སྣ་ཚོགས་རང་གྲོལ།
ཕྱི་ཚུལ་གདན་ས་ཆེན་མོར་འགྲིམ་ཚུལ་སྟོན།།
ནང་སེམས་འཇིག་རྟེན་ཚོང་འབྲེལ་ལས་ལ་བྲེལ།།
ཕྱི་ནང་ཟློག་ནས་སྤྱོད་པའི་སེར་གཟུགས་ཚོར།།
དགེ་བཤེས་མིང་བྱང་སྤྲད་པར་བཟློག་ཏུ་གསོལ།།
ཚེ་སྟོད་རིག་པའི་གཞུང་ལུགས་འབད་པས་བསྦྱངས།།
ཚེ་སྨད་ནུབ་ཕྱོགས་ལུང་པར་ཁྱི་བཞིན་ཉུལ།།
ཐོས་དོན་བསྒོམ་པ་མེད་པའི་སེར་གཟུགས་ཚོར།།
དགེ་བཤེས་མིང་བྱང་སྤྲད་པར་བཟློག་ཏུ་གསོལ།།
རང་ཕྱོགས་དཀར་པོ་ཡིན་པའི་སྒྲུབ་བྱེད་དང་།།
གཞན་ཕྱོགས་ངན་པའི་རྒྱུ་མཚན་མེད་ན་ཡང་།།
དཀར་ནག་བཙན་གྱིས་ལོག་པར་འགྲེལ་མཁན་ཚོར།།
དགེ་བཤེས་མིང་བྱང་སྤྲད་པར་བཟློག་ཏུ་གསོལ།།
དེང་རབས་རིག་པའི་བློ་མིག་ལྡོངས་པ་ནས།།
རང་མིང་འབྲི་བའི་ལག་རྩལ་མེད་པའི་བར།།
བརྡ་སྤྲོད་རིག་པ་དགྲ་རུ་འཛིན་མཁན་ཚོར།།
དགེ་བཤེས་མིང་བྱང་སྤྲད་པར་བཟློག་ཏུ་གསོལ།།
རྙིང་པ་ཐམས་ཅད་ནོར་འཁྲུལ་མེད་པར་བརྩིས།།
གསར་པ་ཡོད་ཚད་བདུད་ཀྱི་འཕྲུལ་དུ་བལྟ།།
གསར་རྙིང་འགལ་དུ་ལྟ་བའི་སེར་མོ་བར།།
དགེ་བཤེས་མིང་བྱང་སྤྲད་པར་བཟློག་ཏུ་གསོལ།།
གཞུང་ཆེན་ཐོས་རྩོད་བྱེད་པའི་ང་རྒྱལ་ཅན།།
ཉམས་ལེན་གཡའ་དང་བྲལ་བའི་འདོད་རྔམ་ཅན།།
རྨོངས་དད་མགོ་བོ་བསྐོར་བའི་གཡོ་སྒྱུས་ཅན།།
དགེ་བཤེས་མིང་བྱང་རེ་བ་བཟློག་ཏུ་གསོལ།།
ཆོས་ཀྱི་ར་བར་སྲིད་དོན་གླེང་ཁུལ་བྱེད།།
སྲིད་ཀྱི་ཁྲིམས་རར་ཆོས་ལུགས་དགོས་རབས་བཤད།།
ཆོས་སྲིད་ཟུང་འབྲེལ་སྨྲ་བའི་མགོ་བདེ་ཚོར།།
དགེ་བཤེས་མིང་བྱང་སྤྲད་པར་བཟློག་ཏུ་གསོལ།།
གཞུང་ཆེན་སློབ་གཉེར་དགྲ་ཡི་དྭངས་མར་བརྩིས།།
རང་ཁེ་གཞན་ཕམ་མི་ཚེའི་སྙིང་པོར་བལྟ།།
ཆོས་ཀྱི་དྲི་མ་བྲལ་བའི་སེར་གཟུགས་ཚོར།།
དགེ་བཤེས་མིང་བྱང་སྤྲད་པར་བཟློག་ཏུ་གསོལ།།
མཐར་ཐུག་གོ་འཕང་འཐོབ་ལ་མི་བརྩོན་པར།།
འཇིག་རྟེན་སྲིད་ཀྱི་ཁྲི་ལ་རྩོད་པ་ཅན།།
འཕྲལ་ཕུགས་ཁེ་བཟང་ནོར་བའི་སེར་མོ་བར།།
དགེ་བཤེས་མིང་བྱང་སྤྲད་པར་བཟློག་ཏུ་གསོལ།།
ཚུལ་མཐུན་བུད་མེད་སྤྱོད་ན་ཧང་སང་བྱེད།།
ཚུལ་མིན་ཨེན་ཆུང་དེ་ཚོར་ཅི་དགར་སྤྱོད།།
གནས་ལུགས་ལྡོག་ནས་སྒྲུབ་པའི་སེར་གཟུགས་ཚོར།།
