སྨན་བླ་སྐྱབས་ཀྱི་ཁ་ཤགས་དེ་ལ་མང་ཚོགས་ཀྱིས་གོ་བ་མ་ལོན་པ།

རྔ་རྒོད།

འདི་ནི་བསམ་བློ་བ་ཁོང་གིས་ལོ་མང་སྔོན་ནས་བརྩམས་པའི་སེམས་ཆུང་སྡེ་བ་ཞེས་པའི་གོ་དོན་དང་ལྷག་པར་དུ་ཁ་ཤགས་འདིའི་ནང་གི་མི་སྣ་གཙོ་བོ་གསལ་ལེ་རྒྱལ་ཞེས་པ་འདི་མི་བཟང་བོ་ཞིག་གམ་ཡང་ན་ངན་པ་ཞིག་ཏུ་བརྩི་རྒྱུ་མ་མཐུན་པའི་དབང་གིས་ཁོ་བོས་འདིར་དེའི་སྐོར་ཆེད་དུ་གླེང་བ་ཡིན་ནོ།། སྤྱིར་ན་བརྩམས་ཆོས་ཤིག་ཡིན་པས་དེ་ལ་ཀློག་མཁན་དང་ཉན་མཁན་གྱི་ངོས་ནས་ཕར་གོ་བ་ལེན་སྟངས་ཤིག་དང་། བརྗོད་བྱ་བརྩམས་ཆོས་རང་ངོས་ནས་ཚུར་གོ་བ་ལེན་པའི་སྲོལ་གཉིས་ཡོད།
དེའི་ཕྱིར། དང་བོར། ཉན་ཀློག་མཁན་མང་ཚོགས་ཀྱི་བསམ་བློ་ལ་བལྟས་ཏེ་བསྙད་ན། ཁོང་ཚོས་གསལ་ལེ་རྒྱལ་ཞེས་པའི་མི་འདི་ནི་ངོ་ཚ་མེད་ཀྱང་ལས་རྒྱུ་འབྲས་མི་བརྩི་མཁན། མདོར་དེད་ན་མགོ་སེར་ལ་མགོ་སྐོར་གཏོང་མཁན་ཞིག་ཡིན་པར་མ་ཟད། གཞན་བོད་ཀྱི་ཞབས་འདྲེན་པ་ལྟ་བུའི་མི་ངན་པ་དགུ་འཛོམས་ཤིག་ལ་གསལ་ལེ་རྒྱལ་ཞེས་བསྙད་དོ།། སྐད་ཆ་འདིའི་ཕུགས་ན་ནང་དོན་འདི་འདྲ་ཞིག་འདུག གལ་སྲིད་རང་རིགས་ཤིག་གིས་རང་ཉིད་ཁོ་ནའི་ཆེད་དུ་བོད་ཀྱི་སྲིད་འབྱོར་རིག་གསུམ་གང་རུང་ཞིག་རྒྱབ་རྟེན་བགྱིས་ཏེ་གཞན་པ་བསླུ་བའི་གང་ཟག་ཅིག་ཏུ་ངོས་འཛིན་བྱེད་ཀྱིན་ཡོད། འོན་ཀྱང་གང་ཟག་འདིའི་རིགས་ལ་སྐྱ་སེར་གྱི་དབྱེ་བ་དང་གསར་རྙིང་གི་ཁྱད་པར་ཞིག་གཏན་ནས་མེད་ལ་ལྷག་པར་རོང་འབྲོག་གི་ཁྱད་པར་དེ་ལས་ཀྱང་མེད་པ་ནི་རང་གཞན་ཚང་མས་ཤེས་གསལ་ལྟར་རོ།།

