བོད་བརྒྱུད་ནང་བསྟན་ནུབ་ཕྱོགས་སུ་དར་བའི་གློག་བརྙན་«ལྕགས་བྱ་འཕུར་དུས་ན་»ཞེས་པའི་ལོ་རྒྱུས་སམ་གློག་བརྙན་དེ་ལ་བལྟས་ཏེ་དཔྱད་པ།

རྔ་རྒོད།

གློག་བརྙན་འདིའི་ནང་དོན་གཙོ་བོ་ནི། རང་རེའི་ནང་བསྟན་འདི་ནུབ་ཕྱོགས་སུ་དར་སྤེལ་མཛད་མཁན་གྱི་སྐྱེས་ཆེན་རྣམས་དང་། དམ་པ་གང་གི་བཀའ་དྲིན་དང་ལོ་རྒྱུས་དག་སྙིང་བསྡུས་བྱས་ཏེ། ནུབ་ཕྱོགས་བོད་ཀྱི་ཆོས་འབྱུང་དེ་གློག་བརྙན་གྱི་ཚུལ་དུ་བསྟན་པ་དེའོ།། འོན་ཀྱང་ལོ་རྒྱུས་འདིའི་ནང་དོན་གྱི་ཆ་ནས་ཅུང་ནོར་འདུག་བསམས་བྱུང་། རྒྱུ་མཚན། གློག་བརྙན་འདིའི་དོན་སྙིང་ངོ་མ་དང་འབྲེལ་བ། ཀུན་ལ་ཡོངས་སུ་གྲགས་པའི་༧གོང་ས་ཐམས་ཅད་མཁྱེན་པ་མཆོག་དང་དྲུང་བ་རིན་པོ་ཆེ་སོགས་གཙོ་བོར་མ་བགྱིས་པར། བཙུན་མའི་དགེ་བཤེས་ཀྱི་སྲོལ་གཏོད་མཁན། མཛངས་མ་བཙུན་མ་དགེ་བཤེས་ཀུན་བཟང་དབང་མོ་མཆོག་དང་རྫོང་གསར་སྤྲུལ་སྐུ། གཞན་ཕྱི་རྒྱལ་མི་སྣ་ཁ་ཤས་ནི་ཟློས་གར་འདིའི་ནང་གལ་ཆེན་དང་གཙོ་བོར་བཟུང་བས་ཡིན།

དེའི་ཕྱིར། ངས་སླར་ཡང་འདིར་བསྐྱར་ཟློས་ཀྱི་ཚུལ་དུ་མ་བཤད་ན། ཁ་ཤས་ཀྱིས་ངས་གོང་དུ་ཅི་བཤད་པ་དེའི་དོན་མི་རྟོགས་པས། འདིར་ཆེད་དུ་རང་གཞན་ཚང་མར་ཆོས་ཅན་མཐུན་སྣང་བ་འགའ་ཞིག་དཔེ་མཚོན་བགྱིས་ཏེ་ང་ཚོའི་ཐག་ཉེ་ས་ཞིག་ནས་ཅིག་བྲིས་ན་ཁ་ཇེ་གསལ་ལ་འགྲོ་སྲིད་པ་རེད།
ཡིན་ཙང་། འདིར་ལྟོས། གལ་སྲིད་དགེ་ལུགས་ཆོས་འབྱུང་དེ་གློག་བརྙན་ནམ་ཟློས་གར་དུ་འཁྲབ་དགོས་བྱུང་ན་༧ རྗེ་ཡབ་སྲས་རྣམ་པ་གསུམ་གཙོ་བོར་བྱ་དགོས་པ་མ་གཏོགས། མཁས་དབང་དགེ་འདུན་ཆོས་འཕེལ་ལྟ་བུ་སོགས་ཀྱིས་དགེ་ལུགས་ཆོས་འབྱུང་གི་ནང་དོན་གཙོ་བོར་བསྟན་དགོས་ཟེར་ན་ནི་གཏན་ཚིགས་དང་འགལ་ཞིང་། དོན་དངོས་ཀྱི་ལོ་རྒྱུས་ལའང་བརྩི་མཐོང་མ་བཞག་པ་ལྟ་བུ་ཀུན་ལ་སྣང་སྲིད།

