མདང་དགོང་གྲོགས་པོ་སྨན་པ་ཞིག་གི་གཉེན་སྟོན་སྔོན་འགྲོའི་རྟེན་འབྲེལ་དུ་བོས་པ་ལྟར་དེར་སོང་། དེར་སོང་བ་ན་རྟེན་འབྲེལ་དེ་ནི་ནམ་རྒྱུན་གྱི་གཉེན་སྟོན་བྱེད་སྒོ་ཞིག་མིན་པར་གུར་ཆུང་ངམ་རྔུལ་ནག་ཁང་ sweat lodge དུ་བསྡད་དེ་ལུས་རྔུལ་འདོན་པའི་ལམ་ནས་ལུས་སེམས་ཀྱི་ནད་གྲིབ་གསོ་བཅོས་བྱེད་
པའི་བྱེད་སྒོ་ཞིག་རེད་འདུག
དྲོད་ཚད་ ༨༢ ལྷག་ཡིན་པའི་མལ་ཌི་སིན་གྲོང་ཁྱེར་ལས་ཅུང་ཁད་རིང་བའི་ནུབ་ཕྱོགས་སུ་ཡོད་པའི་ཤིང་
ནགས་མཐུག་པའི་གསེབ་ཅིག་ཏུ་སོག་པོའི་གུར་དབྱིབས་ལྟ་བུའི་གུར་ནང་ངོས་འགྱིག་ཤོག་དང་ཕྱི་ངོས་ཀམ་པ་ལི་གཡོགས་པ་ཞིག་ཕུབ་འདུག གུར་འདབ་ས་ཡིས་མནན་ཞིང་སྒོ་ཡང་ཆུང་ཆུང་ཞིག་ལས་མི་འདུག གུར་གྱི་ཕྱོགས་གཅིག་ཏུ་མེ་ཕུང་སྤར་ཏེ་ལྷོ་ཌེཀོ་ཊ་མངའ་སྡེ་ནས་འཁྱེར་ཡོང་བའི་རྡོ་ལག་པའི་འཁྱོག་ཙམ་མང་པོ་ཞིག་ཚ་བསྲེག་བྱེད་བཞིན་འདུག གུར་སྒོའི་མདུན་དུ་ས་ཐོ་ཞིག་གི་སྟེང་ཤིང་རྒྱུག་ཞིག་བརྩངས་འདུག་པར་དེའི་རྩར་ཤུག་པ་དང་སྤྲ་བ། ཨ་རིའི་རྒྱལ་དར། རིན་ཆེན་རྡེའུ། བྱིན་ཅན་རྟེན་སྐལ་ཆུང་ངུ་རེ་བཞག་འདུག
ང་ཚོ་མི་བཅུ་ལྷག་འདུག ཨ་རིའི་ཨིན་ཌི་ཨིན་མི་ཕོལ་འབོད་པ་ཞིག་འདུག ཁོ་རྟེན་འབྲེལ་བྱེད་སྒོ་འདིའི་གཙོ་སྐྱོང་བ་རེད་འདུག ཁོས་དང་པོ་ས་ཐོའི་ཤིང་རྒྱུག་ལ་གུས་ཕྱག་དང་བཅས་ཨིན་ཌི་ཨིན་སྐད་དུ་སྨོན་ལམ་གསོལ་འདེབས་བཏབ་ཏེ་ཤིང་བཟོས་རྭ་ཙེ་རིང་པོ་ཞིག་ནས་རྟེན་འབྲེལ་ཚུལ་དུ་དུ་བ་ཕུ་རེ་འཐེན་ཏེ་ཕྱོགས་བཞི་མཚམས་བརྒྱད་ལ་ཕུལ། དེ་ནས་ཁོ་རང་གིས་འགོ་ཁྲིད་དེ་མི་བཅུ་བོ་གོག་འགྲོས་ཀྱིས་གུར་སྒོ་ནས་འཛུལ་ཏེ་གུར་འདབ་ནས་ས་ཐང་དུ་ཙོག་པུར་སྡོད་དུ་བཅུག སྐྱེས་པ་ཚོས་རྐང་ཐུང་མ་གཏོགས་གོན་མི་ཆོག་པ་དང་བུད་མེད་ཚོས་འཇར་མ་རིང་པོ་དང་སྟོད་གོན་ཐུང་ཐུང་ཞིག་གོན་ཆོག གུར་ནང་ནས་སྐད་ཆ་ཅི་ཡང་བཤད་མི་ཆོག ལུས་ལ་ཆུ་ཚོད་དང་ཁ་པར་ལག་གདུབ་སོར་གདུབ་སོགས་ཅི་ཡང་ཐོགས་མི་ཆོག གཙོ་སྐྱོང་ཕོལ་གྱིས་རྔ་ཐེངས་རེ་བརྡུང་བ་དང་ཨིན་ཌི་ཨིན་སྐད་དུ་སྨོན་ལམ་ཐེངས་རེ་བཏབ། ས་རིམ་བཞིན་རུབ།གུར་ནང་ཇེ་ནག་ཇེ་འཐོམས་སེ་སོང་། དབུགས་ཀྱང་གཏོང་དཀའ་བར་གྱུར། གུར་དཀྱིལ་དུ་ས་དོང་ཞིག་བྲུས་འདུག