དགེ་བཤེས་མིང་བྱང་སྤྲད་པར་བཟློག་ཏུ་གསོལ།།
ཟུར་གནས་དྲང་བདེན་ཁ་ནས་མ་ཎི་དྲངས།།
ཕྱོགས་རིས་ཆགས་སྡང་ལག་གིས་ཉམས་ལེན་བྱེད།།
གཡོ་སྒྱུའི་ལས་ལ་བྱང་བའི་སེར་གཟུགས་ཚོར།།
དགེ་བཤེས་མིང་བྱང་སྤྲད་པར་བཟློག་ཏུ་གསོལ།།
རྩོམ་རིག
སྙན་མོའི་ཚིག་གིས་གཞན་སེམས་བསླུ་བར་བྱེད།།
གཡོ་སྒྱུའི་ཐབས་ཀྱིས་ཕ་རོལ་དབང་དུ་བསྡུས།།
ཚེ་འདིའི་སླད་དུ་དགེ་བར་འཛེམ་མཁན་ཚོར།།
དགེ་བཤེས་མིང་བྱང་སྤྲད་པར་བཟློག་ཏུ་གསོལ།།
འཆད་པ་གླེན་ལྐུགས་ལྕེ་རྩེ་མེད་པ་འདྲ།།
རྩོད་པ་བསྡུས་གྲྭའི་གསར་བུར་འཇིགས་སྣང་སྐྱེས།།
རྩོམ་པ་རི་བོང་རྭ་ཡི་རྗེས་འགྲོ་ཅན།།
དགེ་བཤེས་མིང་བྱང་རེ་བ་བཟློག་ཏུ་གསོལ།
ཚུལ་མཐུན་བུད་མེད་སྤྱོད་ན་ཧང་སང་བྱེད།།
ཚུལ་མིན་ཨེན་ཆུང་དེ་ཚོར་ཅི་དགར་སྤྱོད།།
གནས་ལུགས་ལྡོག་ནས་སྒྲུབ་པའི་སེར་གཟུགས་ཚོར།།
དགེ་བཤེས་མིང་བྱང་སྤྲད་པར་བཟློག་ཏུ་གསོལ།།
ཞེས་པ་ལ།
ཚུལ་མཐུན་བུད་མེད་སྤྱད་ན་དགའ་བ་བསྒོམས། །
ཚུལ་མིན་ཨེན་ཆུང་འབྲེལ་ན་སྐྱུག་བྲོ་བ། །
གནས་ལུགས་ལྡོག་སྨྲ་སྣ་ཚོགས་རང་གྲོལ་ལ། །
དགེ་བཤེས་མིང་བྱང་སྤྲོད་པར་བཟློག་ཏུ་གསོལ། །
ཚུལ་མཐུན་བུད་མེད་ཆག་སྤྱོད་འཇིག་རྟེན་མིའི་ལུགས་མཐུན།
ཚུལ་མིན་ཨེན་ཆུང་ཆག་སྤྱོད་ཆོས་སྲིད་མིའི་ལུགས་འགལ།
ཚུལ་མིན་བྱ་སྤྱོད་ཆོས་སྲིད་ལུགས་འགལ་སེར་གཟུགས་ཚོར།
ཚུལ་མཐུན་དགེ་བཤེས་མིང་བྱང་སྤྲོད་པར་བཟློག་ཏུ་གསོལ།
ཆོས་ཀྱི་ར་བར་སྲིད་དོན་གླེང་ཁུལ་བྱེད།།
སྲིད་ཀྱི་ཁྲིམས་རར་ཆོས་ལུགས་དགོས་རབས་བཤད།།
ཆོས་སྲིད་ཟུང་འབྲེལ་སྨྲ་བའི་མགོ་བདེ་ཚོར།།
དགེ་བཤེས་མིང་བྱང་སྤྲད་པར་བཟློག་ཏུ་གསོལ།།
ཞེས་པ་ལ།
ཆོས་ཀྱི་ར་བར་སྲིད་དོན་ལ་རྒྱས་ཁེངས། །
སྲིད་ཀྱི་ཁྲིམས་རར་ཆོས་ལུགས་བྱིན་རླབས་བརླན། །
ཆོས་སྲིད་ཟུང་འབྲེལ་སྨྲ་བའི་བྱང་སེམས་ཚོར། །
དགེ་བཤེས་མིང་བྱང་ངེས་པར་སྩོལ་དུ་གསོལ། །
གཞུང་ལུགས་ལེགས་པར་སྦྱང་པ་མ་བྱས་ཤིང་།།
ཐོས་དོན་བསམ་པས་སྒྲོ་འདོགས་མ་བཅད་པར།།
བ་ཕྱུགས་ལོ་ཤས་འཚོ་བའི་སེར་གཟུགས་ཚོར།།
དགེ་བཤེས་མིང་བྱང་སྤྲད་པ་བཟློག་ཏུ་གསོལ།།
