུང་དང་མགོན་ཁང་སོགས་ལ་མང་མཇལ་ཐུགས་སྨོན་མཛད།
༡༩༦༣ ལོར་ཁུལ་སྲིད་གྲོས་ཨུ་ཡོན་དུ་བདམས་ཤིང་། ༡༩༦༥ ལོར་ཀན་སུའུ་ཞིང་ཆེན་གྱི་ཆབ་སྲིད་སློབ་གྲྭར་བྱོན་ཏེ་ཆབ་སྲིད་ལ་སློབ་སྦྱོང་མཛད། ༡༩༦༦ ལོར་རིག་གསར་དང་བསྟུན་ཏེ་སླར་ཡང་བཙོན་དུ་ཚུད། བཙོན་ཁང་དུ་འཇིགས་བྱེད་ཀྱི་སྙིང་བོ་འབུམ་རྒྱ། མ་ཎི་བྱེ་ཆེན། ལྟུང་བཤགས་དང་བཟང་སྤྱོད་ལྔ་སྟོང་རེ་གྲངས་གསོག་གནང་། ༡༩༦༨ ལོར་བཀས་བཀོད་རྒྱུད་འཛིན་གྱི་ཞྭ་མོ་གཡོགས་ནས་བསང་ཆུའི་བང་གུར་ཐང་ཞང་གི་དགའ་ཕུག་སྡེ་གྲོང་དུ་ངལ་རྩོལ་བསྒྱུར་བཀོད་ནང་ལོ་ ༡༡ ཙམ་ལ་བཞུགས། བཞད་སྒྲའི་སྐབས་མིན་བསྟོད་པའི་རྒྱན་གྱི་དཔེར་བརྗོད་ཀྱང་སྐབས་དེའི་མྱོང་བ་དྲན་ནས་བྲིས་པར་གསུངས། དེ་གར་བཞུགས་རིང་ངལ་རྩོལ་གྱི་ཞོར་དུ་གཞན་པའི་རོགས་རམ་འོག་ཕྱག་དཔེ་མང་བོ་གཡར་ཏེ། ལྐོག་ཏུ་རྗེའི་ལམ་སྔགས་དང་རིམ་ལྔ་སོགས་བསྐྱེད་རྫོགས་སྐོར་དང་། ལམ་རིམ་བློ་སྦྱོང་དང་རིག་གནས་སྐོར་ལ་དཔེ་གཟིགས་ཆད་མེད་མཛད།
༡༩༧༩ ལོར་དཀར་འདོན་གནང་སྟེ་ཁུལ་ཀན་ལྷོའི་མི་རིགས་སློབ་གྲྭའི་དགེ་རྒན་དུ་གདན་དྲངས་རྗེས། སློབ་ཁྲིད་ཀྱི་ཞོར་དུ་སྙན་འགྲེལ་ཚངས་སྲས་བཞད་སྒྲ་ལྗགས་རྩོམ་གནང་། ༡༩༨༥ ལོར་གཙོས་མི་རིགས་དགེ་འོས་ཆེད་གཉེར་སློབ་གྲྭ་གསར་དུ་བཙུགས་ཏེ་སློབ་གྲྭའི་སློབ་སྤྱི་གཞོན་པར་བསྐོས། མི་རིགས་སློབ་གསོ་དང་ཁྱད་པར་དུ་བོད་རིགས་སློབ་གསོའི་ལས་དོན་ཐོག་མཛད་རྗེས་ཆེན་པོ་བཞག
༡༩༨༦ ལོར་པཎ་ཆེན་སྐུ་ཕྲེང་བཅུ་བའི་ཕྱག་ཕྱིར་འབྲངས་ནས་ཟི་ཁྲོན་དཀར་མཛེས་ཁུལ་དང་། བོད་ལྗོངས་ཆབ་མདོ་ཁུལ། ཡུན་ནན་བདེ་ཆེན་ཁུལ། ཏཱ་ལིས་གྲོང་ཁྱེར་འཇང་ཡུལ་སོགས་ལ་གཟིགས་གནང་། ༡༩༨༧ ལོར་ཀུན་གཟིགས་པཎ་ཆེན་མཆོག་གི་བཀའ་ལྟར་པེ་ཅིན་དུ་ཀྲུང་གོའི་བོད་བརྒྱུད་ནང་བསྟན་སློབ་གླིང་གསར་འཛུགས་གྲ་སྒྲིག་ཚོགས་ཆུང་གི་གྲས་སུ་སློབ་དེབ་གསར་སྒྲིག་གི་འགན་བཞེས་ཤིང་། པཎ་ཆེན་རིན་པོ་ཆེ་མཆོག་གི་བཀའ་བཀོད་ལྟར། ༡༩༩༨ ལོའི་བར་དུ་པེ་ཅིན་ནང་བསྟན་སློབ་གླིང་དུ་གྲུབ་མཐའ་དང་འདུལ་བ་སོགས་ཀྱི་སློབ་ཁྲིད་ལོ་རེར་ཟླ་ ༣ རེ་རྒྱུན་ཆགས་སུ་གནང་། ༡༩༩༠ ལོར་སློབ་དཔོན་ཆེན་མོའི་གོ་འཕང་ལ་མངའ་བརྙེས་ཏེ་རྒྱལ་སྲིད་སྤྱི་ཁྱབ་ཁང་གི་དམིགས་བསལ་ཕོག་སྣོན་ལེན་པའི་སློབ་གསོའི་ཆེད་ལས་པར་བདམས། ༡༩༩༢ ལོའི་ཧོར་ཟླ་བརྒྱད་པར་མགར་རྩེ་དགོན་གྲོང་གཉིས་ཀྱིས་གསོལ་འདེབས་ཞུས་དོན་ལྟར། མི་མང་ ༦༠༠༠༠ བརྒལ་བར་དཔལ་དུས་ཀྱི་འཁོར་ལོའི་དབང་ཆེན་བསྩལ།
ད་ལྟ་ཀན་སུའུ་གཙོས་མི་རིགས་དགེ་འོས་མཐོ་རིམ་ཆེད་གཉེར་སློབ་གྲྭའི་སློབ་སྤྱི་གཞོན་པ་དང་སློབ་དཔོན་ཆེན་མོ། སྲིད་གྲོས་ཀན་སུའུ་ཞིང་ཆེན་ཨུ་ཡོན་ལྷན་ཚོགས་ཀྱི་རྒྱུན་ཨུ། སྲིད་གྲོས་ཁུལ་ཀན་ལྷོའི་ཀྲུའུ་ཞི་གཞོན་པ། ཀྲུང་གོའི་ནང་བསྟན་མཐུན་ཚོགས་ཀྱི་ལས་འཛིན་པ། ཀན་སུའུ་ནང་བསྟན་མཐུན་ཚོགས་ཀྱི་ཚོགས་སྤྱི་གཞོན་པ། ཀན་སུའུ་དམངས་སྲོལ་ཞིབ་འཇུག་ཚོགས་པའི་ཚོགས་སྤྱི་གཞོན་པ། ཀྲུང་གོའི་བོད་བརྒྱུད་མཐོ་རིམ་ནང་བསྟན་སློབ་གླིང་གི་གདན་ཞུའི་ཞིབ་འཇུག་པ་དང་ནུབ་བྱང་མི་རིགས་སློབ་གྲྭ་ཆེན་མོའི་གདན་ཞུས་སློབ་དཔོན་ཆེན་མོ་སོགས་ཀྱི་འགན་ཞེས་མུས་ཐོག གཙོད་མི་རིགས་དགེ་འོས་མཐོ་རིམ་ཆེད་གཉེར་སློབ་གྲྭར་འཆད་རྩོད་རྩོམ་གསུམ་ལ་གཞོལ་བཞིན་ཡོད། ཅེས་འཁོད་འདུག
ཁོང་གི་བརྩམས་ཆོས་ཁག་ནི།《ཚངས་སྲས་བཞད་པའི་སྒྲ་དབྱངས།》དང་། 《དགེ་ལྡན་གྲུབ་མཐའ་འཇམ་མགོན་བསྟན་པའི་མཛེས་རྒྱན།》 《ཁྱད་པར་འཕགས་བསྟོད་ཀྱི་འགྲེལ་བ་ཐུབ་དབང་དགྱེས་པའི་མཆོད་སྤྲིན།》 《སྐྱབས་རྗེ་ཨ་རོལ་རིན་པོ་ཆེའི་རྣམ་ཐར།》 《དམ་ཆོས་འདུལ་བའི་ཟིན་བྲིས་ཐུབ་བསྟན་ལྷུན་པོའི་མཛེས་རྒྱན།》 《མགར་རྩེ་དགོན་པའི་གདན་རབས་དང་བཅས་འཇམ་དབྱངས་མཐོང་གྲོལ་ཆེན་མོའི་དཀར་ཆག》 《རེབ་གོང་སྐྱབས་མགོན་བདུན་པའི་རྟོགས་བརྗོད།》《གཏེར་ལུང་དགོན་པའི་བཅའ་ཡིག》 སོགས་ཡོད།
༼བོད་ཀྱི་དུས་བབ་དྲ་ཚིགས་ནས་འདྲེན་བཀོད་ཞུས༽
ཀརྨ་པ་ཞེས་འཛམ་བུའི་གླིང་ལ་གྲགས།།
གྲགས་པ་དོན་ལྡན་མཐའ་ཡས་སྐྱེ་རྒུའི་མགོན།།
མགོན་དེའི་གསང་གསུམ་སྣང་བ་དཀར་པོའི་དཔལ།།
དཔལ་ལྡན་དང་པོའི་མགོན་དང་ཀུན་ནས་མཚུངས།།
ཡག་པོ་རེད། དུས་འཁོར་དབང་ཆེན་གནང་བ་བཀའ་དྲི་ཆེ། བོད་ལ་བསྟན་པ་སྤེལ་བ་བཀའ་དྲིན་ཆེ། བོད་མིའི་སྡུག་བསྔལ་སེལ་བཀའ་དྲིན་ཆེ། མ་འོང་པ་ལ་རྒྱལ་ཀུན་འདུས་སྐུ་གོང་ས་མཆོག་བོད་ལ་ཕེབ་ནས་དུས་དབང་དང་ཚད་ཆོས་ཟུང་འབྲེལ་གྱི་སྨྲ་བ་ཟླ་མེད་དང། ཚད་ཆོས་གེང་གེ་འཇིང་གནོན་དེ་བོད་ལ་སྤེལ་ཐུབ་པའི་རེ་སྨོན་ཡང་ཡང་ཞུ་ཞུ
་་་་་་་་ ༡༩༦༨ ལོར་བཀས་བཀོད་རྒྱུད་འཛིན་གྱི་ཞྭ་མོ་གཡོགས་ནས་བསང་ཆུའི་བང་གུར་ཐང་ཞང་གི་དགའ་ཕུག་སྡེ་གྲོང་དུ་ངལ་རྩོལ་བསྒྱུར་བཀོད་ནང་ལོ་ ༡༡ ཙམ་ལ་བཞུགས། བཞད་སྒྲའི་སྐབས་མིན་བསྟོད་པའི་རྒྱན་གྱི་དཔེར་བརྗོད་ཀྱང་སྐབས་དེའི་མྱོང་བ་དྲན་ནས་བྲིས་པར་གསུངས། ་་་་་་
་་་་་་ ༡༩༧༩ ལོར་དཀར་འདོན་གནང་སྟེ་ཁུལ་ཀན་ལྷོའི་མི་རིགས་སློབ་གྲྭའི་དགེ་རྒན་དུ་གདན་དྲངས་རྗེས། སློབ་ཁྲིད་ཀྱི་ཞོར་དུ་སྙན་འགྲེལ་ཚངས་སྲས་བཞད་སྒྲ་ལྗགས་རྩོམ་གནང་། ་་་་་་་
་་་་་་ ཁོང་གི་བརྩམས་ཆོས་ཁག་ནི།《ཚངས་སྲས་བཞད་པའི་སྒྲ་དབྱངས།》དང་། 《དགེ་ལྡན་གྲུབ་མཐའ་འཇམ་མགོན་བསྟན་པའི་མཛེས་རྒྱན།》 《ཁྱད་པར་འཕགས་བསྟོད་ཀྱི་འགྲེལ་བ་ཐུབ་དབང་དགྱེས་པའི་མཆོད་སྤྲིན།》 《སྐྱབས་རྗེ་ཨ་རོལ་རིན་པོ་ཆེའི་རྣམ་ཐར།》 《དམ་ཆོས་འདུལ་བའི་ཟིན་བྲིས་ཐུབ་བསྟན་ལྷུན་པོའི་མཛེས་རྒྱན།》 《མགར་རྩེ་དགོན་པའི་གདན་རབས་དང་བཅས་འཇམ་དབྱངས་མཐོང་གྲོལ་ཆེན་མོའི་དཀར་ཆག》 《རེབ་གོང་སྐྱབས་མགོན་བདུན་པའི་རྟོགས་བརྗོད།》《གཏེར་ལུང་དགོན་པའི་བཅའ་ཡིག》 སོགས་ཡོད། ་་་་་་
ས་ག་ཟླ་བའི་དུས་ཆེན་ཁྱད་པར་ཅན་འདིར། གངས་ཅན་ལྗོངས་སུ་ཐེག་པ་ཆེན་པོའི་གསང་སྔགས་ཀྱི་ཆོས་སྦྱིན་རྒྱ་ཆེར་སྤེལ་མཁན་ཨ་ལགས་བསེ་ཚང་གི་དགེ་བའི་བྱ་བ་ཐ་དག་ལ་རྗེས་སུ་ཡི་རང་དང་། དགེ་བའི་བྱ་བར་བར་ཆད་མེད་པ་མགོན་པོ་ཕྱག་དྲུག་སོགས་ཀྱིས་གྲོགས་མཛོད་ཅིག