དེ་ནས་ཅུང་ཕྱིན་པ་དང་གཙོ་སྐྱོང་བ་ཕོལ་གྱིས་ཕྱི་ལོགས་ཀྱི་མི་ལ་མེར་བསྲེགས་རྡོ་ཚ་བོ་ཁག་ཅིག་གུར་ནང་འཁྱེར་ཤོག་ཅེས་སྐད་སྦྱིན། ཁོས་རྡོ་ཚ་བོ་རེ་རེ་བཞིན་ས་དོང་དུ་བཞག་སྟེ་གཞན་ཞིག་ལ་ཤུག་སྐམ་ཅུང་ཟད་རེ་བཏབ་ཏུ་བཅུག་པར་ཚ་ཙག་ཙག་བྱེད། དྲོད་ངམ་གྱིས་གདོང་ཡང་ཚ་ལམ་མེ་བྱེད། རྡོ་ནི་ད་རུང་དམར་ལམ་མེ་བསྡད་འདུག དེ་ནས་ཁོས་མི་ཚང་མར་སེམས་ཕྱི་ལ་མ་གཡེང་ནང་དུ་ཆུག ཤ་མ་སྒྲིམ་རྩ་དྲང་པོར་ལྷོད། རང་གི་ཕ་མེས་ཡང་མེས་དང་སྐྱབས་གནས་ལ་གསོལ་བ་སྨོན་ལམ་ཐོབ་ཅེས་བཤད། དེ་ནས་རྔ་ཞིག་ལ་དབྱུ་གུས་སྣུན་ཞོར་ཨིན་ཌི་ཨིན་སྐད་དུ་བཀྲ་ཤིས་པའི་གཞས་ཤིག་བཏང་། དེ་ནས་འཁྲིས་ཀྱི་དུང་བན་ནང་ནས་ཆུ་སྐྱོགས་རེ་རྡོ་ཚ་བོ་སྒང་གཏོར། སྐར་གཅིག་ཀྱང་མ་འགོར་བར་ངའི་ལུས་ཡོངས་ལ་དྲོད་ལམ་ངར་འཁྱུག་འཁྱུག་བྱེད། རིམ་བཞིན་ག་ས་གང་ནས་རྔུལ་ནག་བཞུར། རྔུལ་ནག་བཞུར། ཆུ་རྡོག་པོ་ག་ས་ག་ནས་མར་འཛར། དེ་ནས་ཁོས་དབྱིན་སྐད་དུ། སེམས་གཅིག མི་གཅིག་ ངག་གཅིག རྭ་ཙེ་གཅིག་(ཨིན་ཌི་ཨིན་སྐད་ལ་ཆེ་ནོ་པ་) ཧོ་ལོ་ལོ་ཞེས་སྒྲོག་བཞིན་མི་ཚང་མས་དེ་ལྟར་མགྲིན་གཅིག་ཏུ་སྒྲོགས
དེ་ནས་ཁོས་སོ་སོ་ལ་བསམ་ཚུལ་དང་ཚོར་སྣང་ཅི་ཡོད་འཛེམས་ཟོན་མེད་པོར་བཤད་ཤོག ཡང་ན་བག་གསར་གཉིས་ལ་ཤིས་ཚིག་རེ་བཤད་ཀྱང་འགྲིག་ཟེར། རིམ་བཞིན་མི་རེ་རེས་རང་གི་མྱོང་ཚོར་རེ་བཤད། ངས་ཀྱང་བསམ་བློ་གང་འཚམས་བཏང་སྟེ་མདོར་བསྡུས་ཤིག་བཤད། གུར་ནང་ནག་འཐིམས་སེ་བསྡད་ཡོད།
སྐར་མ་ ༡༥ ཙམ་རྗེས་རྡོ་ཚ་བོ་རིམ་པ་གཉིེས་པ་སྔ་མའི་རྡོ་སྟེང་བཞག སླར་ཡང་རིམ་པ་དང་པོའི་འགྲོ་སྟངས་ཆ་ཚང་ཐེངས་གཅིག་སོང་། ཐེངས་འདིའི་གཞས་ནི་ཕ་མེས་ཡང་མེས་དྲན་གསོ་ཆེད་འདུག མི་ཚང་མས་ཕ་མེས་སྐོར་ལ་མྱོང་ཚོར་རེ་བཤད། ངའི་ལུས་ནས་རྔུལ་ནག་མང་ཙམ་བཞུར།
