བརྟགས་ཏེ་བཤད་ན་ཀུན་གྱིས་དེ་ཁས་ལེན་རུང་ངོ་།།

༼སྤྱིར་བཏང་བཟོ་བ་རིག་པ་དེ་དར་མིན་ནི་དེས་བསྐྲུན་པའི་བྱ་དངོས་ཡོད་ཚད་ལ་བརྟགས་ཏེ་བཤད་ན་ཀུན་གྱིས་དེ་ཁས་ལེན་རུང་ངོ་།།༽
རྔ་རྒོད
——-

དེའི་ཕྱིར། རང་རེའི་གངས་ཅན་པའི་ལྗོངས་འདིར་བཟོ་བ་རིག་གནས་འདི་ཧ་ཅང་དར་བའི་རྟགས་དང་མཚན་མ་བདེན་དཔང་སོགས་མང་བོ་ཞིག་ཁོ་བོས་མ་མཐོང་ཡང་། དུང་ཞེན་གྱིས་”ངན་པས་རང་བསྟོད་བྱེད་སྲོལ་”ཙམ་ལས་ཅུང་བརྒལ་ཏེ་རིག་གནས་ཆེ་བ་ལྔའི་ནང་གསེས་ལྷག་པར་བཟོ་བ་རིག་པའི་སྐོར་ཅིག་གླེང་ན། སྤྱིར་བཏང་བཟོ་བ་རིག་གནས་འདི་ལ་གནའ་དེང་གི་ངོས་འཛིན་ཚུལ་ཅུང་མི་འདྲ་བ་རེ་ཡོད་དེ། དཔེར་ན། གནའ་བོའི་ལུགས་སུ་ལུས་བཟོ་ཁོ་ནར་འཇོག་པ་གྲགས་ཆེ་ཞིང་། དེང་སང་ནུབ་ཕྱོགས་ཀྱི་རྩོམ་འགྲོས་དང་བསྟུན་ནས་ལུས་སེམས་ཟུང་དུ་འབྲེལ་བའི་བྱ་དངོས་ཀུན་བསྐྲུན་པའི་རིག་གནས་ཤིག་ཏུ་ངོས་འཛིན་གྱིན་ཡོད།

དེ་ཡང་ཁ་ཇེ་གསལ་དུ་བཏང་ན། གསུམ་སྟེ། ལུས་བཟོ་དང་། ངག་བཟོ་དང་། ཡིད་བཟོ་བཅས་རེད། དང་བོ་ལུས་བཟོ་རིག་པ་ནི་རིག་རྒྱུ་བསྟན་རྒྱུ་ཡོད་པའི་རྡོ་བཟོ་དང་ཤིང་བཟོ་གསེར་བཟོ་སོགས་དེ་དག་བཟོ་བའི་རིག་གནས་ཡོད་ཚད་ལ་གོ་དགོས་སྙམ།
གཉིས་པ། ངག་བཟོ་རིག་པ་ནི། མཐོང་རྒྱུ་མེད་ཀྱང་ཐོས་རྒྱུ་ཡོད་པའི་དབྱངས་ཀྱི་ངོ་བོར་གྱུར་པའི་གསུམ་རྡུང་དང་བཞི་རྡུང་དང་བདུན་རྡུང་སོགས་ཀྱིས་མཚོན།
གསུམ་པ། ཡིད་བཟོ་རིག་པ་ནི། ལྐོག་གྱུར་གྱི་རིག་གནས་ཤིག་སྟེ་དེ་ལ་མཐོང་ཐོས་མེད་མོད། འབྲས་བུ་འབྱུང་སྲིད་པའི་ས་བཅུའི་རྣམ་བཞག་དང་སྐྱེས་བུ་གསུམ་གྱི་ལམ་རིམ་སྐོར། གཞན་ཡང་འཇིག་རྟེན་གྱི་བདེ་སྡུག་གང་རུང་བསྐྲུན་ནུས་པའི་བསམ་བློའི་རིག་གནས་ཡོད་ཚད་འདིར་བསྡུ་ཆོག་མོད། གཙོ་བོར་ལུས་ལ་བརྟེན་ནས་བཟོ་དགོས་པའི་རིགས་ལ་ལུས་བཟོ་དང་གཙོ་བོར་ངག་དང་ཡིད་ལ་བརྟེན་ནས་བཟོ་དགོས་པའི་རིགས་སོ་སོར་སྦྱར་དགོས་སོ།།

