འབའ་སྲས་ཀྱི་སྙན་ངག་དེབ་གསར་དབུ་འབྱེད།

ཕྱི་ལོ་ ༢༠༡༣ ཟླ་ ༡༡ ཚེས་ ༨ གྱི་དགོང་མོ། ཧྥ་རན་སིའི་རྒྱལ་ས་པེ་རི་སིར་ཡོད་པའི། རྒྱལ་སྤྱིའི་ཤར་ཕྱོགས་སྐད་ཡིག་སློབ་ཆེན་གྱི་བོད་ཡིག་ཚན་ཁག་གི་དམིགས་བསལ་ལས་རིམ་ཞིག་གི་ཁོངས་སུ། སྙན་ངག་པ་འབའ་སྲས་སམ། ཁ་སྒང་བསམ་གཏན་རྒྱ་མཚོའི་སྙན་ངག་དེབ་ཕྲེང་བཞི་པ་གྱི་ལིང་གི་འཚེར་སྐད་དང་། དེབ་ཕྲེང་ལྔ་པ་སྒོ་འགྲམ་གྱི་གསང་བ་ཞེས་པ་གཉིས་རྩོམ་པ་པོ་ཆབ་བྲག་ལྷ་མོ་སྐྱབས་ཀྱིས་དབུ་འབྱེད་གནང་སོང་།

དབུ་འབྱེད་མཛད་སྒོར་རྩོམ་པ་པོ་ཆབ་བྲག་ལྷ་མོ་སྐྱབས་ཀྱིས་གསུང་བཤད་གནང་བ་མ་ཟད། འབའ་སྲས་ཀྱི་སྙན་ངག་དུམ་བུ་གཅིག་གྱེར་མཚམས། རྩོམ་པ་པོ་ངོ་མས་ནང་དོན་འགྲེལ་བཤད་གནང་བ་དང་། ལོ་ཙཱ་བས་ཧྥ་རན་སིའི་སྐད་དུ་བསྒྱུར། དེ་བཞིན་རྩོམ་པ་པོས་སྙན་ངག་དེབ་ཕྲེང་གཉིས་དེ་བརྩམས་པའི་བརྒྱུད་རིམ་མདོར་བསྡུས་ངོ་སྤྲོད་གནང་ཐོག རང་ཉིད་ལ་རྒྱབ་སྐྱོར་གནང་མཁན་གྱི་བཟའ་ཟླར་ཡང་ཐུགས་རྗེ་ཆེ་ཞུས་སོང་། དེ་མིན་སྙན་ངག་པ་མདའ་ཐུབ་བསྟན་དང་། རྨ་དུག་ལྕེ། བུ་མོ་བཀྲ་ཤིས་སྐྱིད་བཅས་ཀྱིས་སྙན་ངག་གྱེར་འདོན་གནང་བ་དང་། མཇུག་ཏུ་རྩོམ་པ་པོ་ཆུང་ཚེ་རིང་གིས། འབའ་སྲས་ཀྱི་སྙན་ངག་གི་ཁྱད་ཆོས་ལས་འཕྲོས་པའི་གཏམ་བཤད་གནང་ཞིང་། གནམ་གཤིས་གྲང་ལ་ཆར་པ་ཆེན་པོ་བབས་རུང་མཛད་སྒོ་དེར་པེ་རི་སེར་གནས་སྡོད་བོད་རིགས་དང་ཕྱི་རྒྱལ་མི་སྣ་གང་ཙམ་འཛོམས་འདུག

འབའ་སྲས་ནི་ཉེ་བའི་ལོ་ཤས་ནང་། གཙོ་བོ་སྙན་ངག་རང་ལ་བརྟེན་ནས་སྤྱི་ཚོགས་ནང་མིང་གྲགས་ཁྱབ་པའི་རྩོམ་པ་པོ་ཞིག་ཡིན་ཞིང་། ཁོང་གིས་བསྟུད་མར་“སྙན་ངག་གི་གྲོང་ཁྱེར་”སོགས་སྙན་དེབ་ལྔ་བྲིས་པའི་ནང་། བརྗོད་བྱ་སྣ་ཁ་མང་ཞིང་། སྒྲོམ་གཞི་ངོ་མཚར་བ། ཚིག་སྦྱོར་སྙན་པ། ནང་དོན་ཁ་གསལ་བ་བཅས་ཀྱི་ཁྱད་ཆོས་ལྡན་པའི་སྙན་ངག་མང་པོ་བཀོད་ཡོད་ལ། ཁོང་གི་སྙན་ངག་མང་པོར་ཕོ་མོའི་འདོད་བརྩེའི་སྐོར་ཡང་མངོན་གསལ་དུ་བྲིས་ཡོད་པ་རེད།། །།