ཆོས་ཀྱི་ཉི་མས་མཚམས་སྦྱོར་བྱས།
སྨྲ་བ་ངག་གི་དབང་ཕྱུག་འཇམ་པའི་དབྱངས། །དབྱངས་ཅན་ལྷ་མོའི་གཙུག་ལག་འདོད་འཇོའི་དཔལ། །དཔལ་ལྡན་ཚངས་པ་སྡེ་བཞིའི་བང་མཛོད་འཛིན། །འཛིན་མའི་མངའ་བདག་རྣམས་ཀྱིས་ཤིས་པ་སྩོལ། །ཆོས་དང་སྲིད་ཀྱི་ཚིག་དོན་ཟབ་བརླིང་སྒྲ། །སྙན་ངག་པི་ཝང་རྒྱུད་ཀྱིས་གླུར་བླངས་ན། །རྣམ་དཔྱོད་ལང་ཚོ་རྒྱས་པའི་ཤེས་ལྡན་རྣར། །འཇེབས་ཀྱང་ཕལ་ཆེར་ཐོས་འཛིན་ཚེར་མ་ཉལ། །དེ་ཕྱིར་མཆོག་དམན་ཀུན་གྱིས་ལེགས་རྟོགས་པའི། །འབོལ་རྩོམ་ཚིགས་སུ་བཅད་པའི་མུ་ཐི་ལ། །ཆིང་གིས་གནམ་གྱི་རིགས་ལས་མི་བདག་མགུལ། །མཛེས་བྱེད་དོ་ཤལ་འཕྲེང་བས་རྒྱན་དུ་སྤུད། །དེང་དུས་རྒྱ་གར་རྒྱ་ནག་ཧོར་བོད་སོགས། །སྔོན་བྱུང་ཡ་རབས་ངང་ཚུལ་ལུགས་གཉིས་ཁྲིམས། །ཆེར་ནུབ་ངན་སྤྱོད་ངོ་སོར་ཁྱེར་དུས་འདིར། །ལེགས་པར་བཤད་ཀྱང་ཙཱུ་ཏའི་རྐང་གཉིས་བཞིན། །བྱང་བསྟན་ཕུག་པར་རྟ་ལྗང་ཅན་གྱི་ཟེར། །མི་འཇུག་དངོས་པོའི་གཤིས་ལ་བཅོས་མེད་ཀྱང༌། །ཕྱོགས་གཞན་བུག་པར་ཤར་བའི་སྣང་བ་ཡིས། །འཐིབས་བུའི་སྨག་རུམ་སེལ་བ་འགའ་འབྱུང་སྙམ། །ལྷ་ཆོས་ལྟ་ཞོག་མི་ཆོས་བྱ་བཞག་ཀྱང༌། །ལམ་དུ་རྒྱུག་པ་བསོད་ནམས་ལ་རག་པས། །དཀོན་ཅོག་མཆོད་དང་ངན་སློང་སྦྱིན་གཏོང་སོགས། །ལེགས་བྱས་སྤེལ་བའི་ཚོགས་ཆེན་གསོག་པ་གནད། །མངོན་ཤེས་མེད་ཕྱིར་གྲོས་དང་འདུན་མ་ཀུན། །ཐོག་ཏུ་འཁེལ་དཀའ་ཡུལ་དུས་གནས་སྐབས་དང༌། །དགྲ་གཉེན་བར་མར་བརྟགས་ནས་འཕྲལ་ཚོད་འཕྲལ། །བླངས་ཏེ་འཇུག་པ་ཕོ་ཚོད་ཡང་རྩེ་ཡིན། །སེམས་ཀྱི་འཆར་སྒོ་འབྱུང་ལ་མཐའ་མེད་ཀྱང༌། །གྲེ་བར་བསྐྱིལ་ནས་མི་སྨྲ་བ་དེ་མཁས། །སྙིང་ནའི་དགྲ་ལ་འཕྲལ་དུ་མི་ཁྲོ་བར། །བཅོས་མ་འཛུམ་གྱིས་བསུ་བ་གྲུང་པོ་ཡིན། །
རང་བློར་མི་འབབ་གཏམ་ཚིག་ཅི་བྱུང་ཡང༌། །རྫུ་བཟང་ཁོག་ནས་མི་མངོན་ལེན་པ་ཟབ། །ཟས་ནོར་འདོད་ཀྱང་ངག་མཛངས་གཡོ་ཐབས་ཀྱིས། །མི་མངོན་ཤུགས་ཀྱིས་ལེན་པ་སྤྱང་པོ་ཡིན། །ངན་ལ་མི་འཁང་སླད་ནས་འགྱུར་བ་སྲིད། །བཟང་ལ་མི་བསྟོད་ཅི་འགྱུར་ཤེས་པར་དཀའ། །གང་གི་ཐོག་ཏུ་འབབ་པའི་གནད་མེད་པར། །གཞན་ཟེར་འབྲངས་པའི་ཞལ་ལྕི་གཅད་མི་རུང༌། །བྱ་བ་གང་ཡང་འགྲུབ་པའི་གདེང་མེད་པར། །ཁ་འདོན་མི་སྐྱེན་ཁོང་དུ་སྦེད་པ་གནད། །བུ་སོགས་གཉེན་ལ་བྱམས་དྲག་ངན་སྲོལ་ཡོང༌། །དགྲ་ལ་ཧ་ཅང་སྡང་ན་རང་ལ་མཚུངས། །གཉེན་ལ་རལ་སྤྱོད་ཆེས་ན་ནམ་ཕུགས་འཁོན། །བྲན་ལ་འབར་ཤ་ཆེས་ན་འཁོར་མཁན་དཀོན། །འཁོར་ལ་ཆེས་ཆེར་རྩུབ་ན་སྙིང་སྐྲན་འཇུག །གྲོགས་ལ་རྔན་ཆེན་མང་ན་ཞེ་བཞག་ཡོང༌། །དཔེ་ངན་གཞན་ལ་བཏོད་ན་རང་ལ་འཁོར། །ཁ་དགྲ་མི་གསག་གནག་པ་སེམས་ལ་ཞོག །གཉེན་ལ་མི་བསྟོད་བྱམས་པ་ཡིད་ལ་འཛིན། །ངན་བློ་ཡོད་ཀྱང་ཕྱི་རུ་འཇམ་སྐད་སྙན། །གདོང་ཐུག་དྲག་པོས་དགྲ་བོ་ཐུལ་དཀའ་བས། །སྣ་ཚོགས་ཐབས་ཀྱི་འདུན་མ་རླབས་ཀྱིས་ཆོད། །
གཏམ་མགོ་འཛུམ་བསུ་མཇུག་མ་དལ་གྱིས་ལོངས། །དགོས་དོན་ཕིགས་སྨྲ་འཚམ་ཞིང་མཛེས་པར་བརྗོད། །སེར་སྣ་ཙམ་གྱིས་ཟས་ནོར་གསོག་དཀའ་བས། །བརྒྱ་བཤིག་སྟོང་འགུགས་སྤྱི་བྱམས་བློ་རྒྱ་བསྐྱེད། །བུ་ལ་ཉེས་སྐྱོན་བཤད་ན་རྗེས་སུ་ཕན། །རང་ལ་ཆེ་བསྟོད་སྤངས་ན་ནམ་ཕུགས་བྲིན། །རང་འདོད་ཞེ་བཞག་སྤྱི་གཙིགས་ཕྱིར་བྱས་བཙུན། །བུད་མེད་གྲོས་དབང་མ་གཏོང་རང་ཐག་ཆོད། །རྨོངས་པར་གྲོས་དང་ངན་ལ་དབང་མ་བསྐུར། །གྲོས་ལ་མི་དབང་མི་ལ་གྲོས་མ་འཆད། །དཀྲུག་ཤིང་བྱེད་མཁན་གྲོས་ཀྱི་ཁྱུར་མ་འཇུག །མཁས་དང་རྒན་རབས་ཉམས་ཆེན་ཤ་ཚར་དྲིས། །གྲོས་མཐིལ་རེ་ཞིག་མ་བཤད་བསྒྱུར་དུ་བཏུབ། །གྲོས་ལ་བསམ་གཞིགས་མང་བཏང་ཧང་བུག་ཆུང༌། །མི་དཔེ་རང་ལ་བཀབ་ནས་ཞིབ་མོར་དཔྱོད། །ཕྲན་བུའི་ཁེ་ལ་བལྟས་ནས་ཉེན་བསྡམ་དང༌། །གཏམ་ངན་མི་བསམ་འདོད་ལ་སྲེད་པས་ཕུང༌། །ཡ་རབས་དུས་བསྟུན་དམའ་སར་འབེབས་མི་རུང༌། །མ་རབས་ཆེ་སར་བཏོན་ན་གཉའ་བ་རེངས། །མཁས་པ་རས་བོར་ཡོན་ཏན་ལྡན་པ་དཀོན། །མི་མང་དགྲ་རུ་མི་ལེན་གཉེན་དུ་འགུགས། །མི་འགྲུབ་ཁས་ལེན་མ་ཆེ་དེར་མི་འཇུག །གཅེས་ནོར་འདོད་ཅན་མི་ལ་མི་སྟོན་གསང༌། །ཚོད་མེད་ལ་གྲོས་ངན་སེམས་ཅན་ལ་བློ། །མི་གཏོད་སྙིང་གཏམ་ཁ་མང་ཅན་ལ་གསང༌། །སྣ་ཐུང་ཀུ་རེ་མི་ཐུབ་ལ་བསྡམ་སྤོང༌། །མི་བདེན་པ་ལ་ཡུས་ཀྱིས་ཤགས་མ་གདབ། །
