བཀྲ་ཤིས་དོན་འགྲུབ།
ཁྱོད་ཀྱི་གླུ་ངག་མཐོན་པོ་དེས།།
ང་ཡི་དྲན་པ་སྨྲེང་ཙམ་བྱས།།
བརྩེ་བ་རྒྱང་བསྐུར་མ་ཞིག་གིས།།
རྩྭ་ཐང་མིག་ཆུར་བཞུར་འདུག་སྐད།།
དཔྱིད་རླུང་རྒྱུ་བཞིན་མི་འདུག་གམ།།
རེ་སྒུག་འདི་ཡང་མི་རིང་ངམ།།
རྒྱལ་ཁམས་ལྷོད་ལ་བབས་དུས་སུ།།
ཁྱོད་རང་ཕེབས་རྒྱུ་མེད་དོན་ཅི།།
བརྩེ་ཆང་འཐུང་བ་མ་ཡིན་ཏེ།།
བར་ཐག་འདི་ཡིས་བཟི་ནས་ཡོད།།
དགུན་རླུང་འདྲ་བའི་པི་ཝང་དེ།།
བདག་གི་གམ་ནས་མ་སྦྲེང་རོགས།།
ཉི་སྲིབ་འདྲེས་མའི་མདུད་པ་དེ།།
རི་བོའི་བརྒྱབས་ཀྱི་གསང་བ་རེད།།
མི་ཚེ་ཟེར་བའི་དངོས་པོ་དེ།།
རྒྱང་བཞུད་ཆུ་མོས་ཁྱེར་འགྲོ་ཟེར།།
ཉི་འོད་གཞུང་ལ་བྱོ་བ་ཡིས།།
འཇིག་རྟེན་རློན་པ་ཤིག་ཤིག་བྱེད།།
སྨིག་རྒྱུའི་རྒྱ་མཚོ་འགུལ་བ་ལ།།
རི་དྭགས་སེམས་པ་འཁྲེང་དོན་ཅི།།
གླིང་བུ་རླུང་གིས་བུས་པ་འདྲ།།
གླུ་ཡང་མ་བཏང་རང་གྲག་ཡིན།།
ལྷིང་འཇགས་མིན་པའི་ལྷིང་འཇགས་ཀྱིས།།
ལྷིང་འཇགས་སྲུང་བ་གང་གིས་ལན།།
གཤོག་སྒྲོ་རླུང་ལ་རྩེན་ལུགས་ཀྱི།།
རྨི་ལམ་དེ་ཡང་བརླགས་ནས་ཐལ།།
སྤྲིན་གྱི་རྦ་རླབས་གཅོད་མཁས་པའི།།
རྒོད་པོའི་གྲིབ་གཟུགས་གང་དུ་ཡལ།།
མིག་ཆུ་ཟེར་བ་མི་འདུག་སྟེ།།
འཛུམ་མདངས་ཟེར་བའང་སྐྱག་རྫུན་རེད།།
སྲིད་པ་མཚོ་རུ་ལྷུང་ས་ནས།།
སྣང་བའི་ན་བུན་ཁྱོམས་ཙམ་བྱེད།།