ཕ་རོལ་པོ་དེས་གཞན་པ་ལ་མགོ་སྐོར་གཏོང་བའི་ཐབས་ལ་གོང་ཞུས་ལྟར་རིགས་གསུམ་ཡོད། ཆོས་ལ་བརྟེན་ནས་གཞན་མགོ་སྐོར་བ་དང་སྲིད་ལ་བརྟེན་ནས་གཞན་པ་བསླུ་བ་དང་དཔལ་འབྱོར་ལ་བརྟེན་ཏེ་གཞན་པའི་མགོ་སྐོར་བ་གསུམ་མོ།། དམིགས་བསལ་མང་ཚོགས་ཀྱིས་འདོད་པའི་གསལ་ལེ་རྒྱལ་ཞེས་པ་དེས་ཀྱང་ཉི་ཚེ་བའི་བརྩེ་དུང་ཙམ་མ་ཡིན་པར་ཁོང་གི་རྒྱབ་ལྗོངས་ནའང་བོད་ཀྱི་ད་ལྟའི་སྲིད་འབྱོར་རིག་གསུམ་གང་ཞིག་བཟུང་ཡོད་པ་རེད། འོན་ཀྱང་ལྡོག་ཕྱོགས་ནས་བསྙད་ན་ཕྱི་རྒྱལ་བ་ཚོས་ཀྱང་བོད་པའི་སྲིད་འབྱོར་རིག་གསུམ་གང་རུང་བཙོང་སྟེ་རང་གཞན་གཉིས་ཀ་བསླུས་པའི་དོན་དངོས་ཀྱི་ལོ་རྒྱུས་ཀྱང་བྱུང་ཡོད།

འོན་ཏེ་མང་ཉུང་བསྡུར་ན་ཉུང་ཉུང་རེད། ང་ཚོར་ཁ་ཤོས་ཁ་ཤོ་ལ་མཛུབ་སྟོན་ལྟར། གསལ་ལེ་རྒྱལ་ལ་གཤེ་གཤེ་གཏོང་མཁན་མང་བོ་ཡོད། འོན་ཀྱང་གཤེ་གཤེ་གཏོང་མཁན་ནང་ནས་མི་ལྷག་བསམ་ཅན་ཁ་ཤས་ལ་རྒྱུ་མཚན་ཡོད་དེ། ཁོང་ཚོས་དབྱེ་འབྱེད་ཕྱོགས་རིས་ཀྱི་སྐད་ཆ་ཙམ་མ་ཡིན་པར། འདྲ་མཉམ་རྒྱུ་འབྲས་ཀྱི་སྐད་ཆ་ཞིག་གསུང་གིན་ཡོད། དེ་ནི་ཕྱི་གླིང་བ་གླེན་པ་སྐོར་ཞིག་གིས་ནང་བསྟན་ཆོས་ལུགས་འདི་ལ་དགའ་ཞིང་དུང་བའི་ངང་ལྷག་པར་༧གོང་ས་མཆོག་གི་བཀའ་སློབ་ལ་ཡིད་ཆེས་ཀྱི་དང་བ་འདྲེན་མཁན་ཚོ་ལ་ཇ་ལན་ཆུས་མི་འཇལ་བའི་རེ་སྐུལ་དང་མི་གཤིས་རང་བཞིན་ལ་བརྩི་བཀུར་ཞུས་པ་ཞིག་ཀྱང་རེད། གཞན་མང་བོས་ཁ་ནས་ཅི་བཤད་ལ་རྒྱུ་མཚན་ཡོད་མེད་ཅི་རིགས་ཡིན། དེའི་ཕྱིར། གསལ་ལེ་རྒྱལ་གྱི་མིང་གི་རྣམ་གྲངས་ལ། མི་སྐྱ་གསལ་ལེ་རྒྱལ་དང་། གྲྭ་བ་གསལ་ལེ་རྒྱལ་དང་། བཙུན་མ་གསལ་ལེ་རྒྱལ་དང་། བླ་མ་གསལ་ལེ་རྒྱལ་དང་། དབྱིན་ཇི་རྐུབ་ལྡག་མཁན་དང་། མགོ་སྐོར་མཁན་དང་། ལྟས་ངན་དང་། ཞབས་འདྲེན་པ་ལ་སོགས་རྗོད་ཀྱིན་མཆིས།