མི་ཉན་གྲོས་འདེབས་མེད་ལ་ཁྱེར་ཤོག་དང༌། །མི་ཡོང་ལས་འཆོལ་མི་ཤེས་ཀོ་ལོང་དོར། །དྲིན་འདྲེན་མངས་ན་དགའ་བའི་གདུང་སེམས་འཆོར། །གྱོང་ཆེན་མངས་ན་གཉེན་ཡང་ཞེན་པ་ལྡོག །གཞན་སྡུག་སྙིང་ཚིམ་མ་བྱེད་རང་ལ་འཁོར། །རང་སྐྱིད་མ་ངོམ་གཞན་གྱིས་དེ་ལན་འཇལ། །གྲོས་ཉེས་འགྱོད་ཐལ་མི་བྱ་ཕྱིན་ཆད་གཟབ། །དགོས་མེད་ཕོག་ཐུག་གཏམ་གྱིས་དགྲ་བོ་འགུགས། །ཕ་རོལ་བསམ་པ་རྟོགས་ཕྱིར་ཡུན་དུ་སེམས། །རང་མགོ་ཐོན་པའི་འཕྲུལ་ཅན་གྲུང་པོ་ཡིན། །ཆེན་པོར་སླེབས་ཚེ་ཁེངས་དང་ང་རྒྱལ་སྨད། །ཀུན་གྱིས་ཁུར་དུས་འོག་འཛུལ་འཇུག་བདེ་བྱེད། །འགྲུབ་ཚད་མི་བྱེད་ཚོད་འཛིན་ཁེ་ཉེན་བསམ། །དཔོན་དུ་གྱུར་ཚེ་འདོད་ཆུང་སྤྱི་གཙིགས་ངོས། །སྒེར་དུ་ལྟོས་རྣམས་མི་མངོན་ཤུགས་ཀྱིས་སྐྱོང༌། །ཤར་ཚད་ལག་ཏུ་མི་ལེན་བླངས་ཕྱིན་ཆད། །ཞི་དྲག་ཐབས་ཀྱིས་བྱ་བ་མཐའ་རུ་ཐོན། །ཟེར་ཚད་བདེན་པར་མི་འཛིན་དཔྱད་དར་གྱིས། །ཟས་ཞིམ་མིར་བྱིན་ནོར་བཟང་རང་གིས་ཆོངས། །མི་སྙིང་གཅོད་པའི་གཏམ་དེ་ལྕེ་ནས་བཟུང༌། །སྡང་དགྲའི་ནོར་ལ་མ་བལྟ་བརྗེད་མ་གཞུག །མ་ཞིམ་སྣ་ཉེར་ཞིམ་ལ་ཧབ་ཤ་དང༌། །མ་མགུར་འཕྲལ་དུ་མཆུ་མུག་མིག་ལྡོག་སྤོང༌། །དོན་མེད་ལས་ལ་བརྩོན་འགྲུས་རང་ངལ་ཡིན། །གསོད་བརྡུང་ངེས་པར་དགོས་ལ་སྙིང་མ་ཆུང༌། །འབབས་ངེས་ཁྲལ་དང་ལག་འདོན་ཡང་མི་འཇུག །དགོས་མེད་འབངས་རྣམས་མནར་བའི་ལས་མི་བྱེད། །
འཕྲད་མ་ཐག་པའི་མི་ལ་ངོ་ཤེས་དང༌། །འདྲིས་མ་ཐག་པའི་མི་ལ་བློ་གཏོད་དང༌། །སེམས་ལ་བབས་འཕྲལ་དགའ་བའི་འཛུམ་སྟོན་དང༌། །མ་བབས་འཕྲལ་བཞིན་སྡུད་རྣམས་ཀླད་ཆུང་ཡིན། །དྲག་པོ་དྲག་ཁྱེར་མ་མཁས་ནམ་ཕུགས་ཕུང༌། །མཛའ་བ་མཛའ་ཁྱེར་མ་མཁས་ནམ་ཕུགས་འཁོན། །མཁས་པ་མཁས་ཁྱེར་མ་མཁས་ནམ་ཕུགས་བླུན། །བཙུན་པ་བཙུན་ཁྱེར་མ་མཁས་ནམ་ཕུགས་འཆལ། །ཆེ་བ་ཆེ་ཁྱེར་མ་མཁས་ནམ་ཕུགས་དམའ། །གཏམ་ལ་རྒྱུ་མཚན་ཡོད་པས་གཞན་ཁ་མྱུལ། །བག་ཕེབས་ངག་འཇམ་སྙན་པོས་བློ་བྲིད་ནས། །གཞན་མཚང་ཐབས་ཀྱིས་བྲུས་ནས་ཆམ་ལ་འབེབས། །མ་བཤད་ཕས་ཀྱང་མི་གོ་ལྷོད་པར་སྨྲ། །མ་འབར་བུས་ཀྱང་མི་ཉན་རན་པར་རྒོལ། །མ་བསླབ་སུས་ཀྱང་མི་གོ་ལེགས་པར་བསླབ། །མ་བྱིན་གཉེན་ཡང་མི་འཁོར་བག་རེ་སྟེར། །ཡང་ཡང་སྦྱིན་སར་རྟག་འགྲོ་བྱམས་པ་ཟད། །དྲིན་ཅན་མི་དེ་སུན་དུ་མ་འཇུག་མཛངས། །གཉའ་བར་འཆོར་བའི་དགྲ་བོ་རེངས་མ་འཇུག །སུས་ཕན་མི་ཤེས་ཉམས་ཆུང་རས་མ་བོར། །གང་བཅོལ་གོ་ཆོད་བྱུང་བ་བྲན་གྱི་རབ། །རྫུན་དང་གཡོ་སྒྱུ་མི་ཤེས་ནམ་ཕུགས་བྲིན། །ཁ་ཉུང་ལག་པ་གཙང་བ་ཡོན་ཏན་མཆོག །བྱས་ཡུས་ཆེས་ན་ལས་ལ་ངོ་སོ་ཆུང༌། །ཁ་གདངས་སྦར་བསྡམས་མི་དང་འབྲེལ་བྱེད་ཕུང༌། །མཐོན་པོ་ང་རྒྱལ་ཅན་གྱི་མཚང་མ་འབྲུ། །བསམ་ངན་ཕྱི་ཐག་ཐུང་དང་གྲོས་མ་བྱེད། །ཞེ་སྡང་ཁ་འཇམ་ཅན་ལ་རང་ཟོན་ཆུག །དོན་མེད་གཏམ་ལ་ཡང་ཡང་སྐྱོར་བཟློས་སྤོང༌། །ཕྱུག་པོ་ནོར་ལ་སྤྱོད་ཤེས་སླད་ནས་འཕེལ། །མི་ལྟོགས་བསྲིས་ཞིབ་བྱས་ན་རང་སྡུག་ཆུང༌། །དབུལ་ཡང་སྡུག་ཐེག་བྱས་ནས་ཕོ་བཟོ་བྱེད། །ནོར་ཡོད་མེད་པོར་མ་བརྫུ་ཀུན་གྱིས་ཤེས། །ངན་པ་ཆེ་སྐད་མ་འདོན་ཁྲེལ་གད་ཡོང༌། །གདོང་པར་ཁྲག་མེད་གཉེན་ལ་རེ་བ་ལས། །ངོ་ཚ་ཁྲེལ་ཡོད་ཤེས་པའི་དགྲ་བོ་དགའ། །བློ་གཏད་མི་ཐུབ་སྤུན་དང་བཟའ་ཚང་ལས། །གསང་ཐུབ་བློ་ལྡན་གྲོགས་དང་གྲོང་པ་བཟང༌། །ཡོན་ཏན་མེད་པའི་ཚོགས་ཀྱི་སློབ་དཔོན་ལས། །ཤེས་རབ་ལྡན་པའི་གྲྭ་སློབ་བྱས་ན་འཚེངས། །
མི་ཉན་ཁ་འདུས་མང་པོའི་དཔོན་པོ་ལས། །ཡ་རབས་བཟང་སྤྱོད་ལྡན་པའི་གཡོག་པོ་སྐྱིད། །ལང་ཤོར་རྐུན་པོ་མི་ཡི་ཁྱུར་མི་ཚུད། །བློ་གྲོས་གཟབ་དང་མགོ་འཐོམས་ནོར་ས་ཡོད། །ཀླད་ཆུང་མི་དང་ཕོ་གྲུང་ནོར་ས་ཡོད། །མ་ནུས་ཇོ་བཟང་རྫུ་ཆེན་ནོར་ས་ཡོད། །བློ་ཤེད་ཅན་དང་དོ་ཐུང་ནོར་ས་ཡོད། །རང་བཞིན་བཟང་དང་འདོ་མེད་ནོར་ས་ཡོད། །དྲང་པོའི་མི་དང་གླེན་པ་ནོར་ས་ཡོད། །ཚུལ་འཆོས་ཅན་དང་བཙུན་པ་ནོར་ས་ཡོད། །ཚེ་བློས་ཐོངས་དང་ཟོག་པོ་ནོར་ས་ཡོད། །བརྫུ་བག་ཅན་དང་མཁས་པ་ནོར་ས་ཡོད། །དེ་ལྟར་ཚེ་འདིའི་འདུན་མ་བསྒྲུབ་པ་ལ། །བླང་དང་དོར་བྱའི་སྐྱོན་ཡོན་ཤེས་བྱས་ནས། །དཔའ་མཛངས་རྟུལ་ཕོད་སྣ་ཚོགས་གཡོ་འཕྲུལ་གྱིས། །རང་ཉིད་རྒྱལ་བའི་སྒྱུ་ཐབས་ལྷུར་ལེན་གཅེས། །འོན་ཏེ་ཚངས་པ་བརྒྱ་བྱིན་འཁོར་ལོས་སྒྱུར། །ལྷ་མིའི་དཔལ་འབྱོར་ཀུན་ལ་ལོངས་སྤྱད་མཐར། །སླར་ཡང་ལྕགས་བསྲེགས་ས་གཞིར་དམྱལ་བའི་མེ། །འབར་བའི་བུད་ཤིང་བྱེད་སྲིད་ཡིད་བརྟན་ཅི། །འཇིག་རྟེན་གསལ་བར་བྱེད་པའི་ཉི་ཟླ་ཡང༌། །སྔོན་བསགས་བཟང་པོའི་འཕེན་པ་རྫོགས་པའི་མཐར། །རང་གི་ལག་པ་བརྐྱང་བསྐུམ་མི་མཐོང་བའི། །མུན་པའི་མལ་དུ་ཉལ་འབྱུང་མཆི་མ་དཀུ། །པདྨའི་འདབ་འདྲའི་གོས་ཀྱི་རེག་བྱས་ཀྱང༌། །ལུས་ལ་རྩུབ་ཉམས་བྱེད་པའི་སྨིན་ལེགས་མ། །བདག་པོའི་རོ་དང་ལྷན་ཅིག་སྲེག་ཁང་དུ། །རབ་འབར་མེ་ཡིས་བསྲེག་པ་སུ་ཡིས་བཟོད། །ནོར་བུའི་གླིང་དུ་བགྲོད་པའི་ཚོང་ཟོག་གིས། །རྣམ་ཐོས་བུ་ལ་འགྲན་པའི་དེད་དཔོན་ཡང༌། །འཇུར་འགེགས་གནས་སུ་སྐྱེས་ནས་ཟས་སྐོམ་གྱིས། །བཀྲེས་ཤིང་སྐོམ་པའི་ངང་ཚུལ་ཀྱེ་མ་ཧུད། །དགྲ་འདུལ་གཉེན་སྐྱོང་མངའ་ཐང་ལོངས་སྤྱོད་སོགས། །བླ་ནས་བླར་འཕེལ་ཕོ་རྒོད་གྲུང་པོ་ཡི། །གྲངས་སུ་ཚུད་ཀྱང་ཚེ་ནི་ནམ་མཁའི་གློག །རྨི་ལམ་ཙམ་གྱི་བདེ་བས་ཅི་ཞིག་བྱ། །བསམ་གྱིན་ནམ་ཡང་རྫུན་ཟོག་མི་གསུང་བ། །འོ་སྐོལ་རྣམ་འདྲེན་ཟས་གཙང་སྲས་པོ་དེས། །འཁོར་བར་གནས་ཕྱིན་སྡུག་བསྔལ་རང་བཞིན་དུ། །བསྟན་ཚུལ་བསམ་ན་སྙིང་ཡང་དུམ་བུར་འགས། །བཟོད་དཀའི་སྡུག་བསྔལ་འདི་ལས་སླན་ཆད་དུ། །མི་ལྡོག་ཐར་བའི་ཁང་པར་འཇུག་པའི་ཐབས། །དཀར་ནག་ལས་འབྲས་བསམས་ནས་བླང་དོར་ངོས། །བསླབ་པ་རྣམ་གསུམ་ཉམས་ལེན་གྲུང་པོ་ཡིན། །སངས་རྒྱས་སྲས་བཅས་མངོན་སུམ་མཐོང་དཀའ་ཡང༌། །དེ་དག་ཞལ་སྐྱིན་གསུང་དང་ཐུགས་རྟེན་ལ། །མེ་ཏོག་བདུག་སྤོས་མར་མེ་ལྷ་བཤོས་སྒྲ། །འཕན་གདུགས་ཕྱེ་ཕུར་ལ་སོགས་མཆོད་སྤྲིན་དབུལ། །བསླབ་གསུམ་ལྡན་པའི་དགེ་འདུན་བསྙེན་བཀུར་ནས། །ཐུབ་གསུང་སྒྲོག་སོགས་ཆོས་སྤྱོད་རྣམ་བཅུའི་ལས། །རྣམ་གསུམ་འཁོར་ལོའི་བྱ་བ་ཆེར་སྤེལ་བའི། །བསོད་ནམས་ཚོགས་ཆེན་གསོག་པ་གནད་དུ་ཆེ། །དབུལ་ཕོངས་སྐྱེ་རྒུ་ཀུན་ལ་སྦྱིན་པ་གཏོང༌། །ཉམ་ཐག་ནད་པར་གོས་ཟས་སྨན་གྱིས་བསྐྱང༌། །འཆི་ངེས་དུད་འགྲོ་གསོད་འོས་ནག་ཆེན་མི། །སྲོག་བླུ་མི་འཇིགས་སྐྱབས་ཀྱི་སྦྱིན་པ་བྱ། །ལྷ་མིའི་རྟེན་བཟང་ཐོབ་པའི་རྒྱུའི་གཙོ་བོ། །བྱ་སླ་ཚེགས་ཆུང་ཡན་ལག་བརྒྱད་པའི་ཁྲིམས། །ཉ་སྟོང་བརྒྱད་གསུམ་རྣམས་ལ་ལེགས་བླངས་ནས། །དམ་བཅའ་སྡོམ་པ་ཚུལ་བཞིན་སྲུང་བར་མཛོད། །ཚིག་རྩུབ་མཚོན་ལ་ཅི་མི་སྙམ་པའི་གོ །བཙན་པོར་གྱོན་ན་རང་རྒྱུད་མི་འཁྲུགས་པས། །རྣམ་པར་དགེ་བའི་སྲོག་རྩ་མི་གཅོད་ཅིང༌། །སྔར་བསགས་འཕེལ་བའི་ཐབས་ཚུལ་འདི་ལ་བརྩོན། །