དགེ་བ་འདིས་འགྲོ་བ་ཀུན་གྱི་དགེ་བའི་སྨོན་ལམ་གྲུབ་གྱུར་ཅིག རབ་གུས་བདག་ཀྱང་དེང་ནས་བླ་མེད་རྫོགས་བྱང་མ་ཐོབ་བར། རྟག་ཏུ་ཕར་ཕྱིན་དྲུག་གིས་རླབས་ཆེན་སྤྱོད་པར་རོལ་བ་དང་། བདག་གི་བདེ་དགེ་མ་ལུས་མགོན་མེད་རྣམས་ཀྱི་ལོངས་སྤྱོད་ཁོ་ནར་གཏོང་གྱུར་ཅིག
ཚངས་སྲས་བཞད་སྒྲ་ནི་སྐབས་དེའི་སྙན་ངག་གི་སློབ་དེབ་དུ་གྱུར། ༨༠་སྟོད་ལྟ་བུ་ལ་དེབ་འདི་ཐོན་ཡིན་བསམ་སོང་། དུས་འཁོར་དབང་ཆེན་གནང་ནས་བོད་ནང་གི་དད་ལྡན་ཕྲང་བ་ཅན་དེ་ཚོ་ལ་སྐོམ་པའི་ཆུ་འབུལ་བར་བཀའ་དྲིན་ཆེ། ཉེ་ལམ་བོད་ནང་ལ་ཨ་ལགས་མང་པོ་ཞིག་ནས་སྙིང་དོན་ཚད་ལྡན་གྱི་དུས་དབང་སོགས་གནང་སོང་བ་དགའ་འོས་བ་ཞིག་རེད། བཙན་བྱོལ་ནང་ལྟ་བུ་ཡིན་གོང་ས་མཆོག་མ་གཏོག་དུས་དབང་གནང་མཁན་ཐོན་མ་སོང་བསམ། ནོར་ཡང་ཡིན་སྲིད། བོད་ཕྱི་ལ་ཡོད་བླ་མ། མཁས་བ། ཉམས་ལེན་པ་གང་མང་ཡོད་པར་ཐེ་མི་ཚོམ་ལ་ཁོང་རྣམས་པས་ཡང་བཙན་བྱོལ་ནང་དུས་དབང་སོགས་མང་ཞིག་སྤེལ་བ་ཞུ། བསྐལ་བ་ཉམ་ཆག་ཏུ་འགྲོ་བའི་དུས་སྐབས་འདིར་ཕན་ཐོག་ས་རེད།
ཁོང་ནི་ཁྱད་དུ་འཕགས་པའི་སྐྱེས་བུ་ཞིག་སྟེ། སྐུ་ཚེ་གང་བསྡུས་གྲྭ་སོགས་རྟོག་གེའི་རིགམས་ལམ་ཁོ་ནར་སྦྱངས་ནས། རང་ཉིད་ཀྱི་མངའ་ཐང་སྤེལ་ཆེད་མི་མང་དབང་སྐུར་བྱེད་པ་ཙམ་མིན་པར། གསང་སྔགས་ཀྱི་བསྐྱེད་རྫོགས་དང་། གསང་སྔགས། རིགས་སྔགས། གཟུངས་སྔགས་སོགས་ལ་རྟགས་གྲངས་དུས་ཀྱི་བསྙེན་པ་ཚད་དུ་ལོང་ནས། གཞན་ལ་དབང་སྐུར་བྱེད་མཁན་ཞིག་ཡིན་པས་སྐྱབས་སུ་མཆིའོ།།
དབང་སྐུར་མང་པོ་བསྐུར་ལགས་སམ། དམ་ཉམས་མང་པོ་གསོག་ལགས་སམ། ཞེས་པ་ལྟར། བླ་སློབ་དད་པ་དམ་ཚིག་བྱུང་ན། དབང་ནི་ཕན་ཐོགས་ཆེ་ཡང་། དེ་མིན་དབང་གིས། ཕན་ལས་གནོད་ཆེ་བ་ཡང་ཡོད་དགོས་པ་དེ་ཡང་ཤེས་དགོས་འདུག
ཁྲོམ་དབང་བསྐུར་བ་དང་གསང་སྔགས་ཁྲོམ་སྒྲོག་གཉིས་ལ་ཁྱད་པར་ཅི་ཡོད། བླ་མེད་རྒྱུད་ཀྱི་དབང་དོན་མ་ཤེས་ན་དབང་མི་ཐོབ་ཞེས་རྗེ་ཙོང་ཁ་བ་ཆེན་པོས་གསུངས། མི་ཤེས་པ་ཚོས་གསང་འདུས་ཀྱི་འགྲེལ་བར་ལྟོས།