དབུ་མ་རིན་ཆེན་སྒྲོན་མ།

སྐྱོ་བྲག་དགའ་དབང་།

ཁོ་བོའི་གཅུང་པོ་ལེགས་མཐོང་གིས། དེང་སང་གི་ཞིབ་འཇུག་པ་ཚོས་དབུ་མ་རིན་ཆེན་སྒྲོན་མ་སྟེ་སྡེ་དགེའི་བསྟན་འགྱུར་མདོ་ཕྱོགས་པོད་ཚ་པའི་ཤོག་གྲངས་ཉིས་བརྒྱ་དོན་གསུམ་པའི་མདུན་ཕྲེང་གཉིས་པར་དུས་རབས་བརྒྱད་པར་བྱོན་པའི་ཞི་བ་འཚོའི་དབུ་མ་རྒྱན་གྱི་ལུང་ཡང་དྲངས་ཡོད་པས། དུས་རབས་དྲུག་པ་ཙམ་གྱི་ནང་དུ་བྱོན་པའི་རང་རྒྱུད་སྲོལ་འབྱེད་ཀྱི་སློབ་དཔོན་ལེགས་ལྡན་འབྱེད་ཀྱིས་མཛད་པ་རྩ་བ་ནས་ཡོང་ཐབས་མེད་པར་དེ་ཉིད་ལེགས་ལྡན་འབྱེད་ཆུང་བའམ་ལེགས་ལྡན་འབྱེད་ཕྱི་མ་ཞིག་ཡིན་པར་ངོས་འཛིན་གྱི་འདུག་པ་ནི་ཐུགས་དྲན་གསོ་འདོད་ཙམ་ཡིན། ཞེས་གསུངས་པའི་རྐྱེན་གྱིས་ལྟ་རྟོག་ཧོལ་ཙམ་བགྱིས་པ་ན། དབུ་མ་རིན་ཆེན་སྒྲོན་མའི་ནང་དུ། འདིའི་དོན་རྒྱས་པར་སློབ་དཔོན་ཟླ་བ་གྲགས་པའི་ཞལ་སྔ་ནས་མཛད་པའི་དབུ་མ་ཕུང་པོ་ལྔ་པ་དང༌། བདག་གིས་བཀོད་པ་རྟོག་གེ་འབར་བ་ལ་སོགས་པར་བལྟ་བར་བྱའོ། །ཞེས་པ་བདོག་ཅིང་། མཇུག་བྱང་དུ། བཀའ་མ་ལུས་པའི་སྙིང་པོ་བསྡུས་པ། དེ་ཁོ་ན་ཉིད་གསལ་པོར་སྟོན་པ་དབུ་མ་རིན་པོ་ཆེའི་སྒྲོན་མ། བདག་དང་གཞན་ཐམས་ཅད་ཀྱི་གྲུབ་པའི་མཐའ་རྒྱ་མཚོ་ལྟ་བུ་མཁྱེན་པའི་ཕ་རོལ་ཏུ་ཕྱིན་པ་སྐུ་ཚེ་འདི་ཉིད་ལ་སྐུ་ལུས་དེ་ཉིད་ཀྱིས་རིག་འཛིན་གྱི་གནས་སུ་གཤེགས་པའི་སློབ་དཔོན་མཁས་པ་ཆེན་པོ་བྷ་བྱས་སློབ་དཔོན་འཕགས་པ་ཀླུ་སྒྲུབ་ཀྱི་གསུང་བཞིན་དུ་མཛད་པ་རྫོགས་སོ། །
བླ་མ་རྗེ་བཙུན་ཟངས་གླིང་པ་དགེ་བསྙེན་མགོན་པོ་ལ། པཎྜི་ཏ་ཆེན་པོ་དཱི་པཾ་ཀ་ར་ཤྲཱི་ཛྙཱ་ནས་བཀའ་དྲིན་ཞུས་པ་ལས། ཕྱིས་སོ་མ་པུ་རིའི་གཙུག་ལག་ཁང་དུ་རྒྱ་བརྩོན་འགྲུས་སེང་གེ་དང༌། ནག་ཚོ་ཚུལ་ཁྲིམས་རྒྱལ་བ་གཉིས་ཀྱིས་ཡང་དང་ཡང་དུ་ཞུས་ནས་བསྒྱུར་ཅིང་