གཏན་དུ་ཡལ་ཟིན་པའི་བྱིས་སྒྲུང་ཞིག་ཆེད་དུ་གླེང་བ།

གཅན་བཟོད་རྒྱམ།
___________

___________མཚམས་རེར་བྱིས་པ་བཞི་རེ་ལྔ་རེས་རང་རང་གི་ཁ་མཐུན་ཕྱོགས་ཀྱིས་སློབ་གྲྭའི་གྱང་རྩ་དག་དང་། ཡང་ན་གད་རྩ་དག་ན་མགོ་བོ་རིག་རིག་གིས་གཅིག་གིས་སྒྲུང་བཤད་ཅིང་གཞན་ཚོས་ཉན་བཞིན་ཡོད། ཕ་མ་དང་ནང་མིས་བཤད་པའི་སྒྲུང་རྣམས་མཁས་ཉམས་དང་བཅས་་སློབ་གྲོགས་ཚོར་བཤད་པ་དང་། སློབ་གྲྭ་ནས་གོ་བའི་སྒྲུང་རྣམས་ཕྱིར་ནང་དུ་ཡོང་ནས་རང་གི་ནང་མིར་བཤད་བཞིན་ཡོད།

ང་རང་ཆུང་ཆུང་བྱིས་པ་ཡིན་དུས། ཕ་མ་གཉིས་ཀ་གཙོས་ཕུ་བོ་དང་ཨ་ལྕགས་ཚོས་དགོང་མོའི་ནུབ་ཚ་འཐུང་ཚར་བ་དང་ཟངས་དང་དཀར་ཡོལ་བཀྲུས་རྗེས། ཚང་མ་ཚབ་ཐབ་ཐོག་ཏུ་བུད་དེ་མདོ་གདུགས་སྒྲོལ་གསུམ་ཚར་འགའ་བཏོན་རྗེས་རང་རང་གི་ཉལ་སར་འཛུལ། དེ་ནས་ཕ་མ་གཉིས་ནས་མགོ་འཛུགས་ཀྱིས་ཕུ་བོ་དང་གཅེན་མོ་ཚོས་ཕན་ཚུན་ལ་གནའ་སྒྲུང་འདྲ་མིན་བཤད་བཞིན་རང་རང་གཉིད་མ་ལོག་གི་བར་དུ་འདུག འདི་ནི་སྐབས་དེའི་ངེད་ཚང་གི་ནམ་རྒྱུན་གྱི་དགོང་མོའི་འགྲོ་ལུགས་ལྟ་བུར་གྱུར་འདུག
ངས་ཀྱང་རང་གི་ལོ་ཚོད་དང་བསྟུན་ནས་ཁོང་ཚོས་བཤད་པའི་གནའ་སྒྲུང་སྙན་མོ་དེ་དག་རེ་རེ་བཞིན་རང་བློར་ངེས་ཐབས་ལ་འབད་པ་ཡིན་ལ། སློབ་གྲྭ་ནས་ཀྱང་སློབ་གྲོགས་བྱིས་པ་ཚོ་དང་ལྷན་དུ་འཛིན་གྲྭ་ནམ་གྲོལ་དང་བར་གསེང་ནམ་ཡོད་ལ་ཕན་ཚུན་ལ་སྒྲུང་བཤད་རེས་བྱེད་ཀྱི་ཡོད།
(རི་བོང་དང་སྤྱང་ཀི) (ཨ་མ་དྲེད་མོང་དང་དྲེད་ཕྲུག་རྒྱ་ལི།) (ཨ་ཁུ་འབྲོང་དང་ཨ་མ་དྲེད་མོང་།) (ཨ་ཁུ་རི་བོང་དང་གྲོག་མ། ད་དུང་ལྟིག་ལེ་སྐྱ་ལྡིང་།) (རྒྱལ་པོ་དང་གསེར་གྱི་ལྷ་ཁང་།) (ཨ་བོ་བྱེའུ་ཆུང་དང་ཨ་ཕ་ཁྭ་ཏ།) (སྐྱ་ཀ་དང་དེ་ཕོ)་སོགས་བྱིས་སྒྲུང་འདི་དག་ནི་སྐབས་དེའི་ངེད་བྱིས་པ་ཚོས་བཤད་སྤྲོ་ལ་ཉན་འདོད་པའི་སྤྱི་ཚོགས་རང་བཞིན་ཅན་གྱི་སྒྲུང་རྐྱང་རྐྱང་རེད།
མཚམས་རེར་བྱིས་པ་བཞི་རེ་ལྔ་རེས་རང་རང་གི་ཁ་མཐུན་ཕྱོགས་ཀྱིས་སློབ་གྲྭའི་གྱང་རྩ་དག་དང་། ཡང་ན་གད་རྩ་དག་ན་མགོ་བོ་རིག་རིག་གིས་གཅིག་གིས་སྒྲུང་བཤད་ཅིང་གཞན་ཚོས་ཉན་བཞིན་ཡོད། ཕ་མ་དང་ནང་མིས་བཤད་པའི་སྒྲུང་རྣམས་མཁས་ཉམས་དང་བཅས་་སློབ་གྲོགས་ཚོར་བཤད་པ་དང་། སློབ་གྲྭ་ནས་གོ་བའི་སྒྲུང་རྣམས་ཕྱིར་ནང་དུ་ཡོང་ནས་རང་གི་ནང་མིར་བཤད་བཞིན་ཡོད།