ཨོ་ཉི་དང་པདྨ་གཉིས་ཀྱིས་ཉོན་བྱོས། ཀརྨ་པ་ལ་བསྟོད་པ་བྲིས་པའི་འོག་གི་མཆན་སྒོ་བརྒྱབ་འདུག མཆན་བུ་བཏབ་ས་མི་འདུག་པས་འདི་ན་ཁྱོད་གཉིས་ལ་ལན་ཞིག་འཇོག་གི་ཡོད།
པདྨ་ཡིས་ཨོ་ཉི་ལ་སྒོ་ཁྱི་རེད་ཅེས་འབོད་བཞིན་འདུག ཨོ་ཉིས་ཡང་ང་རང་གི་ལས་དབང་རེད་ཅེས་ཡིན་མདོག་མདོག་བྱས་ཀྱི་འདུག ཁྱོད་གཉིས་ཉོན་ཨ། བོད་གངས་ཅན་པའི་སྒོ་ཁྱི་ཟེར་བ་འདི་ཁ་ཞེ་གཉིས་ཀྱི་བོད་གངས་ཅན་པའི་ཕ་ཁྱིམ་ལ་བློ་དཀར་གཞུང་དྲང་དང་། དགྲ་རྐུ་ཇག་གྱི་ཐོག་སྟག་ལྟར་ངར་བའི་སྙིང་སྟོབས་ཅན་གྱི་བོད་གངས་ཅན་པའི་སྒོ་ཁྱིའི་མིང་འདི་མྱི་ཨོ་ཉི་ལྟ་བུ་ལ་འདོགས་ན་བོད་གངས་པའི་སྒོ་ཁྱིའི་མཚན་སྙན་ལ་གནོད་ཀྱི་འདུག རིན་གོང་ཡང་མར་ཆག་སྲིད་པ་རེད།
བྱས་ཙང་སྤྲུལ་སྐུ་ཨོ་ཉི་ལྟ་བུ་ལ་སྒོ་ཁྱིའི་མིང་འཁུར་བའི་ཐོབ་ཐང་མེད་ངེས་ཡིན། དེ་བརྟེན་འདོགས་མཁན་གྱི་འདོགས་མི་ཆོག་ལ་མིང་ལེན་གྱི་ལེན་མི་ཆོག སྒོ་ཁྱིའི་མིང་འཁུར་པ་ལ་སྒོ་ཁྱིའི་ལས་ཀ་བྱེད་ཐུབ་དགོས། སྒོ་ཁྱི་ལྟ་བུའི་ཕ་ཁྱིམ་ལ་བློ་དཀར་དྲང་བ་དང་རྐུ་ཇག་ལ་གདུང་ལེན་བྱེད་མཁན་ཞིག་དགོས་ངེས་ཡིན། ཧཧཧ
གཞུང་ལུགས་པོད་ལྔ་མིག་གིས་མ་མཐོང་ཅིང།
དགག་བཞག་སྤོངས་གསུམ་ཉིན་གཅིག་རྩོད་མྱོང་མེད།
ལོ་གསུམ་ཟླ་གསུམ་སྐྱིད་ཉལ་རྒྱགས་མཁན་ཚོར།
སློབ་དཔོན་མཁན་པོ་ཟེར་བ་བཟློག་གྱུར་ཅིག
ད་ངས་བཟློག་བསྒྱུར་ཐ་མ་ཞིག་ནས་རྫོང་འདེབས་བྱེད་ཀྱི་ཡིན།
གྲྭ་སའི་དགེ་བཤེས་ཉམས་ལེན་མེད།།
དེ་ཡང་ཟློག་པའི་ཕྲིན་ལས་མཛོད།།
རི་ཁྲོད་མཁན་པོར་ཐོས་པ་མེད།།
དེ་ཡང་ཟློག་པའི་ཕྲིན་ལས་མཛོད།།
ཕྱི་རྒྱལ་ཆེད་དུ་དགེ་བཤེས་གཏོང་།།
དེ་ཡང་ཟློག་པའི་ཕྲིན་ལས་མཛོད།།
སློབ་དཔོན་མཁན་པོ་སྒོར་མོས་ཉོ།།
དེ་ཡང་ཟློག་པའི་ཕྲིན་ལས་མཛོད།།
མདོར་ན་ཆ་མི་སྙོམ་པ་ཡི།།
ཐོས་བསམ་འགལ་འདུའི་ལྟག་སྤྲོད་པ།།
མཁན་པོ་དགེ་བཤེས་མིང་འཛིན་རྣམས།།
ཕྱོགས་མེད་ཕྱོགས་བྲལ་གནས་སུ་དེངས།།
ཨོྃ་ཐོས་པ་མེད་པའི་མཁན་པོ་སློབ་དཔོན་གཙྪ་གཙྪ་སྭཱ་ཧཱ། སྒོམ་པ་མེད་པའི་སྤྲུལ་སྐུ་དགེ་བཤེས་གཙྪ་གཙྪ་སྭཱ་ཧཱ།
ས་མ་ཡཱ༔ རྒྱ་རྒྱ་རྒྱ༔
