ཡིད་ཆད་ལྷ་ལ་རེ་བའི་ཀ་རྩོམ།

Comments (8) on “ཡིད་ཆད་ལྷ་ལ་རེ་བའི་ཀ་རྩོམ།”

1. ཀོ་ལྤགས་གཡུ་བྱུར་གསེར་དངུལ་རྒྱན་ཆ་དག་དོར་ཏེ། །
   ཁོ་ང་མེད་པར་འཕགས་པའི་ནོར་བདུན་གྱིས་བརྒྱན་ན། །
   གོ་ཐོབ་མེད་ཀྱང་ཀུན་གྱིས་དགའ་མོས་ནི་ཆེ་བ། །
   ངོ་མ་མིན་ན་དཀོན་མཆོག་གསུམ་པོ་དེ་མཁྱེན་ནོ།།

   ཅོ་ཀ་དྲུག་འགྱུར་ལྟ་བུའི་སྐད་ངག་ཅིག་མེད་མོད། །
   ཆོ་མེད་མདོ་མེད་སྨྱོན་པའི་ལབ་བརྡོལ་གྱིས་འཇིགས་ཏེ། །
   ཇོ་མོ་བླ་རིའི་རྩེ་ནས་ཀི་རིང་ཞིག་བཏབ་པས། །
   ཉོ་ཚོང་སྲིད་པའི་ཁྲོམ་གྱི་འུར་ཟིང་དེ་ཡལ་སོང་། །

   ཏོ་རི་ལོང་བཙན་ལ་སོགས་མེས་པོ་ཡི་ཞབས་རྗེས། །
   ཐོ་གཞུང་གསེར་གྱིས་བྲིས་ལྟར་རང་སེམས་ན་གསོན་པོ། །
   དོ་ཟླ་ཀུན་བྲལ་བཙན་པོའི་རྒྱལ་རབས་ལ་བལྟས་ན། །
   ནོ་ཡོན་ཛ་སག་ལ་སོགས་བོད་མི་ལ་མི་འཛའ། །

   པོ་ཏ་ལ་ཡི་བརྗིད་ཉམས་རྒྱང་རིང་ནས་མཇལ་ཚེ། །
   ཕོ་མོ་རྒན་གཞོན་ཐམས་ཅད་ཧང་སངས་པའི་ཚུལ་དེས། །
   བོ་དྷི་ས་ཏྭ་མ་ལུས་གདན་གཅིག་ཏུ་འཛོམས་ཞེས། །
   མོ་ལུང་མི་དགོས་སུས་ཀྱང་ཐག་བཅད་ནས་བརྗོད་ཆོག །

   ཙཽ་ར་དམུ་རྒོད་རྔམ་སེམས་རྡུལ་ཕྲན་དུ་བརླག་ན། །
   ཚོ་བ་གཅིག་གཉིས་ཙམ་གྱི་ནུས་པ་ཡིས་མི་འདེང་། །
   ཛཽ་རོ་zorroགེ་སར་འདྲ་བའི་དཔའ་རྒོད་འགའ་ཡོད་ན། །
   ཝོ་བརྒྱལ་མེད་པར་བདུད་དཔུང་ལྷག་མེད་དུ་གཞོམ་ནུས། །

   ཞོ་དང་འོ་མས་གསོས་པའི་ཐུ་བྷོད་ཀྱི་བུ་ཕྲུག །
   ཟོ་སྐྱོགས་འུར་ཆ་བསྐྱུར་ཏེ་སློབ་གྲྭ་ལ་འཛུལ་ཞིག །
   འོ་ཅག་ས་སྒང་འདི་ནས་བཙན་ས་ཞིག་འཛིན་ན། །
   ཡོ་རོབ་ཨ་རི་བཞིན་དུ་སློབ་སྦྱོང་ལ་བརྩོནད་ཅིག །

   རོ་བསླང་གསེར་འགྱུར་རྩི་ཡི་གདམས་པ་ཞིག་མེད་ཀྱང་། །
   ལོ་མང་བསགས་པའི་རང་གི་ཉམས་མྱོང་ནས་བཤད་ན། །
   ཤོ་རྒྱན་ཆང་གིས་མི་ཚེ་སྟོང་ཟད་དུ་གཏོང་བ། །
   སོ་སོ་རང་གིས་རིག་པའི་དུས་ཚོད་དེ་རེད་འདུག །

   ཧོ་ཧོ་རང་མགོ་མི་ཐོན་གཞན་ལ་གདམས་པ་འདི་མཚར་ཡང་། །
   ཨོ་ཙམ་མིན་འགྲོ་བསམས་ནས་དྲ་ལམ་དུ་ཤོར་སོང་། །
   ཕྱི་ལོ་༢༠༡༣ ཟླ་ ༨ ཚེས་ ༡༧ རེས་གཟའ་སྤེན་པའི་ཉིན། སྤྱན་རས་གཟིགས་སྒོམ་བཟླའི་ཐུན་གསེང་དུ་ཅུང་ཟད་གཡེང་བའི་དབང་དུ་ཤོར་བའི་ཚུལ་གཟུགས་སུ་བསྟར་བའོ།།

2. ཉལ་ས་སྐྱིད་པོར་ཨ་ཐང་ཆད་རབས་བཤད།
   རང་ལག་མི་འགུལ་གཉེན་ལག་འགུལ་ཤིག་ཟེར།།
   རྩམ་སྐྱ་ཞིག་དང་རས་དར་དུད་བསང་ལ།།
   ཡུས་བཤད་དེ་འདྲ་རྒྱབ་ན་ཧམ་རེད།
   ལྷ་ཀླུ་གསོ་བའི་ཤེ་ཉེ་གཡོ་རྐྱལ་ཚོ།

   སྔོན་མའི་དཔའ་བོས་དཔའ་འཛིངས་བྱེད་དུས་འབོད།
   རྒྱལ་ཁ་སྟེར་བའི་སྡོང་གྲོགས་རྒྱུད་མ་ཆད།
   དེང་སང་ཝ་མོས་ཉལ་ས་སྐྱིད་དུས་འབོད།
   བོས་བོས་ས་ལ་རྒྱུག་ཡང་ཞི་གནས་རེད།
   ལྷ་སྲུང་ང་ཚོ་མ་ཐོན་མ་ཟེར་རོགས།།

3. པ་ཅིག་ཆད་འདུག་གོ།

4. ཡིད་ཆད་ལྷ་ལ་རེ་བའི་ཀ་རྩོམ་རེད་མི་འདུག་
   ཡིད་ཆད་ལྷ་ལ་རེ་བ་མེད་པའི་ཀ་རྩོམ་རེད་འདུག
   ཧ་ཧ་ཧ་ཧ

5. ལྷ་ཞིག་ཡོད་ན་རེ་བ་ཡིན་མོད།་ དོན་ལ་མེད་པ་འདྲ་བའི་ན་རེ་བ་མེད་པ་ཡང་ཡིན་ཆོག།
   གང་ལྟར་བསམ་ཚུལ་གནང་བར་ཐུགས་རྗེ་ཆེ།

6. སྨོན་ལམ་ལོག་པས་རྒྱལ་བའི་བསྟན་པ་ལ། །
   འཁུ་བའི་ནག་ཕྱོགས་གཟུགས་ཅན་གཟུགས་མེད་སྡེ། །
   བསམ་སྦྱོར་ངན་པའི་འཇུག་པ་མ་ལུས་པ། །
   མཆོག་གསུམ་བདེན་པའི་རྩད་ནས་གཅོད་གྱུར་ཅིག །འདི་སུའི་གསུང་རེད།

