ཐའེ་ཝན་དུ༼སངས་རྒྱས་བཀྲོངས་པ༽ཞེས་པའི་དཔེ་དེབ་ཆོས་སྡེ་འདྲ་མིན་ཆིག་ཁྲི་སུམ་སྟོང་ལྷག་ལ་བཀྲམས་པ།

བོད་བསྒྱུར་བ་ལྡོང་སྲས།

རྒྱ་ནག་བཙན་བྱོལ་རྩོམ་པ་པོ་ཡན་ཧོང་པེན་དང་བོད་རྒྱ་སྐད་གཉིས་སྙན་ངག་པ་གནམ་ལོ་ཡག་གཉིས་ཀྱི་མཉམ་རུབ་བརྩམས་ཆོས་སམ། ༼སངས་རྒྱས་བཀྲོངས་པ། སློབ་དཔོན་ཆེན་མོ་པཎ་ཆེན་སྐུ་ཕྲེང་བཅུ་བ་གྲོངས་རྐྱེན་ངོ་མ༽ཞེས་པའི་དཔེ་དེབ་ན་ནིང་པར་བསྐྲུན་གྱིས་ཚོང་རར་བཤམས་སྐབས། གེགས་རྐྱེན་ཁ་ཤས་ཤིག་ལ་འཕྲད་ཡོད་ནའང་། ཚགས་པར་སོགས་ཀྱིས་རྗེས་འདེད་གསར་འགོད་གནང་བར་བརྟེན་ཏེ་མཚོ་ངོགས་ཕར་ཚུར་གཉིས་ཀྱི་ཀློག་པ་པོའི་ཁྲོད་དུ་དོ་སྣང་མི་ཆུང་བ་ཞིག་བྱུང་འདུག

སྐབས་དེ་ཤེད་དུ་ཀློག་པ་པོ་དག་གིས་བསྟུད་མར་རྩོམ་ཡིག་སྤེལ་ནས་རྒྱབ་བསྐྱོར་གནང་བས། ཐེ་ཝན་གྱི་ས་གནས་མ་འདྲ་བ་ཁག་ཏུ་རྩོམ་པ་པོ་གདན་ཞུས་ཀྱིས་གཏམ་བཤད་སྤེལ་བ་དང་། ཀློག་པ་པོའི་ཚོགས་འདུར་ཞུགས་ནས་བསམ་བློ་བརྗེ་རེས་རྒྱུན་མ་ཆད་པ་གནང་མྱོང་འདུག

ཡང་སྒོས་ཀློག་པ་པོ་ཞིག་གིས་དཔེ་དེབ་དེ་བཀླགས་རྗེས། ཡ་ང་བའི་དོན་རྐྱེན་དེར་ཧང་སངས་ཡོད་པར་མ་ཟད། གནད་དོན་འདི་ནི་ནང་བསྟན་རྗེས་འཇུག་པ་ཚོ་ཕར་ཞོག ཆོས་ལུགས་མི་གཅིག་པའི་ཚོགས་སྡེའམ། ཆོས་ལུགས་གཏན་ནས་ཁས་མི་ལེན་མཁན་དག་གིས་ཀྱང་དོ་སྣང་སྤྲད་དེ་དཔེ་དེབ་འདི་ངེས་པར་དུ་ཀློག་དགོས་ཀྱི་འདུག ཐའེ་ཝན་དུ་སྲིད་དོན་ཐད་རྩོད་རྙོག་བསྟུད་མུར་བྱུང་གིན་ནའང་། ཆོས་ལུགས་ཐད་ནས་རང་དབང་མཉམ་གནས་ཐུབ་ཡོད་ཅིང་། ཆོས་དད་མང་ཚོགས་ཀྱིས་རང་ཉིད་ཀྱི་ཁམས་དང་མོས་པ་ལྟར་ཆོས་སྒོ་མ་འདྲ་བར་ཞུགས་ཀྱིན་པས། འདི་ནི་སྲིད་གཞུང་ངམ། ཕྱི་འོངས་སྟོབས་ཤུགས་ཀྱིས་ཆོས་ལུགས་ལ་ཐེ་གཏོགས་བྱེད་ཀྱི་མེད་པའི་རྟགས་མཚན་གཙོ་བོ་ཞིག་ཡིན།
དེ་ལྟ་ནའང་། དེབ་འདིའི་ནང་གསལ་བ་ལྟར། བོད་ནང་ཞི་བའི་གྲོས་མཐུན་ཟེེར་བར་མིང་རྟགས་བཀོད་རྗེས། ཏཱ་ལའི་བླ་མ་བཙན་བྱོལ་གནང་ཡོད་ཅིང་། ཤུལ་དུ་བཞུགས་ནས་བོད་བརྒྱུད་ནང་བསྟན་སླར་གསོ་དང་བོད་ཀྱི་ཤེས་རིག་བསྐྱར་དར་ལ་གཞོལ་བའི་པཎ་ཆེན་སྐུ་ཕྲེང་བཅུ་བ་རྒྱ་དམར་གཞུང་གིས་ལྐོག་གསོད་བྱས་ཡོད་སྟབས། དེང་སྐབས་བོད་ནང་བྱུང་བཞིན་པའི་དྲག་གནོན་དང་མེར་བསྲེག་ངོ་རྒོལ་ཡང་གནད་དོན་འདི་དག་གི་རྒྱུན་མཐུད་ཡིན། དེ་བས། འདི་ནི་ཐེ་ཝན་གཞུང་དང་རྒྱ་ནག་སྐམ་སའི་གཞུང་གཉིས་མ་འདྲ་ས་ཆེས་ཤོས་དེའང་ཡིན།