གཉིས་པ། སྐབས་སུ་བབ་པའི་དོན་སྙིང་ངོ་མ་དེ་བརྩམས་ཆོས་སེམས་ཆུང་སྡེ་བའི་མགོ་མཇུག་བར་གསུམ་པོ་དེ་ལ་བརྟགས་ཏེ། ནང་དོན་ངོ་མ་འདིར་བཙུར་འོང་ན། གསལ་ལེ་རྒྱལ་ཞེས་པ་རྒྱུ་འབྲས་མི་བརྩི་མཁན་དང་། ཡང་ན་བོད་པའི་ཞབས་འདྲེན་ཞིག་ཡིན་པའི་སྒྲུབ་བྱེད་ཀྱི་གཏམ་བརྗོད་ཅིག་མེད། གཞན་བརྗོད་བྱ་ཁ་ཤགས་འདི་ལ་ནང་དོན་གསུམ་ཡོད།
གཅིག་ནི། ང་ཚོའི་བསམ་བློ་གུ་དོག་ཡིན་པས། གུ་ཡངས་ཀྱི་བསམ་གཞིག་དགོས་རབས་སྐོར་རེད།
གཉིས་པ། ཕྱིའི་དེང་རབས་རིག་གནས་ཀྱིས་བོད་ཀྱི་རིག་གནས་ལ་ཁ་བསྐང་དགོས་པའི་བསླབ་བྱ་བཏོན་པ་དེ་རེད།
གསུམ་པ། ཡོངས་ཁྱབ་ཀྱི་བརྩེ་དུང་དང་འདྲ་མཉམ་རང་དབང་སོགས་གལ་ཆེ་རབས་སྐོར་རེད།
དེའི་ཕྱིར། འདི་གསུམ་པོ་ལས་འཕྲོས་ཏེ་སྐབས་འདིའི་ཁ་ཤགས་ཀྱི་དཔེ་མཚོན་གཙོ་བོར་གསལ་ལེ་རྒྱལ་ཁོང་འཛིན་དགོས་པའི་རྒྱུ་མཚན་གྱི་གནད་ཀྱང་འདི་ལ་ཐུག་ཡོད། དེའི་ཕྱིར། བཞད་གར་འདིའི་ནང་གི་གསལ་ལེ་རྒྱལ་གྱི་ཚབ་མཚོན་མང་བོ་མེད་དེ། དཔེར་ན། བཀའ་དྲིན་ཅན་དགེ་བའི་གཉེན་ཆེན་མོ་དགེ་བཤེས་ཐུབ་བསྟན་སྦྱིན་པ་མཆོག་དང་། དེང་རབས་ཀྱི་བསམ་བློ་བ་ཆེན་པོ་སྐུ་ཞབས་པདྨ་འབུམ་ལགས་དང་། ཕྱག་རྗེས་བསྟན་རྒྱུ་ཡོད་པའི་ནོར་གླིང་བཀའ་ཟུར་སྐལ་བཟང་ཡེ་ཤེས་ཚང་དང་། ལྷག་བསམ་གྱིས་ཕྱུག་པའི་ཨ་མྱེ་རྨ་ཆེན་ཚང་གི་བཀྲ་ཤིས་ཚེ་རིང་སོགས་རེད།

ད་དུང་དམིགས་བསལ། ཁ་ཤགས་འདིའི་གཏིང་གི་གོ་བ་ལ་བསྙབས་ཏེ་དཔེ་མཚོན་ཁ་ཤས་བརྗོད་ན། དཔལ་དོན་འགྲུབ་རྒྱལ་དང་། དབྱིན་བོད་ཤན་སྦྱར་རྩོམ་མཁན་ཕྱག་རྗེས་ཅན་བཀྲ་ཤིས་ཚེ་རིང་མཆོག་དང་། མཁས་དབང་དགེ་འདུན་ཆོས་འཕེལ་དང་། མཁས་མཆོག་ཐོན་མི་སམ་བྷོ་ཊ་སོགས་ཀྱང་གསལ་ལེ་རྒྱལ་གྱི་དཔེ་དང་སྦྱར་འོས་སྙམ་མོ།།

མཇུག་གི་གསལ་བཤད། སྐལ་བ་དང་ལྡན་པ་ཞིག་ལ། བསམ་བློ་བ་སྐུ་ཞབས་སྨན་བླ་སྐྱབས་མཆོག་དེང་སང་དངོས་སུ་བཞུགས་ཡོད་པས། ཁོ་བོས་འདིར་དམ་པ་ཁོང་གིས་ཅི་གསུང་གི་ལན་གསལ་བོ་ཞིག་མ་རྙེད་པར་དུ། རང་གི་གཏན་ཚིགས་དེ་ལ་རང་གིས་ཡིད་ཆེས་བྱ་འོས་སོ།།

ཞེས་དབྱིན་ཡུལ་ནས་རྔ་རྒོད་ཀྱིས་༢༠༡༤/༡ /༡༧ ལ་བྲིས།