7. ཀ་ཁ་མི་ཤེས་རྒྱ་དམར་ཀླ་ཀློ་ཡི་ཁྱུ་ཚོགས། །ཁ་བ་ཅན་དུ་བཙན་གྱིས་འཛུལ་བའི་ཉིན་དེ་ནས། །
   ག་ལེ་ག་ལེར་ང་ཚོའི་རང་དབང་ཀུན་འཕྲོགས་སོང་། །ང་ཡིས་བལྟས་ན་བདུད་དམག་གསོན་པོ་དེ་རེད་འདུག །
   ཅ་ཅོའི་ཉོག་གཏམ་སྲིད་དོན་གཡོ་སྒྱུ་ལ་བྱང་བའི། །ཆ་རྒྱུས་དེ་ཙམ་མེད་པ་རྒྱ་ནག་གི་མི་རིགས། །
   ཇ་ཡུན་ཙམ་ལའང་སྙིང་རྗེ་ཡོད་མཁན་ཞིག་དཀོན་པས། །ཉ་གསོད་བྱ་སྲེག་སྡིག་པ་མིག་བཙུམ་དེ་སྐྱོ་བ། །
   ཏཱ་ལའི་བླ་མ་སངས་རྒྱས་མངོན་སུམ་དེ་ཡིན་ཡང་། །ཐ་ཆད་རྒྱ་མིས་སྐུ་གསུང་ཐུགས་གསུམ་ལ་བསྡོས་ཏེ། །
   ད་བར་ལས་ངན་བསགས་པ་གནམ་འོག་འདིར་མི་ཤོངས། །ན་ནིང་གཞེས་ནིང་ལོ་ནས་ཇེ་སྡུག་དང་ཇེ་ཐུ། །
   པ་ཏཱ་ལིན་八达岭 ནས་རྒྱ་ནག་ལྕགས་རི་དེ་མཐོང་སྐབས། །ཕ་མེས་བཙན་པོའི་སྟོབས་དང་ནུས་པ་དེ་དྲན་བྱུང་། །བ་ཡན་ཧ་རིའི་རྒྱུད་ནས་བོད་རྒྱ་གཉིས་འཐབ་དུས། །མ་རབས་རྒྱ་ལ་ཕམ་ཁ་ཡང་ཡང་དུ་སྤྲད་འདུག །
   ཙ་མེན་་咋们一家人་་ཁྱིམ་ཚང་གཅིག་གི་མི་ཡིན་ཞེས་ཟེར་བཞིན། །ཚ་བོ་ཚ་མོའི་འཚོ་རྟེན་ཐོན་ཁུངས་ཀུན་བཅོམས་སོང་། །ཛ་ལང་གཏུམ་སྤྱོད་ཧམ་པ་རྒྱ་ཡན་དུ་འབར་བའི། །ཝ་སྐྱེས་རྒྱ་དམར་ས་སྟེང་གདོན་རྫས་དེ་ཡིན་ནོ། །
   ཞ་ཧྭ་ཡན་ཧོང་华夏炎黄་་མེས་པོ་གོང་མ་ཚོའི་དུས་ལ། །ཟ་མ་བཟོ་མཁས་རྒྱ་རིགས་ཐབས་སྡུག་རང་མི་འདུག །འ་ར་འུར་རེ་མ་བརྟགས་དམར་ཤོག་འདི་དར་རྗེས། །ཡ་རབས་དམ་པའི་ལུགས་ཀུན་ཤུལ་མེད་དུ་བཏང་འདུག །
   རྭ་ལོ་རྡོ་རྗེ་གྲགས་དེ་དེང་སང་ཡང་བཞུགས་ན། །ལ་མོའི་རྒྱབ་ཀྱི་བདུད་ཚོགས་ཐར་ས་ཞིག་མེད་དོ། །
   ཤ་ཟ་ཁྲག་འཐུང་གདོང་དམར་ཐུ་བྷོད་ཀྱི་བུ་རྒྱུད། །ས་སྟེང་འདི་ནས་ཁྱིམ་གཞིས་ཟིན་ཐབས་དེ་དཀའ་བ། །
   ཧ་ཧ་ཧོ་ཧོ་སྣང་བ་སྐྱིད་མདོག་རེ་བྱས་ཀྱང་། །ཨ་ཕ་ཨ་མའི་ཕ་གཞིས་དྲོན་མོ་དེ་དྲན་པ། །
   ཕྱི་ལོ་༢༠༡༣ ཟླ་༨ ཚེས་༡༨ རེས་གཟའ་ཉི་མའི་ཐུན་གསེང་དུ། བྱང་ཨ་རིའི་རྒྱལ་ས་ཝ་ཞིན་ཋོན་གྱི་གནས་ཚང་གྲུ་བཞི་ནས་ཤར་མར་བྲིས།