སྒྱིད་ལུག་ལེ་ལོ་བཏང་སྙོམས་དབང་སོང་ན། །ལེགས་པའི་ཡོན་ཏན་གང་ཡང་འགྲུབ་དཀའ་བས། །དལ་མེད་བརྩོན་པ་ཆེན་པོས་འབད་བྱས་ན། །ཆེས་ཆེར་དཀའ་བའི་ལས་ཀྱང་ལྷུན་གྱིས་འགྲུབ། །དེ་བཞིན་གཤེགས་སྐུ་ལ་སོགས་དམིགས་རྟེན་ལ། །མ་ཡེངས་གཞོལ་བའི་ཏིང་འཛིན་བརྟན་པོའི་རྒྱུན། །ཆད་མེད་བསྟར་ན་ཉོན་མོངས་མངོན་གྱུར་མགོ །ཟིལ་གནོན་ལུས་སེམས་ལས་རུང་བསམ་གཏན་རྙེད། །ཆོས་རྣམས་སོ་སོའི་གདགས་གཞིའི་སྟེང་ཙམ་ན། །རྟོག་པས་བཏགས་པ་ལས་གཞལ་དོན་དམ་དུ། །མ་རྙེད་རྟེན་ཅིང་འབྲེལ་འབྱུང་དབུ་མའི་ལམ། །ཤེས་རབ་མཚོན་གྱིས་འཁོར་བའི་རྩ་བ་གཅོད། །ཡིད་སྲུབ་སྡེ་བཅས་མཐར་བྱེད་གསང་བའི་བདག །བླ་མགོན་དབྱེར་མེད་མྱུར་མཛད་ཕྱག་དྲུག་པ། །འདི་ཕྱི་བར་དོའི་སྐྱབས་ཡིན་རྟག་ཏུ་བསྟེན། །དྲན་པས་འཆི་བདག་དཔུང་འཇོམས་ཚེ་དཔག་མེད། །དེ་ཡང་གནམ་དང་ས་ཡི་དཀྱིལ་འཁོར་ལ། །དབང་ཕྱུག་མི་ཡི་རྒྱལ་པོ་ཆེན་པོ་རྣམས། །རང་ཉིད་གཅིག་པུར་དགེ་སྦྱོར་ལ་གཞོལ་ལས། །བསྟན་འགྲོའི་བདེ་ཐབས་བསྒྲུབ་པ་མཆོག་ཏུ་བསྔགས། །
ཉི་འོག་མི་ཡི་བདག་པོ་ཆེ་རྣམས་དང༌། །ཕན་ཚུན་མཉེས་གཤིན་བྱམས་པའི་སེམས་བཟང་པོས། །རང་རང་མངའ་རིས་རྣམས་ཀྱིས་ཆོག་ཤེས་ཤིང༌། །འབངས་ཀུན་བདེ་ཕྱིར་བཟང་པོའི་གཞུང་བཟང་སྤེལ། །སངས་རྒྱས་ཐུགས་རྗེ་ཕྱོགས་བྲལ་འགྲོ་བ་ལ། །འཇུག་ཕྱིར་ཡང་དག་ཆོས་ལ་རིས་མེད་ཀྱང༌། །གནའ་བོའི་དུས་ནས་དར་བའི་ཡབ་མེས་ཀྱི། །ཆོས་ལུགས་གྲུབ་པའི་མཐའ་དེ་ཤིན་ཏུ་ཤིས། །བྱང་ཕྱོགས་ཆེན་པོ་ཧོར་གྱི་རྒྱལ་ཁམས་སུ། །ཨལ་ཐན་ཆོས་ཀྱི་རྒྱལ་པོའི་ཏི་ཤི་རིར། །བསོད་ནམས་མཚན་ལྡན་ཏཱ་ལའི་བླ་མ་གང༌། །བྱོན་ནས་དེང་བར་ཞྭ་སེར་ཅན་གྱིས་ཁྱབ། །རྒྱུ་མཚན་དེས་ན་འཇམ་མགོན་ཙོང་ཁ་པའི། །བསྟན་པ་རིན་ཆེན་བཀུར་ན་ཕྱག་དྲུག་མགོན། །ལས་གཤིན་འདོད་ཁམས་མ་སོགས་ཆོས་སྲུང་གིས། །རྟག་ཏུ་སྲུང་ཞིང་མངའ་ཐང་བདེ་སྐྱིད་འཕེལ། །ལུགས་གཉིས་ཟུང་འབྲེལ་ཡབ་མེས་རྒྱལ་པོའི་ཁྲི། །མནན་ནས་ས་ཆེན་འཇམ་དར་ཡུག་གཅིག་དང༌། །ཕ་རོལ་ཕྱིན་དྲུག་སྤྱོད་པ་ཉེར་སྤྱད་པས། །འདི་ཕྱི་གཏན་གྱི་འདུན་མ་ལྷུན་གྱིས་གྲུབ། །དེ་ལྟར་ཆོས་སྲིད་བླང་དོར་རང་ཉིད་ལ། །མི་ལྡན་ནེ་ཙོའི་བརྗོད་པ་ལྟ་བུའི་ཚིག །སྨྲ་ལ་མཁས་རྣམས་ཁྲེལ་ཡང་སྟོན་ཟླ་ལྟར། །ཆེས་དཀའ་སེམས་བཟང་བ་ལ་ཉེས་པ་མེད། །འདིས་མཚོན་དགེ་བས་གནམ་བསྐོས་མི་ཡི་བདག །བཙུན་མོ་སྲས་བཅས་བློན་འབངས་རབ་བརྟན་ཅིང༌། །མངའ་ཐང་དཔལ་འབྱོར་རྣམ་མང་ཐོས་སྲས་དང༌། །མཚུངས་པའི་སྐལ་བ་བཟང་པོར་འགྲུབ་པར་ཤོག།།