གཞན་ཡང་། རྒྱ་གར་ནང་བའི་བསྟན་པ་རིན་པོ་ཆེ་འདི་བོད་ལ་དར་བའི་ལོ་རྒྱུས་ཀྱི་མི་སྣ་གཙོ་བོ་ཁག་ཅིག་མཚོན་ཏེ་འཆད་ན། མཛངས་བློན ༧ ཐོན་མི་སམ་བྷོ་ཊ། ཡང་ན་༧ སློབ་དཔོན་པདྨ་འབྱུང་གནས། གཞན་པ་༧ རྒྱལ་སྲས་ཆེན་པོ་ཞི་བ་འཚོ་སོགས་གཙོ་བོར་འཛིན་ལོས་དགོས། དེའི་ཕྱིར། དཔལ་ལྡན་ཟླ་བ་གྲགས་པའི་ཞལ་ནས ” འཇིག་རྟེན་གྲགས་པའི་ཀུན་རྫོབ་མ་བརླག་ཅིག” ཟེར་བའི་ནང་དོན་ཡང་འདི་འདྲ་ལ་སྦྱོར་དགོས་སྙམ།

སྤྱིར་ན་རང་རེའི་ལོ་རྒྱུས་ཁག་ཏུ་རྒྱལ་ཁབ་གཞན་ནས། རང་གི་རིག་གནས་དེ་གཞན་གྱི་ཆེད་དུ་ཕར་དར་སྤེལ་གནང་མཁན་དང་། ཡང་ན་གཞན་གྱི་རིག་གནས་དེ་རང་གི་མི་རིགས་ཀྱི་དོན་དུ་ཚུར་ནང་འདྲེན་མཛད་མཁན་གྱི་རླབས་ཆེན་ཚོ་ལ། དོན་སྙིང་ལྡན་པའི་མཚན་སྙན་དམིགས་བསལ་བ་རེ་གསོལ་སྲོལ་ཡོད་དེ། དཔེར་ན། ཐོན་མི་སམ་བྷོ་ཊ་ཞེས་པའི་མཚན་ཟུར་གྱི་གཞན་སྐད་བྷོ་ཊ་བོད་ཡིག་ཏུ་བོད་ཡང་དག་པ་ཞེས་གསོལ་བ་ལྟ་བུ། གཞན་༧གོང་ས་རྒྱལ་དབང་སྐུ་འཕྲེང་ཞིག་ཀྱང་སོག་ཡུལ་ལ་ཕེབས་ཏེ་༧གོང་ས་ཏཱ་ལའི་བླ་མ་ཞེས་པའི་མཚན་གྱི་ཟུར་ན་གཞན་སྐད་དུ་ཏཱ་ལ་ཞེས་པ་དེ་རང་སྐད་དུ་བསྒྱུར་ན་རྒྱ་མཚོ་ཆེན་པོ་ཞེས་པ་སོགས་དོན་དང་ལྡན་པའི་ལོ་རྒྱུས་ཁག་ན་གསལ་བོར་ཡོད་པས་བསྐྱར་བཤད་མི་དགོས་སྙམ།
འོན་ཀྱང་དེང་སང་ང་ཚོས། རང་གི་རིག་གནས་དེ་གཞན་ལ་བཤད་དེ། དེ་ནི་ཚོང་ལས་ཀྱི་ངོ་བོར་བསྒྱུར་ན། ཕྱི་རྒྱལ་བླ་མ། ཡང་ན་རྒྱ་བླ་སོགས་ཀྱང་འབོད། འོན་ཏེ་ཁོ་བོས། རྒྱ་བླ་དང་། ཕྱི་བླ་གཉིས་ལ་ཁྱད་པར་དེ་ཙམ་འབྱེད་ཀྱིན་མེད། གང་ལྟར་ཁོ་བོས་ཁོང་ཚོར་ཧ་ཅང་བསྟོད་པ་འཐེན་གྱིན་མེད་ལ་ཧ་ཅང་གི་ངན་འཚང་ཡང་གཏན་ནས་ཤོད་ཀྱིན་མེད། རྒྱུ་མཚན། ང་ཚོའི་དགེ་སྐྱོན་གང་མང་ཞིག་མ་བཤད་ན་ཕན་ཐོགས་ཡོད་པས་སོ།།