འདིར་ཤེས་དགོས་པ་ཞིག་ལ། ཁོ་བོས་འདིར་བོད་ལ་ལུས་བཟོ་རིག་པ་ཞིག་གཏན་ནས་བྱུང་མྱོང་མེད་ཅེས་བསྙད་མེད་དེ། རྒྱུ་མཚན་རང་རེའི་ལོ་རྒྱུས་ཁག་ན། མི་ལ་མིའི་མཚན་ཉིད་ཚང་མ་ཚང་གི་བསྐལ་བ་ཞིག་ཏུ་ནགས་གསེབ་ནས་བོད་མིས་གོས་སུ་ཤིང་ལོ་གྱོན་པ་ནས་འགོ་བརྩམས་ཤིང་། བར་དུ་ཕོ་བྲང་ཡུམ་མཁར་བཞེངས་པའི་དངོས་བྱུང་ལོ་རྒྱུས་དང་འབྲོག་པའི་སྦྲ་ནག་འཐག་པའི་རིག་གནས་སོགས་བྱུང་མེད་ཅེས་མངོན་སུམ་ལ་བསྙོན་འདིང་མི་འོས་སོ།
འོན་ཀྱང་བོད་ལ་བཟོ་བ་རིག་གནས་དེ་དང་ལྷག་པར་ལུས་བཟོ་འདི་དར་མེད་པའི་ལུང་ཡང་དག་དང་རྒྱུ་མཚན་གང་གི་ཕྱིར་མ་དར་བའི་སྐོར་ལ་འདིར་ཅུང་དཔྱད་ན། རང་རེའི་བོད་སྡེ་བ་གཞུང་དམངས་གཉིས་སོས་དལ་དང་བག་ཕེབས་ངང་བསྡད་དེ་དམ་པའི་ཆོས་འདི་ལ་སློབ་གཉེར་བྱེད་བཞིན་པའི་སྐབས་ཏེ། ༡༩༥༩ ལོའི་ཡར་སྔོན་ཞིག་ཏུ་རང་རེའི་བོད་པའི་སྐུ་ཚབ་རྣམ་པ། བཀུར་འོས་ཚད་མའི་སྐྱེས་བུ་རྒྱ་གར་མེས་པོ་དམ་པ་གྷན་ངྷི་མཆོག་ལ་མཇལ་ཏེ་དམ་པ་ཁོང་ལ་ལེགས་སྐྱེས་སུ། ཁ་བཏགས་ཤིག་ཕུལ་བ་ན། ཁོང་གིས་བཀའ་ལན་འདི་འདྲ་ཞིག་གསུངས་ཡོད། ང་ལ་དངོས་པོ་ཆུང་རུང་བོད་པ་རང་གིས་བཟོས་པའི་ཅ་ལག་ཅིག་དགོས་ཞེས་ཐུགས་དགྱེས་བཞིན་ང་ཚོར་གདམས་ངག་ཅིག་བསྩལ་ཡོད་ཀྱང་། རིན་ཐང་བྲལ་བའི་བཀའ་སློབ་དེ་ངེད་ཚོས་ཉམས་ལེན་གྱིས་ཚོད་ལྟ་ཙམ་ཡང་མ་བགྱིས་པ་ནི་ཡིད་ཕངས་པ་ལ། དེ་མཚུངས་སུ་རྒྱ་གར་ཚང་མས་མོའི་མཚན་ལ་མ་ཡུམ་ཆེན་མོར་འབོད་པ་༼དངོས་མིང་ལ་ མཱ་ཐར་ཨ་མིར་ཊར་ནམ་ཊན་མ་ཡེ་སྒྲ་ཡེ ༼Mata Amritandamayi Devi༽ རྒྱ་གར་ཡོངས་གྲགས་ཀྱིས་མོའི་མཚན་ལ་མིང་གཞན་དུ་ཨ་མ་ཞེས་འབོད་པ་འདི་ལ་བརྟགས་ན་ཨ་མ་ཞེས་པའི་ཚིག་འདི་ཡང་རྒྱ་བོད་ཐུན་མོང་གི་བརྡ་རྙིང་ཞིག་ཡིན་པར་རྟོགས།༽ མོའི་འཁྲུངས་སྐར་ལ་རྒྱལ་ཁབ་བརྒྱ་ལྷག་གི་མི་སྣ་འཛོམས་སྐབས། ངའི་བློས་ཐུབ་ཀྱི་གྲོགས་པོ་རྨ་ཆུའི་བྱམས་པ་མཆོག་ཀྱང་བརྩེ་བའི་ཨ་མ་མཆོག་གི་འཁྲུངས་སྐར་ལ་ཕེབས་པའི་སྐལ་བ་བྱུང་བས། གྲོགས་བྱམས་པ་མ་སོང་སྔོན་དུ་ངེད་གཉིས་ཀྱིས་ནང་ཚགས་ཀྱི་གྲོས་མོལ་ཁ་བརྡ་ཞིག་བྱས། གྲོགས་བྱམས་པས་ལེགས་སྐྱེས་དངོས་པོ་གསུམ་གྲ་སྒྲིག་བྱས་འདུག

དེ་ནི། ཁ་བཏགས་དང་། འུར་རྡོ་དང་། ཏ་ལེན་གསུམ་རེད། ངས་དེའི་སྐོར་ལ་ཅིག་བཤད་ཡོད། ངས་འདི་འདྲ་ཟེར་བ་ཡིན། ཁ་བཏགས་ནི་བོད་པས་བཟོས་པ་མིན་པས། གྷན་ངྷི་ནང་ལྟར་མཁྱེན་ལྡན་མ་ཡང་ཐུགས་དགྱེས་མིན་ཐེ་ཚོམ་དང་། འུར་རྡོ་ནི་མཚོན་ཆའི་ཁོངས་སུ་གཏོགས་པས་བྱམས་བརྩེའི་ཨ་མ་ཞིག་ལ་ལེགས་སྐྱེས་སུ་མི་འོས་སྙམ་པའི་བསམ་ཚུལ་བཏོན། འོན་ཀྱང་ཁོ་བོས་ཏ་ལེན་དེ་ནི་བོད་པ་རང་གིས་བཟོས་པས། ཕྱོགས་གང་ནས་བལྟས་ན་བརྩེ་བའི་མ་མ་མཆོག་ཐུགས་དགྱེས་པའི་མཆོད་སྤྲིན་དུ་འགྱུར་སྲིད་ཅེས་ལབ་མཐར། གྲོགས་བྱམས་པ་རང་གིས་ཐག་བཅད་དེ། ཏ་ལེན་དང་ཁ་བཏགས་གཉིས་ཨ་མ་མཆོག་ལ་ཕུལ་བས། དམ་པ་མོས་ཀྱང་བོད་ཀྱི་ཏ་ལེན་ལ་ལྷག་པར་ཐུགས་དགྱེས་པའི་ལོ་རྒྱུས་ཐོས།

གང་ལྟར་བོད་ལ་བཟོ་རིག་འདི་མ་དར་བའི་རྒྱུ་རྐྱེན་དེ་ཡང་བཙན་པོའི་སྐབས་ནས་བྱུང་ཡོད་ལ། དར་ན་ཡང་བཙན་པོའི་སྐབས་སུ་ཁོངས་གཏུགས་དགོས་པ་ཞིག་ཀྱང་རེད་འདོད། དཔེར་ན། རྒྱ་བལ་གཉིས་ནས་རྫོངས་པར་གནངས་པའི་སྐུ་བརྙན་རེ་རེའི་གཟི་བརྗིད་ཀྱིས་དང་། བལ་བོ་མཁས་པའི་ལག་རྩལ་ལས་བསྐྲུན་པའི་གཙུག་ལག་ཁང་གི་འབུར་བརྐོས་ཀྱི་ཁྱད་ཆོས་སོགས་ཐུན་མོང་མ་ཡིན་པའི་ལོ་རྒྱུས་དང་བསྟོད་བསྔགས། ཕུལ་བྱུང་གི་མི་སྣ་ངོས་འཛིན་བགྱིས་ཕྱིར། འདི་ལ་བལྟས་ན། བོད་པ་རང་གི་ལག་རྩལ་བ་ཚོ་རང་བཞིན་གྱིས་བག་འཁུམ་དགོས་བྱུང་ཡོད། དེང་སང་གི་སྐད་དུ་དེ་ལ་སེམས་ཤུགས་ཆགས་ཟེར།
མདོར་དེད་ན། སྐད་ཆ་འདི་འོང་དགོས་དོན་ནི། མཐའ་ན་བོད་ཀྱི་ཚེ་སྲོག་དང་འབྲེལ་བའི་ཆོས་ཀྱི་ཅ་ལག་ཀྱང་བོད་པ་རང་གིས་བཟོ་བཏུབ་ཀྱིན་མི་འདུག་སྙམ་སོང་། རྒྱུ་མཚན། ཁོ་བོ་ཟླ་སྔོན་མའི་ནང་དུ་རྒྱ་ནག་གི་གྲོང་ཁྱེར་ཁྲིན་ཏུ་རུ་འབོད་པའི་ནང་དུ་བོད་ཁྲོམ་ཟེར་བ་ཞིག་ཡོད་པས། དེར་ཆེད་དུ་ལྟད་མོར་སོང་བ་ཡིན། ཆོས་ཀྱི་ཅ་དངོས་དག་ཉོ་མཁན་ནི་བོད་པ་ལས་རྒྱ་རིགས་སྲིད་པ་ཙམ་མོ།། ཆོས་ཀྱི་ཅ་དངོས་བཟོ་མཁན་དང་འཚོང་མཁན་ནི་རྒྱ་རིགས་ལས་བོད་པ་ཞིག་ཡོད་ཚོད་མི་འདུག
ངོ་མ་བཤད་ན། དཔུང་རྒྱན་དང་རླུང་རྟ་དང་། མ་ཎི་འཁོར་ལོ་སོགས་ཀྱི་བཟོ་གྲྭ་ཞིག་ནི་ང་ཚོས་ཀྱང་བསྐྲུན་འོས་མོད། དེ་ཡང་འཁྱོངས་ཀྱིན་མི་འདུག་པས། ང་རང་བཏང་སྙོམས་ཀྱི་ཚོར་བ་ཞིག་གིས་དེད་དེ་བཟི་བཞིན་ཡོད་པས། ཚོར་བ་དང་སྨྱུག་ཁ་སོ་སར་གྱེས་བཞིན་པས། འདིར་མཚམས་འཇོག་དགོས་བྱུང་།

ཞེས་རྔ་རྒོད་ཀྱིས་༢༠༡༤/༣/༡༢ དབྱིན་ཡུལ་ནས།།