འདོད་ཆགས་ཞེ་སྡང་སྤང་བྱ་མིན།

འབའ་སྲས།

འདོད་ཆགས་ཞེ་སྡང་སྤང་བར་བྱ་འོ་ཞེས།།
གནའ་ནས་དེ་རིང་བར་དུ་བཤད་ན་ཡང་།།
སུ་དང་གང་གིས་མ་སྤངས་རང་རྒྱུད་དུ།།
དམ་དུ་བསྲུངས་པ་འདི་ཡང་རིགས་ཤིང་འོས།།

འདོད་པ་མེད་ན་རང་དོན་ཇི་ལྟར་བསྒྲུབ།།
ཆགས་པ་སྤངས་ཚེ་རྗེས་སུ་ཅི་ཞིག་འཛིན།།
ཞེ་སྡང་བོར་ན་དགྲ་ལ་ཇི་ལྟར་རྒོལ།།
འདོད་ཆགས་ཞེ་སྡང་སྤངས་ན་ག་ལ་རིགས།།

འདོད་པ་མེད་པའི་འཁོར་བ་སུ་ཡིས་ནུས།།
ཆགས་པ་མེད་པའི་སྐྱོབ་པོ་སུ་ཞིག་མཆིས།།
སྡང་བ་མེད་པའི་དཔའ་བོ་སུ་ཞིག་ཡིན།།
འདོད་ཆགས་ཞེ་སྡང་སྲོག་གི་དབུགས་དང་འདྲ།།

འདོད་པའི་མཐར་ཐུག་བཙལ་ན་ཆགས་པ་དང་།།
ཆགས་པའི་སྙིང་བོ་བསློག་ན་འདོད་པ་སྟེ།།
ཆགས་དང་འདོད་པའི་གསེབ་ན་ཞེ་སྡང་གནས།།
འདི་གསུམ་བྲལ་ཚེ་མི་ནི་རོ་དང་མཚུངས།།

འདོད་དང་ཆགས་པ་མེད་ན་སྒྱིད་ལུག་དང་།།
ཞེ་སྡང་ཁོང་ཁྲོ་མེད་ན་ཞུམ་པ་སྟེ།།
མི་ཡི་གཤེད་མ་བརྩི་ན་འདི་དག་ལས།།
འདོད་ཆགས་ཞེ་སྡང་གསུམ་ནི་ག་ལ་ཡིན།།

འདོད་ཆགས་ཞེ་སྡང་དུག་ཏུ་སྦྱར་ན་ཡང་།།
མི་ཚེ་དོན་ལྡན་སྐྱེལ་ལ་སྦྲང་རྩི་འདྲ།།
སྦྲང་རྩི་འདི་ཡི་རོ་དང་མི་ལྡན་པ།།
མི་གཟུགས་ཙམ་ལས་བླ་སྲོག་ཆད་པ་ཉིད།།

ལྟོས་དང་འདོད་པས་བདེ་ལ་དབང་བསྒྱུར་ཅིང་།།
ཆགས་པས་གཞན་དག་རྗེས་སུ་འཛིན་པར་བྱེད།།
སྡང་བས་དགྲ་དག་བཏུལ་ཏེ་གཉེན་རྣམས་སྐྱོང་།།
འདི་ཡང་སྤང་བྱར་གསུངས་ན་སུ་ཞིག་རློམ།།

མི་ལ་རས་པ་སྡང་བས་གྲོང་སྡེ་བཅོམ།།
དགེ་འདུན་ཆོས་འཕེལ་ཆགས་པས་སྡོམ་པ་དོར།།
འབྲུག་པ་ཀུན་ལེགས་འདོད་པས་འཁོར་བ་ཉུལ།།
སྐྱེས་བུ་དམ་པ་མ་རེད་སུ་ཡིས་བརྗོད།།

སོ་ཕྲེང་ཅན་གྱིས་ཨ་མ་ཅི་ལ་བསད།།
རྗེ་ཙོང་ཁ་བས་ཨ་མ་ཅི་ལ་བརྗེད།།
དྲང་སྲོང་སྒུར་བས་ཨ་མ་ཅི་ལ་སྤྱུགས།།
ཉོན་མོངས་དབང་དུ་གྱུར་ཅེས་སུ་ཡིས་བསྒྲོགས།།

འདོད་ཆགས་ཞེ་སྡང་དབང་དུ་མ་གྱུར་བའི།།
མཁས་པ་དྲང་སྲོང་དམ་པ་རྒྱལ་བ་དག །
མེད་ན་ཅིའི་ཕྱིར་འཁོར་བར་གནས་པའི་མིས།།
འདོད་ཆགས་ཞེ་སྡང་སྤང་བྱར་གང་ལ་ཐུག །