སེར་ཤུལ་རིན་ཆེན་དོན་གྲུབ།
གུས་པའི་རྩོམ་དེབ་༼རྟོག་འགྱུའི་ང་རོ།༽གསར་དུ་པར་འགྲེམས་བྱས་ཡོད། འདི་ནི་བདག་གི་རྩོམ་ཡིག་དེབ་ཕྲེང་གསུམ་པ་དེ་ཡིན། རྩོམ་དེབ་འདིར་དད་པའི་དབྱངས་དང་། ལ་རྒྱའི་དབྱངས། དཔྱོད་པའི་དབྱངས། ཚོར་བའི་དབྱངས། བཅས་ཚན་པ་བཞི་ཡིས་གྲུབ་ཡོད་པ་དང་། ཤོག་ངོས་༡༣༥ ཡོད། རྩོམ་དེབ་འདི་ནི་དད་སེམས་དང་། ལ་རྒྱ། དཔྱོད་ཞིབ། ཚོར་བ་བཅས་ཀྱི་བརྗོད་གཞི་བྱས་ཤིང་། གསར་བཅད་རྣམ་པའི་ཚིག་འགྲོས་ཀྱི་རང་བཞིན་ལྡན་པའི་དཔྱད་བརྗོད་སྙན་ངག་ཕྱོགས་བསྒྲིགས་བྱས་པ་ཞིག་ཡིན། བདག་གིས་དེབ་འདིར་དཔྱད་བརྗོད་སྙན་ངག་ཕྱོགས་བསྒྲིགས་ཞེས་ཐ་སྙད་གསར་བ་ཞིག་བེད་སྤྱོད་བྱས་ཡོད། རྒྱུ་མཚན་ནི་ཚིག་གི་སྦྱོར་འགོད་ཀྱི་རང་བཞིན་གང་ཐུབ་ཀྱིས་སྙན་ངག་གི་ཉམས་ཀྱིས་ཕྱུག་པར་འབད་བརྩོན་བྱས་པ་དང་ལྷན་དུ། བརྗོད་དོན་ནི་དཔྱད་ཞིབ་རང་བཞིན་དང་། ལམ་སྟོན་རང་བཞིན། འདོར་ལེན་རང་བཞིན་བཅས་ཀྱིས་དཔྱད་པའི་རྣམ་འགྱུར་་མངོན་པར་བྱས་ཡོད་པས་ཡིན། དེབ་ཆུང་འདི་༸གོང་ས་མཆོག་གི་སྐུའི་འཁྲུངས་སྐར་ཉིན་སེར་བྱེས་བྱ་བྲལ་ཁང་ཚན་དུ་ཚོགས་པའི་༸གོང་ས་༸སྐྱབས་མགོན་ཆེན་པོ་མཆོག་གི་མཛད་རྣམ་དང་འབྲེལ་བའི་བགྲོ་གླེང་གི་མཛད་སྒོའི་ཐོག་སྐུ་བཅར་རྣམ་གྲྭ་མཁན་རིན་པོ་ཆེ་མཆོག་གིས་དབུ་འབྱེད་གནང་ཡོད།
བླ་སྲོག་གི་གཟི་ཉམས་དཔྱོད་ཤེས་ཀྱིས་མྱོང་དགོས།
རང་རྩོམ་དེབ་ཕྲེང་གསུམ་པ་(རྟོག་འགྱུའི་ང་རོའི་)སྔོན་གླེང་དུ།
གཅིག