བྱིས་པ་ཚོས་འདི་ལྟར་ཕན་ཚུན་ལ་སྒྲུང་ཤོད་རེས་བྱེད་པའི་བརྒྱུད་རིམ་ཁྲོད་སྐབས་དེའི་བྱིས་པ་རེའི་ཉུང་མཐར་ཡང་སྒྲུང་བཅོ་ལྔ་ཉི་ཤུ་རེ་མི་ཤེས་མཁན་མེད་ཟེར་ན་ཆོག སྐབས་དེའི་བྱིས་པ་ཚོའི་བཤད་བཞིན་པའི་གནའ་སྒྲུང་དེ་དག་ནི་དངོས་གནས་གནའ་སྒྲུང་རང་རེད་པས། ད་ལྟའི་ཡིག་ཐོག་ན་དེ་འདྲ་མཐོང་རྒྱུ་མི་འདུག
བྱིས་པ་ཚོ་རེ་རེ་བཞིན་ཆེར་ཆགས་པ་དང་། ཁོ་ཚོས་གནའ་བོའི་བྱིས་སྒྲུང་བསྐྱུར་ཏེ་དེང་རབས་བརྩམས་སྒྲུང་ལ་ཁ་ཕྱོགས་པ་དང་བསྟུན་ནས། སྙན་ཞིང་འཇེབས་ལ་དོན་སྙིང་ལྡན་པའི་གནའ་བོའི་བྱིས་སྒྲུང་དེ་དག་ཀྱང་གཏན་དུ་ཁོ་ཚོ་དང་ཁ་བྲལ་སོང་བ་རེད།
ཉན་སྤྲོ་ལ་བཤད་འདོད་པའི་བྱིས་སྒྲུང་དེ་དག ལོ་ངོ་ཅི་ཙམ་གྱི་རིན་ཐང་ལྡན་མིན་མི་ཤེས་པའི་བྱིས་སྒྲུང་དེ་དག ཕ་མེས་ཡང་མེས་ནས་བརྒྱུད་ཡོང་བའི་སྒྱུ་རྩལ་གྱི་བཞུར་རྒྱུན་རིང་བའི་བྱིས་སྒྲུང་དེ་དག རིག་གནས་ཀྱི་བང་ཁ་ཚད་མཐོར་སླེབས་པའི་དེང་དུས་ཀྱི་ཡིག་ཐོག་ན་མེད་པའི་བྱིས་སྒྲུང་དེ་དག ཁོར་ཡུག་དང་སྤྱི་ཚོགས་ཀྱི་འབྲེལ་བ་གསལ་བོར་མཚོན་པའི་བྱིས་སྒྲུང་དེ་དག བྱིས་པ་ཚོའི་ངག་ནས་བཤད་མཚམས་ཆད་པ་དང་ལྷན་དུ། གཏན་དུ་ཡལ་སོང་། བཙལ་ཀྱང་མི་རྙེད་པའི་མིང་གི་ལྷག་མར་གྱུར་སོང་།
ད་ནི་ངས་ཇི་ལྟར་བསམ་བློ་བཏང་ཡང་ཆུང་བྱིས་དུས་ཀྱི་བྱིས་སྒྲུང་འདི་གཅིག་པོ་ལས་གཞན་རྣམས་བཙལ་ནས་རྙེད་མ་སོང་། ངས་སྒྲུང་བཤད་རྒྱང་ང་ཆུང་དུས་ཀྱི་རྩེད་རོགས་དང་སློབ་གྲྭ་ཚོ་དྲན་འོང་གི དེ་རིང་ཁྱེད་ཚོར་གནའ་བོའི་བྱིས་སྒྲུང་འདི་ཐེངས་གཅིག་བཤད། ཁྱོད་ཚོ་ང་བྱིས་དུས་ཀྱི་རྩེད་རོགས་དང་སློབ་གྲོགས་ཆུང་ཆུང་དེ་ཚོ་ཡིན་ཁུལ་བྱས་ཨང་།
སྒྲུང་དངོས།
ཉིན་ཞིག་རི་བོང་དང་འབུ་གྲོག་མ། ལྟིག་ལེ་སྐྱ་ལྡིང་གསུམ་གྱིས་ཟྭ་བོ་བཏུས་ཏེ་ཚོད་མ་བཅོས་པ་རེད། ཁོ་ཚོས་རེ་རེ་ལ་ཚོད་མ་ཞིམ་པོ་གཅིག་རེ་བཅོས་ཏེ་ཐབ་ཏུ་བཙོས་པ་རེད།
ཅུང་ཙམ་ནས་རི་བོང་གིས། “ཡ་ད་ངས་ཚོས་ཡོད་མེད་ལ་གཅིག་ལྟ་དང་”ཟེར་བཞིན་རྣ་ཅོར་ཅོར་ངང་ཚོད་མ་གཅིག་ཟོས་རྗེས། མགོ་བོ་ཐད་དུ་གཡུག་གཡུག་བྱེད་བཞིན། “ཨིང་ཧིན། ཞིམ་པོ་ད་འདུག་སྟེ། ད་དུང་ཅུང་ཚོས་མི་འདུག”ཅེས་བཤད་པར། གྲོག་མ་དང་ལྟིག་ལེ་གཉིས་ཀྱིས་རི་བོང་ལ་ལྟ་བཞིན་ཁ་ཆུ་མིད་ཙམ་བྱས།
ཅུང་ཙམ་འགོར་རྗེས་ཡང་རི་བོང་གིས”ཡ་ད་ངས་ཚྭ་ཨེ་བྲོ་ལ་གཅིག་ལྟ་དང་”ཟེར་བཞིན་ཡང་ཚོད་མ་གཅིག་ཟོས། གྲོག་མ་དང་ལྟིག་ལེ་གཉིས་ཀྱི་སེམས་སུ། ཡང་སྙིང་ང་ཚོའི་ཚོད་མ་འདིའི་བྲོ་བ་ཅི་འདྲ་ཞིག་ཡིན་ནམ་སྙམ་བཞིན་རི་བོང་གི་གདོང་ལ་བལྟས། རི་བོང་གིས་”ཨོ་ཚྭ་ཏག་ཏག་རེད་འདུག་སྟེ། ད་དུང་ཅུང་ཚོས་མི་འདུག”ཅེས་བཤད་རྗེས་རང་སར་ལྷོད་ཀྱིས་བསྡད།
ཡུད་ཙམ་ནས་རི་བོང་གིས་གྲོག་མ་དང་ལྟིག་ལེ་གཉིས་ཀྱི་རྣམ་ཤེས་གཡང་བའི་སྐབས་དང་བསྟུན་ནས་སླར་ཡང་ཚོད་མ་གཅིག་ལྷག་ཡོད་པ་དེ་ལག་སྙོབ་ཅིག་བྱས་ཏེ་”ཨོ་ད་ཚོས་འདུག་་་་ཚོས་འདུག”ཟེར་བཞིན་ཚོད་ལ་གཅིག་པོ་དེ་ཡང་ཁྱེར་ནས་ནགས་ཀྱི་ཕྱོགས་སུ་བྲོས་སོང་།
གྲོག་མ་དང་ལྟིག་ལེ་གཉིས་ལ་ཚོད་མ་གཅིག་ཀྱང་མ་རག་སྟབས། ཁོང་ཁྲོ་ཆེན་པོ་ལངས་བཞིན་རི་བོང་གི་ར་མདར་འགྲོ་བའི་གྲབས་བྱས།
ལྟིག་ལེ་ཡིས་ཁོང་ཁྲོའི་ངང་ནས་”ང་ར་མདར་འགྲོ”ཟེར་བཞིན་ཤུལ་དུ་ལྷག་པའི་ཁུ་བ་རྣམས་བཏུང་ཡག་བྱས་པས་གྲོད་པ་རིལ་རིལ་ཆགས་ནས་འགུལ་ཡང་མ་ནུས་པ་རེད།
གྲོག་མས་ལྟིག་ལེ་ལ་ལྟ་བཞིན། “ད་ཁྱོད་འགུལ་ཡང་མི་ཐུབ་པས་ར་མདར་ཇི་ལྟར་འགྲོ དེ་བས་ང་འགྲོ”ཟེར་བཞིན་གྲོད་པ་སྟོང་བའི་སྟེང་དུ་སྐེད་རག་བཅིངས་ཏེ་བསྡམས་བསྡམས་པས་མགོ་ལུས་ཆད་ལ་ཁད་པར་གྱུར་བ་དང་། མཐར་ཁོ་གཉིས་ཀར་ཚོད་མ་མ་རག་པའི་སྟེང་དུ་ར་མདར་ཡང་འགྲོ་མ་ཐུབ་པར་ལྷག་པ་རེད།

ཐ་སྙད་གསལ་འགྲེལ།
༡ ཚོད་མ། མོག་མོག
༢ ལྟིག་ལེ། ལུག་ཤིག་གམ། དབྱར་ཁར་ཟོག་ལུག་གི་རྒྱབ་ཏུ་ཡོད་པའི་འབུ་རིལ་རིལ་ཞིག་གི་མིང་ཡིན།

༢༠༠༩ལོའི་སྤྱི་ཟླ་༡༡པའི་ཚེས་༣༠ཉིན་ཡི་གེར་ཕབས་པ་འདིས་ཀྱང་བོད་གངས་ཅན་པའི་བྱིས་པ་སྣབས་ལུག་ཚོའི་སྐད་ཡིག་ཡར་རྒྱས་ལ་ཅུང་ཟད་ཕན་པའི་རྒྱུར་གྱུར་ཅིག