རང་དབང་གིས་འཚོའམ་ཡང་ན་འཆི། Live free or die.

ཐེ་བོ་སངས་རྒྱས་ཀྱིས་སྒྱུར་སྒྲིག་བྱས།

ང་ཚོར་གསར་བརྗེ་ཞིག་མཁོའོ། we need a revolution. དམག་འཁྲུག་གི་འགྲོ་གྲོན། the cost of war. ངའི་མགོར་རྡོག་རྫིས་མ་གཏོང་། don’t tread on me. སུ་ལའང་ཡིད་ཆེས་མེད། trust no one. ཁྱེད་ཀྱིས་ཨ་རིའི་སྒྱུ་རྩལ་བ་མིང་གྲགས་ཅན་ཌན་ཋ་གྷེས་Dan Tague, སྒྲོ་ལཱར་ལྟེབ་ཚགས་བརྒྱབས་པའི་གསེང་གི་འཕྲིན་ཐུང་གན་ཚོ་མཐོང་བྱུང་ངམ། གཅིག་ཐང་ན་མི་སྡེས་དངུལ་ལོར་བེད་སྤྱོད་བྱེད་ཐབས་ལེགས་བཅོས་བྱ་དགོས་པའི་གསལ་བརྡ་སྒྱུ་རྩལ་ལམ་ནས་བསྟན་པ་གཞན་པའང་ཁྱོད་ཀྱིས་མཐོང་མྱོང་ཡོད་རྒྱུ་རེད།

འདིར་སྒྱུ་རྩལ་བ་ཋ་གྷེས་ཨ་སྒོར་གྱི་འཛའ་ཐང་གཅོག་ཐབས་སུ་གོ་རྒྱུ་བསྟན་པ་ཡིན་ཀྱང་སྲིད། གང་ཡིན་ཞེ་ན་ཋ་གྷེས་སྒྲོ་ལཱར་ལ་སྒྱུ་འཕྲུལ་ལམ་བཤད་མི་ཤེས་པའི་ནུས་པ་ཞིག་ཡོད་པར་ཁས་བླངས། དེ་ལ་དངོས་པོ་ཉོ་སྒྲུབ་བྱེད་པའི་ནུས་སྟོབས་དང་། དེས་མི་བུ་གང་མང་ཞིག་ལྟོགས་གྲིར་འདེད་པ། ཐ་ན་དམག་འཁྲུག་ཕལ་མོ་ཆེའི་རྐྱེན་རྩ་ཡང་ཤོག་སྒོར་ལ་ཐུག་པར་འདོད་ཀྱི་འདུག ཋ་གྷེས་ཨ་མེ་རི་ཁའི་ལོ་རྒྱུས་དང་ཤོག་སྒོར་གྱི་ལམ་ལུགས་ཐད་སྐྱོན་བརྗོད་བྱས་པའི་བརྒྱུད་རིམ་ནང་ཤོག་སྒོར་ནི་ཉ་འཛིན་ལྕགས་ཀྱུ་ལྟ་བུར་ཆགས་ཚར་བས། མི་རྣམས་སྒོར་མོའི་ཆེད་རང་དབང་མེད་པར་འཆི་བའི་ཚད་དུ་གཏུགས་པར་བྱེད་ལ།

ཤོག་སྒོར་གྱི་སྡོམ་ཐག་འདིས་དུས་རྒྱུན་པར་སྤྱི་ཚོགས་ཧྲིལ་པོ་རྙོག་འཛིང་ནང་དུ་ཁྲིད་ཀྱིན་འདུག་ཅེས་འཁང་ར་བྱས། ཋ་གྷེའི་ཡིད་འགུགས་ནུས་པ་ལྡན་པའི་འཕྲིན་ཐུང་དག་གིས་འཛམ་གླིང་ངམ་ཡང་ན་ཨ་རི་དང་དངུལ་ལོར་བཏང་འཛིན་བར་གྱི་གནད་དོན་བསྟར་ཆགས་སུ་གླེང་བསླངས་པ་ལས། མ་རྩ་རིང་ལུགས་པའི་སྤྱི་ཚོགས་ཁྲོད་དངུལ་སྨར་གྱི་འཁོར་སྐྱོད་ནི་ཡོད་ཚད་ནང་གི་ཡོད་ཚད་དུ་ཐལ་བའི་གནས་བབས་ངོ་མ་སྒྱུ་རྩལ་བརྩམས་ཆོས་བྱེ་བྲག་པས་གསལ་སྟོན་བྱས་པར་སྣང་། དེ་ལས་ཅུང་ཁ་གསལ་དུ་བཏང་ན་སྒོར་མོས་བརྩེ་དུངས་དང་། བདེ་སྐྱིད། གོ་གནས། བདག་དབང་། དཔྱ་ཁྲལ་ཆག་ཡང་། འོས་ཤོག་སོགས་ཉོ་ཐུབ་པ་ལྟར་སྣང་བའི་འོག་མི་རྣམས་ལོག་ལམ་དུ་ཁྲིད་ཀྱིན་ཡོད་ཟེར། ལྟ་ཚུལ་དེ་ནི་བློ་རིག་ཅན་ཚོར་དྲང་བདེན་དང་བཟང་སྤྱོད་ཀྱི་རིན་ཐང་གཙིགས་སུ་འཛིན་དགོས་པའི་གཞེན་སྐུལ་དུ་མ་གྱུར་ཏམ།

