བོད་ལ་ཞེན།
ཉིན་ཤས་སྔོན་མ་སུ་རིའི་བོད་ཁྱིམ་སློབ་ཕྲུག་༢༥༠ ཙམ་གྱིས་ཞི་བའི་གོམ་བགྲོད་ཀྱི་ལས་འགུལ་ཞིག་སྤེལ་བའི་གསར་འགྱུར་ཞིག་མཐོང་བྱུང་། དང་ཐོག་ཁོ་བོས་བསམ་པར་རྒྱ་ནག་གཞུང་ལ་ངོ་རྒོལ་ཡིན་ཤག་གིས་གསར་འགྱུར་གྱི་མགོ་ནས་མར་བལྟས་ཚེ་དེ་ལྟར་མ་ཡིན་པར་སློབ་གྲྭའི་འཛིན་སྐྱོང་ལ་ངོ་རྒོལ་རེད་འདུག ཡང་ཁོ་བོའི་བསམ་པར་ཕལ་ཆེར་ཤེས་ཡོན་སྲིད་ཇུས་སམ། ཡང་ན་བོད་ཀྱི་རིག་གཞུང་རྒྱུན་འཛིན་བྱེད་སྟངས་ཐད་འཛིན་སྐྱོང་གིས་ཕྱག་ལས་གནང་སྟངས་འགྲིག་མ་འགྲིག་ཐད་ནས་སློབ་ཕྲུག་ཚོས་ངོ་རྒོལ་བྱས་པ་ཡིན་ཐག་ཆོད་རེད་སྙམ་བྱུང་།
གསར་འགྱུར་མར་མར་ཀློག་ཚེ་བསམ་པ་ལྟར་མ་ཡིན་པར་བློ་ཕམ་དགོས་པ་ཞིག་ལ། སློབ་ཕྲུག་རྒན་པ་ཚོའི་གོམ་བགྲོད་ཀྱི་ལས་འགུལ་དེ་ནི་ཐུགས་སྤྲོ་གཏོང་ཆོག་མི་ཆོག སྒྲིག་ཆས་གོན་དགོས་མི་དགོས། ཐུགས་སྤྲོའི་སྐབས་འཛིན་སྐྱོང་གིས་ཇུས་གཏོགས་བྱེད་ན་འགྲིག་མི་འགྲིག་གི་ཐད་ནས་ཡིན་པ་རེད། གསར་འགྱུར་བཀླགས་ཚར་བ་དང་སེམས་ནང་བཤད་མ་ཤེས་པའི་ཚོར་བ་སྐྱུར་མོ་་ཞིག་དང་ལྷན་ལུས་པོར་གྲང་འདར་ཞིག་བརྒྱབ་བྱུང་།
བོད་ནང་སློབ་ཕྲུག་ཚོས་སོ་སོའི་མདུན་ལམ་དང་ཐ་ན་རང་སྲོག་ཡན་ཆད་བློས་བཏང་ནས་བོད་ཀྱི་སྐད་ཡིག་དང་རིག་གཞུང་གི་ཆེད་རྒྱ་གཞུང་ལ་ངོ་རྒོལ་གྱི་ཞི་བའི་གོམ་བགྲོད་སྤེལ་གྱི་ཡོད།
འོན་ཀྱང་བཙན་བྱོལ་གྱི་སློབ་ཕྲུག་དེ་ཚོས་་་་་་་་་་་་་་་་་
བོད་ནང་གི་སློབ་ཕྲུག་ཚོས་རང་མི་རིགས་ཀྱི་སྐད་ཡིག་ཡར་རྒྱས་དང་སྲུང་སྐྱོབ་གནང་པར་ངོ་རྒོལ་སྐད་འབོད་དང་གོམ་བགྲོད་གནང་གི་ཡོད་རེད། ཡིན་ནའི་བཙན་བྱོལ་ནང་གི་སློབ་ཕྲུག་ཚོས་རང་དབང་སྟེ་ཐུགས་སྤྲོ་དང་སྒྲིག་ཆས་གོན་ཆོག་མེད་ཀྱི་ཆེད་ངོ་རྒོལ་དང་གོམ་བགྲོད་གནང་གི་ཡོད་རེད། དངོས་གནས་བློ་ཕམ་པ་ལ་་་་་་་་་་་་་་