རྡོ་ཚ་བོ་རིམ་པ་གསུམ་པ་སླེབས། སྔོན་ལྟར་གཙོ་སྐྱོང་བ་ཕོལ་གྱིས་གསོལ་འདེབས་སྨོན་ལམ་བཏབ། རྔ་བརྡུངས། སྨན་བཅོས་སྐོར་གྱི་གཞས་བཏང་། མི་ཚང་མས་ནད་གསོ་སྨན་བཅོས་སྐོར་ལ་ཚིག་རེ་བཤད། ངའི་ལུས་ནས་རྔུལ་ནག་སྔར་ལས་མང་ཙམ་བཞུར། ཕལ་ཆེར་ལི་ཀྲི་གཅིག་བཞུར་ཡོད་སྙམ།
མི་ཚང་མས་ངག་བསྡམ། ཕྱི་བསྐྱོད་བྱེད་མི་ཆོག
རྡོ་ཚ་བོ་རིམ་པ་བཞི་བ་སླེབས། རིམ་པ་སྔ་མའི་བྱེད་སྟངས་ཚང་མ་སླར་ཡང་ཐེངས་གཅིག་སོང་། ད་ཐེངས་རྡོ་ཚ་བོ་མང་པོ་སྤུངས་ཡོད་པས་གུར་ནང་གི་དྲོད་དེ་ཇེ་ཆེ་ནས་ཇེ་ཆེར་སོང་། ཆུ་ཅི་ཙམ་མང་བ་གཏོར་བ་དེ་ཙམ་གྱིས་དྲོད་ངམ་ཆེ་རུ་སོང་། ལུས་ནས་རྔུལ་ནག་བཞུར་མང་དུ་སོང་།
དེ་ལྟར་ཆུ་ཚོད་གཉིས་ཙམ་གུར་ནང་བསྡད་། དབུགས་རིང་ལེན་དང་གཏིང་ལེན། ལུས་པོ་སྤྲུགས་སྤྲུགས་ཐེངས་འགའ་བྱས། དེ་ནས་གཙོ་སྐྱོང་བ་ཕོལ་གྱིས་མི་ཚང་མར་ད་ཕྱི་ལོགས་ལ་འགྲོ་ཆོག གུར་ནང་གི་བྱེད་སྒོ་ཚར་སོང་ཞེས་སྒྲོགས། སླར་ཡང་མི་རེ་རེ་བཞིན་གུར་ནང་ནས་གོག་འགྲོས་བྱས་ཏེ་གུར་ཕྱིར་ཐོན། ངའི་ལུས་པོ་ཇེ་ཡང་དང་སེམས་བག་ཇེ་ལྷོད་དུ་སོང་འདུག མི་གཞན་པ་ཚོའི་མྱོང་བ་ཇི་འདྲ་ཡིན་མི་ཤེས་མོད། ཕལ་ཆེར་བདེ་མོ་བྱུང་ཡོད་མདོག་རེ་སྟོན་བཞིན་འདུག
དེ་ནས་གཙོ་སྐྱོང་བས་མཇུག་བསྡུའི་གསོལ་འདེབས་སྨོན་ལམ་བཏབ་སྟེ་རྭ་ཙེ་རིང་པོ་དེ་འཐེན་བཞིན་སླར་ཡང་ཕྱོགས་བཞི་མཚམས་བརྒྱད་ལ་ཕུ་རེ་ཕུལ། དེ་ནས་མི་རེ་རེས་རེས་མོས་ཀྱིས་རྭ་ཙེ་དེ་ལག་ཏུ་བླངས།
རྔུབ་འཐེན་རེ་བྱས་ཏེ་ཡར་བལྟ་བཞིན་དུ་བསངས་གནམ་རྒན་མ་ལ་ཕུལ་བའི་ཚུལ་བྱས།
གཉེན་སྟོན་སྔོན་འགྲོའི་བྱེད་སྒོ་འདི་ལྟར་གྲོལ། རིམ་པས་རྒྱུན་གོན་གྱོན་གོས་གོན། ཆུ་ཚོད་ལ་བལྟས་པར་
མཚན་གྱི་ཆུ་ཚོད་ ༡༡།༣༠ རེད་འདུག དེ་ནས་དེར་གོ་སྒྲིག་བྱས་པའི་ཨ་རིའི་ནུབ་ཚ་དེ་ཟོས། ཁྱིམ་དུ་
ལོག་སྟེ་གཉིད་སྐྱིད་ཅིག་ཡུར།