8. ཀ་ར་སིལ་ཏོག་འཛོམས་ཚོད་སྡེར་ཁ་ཞིག་བསྒྲིགས་ཏེ། །ཁ་ཁོག་མཐུན་པའི་གྲོགས་པོ་གྲོགས་མོ་དང་མཉམ་དུ། །ག་ལེར་སེམས་གཏམ་གླེང་བའི་སྐལ་བཟང་གི་དུས་ཚོད། །ང་ཡིས་དྲན་ཐེངས་རེ་ལ་སྐྱིད་སྣང་ཞིག་ཤར་གི །
   ཅ་ལག་དངུལ་མེད་ལག་གཉིས་མཆན་སྟོང་ལ་བཅུག་སྟེ། །ཆ་མེད་རྒྱ་གར་འཕགས་ཡུལ་རྡ་ས་ལ་བརྟོལ་རྗེས། །ཇ་ཡུན་ཙམ་ལ་༧རྒྱལ་བའི་གསེར་ཞལ་དེ་མཇལ་སྐབས། །ཉ་གང་ཟླ་བའི་འཛུམ་ཞལ་སྙིང་དབུས་ནས་གྲོལ་སོང་། །
   ཏ་ཐཱ་ག་ཏའི་བསྟན་ལ་ཆུང་དུས་ནས་དད་ཀྱང་། །ཐ་མལ་ལུས་ལ་གཞན་དབང་དམར་ལུགས་ཀྱི་སློབ་གསོས། །ད་བར་ཉམས་ལེན་བྱེད་པའི་རང་དབང་ཞིག་མ་ཐོབ། །ན་མཉམ་མང་བོའི་ཆོས་སྐལ་རྒྱ་དམར་གྱིས་བཅད་སོང་། །
   པ་ཏྲའི་རི་མོ་ཙམ་ཡང་རྨོངས་དད་དུ་བརྩིས་ཏེ། །ཕ་ཆོས་རིག་གཞུང་བཟང་བོ་རིག་གསར་གྱིས་བསྣུབས་སོང་། །བ་གམ་མངོན་མཐོའི་དགོན་པ་ལྷ་ཁང་དང་གནས་ཆེན། །མཱ་ལེ་རིང་ལུགས་པ་ཚོས་གྱང་གོག་ཏུ་བསྒྱུར་སོང་། །
   ཙ་ལེང་ཧྭའོ་་ 咋俩好་་ཞེས་སྐད་ཅོར་ཁང་བ་གང་བརྒྱབ་སྟེ། །ཚྭ་སྒོག་གཡེར་གསུམ་མང་བའི་རྒྱ་ཟས་ལ་རོལ་ནས། །ཛ་ཡའི་གསུང་རབ་ཀློག་རྒྱུ་གཏིང་བརྗེད་དུ་སོང་བ། །ཝ་ལེར་བསམ་ན་སྨྱོན་པའི་མཐར་ཐུག་དེ་རེད་འདུག །
   ཞྭ་མོ་བསྐོན་ནས་མི་ངན་རིགས་བཞི་རུ་བསྙད་དེ། །ཟ་དབང་འཐུང་དབང་མེད་པར་སྐྱོན་འཛུགས་དང་རྡུང་བརྡེགས། །འ་ན་འོན་ནེ་ཞ་འཐེང་ཚེ་ལད་དུ་བསྒྱུར་བའི། །ཡ་མཱོན་མི་དགོས་བོད་མི་གསོད་གཏུབ་ཀྱི་ལོ་ཟླ། །
   ར་བ་གངས་རིས་བསྐོར་བའི་སྣོད་བཅུད་ཀྱི་སྐྱབས་མགོན། །ལ་དྭགས་ཞི་བ་ཚལ་གྱི་ཕོ་བྲང་ན་བཞུགས་འདུག །ཤ་རུས་གདུང་རྒྱུད་གཅིག་པའི་གཞིས་བྱེས་ཀྱི་སྤུན་ཟླ། །ས་ཆ་གང་ན་ཡོད་ཀྱང་གསོལ་འདེབས་ལ་རེམ་ཞིག །
   ཧ་ཅང་མཉམ་པར་མ་བཞག་ཀ་རྩོམ་གྱི་ཕྲེང་བ། །ཨ་ཁུ་གདུགས་མིང་རྒད་པོས་མཚན་དཀྱིལ་ལ་བྲིས་སོ། །
   ཕྱི་ལོ་༢༠༡༣ ཟླ་༨ ཚེས་༡༩ རེས་གཟའ་ཟླ་བའི་ཐོ་རེངས་དང་བོར།