ཨོྃ་ཐོས་པ་མེད་པའི་མཁན་པོ་སློབ་དཔོན་གཙྪ་གཙྪ་སྭཱ་ཧཱ། སྒོམ་པ་མེད་པའི་སྤྲུལ་སྐུ་དགེ་བཤེས་གཙྪ་གཙྪ་སྭཱ་ཧཱ།
ས་མ་ཡཱ༔ རྒྱ་རྒྱ་རྒྱ༔
ཞེས་པའི་དོན་གང་ཡིན་ནམ། དངོས་གནས་ཚིག་འགྲེལ་མ་ཤེས་ནས་དྲིས་པ་ཡིན་པས་་་་་
རྗེ་བླ་མའི་བསྟོད་པ་དད་པའི་དྲི་བསུང་འཐུལ་བའི་སྤོས་ཀྱི་རྫིང་བུ་ཞེས་བྱ་བ་བཞུགས་སོ།།
________________________________________
དགེ་བཤེས་ཤེས་རབ་རྒྱ་མཚོ།
༄༅།།རྗེ་བཙུན་འཇམ་དཔལ་དབྱངས་དང་གཉིས་སུ་མ་མཆིས་པའི་བླ་མ་དམ་པ་ཁམས་གསུམ་ཆོས་ཀྱི་རྒྱལ་པོ་ཤར་ཙོང་ཁ་བ་བློ་བཟང་གྲགས་པའི་ཞབས་ ཀྱི་པདྨོ་དྲི་མ་མེད་པ་ལ་གུས་པ་ཆེན་པོས་ཕྱག་འཚལ་ཞིང་སྐྱབས་སུ་མཆིའོ།། ཚེ་རབས་ཐམས་ཅད་དུ་རྗེས་སུ་གཟུང་དུ་གསོལ།
ཕན་བདེའི་གཟུགས་འཆར་དངུལ་དཀར་མེ་ལོང་ལ།། དག་གཙང་ཙམ་གྱིས་ཉིན་མཚན་ཁ་སྦྱོར་ཞིང་།། མངོན་ཤེས་རྫུ་འཕྲུལ་སྦ་བའི་ཐུགས་དམ་ཅན།། སྐྱབས་གཅིག་དྲིན་ཆེན་བླ་མ་བློ་བཟང་གྲགས།། བདེ་སྐྱོང་སྣོད་དང་ཕུར་བུའི་ཆེ་བ་མེད།། ཆང་དང་བུད་མེད་སྤྱོད་པའི་འཕྲུལ་མཛངས་མེད།། སྐལ་ངན་རྨོངས་པ་སླུ་བའི་སྙིང་སྟོབས་མེད།། འབྲོག་རིའི་དགེ་སྦྱོང་དེ་ལ་བདག་ཕྱག་འཚལ།། རང་ཤར་རང་གྲོལ་རྫིག་པོའི་རྟོགས་པ་མེད།། དུས་གསུམ་གཟིགས་པའི་ཉམས་དང་ལུང་བསྟན་མེད།། ཕ་རོལ་གསོད་པའི་མཐུ་དང་ནུས་པ་མེད།། འབྲོག་རིའི་དགེ་སྦྱོང་དེ་ལ་བདག་ཕྱག་འཚལ།། རང་བཟོའི་བརྡ་ཆད་སྤེལ་བའི་གཞུང་འགྲེལ་མེད།། འགལ་འདུའི་སྟོང་གསོབ་ཚིག་བཀྲའི་ཝུ་བ་མེད།། མ་རེག་ཐུག་པའི་རྒྱུས་གཏམ་ཁ་ཕོ་མེད།། འབྲོག་རིའི་དགེ་སྦྱོང་དེ་ལ་བདག་ཕྱག་འཚལ།། གྲུབ་རྟགས་སྤྱི་བོར་སྤུངས་པའི་རལ་བ་མེད།། ལུས་ཕྲའི་འཁོར་དང་ཤ་ཆང་ལོངས་སྤྱོད་མེད།། དྭངས་མ་འདོད་རྒུར་འཇོ་བའི་བདེ་ཆེན་མེད།། འབྲོག་རིའི་དགེ་སྦྱོང་དེ་ལ་བདག་ཕྱག་འཚལ།། ལྷ་མཐོང་འདྲེ་མཐོང་སྤྱན་དང་མངོན་ཤེས་མེད།། བླུན་དད་འདྲེན་པའི་ལྟས་དང་བརྟག་དཔྱད་མེད།། རྙེད་བཀུར་ཟབ་ལམ་སྒྲུབ་པའི་འདག་སྦྱར་མེད།། འབྲོག་རིའི་དགེ་སྦྱོང་དེ་ལ་བདག་ཕྱག་འཚལ།། དབེན་གཞིས་སྟོང་བའི་སྐུ་ཡི་ཏིང་འཛིན་མེད།། འབྲུ་གསུམ་མ་དམིགས་ངག་གི་ཏིང་འཛིན་མེད།། ངེས་ཤེས་བྲལ་བའི་ཐུགས་ཀྱི་ཏིང་འཛིན་མེད།། འབྲོག་རིའི་དགེ་སྦྱོང་དེ་ལ་བདག་ཕྱག་འཚལ།། རང་ཉམས་ཁུངས་མེད་འདོན་པའི་སྤོབས་པ་མེད།། རྒྱལ་བའི་བཀའ་ལས་འགོངས་པའི་སྙིང་སྟོབས་མེད།། ས་རྡོ་རྨི་ལམ་ལུང་གི་ཆོས་གཏེར་མེད།། འབྲོག་རིའི་དགེ་སྦྱོང་དེ་ལ་བདག་ཕྱག་འཚལ།། འདུལ་བའི་ཁྲིམས་ཀྱིས་མ་གོས་ལུང་གཙང་མེད།། དམ་པ་སྒྲོལ་བའི་ཕཊ་དང་ཧཱུཾ་སྒྲ་མེད།། སོར་རྟོག་དཔྱད་སྒོམ་སྤོང་བའི་ཐོམ་ཡོར་མེད།། འབྲོག་རིའི་དགེ་སྦྱོང་དེ་ལ་བདག་ཕྱག་འཚལ།། མདོ་སྔགས་ཉམས་ལེན་གདན་གོས་སོ་སོར་མེད།། ཕན་ཚུན་སྤོང་བའི་རྭ་དང་མཆེ་བ་མེད།། བཤད་སྲོལ་མཐའ་དག་འདྲེས་པའི་ཁྲུས་རྫིང་མེད།།འབྲོག་རིའི་དགེ་སྦྱོང་དེ་ལ་བདག་ ཕྱག་འཚལ།། ལག་རྗེས་རྐང་བས་བསུབ་པའི་སུག་བཞི་མེད།། དཔྱད་ན་གཏད་སོ་བྲལ་བའི་འཇའ་རིས་མེད།། རྨོངས་ཡུས་བརྗིད་པོར་ཆགས་པའི་སྤྲིན་ཕུང་མེད།། འབྲོག་རིའི་དགེ་སྦྱོང་དེ་ལ་བདག་ཕྱག་འཚལ།། ཚད་ལྡན་མཁས་པ་སྨོད་པའི་ལྕེ་རྩལ་མེད།། ཆོས་མཐུན་རྒོལ་བའི་ཐོག་གི་འཇིགས་པ་མེད།། སྡོམ་གསུམ་དྲི་ཡིས་ཁོར་ཡུག་བཏང་བ་མེད།། འབྲོག་རིའི་དགེ་སྦྱོང་དེ་ལ་བདག་ཕྱག་འཚལ།། མ་སྦྱངས་མཁས་པའི་རང་བྱུང་འབྲས་བུ་མེད།། མ་བསྒོམས་གྲོལ་བའི་རྟོགས་པ་ཀློང་རྡོལ་མེད།། མ་བཤིག་ཞིག་པའི་སྒྲིབ་པ་རང་ལོག་མེད།། འབྲོག་རིའི་དགེ་སྦྱོང་དེ་ལ་བདག་ཕྱག་འཚལ།། རང་ཉིད་མ་གྲོལ་གཞན་སྒྲོལ་གདམས་པ་མེད།། རང་ཉིད་མི་ཤེས་གཞན་སློབ་འཆད་རྩོམ་མེད།། རང་ཚོད་མ་རྟོགས་དུས་གསུམ་རིག་པ་མེད།། འབྲོག་རིའི་དགེ་སྦྱོང་དེ་ལ་བདག་ཕྱག་འཚལ།། རྟག་ཆད་མཐའ་རུ་གོལ་བའི་ལྟ་བ་མིན།། བྱིང་ཕྲའི་ཀློང་དུ་འབྱམས་པའི་སྒོམ་པ་མིན།། བག་མེད་གླང་ཆེན་སྨྱོན་པའི་སྤྱོད་པ་མིན།། འབྲོག་རིའི་དགེ་སྦྱོང་དེ་ལ་བདག་ཕྱག་འཚལ།། གནག་རྫིས་ཕྱུགས་ངོ་བགྲང་བའི་འཆད་པ་མིན།། དམུས་ལོང་གཟུགས་ལ་རྟོག་པའི་རྩོད་པ་མིན།། བྱིས་པས་བྱེ་མ་སྤུངས་པའི་རྩོམ་པ་མིན།། འབྲོག་རིའི་བླ་མ་མཆོག་ལ་བདག་ཕྱག་འཚལ།། མ་སྦྱངས་རི་ནས་བརྡོལ་བའི་མཁས་པ་མིན།། རྐུན་པོ་ནོར་ལ་འཇབ་པའི་བཙུན་པ་མིན