གཏན་ལ་ཕབ་པའོ། །ཞེས་བཀོད་པ་དང་། དབུ་མའི་སྙིང་པོའི་མཇུག་བྱང། དབུ་མའི་སྙིང་པོ་ཚིག་ལེའུར་བྱས་པ་སློབ་དཔོན་ཆེན་པོ་བྷ་བྱས་མཛད་པ་རྫོགས་སོ། །ར་ས་འཕྲུལ་སྣང་གི་གཙུག་ལག་ཁང་གི་གཞིར། རྒྱ་གར་གྱི་མཁན་པོ་དཱི་པཾ་ཀ་ར་ཤྲཱི་ཛྙཱ་ནའི་ཞལ་སྔ་ནས་དང༌། ལོ་ཙྪ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །ཞེས་ཕྱོགས་མཚུངས་སུ་འདུག

བུ་སྟོན་ཆོས་འབྱུང་དུ། སློབ་དཔོན་ལེགས་ལྡན་བྱེད་ཀྱིས་མཛད་པའི་དབུ་མའི་སྙིང་པོ་བསྡུས་པ་ཤུ་ལོ་ཀ་བརྒྱད་ཅུ། དེའི་འགྲེལ་པ་རྟོག་གེ་འབར་བ། དབུ་མའི་དོན་བསྡུས་པ་རྣམས་ནག་ཚོའི་འགྱུར། དབུ་མ་རིན་པོ་ཆེའི་སྒྲོན་མ། རྒྱ་བརྩོན་སེང་དང་ནག་ཚོའི་འགྱུར། ཞེས་དང་། ཚུལ་ཁྲིམས་རིན་ཆེན་གྱི་སྡེ་དགེའི་བསྟན་འགྱུར་དཀར་ཆག་ཏུ། དབུ་མ་རིན་པོ་ཆེའི་སྒྲོན་མ་ཞེས་བྱ་བ་བདག་དང་གཞན་གྱི་གྲུབ་མཐའ་རྒྱ་མཚོ་ལྟ་བུ་ལ་མཁྱེན་པའི་ཕ་རོལ་ཏུ་ཕྱིན་པ། སྐུ་ཚེ་འདི་ཉིད་ཀྱིས་རིག་འཛིན་གྱི་གནས་སུ་གཤེགས་པའི་སློབ་དཔོན་མཁས་པ་ཆེན་པོ་བྷ་བྱས་སློབ་དཔོན་འཕགས་པ་ཀླུ་སྒྲུབ་ཀྱི་གསུང་བཞིན་དུ་མཛད་པ། ཕྱིས་སོ་མ་པུ་རིའི་གཙུག་ལག་ཁང་དུ་ལོ་ཙཱ་བ་རྒྱ་བརྩོན་འགྲུས་སེང་གེ་དང༌ནག་ཚོ་ཚུལ་ཁྲིམས་རྒྱལ་བ་གཉིས་ཀྱིས་ཡང་དང་ཡང་དུ་ཞུས་ནས་བསྒྱུར་བ། ཞེས་ཡིན་ངེས་སུ་བཞག་པ་ལས་ཐེ་ཚོམ་གྱི་ཟུར་ཙམ་ཡང་མི་འདུག
དབུ་མ་རིན་ཆེན་སྒྲོན་མ་སྟེ། སྡེ་བསྟན་མདོ་ཕྱོགས་ཀྱི་པོད་ཚ་པའི་ལྡེབ་གྲངས་ཉིས་བརྒྱ་དོན་གསུམ་གྱི་མདུན་ཕྲེང་དང་པོ་ནས། འདི་ལྟ་བུའི་བདེན་པ་གཉིས་ཁོང་དུ་ཆུད་པ་ནི་གཞན་གྱི་སྡེ་པ་དང༌། རང་གི་སྡེ་པའི་རྒོལ་བ་དག་ལ་འཇིགས་པ་དང༌། བག་ཚ་བ་ནི་ཅི་ཡང་མེད་དེ། ཚུལ་གཉིས་ཤིང་རྟ་ཞོན་བྱས་ཏེ། །རིགས་པའི་སྲབ་ཀྱིས་བསྲབས་བྱས་ནས། །ལུང་གི་ལམ་དུ་ལེགས་པར་ཞུགས། །བླ་མའི་མན་ངག་ལྕག་གིས་གཞུ། །ཞེས་དང་། ལྡེབ་གྲངས་ཉིས་བརྒྱ་དོན་དྲུག་གི་རྒྱབ་ཕྲེང་བཞི་པ་ནས། བདེན་པ་གཉིས་ཀྱི་ཚུལ་ལ་གནས་པས་ཁས་བླངས་པའི་གནོད་པ་ཡང་མེད་དོ། །ཚུལ་གཉིས་ཤིང་རྟར་ཞུགས་བྱས་ནས། །རིགས་པའི་ཁ་ལོ་ལེགས་བསྒྱུར་ཏེ། །ལུང་གི་ལམ་དུ་ཞུགས་བྱས་ནས། །ལམ་ལོག་པར་ནི་འགྲོ་མི་འགྱུར། །ཇི་ལྟར་འདབ་གཤོག་མ་ཉམས་བྱ། །བར་སྣང་གཅོད་པ་ཐོགས་པ་མེད། །དེ་བཞིན་ཚུལ་གཉིས་ལྡན་པ་ཡང༌། །ཆོས་རྣམས་ཀུན་ལ་ཐོགས་པ་མེད། །ཇི་ལྟར་སེང་གེའི་ང་རོ་ཡིས། །གཅན་གཟན་ཐམས་ཅད་སྐྲག་ཅིང་འཇིགས། དེ་བཞིན་སྟོང་ཉིད་སེང་གེའི་སྒྲས། །རྒོལ་བ་ཐམས་ཅད་འཇིགས་ཤིང་སྐྲག །དངོས་པོ་མེད་ལ་དབང་ཐོབ་པས། །དེ་ཕྱིར་དངོས་པོ་ཀུན་བདག་ཉིད། །རང་གཞན་སྡེ་པ་ཐམས་ཅད་ལ། །སེང་གེའི་ང་རོ་སྨྲ་བ་ཡིན། །ཞེས་བདེན་གཉིས་ཕྱེད་པའི་ཆེ་བ་བར་སྐབས་ཀྱི་ཚིགས་བཅད་ལྟ་བུར་གནང་འདུག

ཞི་བ་འཚོའི་དབུ་མ་རྒྱན་ཏེ། སྡེ་བསྟན་མདོ་ཕྱོགས་ཀྱི་པོད་ས་པའི་ལྡེབ་གྲངས་ང་དྲུག་པའི་མདུན་ཕྲེང་བདུན་པ་ནས། ཚུལ་གཉིས་ཤིང་རྟ་ཞོན་ནས་སུ། །རིགས་པའི་སྲབ་སྐྱོགས་འཇུ་བྱེད་པ། །དེ་དག་དེ་ཕྱིར་ཇི་བཞིན་དོན། །ཐེག་པ་ཆེན་པོ་པ་ཉིད་འཐོབ། །ཞེས་དབུ་མ་པ་དང་རྣལ་འབྱོར་སྤྱོད་པ་ལྟར་གཏན་ལ་ཕབ་པའི་ཆེ་བརྗོད་ཀྱི་ཚུལ་དུ་གསུང་འདུག །དེ་ལྟར་ན་དབུ་མ་རིན་ཆེན་སྒྲོན་མ་དང་རྟོག་གེ་འབར་བ་རྩོམ་པ་པོ་གང་ཟག་གཅིག་ཡིན་པའི་ཞལ་བཞེས་མངོན་སུམ་པ་དང་། བླ་མ་བརྒྱུད་པ་བར་མ་ཆད་པའི་གསུང་དང་། མཁས་པའི་དཀར་ཆག་དག་ཏུ་བཀོད་པ་དག་རང་དགར་བོར་ཏེ། ཚིག་རྐང་གཅིག་གཉིས་ཤིག་མཚུངས་པ་ཙམ་ལ་བརྟེན་ནས་ལུང་དྲངས་མདོག་སྐད་པས་གནས་ཚུལ་གཞན་དུ་སྒྲོག་པའི་མུ་ཅོར་ལ་ཡིད་རྟོན་རུང་བ་ཅི་ཡང་མ་མཐོང་ངོ་། །