དེ་ལྟར་ལུགས་གཉིས་དང་འབྲེལ་བའི་བསླབ་བྱའི་རིམ་པ་མུ་ཐི་ལའི་འཕྲེང་བ་འདི་ནི་ཚེ་རིང་གནམ་གྱི་ཤེ་མོང་གིས་སྟོབས་ཀྱི་དབང་ཕྱུག་ཆིང་གིས་རིགས་ལས་ཁལ་ཁ་ཐུ་ཤེ་ཡེ་ཐུ་རྡོ་རྗེ་རྒྱལ་པོས་རི་ཁ་བ་ཅན་གྱི་ལྗོངས་སུ་དཀོན་མཆོག་གསུམ་ལ་བླ་མར་བཟུང་སྟེ་མཆོད་པར་བྱོན་པའི་ཚེ་རྩོམས་ཤིག་པར་སྲུང་གིས་བསྐུལ་བ་ལྟར་ཟ་ཧོར་གྱི་རིགས་ལས་སྡེ་སྣོད་གསུམ་པ་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེས་ཕོ་བྲང་ཆེན་པོ་པོ་ཏཱ་ལར་སྦྱར་བའི་ཡི་གེ་པ་ནི་འཕྱོངས་རྒྱས་བཀྲས་རབ་ཕུན་ཚོགས་དབང་པོའོ།། །།
སེམས་ཀྱི་འཆར་སྒོ་འབྱུང་ལ་མཐའ་མེད་ཀྱང༌། །
གྲེ་བར་བསྐྱིལ་ནས་མི་སྨྲ་བ་དེ་མཁས། །
འདི་ང་རང་ལ་གདམས་འདུག
ཤར་ཚད་ལག་ཏུ་མི་ལེན་བླངས་ཕྱིན་ཆད། །
ཞི་དྲག་ཐབས་ཀྱིས་བྱ་བ་མཐའ་རུ་ཐོན། །
ཟེར་ཚད་བདེན་པར་མི་འཛིན་དཔྱད་དར་གྱིས། །
ཟས་ཞིམ་མིར་བྱིན་ནོར་བཟང་རང་གིས་ཆོངས། །
འདི་ཆུང་དུས་ནས་བློ་ལ་ཡོད་པའི་ཚིགས་རྐང་བཞི་པོ་དེ་རེད།
དེང་སང་ལེགས་བཤད་ལེགས་བཤད་དུ་གོ་མཁན་ཉུང། འདི་ཚང་མ་འདིར་དྲངས་ཀྱང་ཀློག་ནི་མེད། དེ་ལས་གནད་འགག་ཅན་གཅིག་གཉིས་རེ་དྲངས་ཏེ་དོགས་འདྲི་དང་མཐའ་དཔྱོད་གནང་ཐུབ་ན་ལེགས་སོ།
འདིར་དྲངས་ཏེ་སློབ་སྦྱོང་བྱོས་ཟེར་བ་ཡིན་ནམ། ཡང་ན་དགག་པ་རྒྱོབ་ཟེར་བ་ཡིན་ནམ། ཞེས་ཀྱང་དོགས་འདྲི་ཞིག་མི་ཞུ་ཀ་མེད་དུ་གྱུར།
རྒན་ལགས་ཀྱིས་དགོངས་འཆར་གཅིག་དང་དོགས་འདྲི་གཉིས་གནང་འདུག རང་རང་གི་འདོད་པ་བཞིན་དེ་གསུམ་ཀ་ཡོང་སྲིད་པ་ཡིན་དུས་དོན་ལ་གོ་བ་བླང་ནས་ཚིག་གཅིག་ཡིན་ན་དཔྱད་པའི་གཞིར་སོང་ན་འགྲིགས་འདུག་པས་དེ་གསུམ་ག་རེ་གནང་ན་ཡག་པོ་འདུག་ཞུ།།
སྔར་གྱི་དུས་སུ།
འཕྲད་མ་ཐག་པའི་མི་ལ་ངོ་ཤེས་དང༌། །
འདྲིས་མ་ཐག་པའི་མི་ལ་བློ་གཏོད་དང༌། །
སེམས་ལ་བབས་འཕྲལ་དགའ་བའི་འཛུམ་སྟོན་དང༌། །
མ་བབས་འཕྲལ་བཞིན་སྡུད་རྣམས་ཀླད་ཆུང་ཡིན། །
དེང་གི་དུས་སུ།
འཕྲད་མ་ཐག་པའི་མི་ལ་ངོ་ཤེས་ཟོས། །
འདྲིས་མ་ཐག་པའི་མི་ལ་རེ་སེམས་གཏོད། །
སེམས་ལ་བབས་འཕྲལ་དགའ་བའི་འཛུམ་སྟོན་གྱིས། །
མ་བབས་རང་སོར་བཞག་ན་མཁས་པ་རེད། །
དེ་ཡག་པོ་གསུངས་འདུག
བསླབ་བྱ་འདི་ལས་ཆོས་སྲིད་ཟུང་འབྲེལ་གྱི་གོ་བ་ཅུང་རེ་ལོན་ན་གཞི་ནས་ལེགས་བཤད་ཀྱི་གོ་བ་ཅུང་ལོན་པར་བརྩི་འོས།