དེ་བས་ཀྱང་བློ་ཕམ་སྐྱེ་དགོས་པ་ཞིག་ནི། བོད་ཁྱིམ་གྱི་དགེ་སློབ་མང་ཆེ་བ་རང་མི་རིགས་ཀྱི་སྐད་ཡིག་ལ་དུང་བ་མེད། དབྱིན་ཡིག་གི་རྗེས་ཆོད་ལ་མ་ཆོད་བྱས་ནས་རྒྱུག་གི་ཡོད་རེད།
ཙུ་ཙུ། ཕ་ཡེ། ད་ག་རེ་བྱེད། རེ་བ་ཞེ་དྲག་མིན་འདུག
རེད་རེད། བློ་ཕམ་ན་ལས་འགྲིག། ཡིན་ན་ཡང་། སྙིང་རྗེ། ཁོང་ཚོར་ཡང་ཁག་ག་ལ་ཡོད། ཐུགས་སྤྲོ་བོ་བྱེད་པའི་ཐུགས་སྤྲོ་ཞིག་ཡོད་ན། དེ་ལ་ཐུགས་སྤྲོ་བོ་བྱེད་དུ་མ་བཅུག་ན། ཁོང་ཁྲོ་ལངས་དང་ལངས། དེ་འདྲའི་ཐུགས་མི་སྤྲོ་བའི་ཐུགས་སྤྲོ་ཞིག་གིས་གང་བྱེད།
ལུས་ལ་འགྲིག་ཆས་བཙན་གྱིས་སྐོན་པ་ལས།། སློབ་མཐར་ཐོན་པས་དགའ་བ་སྒོམ་ན་བཟང་།།
ཐོབ་ཐང་རང་ལྟ་ངོམ་པའི་སློབ་བུ་རྣམས།། མ་རུང་འཇིག་རྟེན་འདི་ལ་welcome.ཞུ།
བཙན་བྱོལ་ཕ་ཡུལ་ཟེར་ནས་ཡོད་ཚད་ལ།། བཟང་ངན་དབྱེ་བྱེད་པོ་ཡིས་ཕུགས་བསམ་ནི།
དུང་ལྟར་དཀར་བའི་མྱི་ཞིག་ཨེ་ཡིན་དོགས།། བོད་ལ་ཞེན་པར་བོད་རིགས་ཞེན་པས་བྲིས།།
ཡག་པོ་མ་རེད་གང་དྲག།
བོད་ལ་ཞེན་ལགས་ཀྱིས་བོད་ཁྱིམ་སློབ་གྲྭའི་སློབ་ཕྲུག་དེ་ཚོར་རེ་བ་འདྲ་ཞིག་བཅངས་མྱོང་ཡོད་པ་འདྲ། ངས་ནི་གནའ་སྔ་མོ་ནས་བོད་ཁྱིམ་སློབ་གྲྭ་ཟེར་བ་དེ་ནས་ཐོན་པའི་མི་ཞིག་གིས་བོད་མི་ཤེས་ཡོན་པ་ཞིག་གི་ཚབ་བྱེད་ཐུབ་པ་ཕར་ཞོག བོད་མི་དཀྱུས་མ་ཞིག་གི་ཚབ་ཀྱང་བྱེད་ཐུབ་ཐབས་མེད་པ་སྔ་མོ་ནས་ཤེས་ཡོད་པས། དུས་དེང་སང་གསར་འགྱུར་དེའི་བཟོ་འདྲ་དེ་ཚོ་ང་ལ་མཚོན་ན་གནས་ཚུལ་དཀྱུས་མ་ཁོ་ན་རེད། ད་བོད་ཁྱིམ་སློབ་གྲྭ་ཟེར་བ་དེ་དྲང་པོར་བཤད་ན། བཟོ་གྲྭ་བྱེ་བྲག་པ་ཞིག་རེད། བཟོ་གྲྭ་གཅིག་ནས་ཐོན་པའི་ཐོན་རྫས་རྣམས་བྱེད་ལས་དང་ངོ་བོ་ནུས་པ་རྣམ་པ་སོགས་གང་ལ་ཡང་ཁྱད་པར་མེད་པར་གཅིག་འདྲ་ཞིག་ཐོན་ཡོང་བ་ཡིན་པས། བོད་ཁྱིམ་སློབ་གྲྭའི་སློབ་ཕྲུག་རྣམས་ཀྱང་ད་ལྟའི་གཞིས་ཆགས་ཀྱི་ཕོ་གསར་འཕོངས་ཤ་སྐམ་པོ་འདི་ཚོ་དང་གཅིག་པ་གཅིག་རྐྱང་ཁྱད་པར་སྤུ་ཙམ་ཡང་མེད་པ། ཐ་ན་སྐད་ཀྱི་གདངས་ཕྲ་མོ་ཚུན་ཆད་ནས་པར་བརྒྱབས་པ་འདྲ་རྐྱང་རྐྱང་རེད་འདུག་པས། དེ་དག་ལ་བོད་མི་རིགས་ཀྱི་རེ་བ་འཆང་བ་ནི་ནོར་འཁྲུལ་ཆེ་ཤོས་དེ་ཡིན་པས། དོན་མེད་སྙིང་ན་རོགས་རེད།
བོད་མི་ཤེས་ཡོན་ཅན་གྱི་ཚད་གཞིར་སླེབས་མཁན་ཉུང་ཟེར་ན་འོས། ¨བོད་མི་དཀྱུས་མ་ཞིག་གི་ཚབ་ཀྱང་བྱེད་ཐུབ་ཐབས་མེད་པ་¨སྐད་ཆ་འདི་ཡང་ཅུང་ཐལ་དྲགས་སོང་ང།
འབྲེལ་ཡོད་ཚོས་ཁ་ནས་སྒྲིག་ཆས་གྱོན་ཆོག་མི་ཆོག་དང་། ཐུགས་སྤྲོ་བཏང་ཆོག་མི་ཆོག་ལབ་པ་ཙམ་ལས་དེའི་ནང་ལོག་ལ་ལྐོག་འགྱུར་གྱི་གནད་དོན་མང་པོ་ཞིག་ཡོད་པ་འདྲ། ལྷག་དོན་མུ་རིའི་བོད་ཁྱིམ་སློབ་གྲ་ནང་ལ་སློབ་ཕྲུག་ལ་ཕ་ཚབ་མ་ཚབ་ཚོས་ལས་ཀ་ཧ་ལས་པ་བསྐོལ་གྱི་འདུག་ལ། ཕྲུ་གུ་ཆུང་ཆུང་ལ་ཁ་ལག་བཟོ་བཅུག་པ་དང་། གད་ཕྱིས་བྱེད་བཅུག་པ་སོགས་ཕྲུ་གུ་སློབ་སྦྱོང་བྱེད་རྒྱུའི་ཚབ་ལ་ཐབ་ལས་དང་ནང་མང་བ་བསྐོལ་གྱི་འདུག་ཅིང་། དེ་དག་ནི་རྒྱ་གར་གྱི་ཡུལ་ཁྲིམས་དང་མཐུན་གྱི་ཡོད་ན། རྒྱ་གར་གཞུང་གི་ཕྲུ་གུར་ལས་ཀ་བསྐོལ་མི་ཆོག་པའི་ཁྲིམས་ལུགས་གཏན་འབེབས་གནང་ཟིན་ཡོད་ཅིང་། དེ་དག་འབྲེལ་ཡོད་ཚོས་མ་ཤེས་པ་ཞིག་ནི་ག་ལ་ཡིན། ད་ནི་འབྲེལ་ཡོད་ཚོས་དེ་དག་ལ་དགོངས་པ་བཞེས་དགོས་ཀྱི་འདུག་སྙམ། མ་སུ་རི་སློབ་གྲྭ་མཐོང་ན་སློབ་གྲྭའི་རྣམ་པ་འདྲ་པོ་མཐོང་མི་ཐུབ་ལ། ཕྲུ་གུར་ལས་ཀ་བསྐོལ་ས་འདྲ་པོ་ཞིག་མཐོང་གི་ཡོད། ཕ་ཚབ་མ་ཚབ་བཞག་དགོས་པའི་རྒྱུ་མཚན་ནི་སློབ་ཕྲུག་དེ་དག་ཕ་མ་རྒྱང་རིང་ཡོད་པ་སོང་ཙང་། ཕ་མ་ནང་བཞིན་བྱམས་བརྩིའི་ལྟ་སྐྱོང་གནང་ཞིག་ཡིན་པ་ལས་ཕྲུ་གུར་སྡིག་ར་བསྐུལ་ནས་ཐབ་ལས་བསྐོལ་མཁན་ཞིག་བཞག་པ་ག་ཡིན། དེ་བཞིན་དུས་ཚོད་ལ་སློབ་ཕྲུག་ལ་ཁ་ལག་བཟོ་སྟེ་སྤྲད་ཐུབ་པ་བྱ་རྒྱུ་དང་། ཕྲུ་གུ་ལྟ་སྐྱོང་ལེགས་པར་བྱེད་མཁན་ཞིག་ཡིན་པ་ལས་སློབ་ཕྲུག་ལ་ལས་ཀ་བཀོལ་ནས་བཀོད་མངགས་གཏོང་མཁན་ཞིག་ག་ལ་ཡིན། ཕ་ཚབ་མ་ཚབ་ཀྱིས་སློབ་ཕྲུག་ལ་ཁ་ལག་བཟོ་སྟངས་སློབ་ཀྱི་ཡོད་མདོག་གི་ཐབ་ལས་ཡོངས་རྫོགས་ཕྲུ་གུར་བསྐོལ་བའི་ལུགས་སྲོལ་མ་རབས་རྒྱུན་འབྱམས་ཤིག་ཆགས་འདུག་ན་ངེས་པར་མེད་པ་བཟོ་དགོས་ཀྱི་འདུག་ཅིང་། མ་འོངས་པ་ཕྲུ་གུར་ཐབ་ལས་མི་བསྐོལ་བའི་རེ་བ་ཞུ་བཞིན་ཡོད།
གོང་གི་གནས་ཚུལ་དངོས་གནས་བློ་ཕམ་དགོས་ཡག་ཅིག་རེད། ཡིན་ནའང་དེ་ལྟར་ཡོང་དགོས་དོན་གཙོ་བོ་དེ་ང་ཚོས་ཤེས་དགོས། རང་ཉིད་སྤྱི་ཚོགས་དེའི་ནང་ལོ་མང་བསྡད་མྱོང་ཡོད་པའི་མི་ཞིག་གི་ངོས་ནས་ཉམས་མྱོང་བཤད་པ་ཡིན་ན། སྤྱི་ཚོགས་དེའི་ནང་དཀའ་ངལ་ག་ཚོད་ཡོད་ཀྱང་ནང་ཁུལ་སེལ་ཐབས་ཀྱི་བསམ་བློ་རྩ་བ་ནས་མེད་པ་གཅིག་རེད། དེའི་ཐོག་ནས་ངོ་རྒོལ་བྱེད་དགོས་པ་ཞིག་ཆགས་ཀྱི་ཡོད།
གལ་ཏེ་དབང་ཆེན་འགའ་ཤས་ཡོད་པ་དེ་དག་གི་ཕྱོགས་གཏོགས་ཡིན་ན་དཀའ་ངལ་གང་ཅིའི་ཐོག་ཡར་ཞུས་ཙམ་གྱི་བསལ་ཐུབ་པ་དང་། དེ་དག་གི་ཕྱོགས་གཏོགས་མ་ཡིན་པའི་རིགས་ཀྱི་དཀའ་ངལ་རྣམས་བསལ་རྒྱུའི་ཚབ་ཏུ་དཀའ་ངལ་གང་ལས་ཚབས་ཆེ་རུ་འགྲོ་རྒྱུ་ཐག་ཆོད་པ་རེད། དཔེར་ན། བོད་པའི་ཤོས་སྲོལ་ལ་གྱེལ་བའི་ཐོག་ཏུ་རྡོག་རྫིས་ལྟ་བུ་རེད། དེར་བརྟེན་མང་པོ་ཞིག་གིས་རྡ་ས་བཙན་བྱོལ་གཞུང་ལ་རེ་བ་རྒྱག་གི་ཡོད། འོ་ན་དེས་ཕན་ཐོགས་ཤིག་ཡོང་གི་ཡོད་རེད་དམ་ཞེ་ན། རེ་བ་སྟོང་ཟད་རེད། སྐབས་ཤིག་མི་གནད་ཡོད་ཅིག་གིས་ གལ་ཏེ་ཁྱོད་ཚོའི་དཀའ་ངལ་སེལ་དགོས་ན་དེར་ཟིང་སློང་དགོས། དེ་མིན་སུས་ཀྱང་དོ་སྣང་སྤྲོད་ཀྱི་མ་རེད་ཅེས་པའི་གནས་ཚུལ་གོ་ཐོས་བྱུང་། གཞུང་ཞབས་པ་དོ་ཚོས་ཐོས་ཀྱང་གོ་མ་བྱུང་མདོག་མདོག་དང་ཤེས་མ་བྱུང་མདོག་མདོག་སྡོད་པ་ལས་ཡ་ལན་སྐར་ཆ་གཅིག་སྤྲོད་རྒྱུ་མིན་པ་ཐག་ཆོད་པའི་སྒོ་ནས་ཞུ་ཐུབ། ༸གོང་ས་མཆོག་གི་ཉེ་ཆར་ ཁྱོད་ཚོའི་སྐུ་དྲག་གསར་པ་བྱེད་ན་འགྲིག་གི་མ་རེད་གསུངས་གནང་བ་བཞིན། དངོས་གནས་སྐུ་དྲག་གསར་མང་པོ་ཐོན་བཞིན་པ་ནི་གསལ་པོ་རེད། གང་ལྟར་ད་ལན་སློབ་ཕྲུག་དེ་ཚོར་གཏན་གཏན་ཟིང་སློང་ན་རྒྱལ་ཁ་ཡོད་པ་གསལ་པོ་ཤེས་ཀྱི་ཡོད་པའི་རྟགས་རེད། མ་འོངས་པར་སློབ་གྲྭ་མང་པོར་ཟིང་སློང་རྒྱུ་དེ་དར་སོ་གསར་པ་ཞིག་ཆགས་སྲིད་པ་ཡིན་དུས། ང་ཚོའི་བཙན་བྱོལ་སྒྲིག་འཛུགས་ནས་སྤྱི་ཚོགས་གང་ནས་ཀྱང་ཞུ་འབུལ་འབྱོར་བ་དང་དེ་ལ་ཞིབ་འཇུག་དང་བདེན་རྫུན་ངོ་སྤྲོད་གནང་ཐབས་ངེས་པར་གནང་དགོས་པ་ཞིག་མཐོང་གི་འདུག སྐབས་རེ་བོད་གཞུང་ལ་ཞུས་སྐབས་དེ་ནས་དང་པོ་ prima facia བྱུང་ན་མ་གཏོགས་ངོས་ལེན་མེད་ཅེས་འཁོད་པའི་ཕྱག་བྲིས་གཏོང་གནང་གི་ཡོད་པའི་ལོ་རྒྱུས་འདུག
བྱས་དུས་གོང་མ་རྣམ་པས་ངོས་ལེན་གནང་རྒྱུར་ལས་སླ་ཤོས་དེ་ངོ་རྒོལ་ལམ་ཟིང་སློང་རྒྱུ་དེ་རེད། གནས་ཚུལ་དེ་འདྲ་ཞིག་ལ་སླེབས་དུས་ཚར་བ་རེད། གཅིག་གི་གདོང་ལ་གཅིག་གིས་ལྟ་བཞིན་སྡོད་རྒྱུ་ལྟག་ཡོད་མ་རེད། བཀྲིས་བདེ་ལེགས།