ང་རྒྱལ་གྱི་དཔལ་གླུ་དགྱེས་པ་རྡོ་རྗེའི་རང་གཤིས་ཨཱ་ལི་ཀཱ་ལིའི་སྒྲ་དབྱངས།

ཨེ་མ་ཧོ།

ན་མོ་མ་ཧཱ་གུ་རུ་ཤྲྰི་ཨ་ནནྟ་བཛྲ་ཡེ།།
ཀ་དག་ཆོས་ཉིད་གཟིགས་པའི་རྫོགས་སངས་རྒྱས།།
ཁ་བའི་བསྟན་སྲིད་འཛིན་པའི་བཀའ་གཏེར་ཆོས།།
ག་ས་གང་དུ་བཞུགས་པའི་དགེ་འདུན་སྡེ།།
ང་ཡི་སྐྱབས་གནས་དམ་པར་སྙིང་ནས་གུས།།
ཅ་ཅོའི་འདུ་འཛིས་དབེན་པའི་ཞིང་ཁམས་འགྲིམས།།
ཆ་ལུགས་གང་བྱུང་མཛད་པའི་སྤྱོད་པ་གཤེགས།།
ཇ་ཆང་འདོད་ཡོན་རོལ་བའི་ཚོགས་འཁོར་པ།།
ཉ་གང་ཟླ་ལྟར་བླ་མ་ང་མིན་སུ།།
ཏ་ཐཱ་ག་ཏའི་བསྟན་པའི་སྙིང་པོ་དགོངས།།
ཐ་སྙད་ཤེས་བྱའི་གནས་ཀུན་མ་འདྲིས་མཁྱེན།།
ད་ལྟའི་དུས་རབས་འཚམས་པའི་མཁས་གྲུབ་རྗེ།།
ན་གཞོན་དཔལ་དགྱེས་རྡོ་རྗེ་ང་མིན་སུ།།
པ་ར་མི་ཏའི་ཕྱིན་དྲུག་སྤྱོད་པར་བརྩོན།།
ཕ་མེས་རིག་གཞུང་ཚུལ་བཞིན་འཛིན་སྐྱོང་སྤེལ།།
བ་ཀུ་ལ་ལྟར་གནས་བརྟན་སྡེ་སྣོད་འཛིན།།
མ་ལུས་འགྲོ་བའི་མགོན་པོ་ང་མིན་སུ།།
ཙ་ན་ཀའི་རྒྱལ་ལུགས་བཞིན་གསོ་བྱེད་པ།།
ཚ་གྲང་དཀའ་སྤྱད་དམ་པའི་ཆོས་ལ་མཛད།།
ཛ་ཡའི་བསྟན་པ་འཛིན་པའི་སྤྲུལ་པའི་སྐུ།།
ཝ་ཡེར་རིགས་པའི་རྒྱལ་པོ་ང་མིན་སུ།།
ཞ་ལོང་ལྐུགས་པའི་མ་རིག་གཏི་མུག་དབེན།།
ཟ་ཧོར་མཁན་ཆེན་ཐུགས་ཀྱི་རྒྱན་ཏུ་ཤར།།
འ་ཅག་ཕན་བདེའི་གསང་ཆེན་བསྟན་པའི་བདག །
ཡ་མཚན་ཀུན་བཟང་བླ་མ་ང་མིན་སུ།།
ར་ལྟར་གྱོང་བའི་རྣམ་རྟོག་ཞི་བས་བརྟུལ།།
ལ་རྒྱའི་བྱང་ཆུབ་སེམས་ལ་མངའ་དབང་འབྱོར།།
ཤ་ཆང་བདུད་རྩི་རོལ་མཁས་མ་ཎི་ཀ །
ས་ཐོབ་གྲུབ་པའི་རིག་འཛིན་ང་མིན་སུ།།
ཧ་ཤང་བདེན་པའི་རང་ཚུགས་མ་ཤོར་ནས།།
ཨ་ཏིའི་ཟབ་དོན་མྱོང་བའི་སྐལ་བཟང་གཏམ།།
ཨི་ལྡན་དབྱངས་གསལ་རྒྱན་པའི་རྣམ་ཐར་འདི།།
ཨུ་ཚུགས་མིན་པར་མགྲིན་པའི་ལམ་ནས་ཐལ།།
ཨེ་མ་བརྒྱུད་གསུམ་བླ་མའི་བྱིན་རླབས་ཅན།།
ཨོ་རྒྱན་ཧེ་རུ་ཀ་པའི་ཕྲིན་ལས་མཛོད།།
སྣང་སྲིད་དབང་བསྒྱུར་པདྨ་གླིང་པའི་གར།།
རིག་འཛིན་མཁན་ཆེན་བླ་མ་ང་མིན་སུ།།
ངེས་འབྱུང་རྣལ་མའི་སྡོམ་པ་ཕུན་སུམ་ཚོགས།།
བྱང་ཆུབ་སེམས་ཀྱི་རང་བཞིན་བཅོས་མིན་ལྡན།།
སྣང་སྲིད་རྣམ་དག་གཟིགས་པའི་ཆོས་མཆེད་ཀུན།།
ཀུན་བཟང་བསྟན་སྲིད་དམ་པ་རྒྱལ་གྱུར་ཅིག །

ཅེས་པ་འདི་ཡང་རབ་རྒྱན་ཆུ་སྦྲུལ་ཆུ་སྟོད་ཟླ་བའི་དུས་བཟང་ལ་ཆོས་མཆེད་ཞིག་གིས་ཟུར་ཟ་དང་སྡུག་གཏམ་ལོང་བ་གང་བཤད་པ་མཐོང་བའི་མོད་ལ་གང་དྲན་བྱུང་རྒྱལ་ཏུ་རིག་འཛིན་ཨེ་མ་ཧོས་ཆོས་དཔལ་རིག་པའི་ལོངས་སྤྱོད་མཁའ་ལྟར་ཡོངས་པའི་རྒྱལ་ཁབ་དབྱིན་ཡུལ་ཝ་ཡེལ་ཀུན་བཟང་ཆོས་གླིང་ནས་བྲིས་པ་དགེའོ། དགེའོ། དགེའོ།། །།