མཇུག་ཏུ་དམིགས་བསལ་ཞུ་རྒྱུ་ཞིག་ལ། རང་རེའི་བཙུན་མའི་དགེ་བཤེས་ཀྱི་སྲོལ་དེ་ཕྱི་རྒྱལ་བ་ཞིག་གིས་འབྱེད་དགོས་པའི་གནད་དོན་དེ་རེད། འོན་ཀྱང་གུས་པས་ཕྱི་རྒྱལ་བཙུན་མ་འདི་ལ་དགེ་བཤེས་ཀྱི་ཤེས་ཚད་མི་འདུག་ཤོད་ཀྱིན་མེད་ལ། ལྷག་པར་མོའི་ལུས་ངག་ཡིད་གསུམ་པོ་གང་གི་ཆ་ནས་ཡིན་ན་རེད་བོད་ཀྱི་དགེ་བཤེས་ཚོ་དང་། མཉམ་བསྡུར་བྱས་ན་མོ་ངན་པ་རེད་གཏན་ནས་བརྗོད་མི་འོས།
ངས་ཤོད་འདོད་པ་ནི་བོད་ཀྱི་བུད་མེད་བཙུན་མ་ཚོར་ཅིའི་ཕྱིར་དགེ་བཤེས་ཀྱི་གོ་ཐོབ་ད་ལྟའི་བར་མ་ཐོབ་པ་དེ་རེད། ལོ་རྒྱུས་ལྟར་ན། སྤྱིར་བུད་མེད་རིགས་ལ་ཤེས་ཡོན་བསླབ་པའི་གོ་སྐབས་མ་རེག་པ་དང་ཡང་ན་ཕ་མོ་འདྲ་མཉམ་གྱི་དབྱེ་འབྱེད་བྱས་ཏེ་གྱོང་གུད་ཐེངས་གསུམ་ལ་རེག་མྱོང་ཡོད།

༡ བོད་ཆོས་རྒྱལ་བཙན་པོའི་སྐབས་སུ་དགེ་བཅུའི་ཁྲིམས་སོགས་དང་ལྷན་དུ་བུད་མེད་ཀྱི་ཁ་ལ་མ་ཉན་པ་དེ་སྐབས་དེའི་ཁྲིམས་སྲོལ་རང་རེད།

༢ འདུལ་བའི་ཆོས་གཞུང་དུ་བཙུན་མ་དག་ལ་དགེ་སློང་གི་བྱང་སྡོམ་མི་ཐོབ་པ་སོགས་ཀྱིས་ཀྱང་སྤྱི་ཚོགས་ཤིག་མཚོན་ནོ།།

༣ དུས་རབས་བཅུ་གཉིས་ཀྱི་དཀྱིལ་ཙམ་དུ་བོད་ཀྱི་རྩོད་གྲྭའི་རིག་པ་སྲོལ་འབྱེད་མཁན་པོ་༧ཆ་བ་ཆོས་ཀྱི་སེང་གེས་ཀྱང་ཁྱབ་པ་སྒོ་བརྒྱད་དང་རང་ལུགས་རྫས་ལྡོག་བརྩམས་དོན་དེའང་བཙུན་མའི་དཔུང་ཁག་འཇོམས་བྱེད་ཅིག་ཡིན་པའི་ཁྲིད་རྒྱུན་སོགས་ལ་བརྟགས་ན། ཧ་ཅང་ལོ་མང་རིང་དུ་ང་ཚོས་ཕོ་མོ་འདྲ་མཉམ་དང་རིགས་རུས་ཁྱད་མེད་རེད་ཟེར་བ་ནི་ཁའི་རླངས་པ་ཙམ་མ་ཡིན་ནམ། སྤྱིར་ན་དགེ་བཤེས་ལ་དགེ་བཤེས་ལྷ་རམས་པ་དང་ཚོགས་རམས་པ། དཀའ་བཅུ་བ། རྡོ་རམས་པ་བཅས་སོགས་ཡོད་ཀྱང་། འདིར་དེའི་སྐོར་རེ་ཞིག་གཞག་དགོས་བྱུང་།

དབྱིན་ཡུལ་ནས་༢༠༡༣//༡༢ /༡༦ ལ་བྲིས།།