འཇིག་རྟེན་སྟེང་གི་སྤྲང་ཤོས་ང་རང་ཡིན།

དོལ་སྨྱོན།

སྟེང་དུ་བཀུར་བའི་ལྷ་ཞིག་ང་ལ་མེད།།
འོག་ཏུ་གནོན་པའི་འདྲེ་ཞིག་ང་ལ་མེད།།
བར་དུ་མཆོད་པའི་བཙན་ཞིག་ང་ལ་མེད།།
འཇིག་རྟེན་སྟེང་གི་སྤྲང་ཤོས་ང་རང་ཡིན།།

སྡོམ་པ་དམ་ཚིག་ཟེར་བའི་ལྕགས་ཐག་མེད།།
ལས་དང་རྒྱུ་འབྲས་ཟེར་བའི་དོགས་ཟོན་མེད།།
སྐྱེ་བ་སྔ་ཕྱི་ཟེར་བའི་འདང་རྒྱག་མེད།།
འཇིག་རྟེན་སྟེང་གི་སྤྲང་ཤོས་ང་རང་ཡིན།།

སྤྱི་ཚོགས་རྙིང་པའི་བག་ཆགས་བདག་ལ་མེད།།
སྤྱི་ཚོགས་གསར་བའི་འགྲན་རྩོད་བདག་ལ་མེད།།
ཡོད་ཚད་འཐོབ་བྱར་འདོད་པའི་སྟོང་བསམ་མེད།།
འཇིག་རྟེན་སྟེང་གི་སྤྲང་ཤོས་ང་རང་ཡིན།།

བླ་སྤྲུལ་མཁན་པོ་དག་ལ་དད་པ་མེད།།
སྤྲང་པོ་སློང་མོ་དག་ལ་སྙིང་རྙིང་རྗེ་མེད།།
ཤེས་བྱ་ཡོན་ཏན་ཞེས་པར་དོ་སྣང་མེད།།
འཇིག་རྟེན་སྟེང་གི་སྤྲང་ཤོས་ང་རང་ཡིན།།

སྒོར་མོ་འཁྲི་འབུམ་མང་པོའི་འཛིན་བྱང་མེད།།
འཕྲུལ་ཆས་འདྲ་མིན་མང་པོའི་ཡོ་བྱད་མེད།།
ཕྱི་ནང་གསང་བའི་མཐུན་རྐྱེན་སྣ་དགུ་མེད།།
འཇིག་རྟེན་སྟེང་གི་སྤྲང་ཤོས་ང་རང་ཡིན།།

ཕྱི་ནས་གཞན་སེམས་འཕྲོག་པའི་ཕོ་སྒོ་མེད།།
ནང་ནས་གཞན་ཡིད་འགུག་པའི་ཡོན་ཏན་མེད།།
གསང་བར་རང་གཞན་ཕན་པའི་བྱ་བ་མེད།།
འཇིག་རྟེན་སྟེང་གི་སྤྲང་ཤོས་ང་རང་ཡིན།།

འཁྲེལ་དང་ངོ་ཚ་ཞེས་པའི་ཕྱི་ཤུན་མེད།།
སྒམ་པོ་རླིང་པོ་ཞེས་པའི་སྤྱོད་ཚུལ་མེད།།
གཏམ་དང་མི་ཁ་ཞེས་པར་འཛེམ་ཟོན་མེད།།
འཇིག་རྟེན་སྟེང་གི་སྤྲང་ཤོས་ང་རང་ཡིན།།

མི་རུ་སྐྱེས་པའི་སྤོབས་པ་བདག་ལ་མེད།།
དོན་ཞིག་བསྒྲུབས་པའི་ཚོར་བ་བདག་ལ་མེད།།
ལས་ཞིག་འཇོན་པའི་འདུ་ཤེས་བདག་ལ་མེད།།
འཇིག་རྟེན་སྟེང་གི་སྤྲང་ཤོས་ང་རང་ཡིན།།

17.12.2013