སྙན་ངག་གིས་མིའི་སེམས་ཁམས་ཀྱི་མཛེས་པ་མཐོར་འདེགས་བྱེད་པའི་གནས་ལུགས་ཀྱི་གོ་དོན་རྟོགས་མཁན་ནི་སྐད་ཡིག་འདི་བཀོལ་སྤྱོད་བྱེད་མཁན་གྱི་གྲས་ན་གྲངས་ཀ་ཉུང་ཉུང་ཞིག་རེད། རྒྱུ་མཚན་དེའི་དབང་གིས་ཕལ་མོ་ཆེས་སྙན་ངག་གི་དགའ་མོས་ལ་ཡིད་ཕྱོགས་པ་ལས་འདོར་ལེན་རང་བཞིན་དང་མྱོང་ཞིབ་རང་བཞིན་གྱིས་སྙན་ངག་གི་མཛེས་ཡོན་འཚོལ་ཞིབ་བྱེད་ཀྱི་མེད། མཚམས་འདིར་སླེབ་སྐབས་རང་གིས་རང་གི་སྙན་ངག་གི་དགེ་མཚན་འགྲེལ་དགོས་པའི་གནས་སྟངས་ཀྱང་ཡོང་བཞིན་པར་མངོན། འོན་ཀྱང་ངས་ནི་བྱེད་སྟངས་དེ་དག་ལས་ལྡོག་པའི་ལྟ་ཚུལ་གྱི་རང་ཚུགས་བཟུང་སྟེ་རང་ཉིད་ཀྱི་སྙན་ངག་ལ་མཛེས་ཡོན་དང་། ཚོར་བའི་རྣོ་མྱུར། སེམས་ཁམས་གཡོ་འགུལ་ཐུབ་པའི་སྙན་ངག་གི་ནུས་པ་ཡོད་རབས་སོགས་རྒྱས་གླེང་བྱེད་འདོད་མེད་ལ་ཕྲན་བཤད་དང་ཕྲན་དཔྱད་སོགས་ཀྱི་མིང་འོག་ནས་རང་གི་ཚོར་བ་དང་རང་གི་སྙན་ངག་གི་དགེ་མཚན་གླེང་འདོད་མེད། རྒྱུ་མཚན་ནི་རང་གི་སྙན་ངག་གི་མཛེས་ཡོན་དང་། སྙན་འགྱུར། དབྱངས་གྲོས། ཡིད་འགུགས་རང་བཞིན་དང་། སྒྱུ་རྩལ་རང་བཞིན་གྱི་མཛེས་ཆ་དེ་ཚོ་ནི་སྙན་ངག་འབྲི་མཁན་རང་ཉིད་ཀྱིས་གླེང་དགོས་པ་དེ་མ་ཡིན་པར་སྙན་ངག་ཀློག་མཁན་གྱིས་གླེང་དགོས་པ་དང་མྱོང་དགོས་པ་དེ་ཡིན་པས་སོ།། སྙན་ངག་གི་བསམ་བློའི་འདུ་ཤེས་སེམས་ཁམས་སུ་གྲུབ་མེད་པའི་སྤྱི་ཚོགས་ཤིག་ལ་མཚོན་ན་སྙན་ངག་ལས་སྒོར་མོ་རྩ་ཆེ་བ་དང་། སྙན་དེབ་ལས་ཟས་རིགས་གལ་ཆེ་བའི་བསམ་བློ་ཡོད་པ་སྨོས་མེད་རེད། རྒྱུ་མཚན་དེས་དབང་གིས་སྙན་ངག་འབྲི་མཁན་དང་སྙན་དེབ་རྩོམ་པ་པོ་ཆེས་མང་པོ་ཞིག་གིས་རང་གིས་རང་གི་སྙན་ངག་ལ་འགྲེལ་བཤད་དང་བསྐྱར་བཤད་བྱ་དགོས་བྱུང་བའང་ཁག་མེད་པའི་ཚོད་དུ་རེད། འོན་ཀྱང་ངས་རང་ཉིད་ཀྱི་འབད་འབུངས་ཀྱི་གྲུབ་དོན་དང་བསམ་བློའི་མཛེས་བཀོད་ཀྱི་ཟུར་ཆར་གཏོགས་པའི་སྙན་ངག་འདི་ཚོ་སྒྱུ་རྩལ་སེམས་ཁམས་ཀྱི་ནུས་སྟོབས་ཀྱི་ཚད་གཞི་གང་འཚམ་སླེབ་པའི་ཀློག་པ་པོ་དག་གིས་ལེགས་དང་ཉེས་ཀྱི་སྤྱོད་ཡུལ་དུ་གཤམ་འདོད་པ་ལས་རང་གིས་རང་བསྟོད་པའི་རང་འགྲེལ་རྩོམ་པ་པོ་ཞིག་བྱེད་འདོད་གཏན་ནས་མེད། དེའི་ཕྱིར་སྙན་ངག་འདི་དག་ལ་རོལ་མྱོང་གིས་མཇུག་འབྲས་བརྗོད་པའི་འགན་འཁྲི་ནི་རྣམ་དཔྱོད་དང་སྙན་ངག་གི་སེམས་ཁམས་ལྡན་པའི་ཀློག་པ་པོ་ཚོའི་ལས་སྐལ་དུ་བཞག་ཡོད།
གཉིས།
སྒྱུ་རྩལ་སེམས་ཁམས་ཀྱི་ནུས་པ་ལྡན་པའི་ཀློག་པ་པོ་མེད་པའི་སྡུག་ཡུས་འདི་སྙན་ངག་འབྲི་མཁན་དག་གིས་ཡང་དང་ཡང་དུ་གླེང་བཞིན་པ་དེ་རྒྱུན་ལྡན་ལྟ་བུར་སྣང་མོད་སྡུག་བཤད་འདི་མུ་མཐུད་དེ་ཡང་ཟློས་བསྐྱར་ཟློས་བྱེད་པ་ལས་སྙན་ངག་འབྲི་མཁན་དག་གིས་ནམ་ཡང་རང་ཉིད་ཀྱི་བསམ་བློའི་བཟོ་བཀོད་དང་། འཚོ་བའི་མྱོང་ཞིབ། སྒྱུ་རྩལ་ཆེད་སྦྱོང་སོགས་ཀྱི་ནུས་པ་ཞན་པའི་ཆ་དེར་ངེས་པར་དུ་དོ་སྣང་བྱ་དགོས་པའང་གནད་འགག་ལས་ཀྱང་གནད་འགག་རེད། དེའི་ཕྱིར་ངས་ད་དུང་རང་ཉིད་ཀྱི་སྙན་ངག་གི་བཟོ་བཀོད་དང་། སྒྱུ་རྩལ་གྱི་ཆ། སྒྲིག་སྦྱོར་གྱི་ཆ། ཡིད་འགུགས་ཀྱི་ཆ་སོགས་ཕྱོགས་གང་ནས་ཀྱང་ཡར་རྒྱས་གཏང་དགོས་པའི་ཆ་མང་པོ་ཞིག་ཡོད་པའི་གནས་ལུགས་དེར་དུས་ནམ་ཡངདང་ལེན་བྱེད་ཀྱི་ཡོད། དང་ལེན་འདི་དང་ལྷན་དུ་རང་གི་སྙན་ངག་གི་སྒྱུ་རྩལ་མྱོང་རོལ་ཐུབ་པའི་ཀློག་པ་པོ་ཆེས་མང་པོ་ཞིག་ཀྱང་སྐབས་དང་དུས་ལ་འཚང་ཁ་ཤིག་ཤིག་གིས་ཡོང་བ་དང་དེ་དག་ལ་བདག་གིས་སྙན་ངག་གི་བྲོ་བ་མངར་མོ་རེའི་ལེགས་སྐྱེས་འབུལ་ཐུབ་པའི་ཡིད་ཆེས་བྱེད་ཀྱི་ཡོད། ཡིད་ཆེས་འདི་དང་དགའ་ཕྱོགས་འདིས་ད་སྐབས་ཡང་བདག་གི་དེབ་ཕྲེང་གསུམ་པ་༼རྟོག་འགྱུའི་ང་རོ༽་རེ་བ་དང་། ཡིད་ཆེས། བློ་སྟོབས། བལྟོས་བཅས་ཀྱི་སྒྱུ་རྩལ་དང་མཛེས་སྡུག གནས་ལུགས་དང་ངར་ཤུགས་བཅས་ཀྱིས་ལམ་ལ་ཆས་པའི་ཚུལ་འདིར་ཞུགས་པ་ཡིན།
གསུམ།
མ་གཞི་བདག་རྩོམ་ཡིག་འབྲི་བཞེངས་ཀྱི་ལམ་ཁ་དེར་ཞུགས་ནས་མི་ལོ་བཅུ་ཕྲག་ཙམ་འདས་ཟིན་མོད་རང་ཉིད་ཀྱི་རྩོམ་འབྲི་ནུས་ཤུགས་ཀྱི་ཆ་དང་། སྒྱུ་རྩལ་གྱི་ཆ། གོ་རྟོགས་ཀྱི་ཆ། གནས་ལུགས་དམར་འགྲེལ་གྱི་ཆ། ཚོལ་ཞིབ་འདོར་ལེན་གྱི་ཆ་སོགས་ཀྱིས་རང་ཉིད་བླ་ན་མེད་པ་ཞིག་དང་། གོང་ན་མེད་པ་ཞིག ཕུལ་དུ་བྱུང་བ་ཞིག་ཡིན་བསམ་མྱོང་མེད། རེད་དེ། སྒྱུ་རྩལ་སེམས་ཁམས་ཀྱི་མཛེས་བཀོད་སྦྲུམ་པའི་སྙན་ངག་དང་། དཔྱོད་ཤེས་དང་གོ་རྟོགས་ཀྱི་གཙུབ་བརྡར་ཁྲོད་ནས་འབྲི་བཞེངས་དང་འགྲེམ་སྤེལ་བྱས་པའི་བདག་གི་རྩོམ་ཡིག་ཁག་ཅིག་ལ་སྔ་ཕྱི་རིམ་པར་བྱ་དགའ་གཟེངས་བསྟོད་ཐོབ་པ་དང་། ཀློག་མཁན་གང་མང་ཞིག་གིས་ཀྱང་གདེང་འཇོག་སྐུལ་སློང་བྱས་པ་དང་། རང་ཉིད་ཀྱི་འཇོན་ནུས་ལ་མངོན་པར་བསྟོད་པའི་རང་གཤིས་དང་ང་རྒྱལ་དག་གིས་ཀྱང་སྐུལ་དེད་འོག་ནས་ཀྱང་འདི་ལྟར་ཡང་བསྐྱར་ལམ་བུ་འདི་བརྒྱུད་ནས་བསྙེག་འགོ་བརྩམས་པ་ཡིན། ངས་ནམ་རྒྱུན་ནས་རྩོམ་ཡིག་འབྲི་བ་ནི་ཅི་ཞིག་གི་ཆེད་དུ་ཡིན་པ་དེར་བསམ་བློ་བཏང་མྱོང་། བསམ་བློ་གཏོང་ཐེངས་རེར་ང་ལ་རྙེད་པའི་ལན་ནི་ཆེ་ས་ནས་མིའི་རིགས་ཀྱི་འཚོ་བའི་དགོས་མཁོ་དང་། སློབ་གསོའི་སྣེ་འཁྲིད་ལེགས་བཅོས་ཀྱི་བྱ་བཞག་གི་ཐད་ལེགས་སྐྱེས་འབུལ་རྒྱུ་དང་། ཆུང་ས་ནས་རང་ཉིད་ཀྱི་སེམས་གསོའི་སྨན་མཆོག་དང་། ངལ་གསོའི་སྟེགས་བུ་ཙམ་ཞིག་རེད་ཟེར་བ་འདི་རེད། དེའི་དབང་གིས་ངས་ད་བར་དུ་རང་གི་རྩོམ་ཡིག་གི་ཆེ་བ་བརྗོད་མྱོང་མེད་ལ་མིང་གྲགས་དོན་གཉེར་གྱི་ལྐོག་གཡོ་ཙམ་ཞིག་གི་ཆེད་དུ་མིང་འདྲ་མིན་གྱི་འོག་ནས་རང་བསྟོད་དང་། རང་ཡག་གི་དཔྱད་བརྗོད་ཀྱི་ཚིག་རིལ་ན་གཅིག་ཀྱང་འབྲི་མྱོང་མེད། རང་ཉིད་ཀྱི་ལྟ་བ་འདིས་ད་སྐབས་ཡང་རང་རྩོམ་གྱི་ཆེ་བ་བརྗོད་འདོད་ཀྱི་ཡི་ག་གཏན་དུ་འགག་སོང་། དེ་ནི་ངའི་མི་ཚེའི་དགེ་མཚན་ནམ་ཉེས་ཕྱོགས་ཤིག་ཡིན་སྲིད། དོན་དངོས་ཐོག་རང་གི་རྣམ་པར་དཔྱོད་པའི་ཤེས་རབ་དང་འབད་བརྩོན་མཐོར་འདེགས་ཀྱི་འབྲས་བུ་འདིས་བོད་གངས་ཅན་པའི་ཤེས་རིག་གི་དབྱར་མཚོར་ཆུ་ཐིགས་ཙམ་གྱི་རོགས་འདེགས་ཐུབ་པ་དེས་བདག་གི་དམིགས་ཡུལ་དང་རེ་བའི་ལང་ཚོར་གསོན་ཤུགས་བསྩལ་བ་ཡིན་ཞེས་བཤད་བསམ་ལ། སླར་ཡང་འདིར་བརྗོད་འདོད་པ་ནི་དགེ་མཚན་ལྷ་ལ་འབུལ་ལོ།། ལེགས་ཕྱོགས་མི་ཡིས་བཞེས་ཤིག ཉེས་པའི་དུག་ནད་སེལ་ལོ།། རྩོམ་རིག་ཆོས་ཉིད་རྒྱལ་ལོ།། ཞེས་པའོོ།།
སྤྱི་ལོ་༢༠༡༢ ལོའི་ཟླ་༡༢ པའི་ཚེས་༢༣ ཉིན་རྒྱ་གར་ལྷོ་ཕྱོགས་ནས་རྩོམ་པ་པོས།།
དེང་རབས་གདན་སའི་སློབ་གཉེར་ཞར་ཞོར་དུ།། འཕོས་པའི་ཟུངས་ཁྲག་རྟོག་འགྱུའི་ང་རོ་འདིས།། ས་ཆེན་གོམ་པ་མདུན་ནས་མདུན་དུ་བསྐྱེད།། ཉིན་ཞིག་མཐའ་ལ་བསླེབ་པའི་རྟེན་འབྲེལ་ཡོད།།
ཁ་བརྡ་ཚང་གི་འགྲོན་པོ་ཚོ་ཚང་མ། བླ་མ་བླ་རྒན། གྲྭ་བ་གྲྭ་རྒན། སྔགས་པ་སྔགས་རྒན། གྲྭ་ལོག་ལོ་རྒན། བླ་ལོག་ཆགས་རྒན། སྔགས་ལོག་རྫུན་རྒན། ཨ་ཙེ་ཨ་ཙེ། ད་མང་གི་ཡ།
རིན་དོན་ལགས་ལ་ངོ་མ་ཡི་རང་ཞུ་་་འཚོགས་ཆོས་འགྲིམ་ཞོར་དུ་རང་གི་ཆེད་སྦྱོང་མ་ཡིན་པ་འདི་ལྟར་བསླབ་བྱ་གཞན་ཞིག་ལ་བརྩོན་པ་ཙམ་མ་ཟད་དེབ་ཅིག་བཏོན་ཐུབ་སོང་བ་དེ་གཟི་བརྗིད་རེད་་་་་