གཞན་ཡང་ཁོང་གི་སྒྱུ་རྩལ་བརྩམས་ཆོས་དམག་འཁྲུག་གི་འགྲོ་གྲོན་the cost of war. ཞེས་པས་དྲག་པོའི་དམག་འཐབ་ཀྱི་འགྲོ་གྲོན་ཨ་སྒོར་ཐེར་འབུམ་མང་པོ་ཆུད་ཟོས་བཏང་བའི་མཇུག་འབྲས་མི་ཁྲི་ཕྲག་མང་པོ་ལས་མེད་དུ་གྱུར་པའི་ཁར། དེའི་རྐྱེན་གྱིས་ཡུལ་མི་ཚོའི་སློབ་གསོའི་ཆུ་ཚད་ཉམས་རྒུད་དང་། འཕྲོད་བསྟེན་ལ་ཚད་བཀག་ངེས་ཅན་ཐེབས་སུ་བཅུག་ཡོད་པ་ཤུགས་སུ་བསྟན། དེ་ཡང་ཁོང་གིས་བརྩམས་ཆོས་དེར་འགྲེལ་བཤད་རྒྱག་སྐབས། དུས་རབས་བཅུ་དགུ་བའི་ནང་གི་ཨ་རིའི་སྲིད་དོན་པ་ཆཱར་ལེ་སི་སུམ་ནེར་Charles Sumner. གྱི་བསྒྲགས་གཏམ་སྟེ། “ང་ལ་དངུལ་ལོ་སྤྲོད་དང་ངས་དེ་དག་དམག་གྲོན་དུ་བཏང་བ་ལས། སྐྱེས་ཕོ་མོ་རྒན་གཞོན་མེད་པར་གཟབ་འཕྱོར་སྤྲོས་སུ་བཅུག་ནས་རྒྱལ་པོ་དང་བཙུན་མོ་དག་ལའང་སྤོབས་པ་སྐྱེ་རུ་འཇུག ངས་གནམ་འོག་གི་གྲོང་གསེབ་ཡོད་ཚད་དུ་སློབ་གྲྭ་རེ་བརྒྱག ངས་རི་དེའུ་ཐམས་ཅད་ཀྱི་རྩེ་རུ་ཕོ་བྲང་རྒྱ་ཕིབས་ཅན་རེ་བསྐྲུན་པའི་ནང་ཕྱག་མཆོད་ཀྱིས་ཞི་བདེ་ཡོང་བའི་བྱིན་རླབས་འབེབས་པར་བྱ།” ཞེས་པ་ལུང་འདྲེན་བྱས་འདུག

ཋ་གྷེས་ཀྱི་སྒྱུ་རྩལ་བརྩམས་ཆོས་རྣམས་དེང་སང་ཚགས་པར་དང་དུས་དེབ་དྲ་ལམ་སོགས་སུ་ཁྱབ་བརྡལ་ཕྱིན་པར་བརྟེན། ཉེ་ཆར་བྷི་བྷི་སིའི་BBC.གསར་འགོད་པས་དེ་དག་གི་རྒྱབ་ལྗོངས་ཐད་བཅར་འདྲི་གནང་བར་མི་རྣམས་དོ་སྣང་ཆེན་པོ་བྱེད་ཀྱི་ཡོད་ཚོད་རེད། མཇུག་མཐར་ཀློག་པ་པོ་དག་གིས་ཤོག་སྒོར་གང་རུང་ལྟེབས་ཚགས་གི་སྒྱུ་རྩལ་ལས་བསམ་བློ་གསར་བ་རེ་བསྟན་ན་ང་ཡིས་མཐོང་འདོད་ཆེའོ།།