།། རང་སྲོག་གཅོད་ལ་མཛའ་བའི་བཟང་པོ་མིན།། འབྲོག་རིའི་བླ་མ་མཆོག་ལ་བདག་ཕྱག་འཚལ།། འཁྲུལ་བ་རང་ཞིག་རལ་བའི་རྟོགས་ལྡན་མིན།། སྨན་ཤར་མཁའ་འགྲོས་དབང་བསྐུར་སློབ་མ་མིན།། སྦྱོར་སྒྲོལ་ཨ་ཏི་གསང་བའི་རིག་འཛིན་མིན།། འབྲོག་རིའི་བླ་མ་མཆོག་ལ་བདག་ཕྱག་འཚལ།། རིག་པའི་སྣང་བ་མ་མཐོང་མིག་སེར་མིན།། ཟེར་སྒྲོས་མ་ཎི་འདོན་པའི་མཆུ་དམར་མིན།། འགལ་འདུའི་ཚིག་ཉམས་བཀྲ་བའི་མདོངས་མཐའ་མིན།། འབྲོག་རིའི་བླ་མ་མཆོག་ལ་བདག་ཕྱག་འཚལ།། མ་རྟོགས་ཁུང་བུར་ཉལ་བའི་སྦྲུལ་ནག་མིན།། ལོག་རྟོག་ལྗོན་རྩེར་འཁྱུག་པའི་སྤྲེའུ་མིན།། སོམ་ཉིའི་འབུ་སྲིན་ཟ་བའི་བྱིའུ་མིན།། འབྲོག་རིའི་བླ་མ་མཆོག་ལ་བདག་ཕྱག་འཚལ།། འཇིག་རྟེན་ཕ་རོལ་འཇོམས་པའི་དགྲ་སྟ་མིན།། འདི་སྣང་བདེ་ལ་རྒྱས་པའི་པདྨ་མིན།། མཐོང་ཚད་བདེན་པའི་འཛིན་པའི་ལྕགས་ཀྱུ་མིན།། འབྲོག་རིའི་བླ་མ་མཆོག་ལ་བདག་ཕྱག་འཚལ།། དམ་པ་སྨོད་ལ་མི་འཇིགས་རྡོ་རྗེ་མིན།། བླུན་པོའི་འཁོར་མང་སྡུད་པའི་ཞགས་པ་མིན།། ཕན་བདེའི་བྲག་རི་གསིལ་བའི་ཐོག་མདའ་མིན།། འབྲོག་རིའི་བླ་མ་མཆོག་ལ་བདག་ཕྱག་འཚལ།། མང་དུ་ཐོས་པའི་ལུས་རྩལ་ཞུམ་པ་མིན།། དྲི་མེད་རིགས་པའི་མཆེ་སྡེར་རྟུལ་བ་མིན།། ལེགས་པར་བཤད་པའི་གཡུ་རལ་གཟི་ཆུང་མིན།།འབྲོག་རིའི་བླ་མ་མཆོག་ལ་བདག་ཕྱག་འཚལ།། མདོ་རྒྱུད་ཆུ་གཏེར་ཆེ་ལ་འཇིགས་པ་མིན།། ཡང་དག་ཐབས་ཀྱི་སྣ་ཞགས་ཐུང་བ་མིན།། སྐྱེས་སྦྱངས་ཤེས་རབ་སོ་རྣོན་བྲུལ་བ་མིན།། འབྲོག་རིའི་གླང་བོ་དེ་ལ་བདག་ཕྱག་འཚལ།། བཤད་སྲོལ་གཤེགས་པའི་བཤུལ་ལམ་གཡང་ས་མིན།། སྨྲ་ངན་ཝ་མོས་དབྱི་བའི་དོགས་གནས་མིན།། རྗེས་འབྲང་འཇིགས་པས་བ་སྤུ་གཡོ་བ་མིན།། འབྲོག་རིའི་ཁྱུ་མཆོག་དེ་ལ་བདག་ཕྱག་འཚལ།། ཕྲག་དོག་རྨོངས་པའི་ས་ཡིས་གནོན་ནུས་མིན།། སྤངས་རྟོགས་ཡལ་འདབ་ར་བར་ཤོང་བ་མིན།། ལེགས་བཤད་དྲི་བཟང་ཕྱོགས་རེར་འཐུལ་བ་མིན།། འབྲོག་རིའི་དཔག་བསམ་དེ་ལ་བདག་ཕྱག་འཚལ།། མཐའ་བྲལ་གནམ་འཕང་གཅོད་ལ་ཞུམ་པ་མིན།། ཀུན་མཁྱེན་དག་གསལ་གསེར་མིག་ལྡོངས་པ་མིན།། གཞུང་ངན་གདུག་སྦྲུལ་ཡན་པོར་གཏོང་བ་མིན།། འབྲོག་རིའི་མཁའ་ལྡིང་དེ་ལ་བདག་ཕྱག་འཚལ།། རང་བྱུང་ཚངས་པས་རི་མོར་སྤེལ་བ་མིན།། བླུན་པོའི་བསྟོད་བསྔགས་རྟ་ཡིས་དྲངས་པ་མིན།། མཁས་རློམ་ཆུ་རྒྱན་སྨྲ་བའི་གོ་སྐབས་མིན།། འབྲོག་རིའི་ཟླ་བ་དེ་ལ་བདག་ཕྱག་འཚལ།། འཇམ་དབྱངས་མཁྱེན་རབ་རལ་གྲི་ཆག་པ་མིན།། གསང་དབང་མཐུ་ནུས་རྡོ་རྗེ་འཐོར་བ་མིན།། འཕགས་མཆོག་བརྩེ་ཆེན་མེ་ཏོག་ཟུམ་པ་མིན།། རིགས་གསུམ་གཅིག་བསྡུས་བླ་མ་བློ་བཟང་གྲགས།། སྙིང་ནས་དྲན་པའི་གསོལ་འདེབས་གླིང་བུའི་གདངས།། དད་གུས་སོར་རྩེས་ལྡེམ་པོར་བསྒྱུར་བ་ནི།། ངོ་མཚར་དཔག་ཡས་ཡིད་དགའ་ཆོས་འཛིན་ནས།། ཡབ་གཅིག་འཇམ་དཔལ་སྙིང་བོས་གསན་དུ་གསོལ།། འཇམ་དབྱངས་མཁྱེན་རབ་ཉི་མ་ཞུ་བའི་ངོགས།། རྒྱལ་ཀུན་དགོངས་པའི་པདྨོ་རྣམ་རྒྱས་པ།། ད་དུང་སྨྲ་མཁས་དབྱངས་ཅན་བྱེ་བས་བཟུང་།། དགྱེས་འཛུམ་གསར་བའི་ཐིགས་ཕྲེང་སྤྲོ་བར་མཛོད།། བརྩེ་ཆེན་བྱིན་རླབས་དྲི་བཟང་འཛིན་པའི་དཔལ།། རྣམ་དཔྱོད་དལ་གྱིས་འཁྱིལ་བའི་ལང་ཚོ་ནི།། ཁྱོད་ཀྱི་ལེགས་བཤད་མཚོ་ལས་མི་འཕོ་ཞིང་།། ཟབ་གསང་དོག་པ་མངར་བོས་སྙེམས་པར་མཛོད།། དབང་བོ་སྙིགས་མའི་ཡང་མཐར་ལྷུང་བ་ཡི།། རྨོངས་པ་རྣམས་ཀྱི་རོལ་རྩེད་འདི་དགོངས་ལ།། མཁྱེན་བརྩེ་མི་ཟད་གསང་བའི་འཕྲུལ་འཁོར་གྱིས།། ཡང་དག་རྡོ་རྗེའི་མིག་གི་སྣང་བ་སྩོལ།། རྨོངས་ཞེན་འཁྲུལ་བའི་དྲི་མ་བསལ་དུ་གསོལ།། ཟབ་དོན་དག་པའི་རི་མོ་མཇལ་དུ་གསོལ།། ངེས་ལེགས་བདུད་རྩིའི་རོ་མཆོག་མྱོང་དུ་གསོལ།། མཁའ་མཉམ་ལས་ཅན་བདེ་ལ་སྦྱོར་དུ་གསོལ།། དེང་སང་སྐྱེ་བོ་ཕལ་ཆེར་བློ་མིག་ལྡོངས།། ལེགས་བཤད་ཉེས་བཤད་འབྱེད་པའི་མཐུ་རྩལ་ཆུང་།། ཇི་ལྟར་བྱས་ཀྱང་དོན་དུ་འགྱུར་དཀའ་བ།། བརྩེ་བས་དགོངས་ལ་མྱུར་དུ་བསྐྱབ་ཏུ་གསོལ།། དེ་ཕྱིར་རྨོངས་ཞེན་གྲགས་པའི་རྗེས་སུ་འབྲང་།། ཡིན་ལུགས་བརྡ་ཡིས་སྦྲན་ན་ཚུར་ལ་བསྡོ།། ལས་ངན་མགོ་བསྐོར་ཁྲམ་པའི་སྤྱོད་ལ་རངས།། བརྩེ་བས་དགོངས་ལ་མྱུར་དུ་བསྐྱབ་ཏུ་གསོལ།། དུས་གསུམ་མཁས་མཆོག་ཀུན་གྱི་བགྲོད་གཅིག་ལམ།། རྨོངས་པའི་འཁྲི་ཤིང་གཅོད་པའི་རལ་གྲི་ཆེ།། གཞུང་དོན་ཐང་མར་བརྡལ་བ་སྐྱོན་དུ་སེམས།། བརྩེ་བས་དགོངས་ལ་མྱུར་དུ་བསྐྱབ་ཏུ་གསོལ།། སྒོ་ངའི་མཐིལ་ནས་ནམ་མཁའི་ལོ་རྒྱུས་སྨྲ།། མཁས་པའི་དྲི་གཏུགས་འགོག་པའི་གཡོ་ཟོལ་བྲིན།། བླུན་སྒོམ་ལྷ་མཐོང་འདྲེ་མཐོང་མཆོག་ཏུ་འཛིན།། བརྩེ་བས་དགོངས་ལ་མྱུར་དུ་བསྐྱབ་ཏུ་གསོལ།།