ཁོང་གི་རེ་བར་ཐའེ་ཝན་གྱི་མི་རྣམས་ཀྱིས་དཔེ་དེབ་འདི་ཀློག་པ་བརྒྱུད་ནས་ཐའེ་ཝན་གྱི་ཆོས་དད་རང་དབང་གི་རིན་ཐང་རྟོགས་འོས་པར་མ་ཟད། རྒྱ་ནག་སྐམ་ས་ན་ཆོས་ལུགས་ལ་ཇི་ལྟར་བྱེད་ཀྱིན་པ་གསལ་བོར་མཐོང་འོས། དེ་ལྟར་མ་འོངས་པར་ཁ་གཏད་སྐབས། ལེགས་ཉེས་ཀྱི་བླང་དོར་འབྱེད་ཐུབ་ཀྱི་རེད། དེ་བས། ཁོང་གིས་དེབ་ཆིག་ཁྲི་གསུམ་སྟོང་བླུས་ནས་ཐའེ་ཝན་གྱི་ཆོས་ལུགས་འདྲ་མིན་གྱི་བསྟི་གནས་ཁག་ལ་ཧོར་ཟླ་དང་པོའི་ཚེས་བཅོ་ལྔའི་ཉིན་ཡོངས་སུ་བཏང་ཚར་ཡོད་འདུག
དེ་མཚུངས་སུ་ཁོང་གིས་དཔེ་དེབ་འདིའི་ནང་དོན་ཆོས་བྱེད་པ་ཚོས་མཐའ་འཁོར་གྱི་མི་རྣམས་ལ་དྲང་བཤད་གནང་བར་སྨོན་ལམ་ཡང་བཏབ་འདུག

དཔེ་བསྐྲུན་ཁང་གིས་བརྗོད་དོན། ཀློག་པ་པོ་འདིར་མིང་སྨྲས་ནས་སྐད་གྲགས་ཆགས་འདུན་མེད་ཅིང་། གཙོ་བོ་ཁོང་གིས་ལྷག་བསམ་ནི་བརྗོད་དུ་མེད་པ་ཞིག་རེད་ལ། ཁོང་གིས་མཛད་པ་འདིས་ཐའེ་ཝན་གླིང་ཕྲན་སྟེང་གི་ཆོས་དད་ཡོད་མེད་ཀུན་ལ་ཤུགས་རྐྱེན་སྔ་ན་མེད་པ་ཞིག་བསྐྲུན་ངེས་རེད། དེ་བས། དེབ་ཆིག་ཁྲི་གསུམ་སྟོང་ཧོར་ཟླ་དང་པོའི་ཚེས་བཅོ་ལྔའི་ཡར་སྔོན་བཏང་ཚར་ཡོད།
ད་ལྟ་ཁྱོན་བསྡོམས་དེབ་ཉིས་ཁྲི་ལྔ་སྟོང་ལྷག་བཙོང་ཚར་ཡོད་པས། དཔེ་དེབ་འདི་བཞིན་བོད་འབྲེལ་དེབ་རིགས་ཁྲོད་ཀྱི་བྲིན་རྒྱུགས་ཆེ་ཤོས་སུ་གྱུར་ཡོད་འདུག

ཨེ་ཤ་ཡ་དང་ཞི་བདེ་རྒྱ་མཚོའི་སྲིད་དོན་དང་མཚན་ཉིད་རིག་གཞུང་དཔེ་བསྐྲུན་ཁང་ནས།

༢༠༡༤ལོའི་ཟླ ༢ ཚེས ༡༧ཉིན།