བསླབ་བྱ་འདི་ལས། ཐད་ཀར་ད་ལྟའི་བོད་པ་ཚོའི་དཔལ་འབྱོར་དང་འབྲེལ་ཡོད་ཀྱི་ཚིག་གཅིག་འཁོལ་འཕྱུང་བྱེད་པ་ལ། “།སེར་སྣ་ཙམ་གྱིས་ཟས་ནོར་གསོག་དཀའ་བས། །བརྒྱ་བཤིག་སྟོང་འགུགས་སྤྱི་བྱམས་བློ་རྒྱ་བསྐྱེད།”ཅེས་པ་ནི་ཤིན་དུ་ནས་གནད་འགག་ཆེའོ། འདི་ལ་རྒྱ་དང་ཕྱི་རྒྱལ་བ་རྣམས་འཇོན་ཐང་ཆེ། བོད་པ་དང་རྒྱ་གར་བ་རྣམས། ག་ཚོད་ཆུང་ཚགས་གསོག་འཕྲི་བྱས་ནས། རྒྱ་ཆེན་པོའི་ཁེ་ཕན་མིག་ལ་མི་ཤར་མཁན་ལྟ་བུ་རེད།
བརྒྱ་ཤིག་སྟོང་འགུགས་ཟེར་བ་འདི་ཇི་ལྟར་མི་སྙན་ནམ། རྒྱ་མི་རིགས་ཚོས་འདི་ཤེས་ཚོད། དཔེར་ན། རྒྱ་མིས་ཚོང་རྒྱག་སྐབས། ཁེ་བཟང་ཆུང་ཆུང་ཞིག་ལས་མི་ལེན་པར། ཉོ་མཁན་སྟོང་འགུགས་པའི་སྲིད་འཇུས་དེ་རེད། དེས་ད་ལྟ་རྒྱའི་ཚོང་ཟོག་འཛམ་གླིང་ཀུན་གྱི་ཁྱིམ་ནང་ལ་འདྲེན་པར་བྱེད། ངོ་མ་རེད།
ཚིག་འདི་གཅིག་པོར་བསམས་ཚེ། རྒྱལ་དབང་ལྔ་པ་ནི་ངོ་མ་དཔལ་འབྱོར་གྱི་འགྲོ་སྟངས་ལེགས་པར་ཤེས་མཁན་ཞིག་རེད་འདུག
ཡག་པོ་གསུང་འདུག ད་དུང་འགྲེལ་བཛད་རེ་གནང་ན་ཕན་ཐོག་འདུག
དཔེ་ཡག་པོ་འགྲེལ་འདུག ད་དུང་ཡང་གནད་ཡོད་གྱི་ཚིག་རེ་ལ་འགྲེལ་བཤད་གནང་ཐུབ་པའི་རེ་བ་ཡོད། ཁོང་གི་མཛད་ཕྲིན་སྐྱོང་སྟངས་དེ་ཚོ་ཧ་ལས་པ་འདྲ་བོ་རེད་འདུག
སྨྲ་བ་ངག་གི་དབང་ཕྱུག་འཇམ་པའི་དབྱངས། །དབྱངས་ཅན་ལྷ་མོའི་གཙུག་ལག་འདོད་འཇོའི་དཔལ། །དཔལ་ལྡན་ཚངས་པ་སྡེ་བཞིའི་བང་མཛོད་འཛིན། །འཛིན་མའི་མངའ་བདག་རྣམས་ཀྱིས་ཤིས་པ་སྩོལ། སྔ་མོ་ངའི་ཕ་རྒན་ཡིག་གེ་ཀློག་ལ་ཤིན་ཏུ་མཁས་ཀྱང་བྲིས་ཡག་པོ་ཞིག་འབྲི་མི་ཤེས་སྐབས་རེ་འདིའི་ཚིག་དེ་འབྲི་ཡོང་གི་ཡོད། ངས་མང་པོ་མཐོང་མྱོང་བ་དང་བློ་ལ་ཟིན་འདུག དོན་ག་རེ་ཡིན་ན་བསམ་ཀྱང་ཅི་གོ།
སྔར་གྱི་དུས་སུ།
ཉི་འོག་མི་ཡི་བདག་པོ་ཆེ་རྣམས་དང༌། །
ཕན་ཚུན་མཉེས་གཤིན་བྱམས་པའི་སེམས་བཟང་པོས། །
རང་རང་མངའ་རིས་རྣམས་ཀྱིས་ཆོག་ཤེས་ཤིང༌། །
འབངས་ཀུན་བདེ་ཕྱིར་བཟང་པོའི་གཞུང་བཟང་སྤེལ། །
དིང་གི་དུས་སུ།
ཉི་འོག་མི་ཡི་འགོ་འཁྲིད་ཆེ་རྣམས་དང༌། །
ཕན་ཚུན་མཉེས་གཤིན་བྱམས་པའི་སེམས་བཟང་པོས། །
རང་རང་ས་གནས་རྣམས་ཀྱིས་ཆོག་ཤེས་ཤིང༌། །
མི་སེར་བདེ་ཕྱིར་བཟང་པོའི་གཞུང་བཟང་སྤེལ། །