ཕྱི་ཡི་སྤྱོད་ཚུལ་གནས་བརྟན་ཨུ་པ་ལི།། ནང་གི་རྣལ་འབྱོར་དཔལ་ལྡན་ས་ར་ཧ།། གསང་བ་འཆད་རྩོམ་རྩོམ་པ་འཇམ་དཔལ་དབྱངས།། མགོན་པོ་ཁྱོད་ཀྱི་རྣམ་ཐར་ཟིན་པར་ཤོག།། ཉི་མའི་གཉེན་གྱི་གསུང་རབ་མ་ལུས་པ།། གདུལ་བྱ་གཅིག་གི་གདམས་པར་འགལ་མེད་འཆད།། ཕྲ་ཞིབ་ལུང་རིགས་ཐིག་ལས་འཛུར་བ་མེད།། མགོན་པོ་ཁྱོད་ཀྱི་རྣམ་ཐར་ཟིན་པར་ཤོག། ཡང་དག་ལྟ་དང་གསང་ཆེན་བིད་ཀ་ར།། གངས་ཅན་མཁས་རློམ་ཆུ་གཏེར་ཀློང་བྱིང་ཚེ།། གསར་བཤད་གསེར་མིག་གཟུགས་ཀྱིས་འདོན་མཁས་པ།། མགོན་པོ་ཁྱོད་ཀྱི་རྣམ་ཐར་ཟིན་པར་ཤོག། གཞན་སྟོང་བདེན་གྲུབ་ཡོད་མིན་མེད་མིན་སོགས།། སྨྲ་བ་ངན་པའི་རི་ཚོགས་འཁྲུགས་པའི་ཚེ།། རིགས་ལམ་རྩེ་བརྒྱ་འབར་བས་གཞོམ་མཛད་པ།།མགོན་པོ་ཁྱོད་ཀྱི་རྣམ་ཐར་ཟིན་པར་ཤོག། མདོ་དང་སྔགས་ཀྱི་ཆོས་ཚུལ་གང་ལའང་།། རྗེ་བཙུན་མཁྱེན་པའི་གཏེར་དང་རང་རང་གི། གདམས་པའི་ཆུ་མགོར་སྒྲོ་འདོགས་ལྷག་མེད་བཅད།། མགོན་པོ་ཁྱོད་ཀྱི་རྣམ་ཐར་ཟིན་པར་ཤོག། རང་བཞིན་མེད་དང་མེད་པ་དོན་གཅིག་སོགས།། ཆོས་ཉིད་དཔྱད་བཟོད་སྨྲ་བའི་ཐལ་འགྱུར་སྲོལ།། བྱུང་ཚེ་ལེགས་བཤད་སྣང་བ་འབུམ་ཕྲག་སྤྲོས།། མགོན་པོ་ཁྱོད་ཀྱི་རྣམ་ཐར་ཟིན་པར་ཤོག། གང་སྣང་དགག་བྱ་མཉམ་བཞག་ཡུལ་མེད་སོགས།། ཆེན་པོ་རྣམས་ཀྱང་རྒྱ་ལ་ཐིམ་པའི་ཚེ།། མཁྱེན་རབ་གྲི་སོ་རྣོན་པོས་དུམ་བརྒྱར་གྲོལ།། མགོན་པོ་ཁྱོད་ཀྱི་རྣམ་ཐར་ཟིན་པར་ཤོག། རྒྱལ་ཀུན་དགོངས་པ་ཟད་སར་བསྐྱལ་བའི་མཐུས།། ཟབ་དོན་དགྲོལ་བའི་གསུང་ཟུར་ཕྲ་མོས་ཀྱང་།། རྒོལ་ངན་གླང་བོ་འབུམ་སྡེ་གཅིག་ཅར་འཇིག།། མགོན་པོ་ཁྱོད་ཀྱི་རྣམ་ཐར་ཟིན་པར་ཤོག།། དེ་ཚེ་འདོད་ཡོན་ཆང་གིས་མྱོས་པ་འགའ།། སུན་འབྱིན་ལྟར་སྣང་གློག་དམར་འཕེན་ལ་བརྩོན།། བ་སྤུའི་རྩེ་ཡང་མི་གཡོ་རི་ཡི་དབང་།། མགོན་པོ་ཁྱོད་ཀྱི་རྣམ་ཐར་ཟིན་པར་ཤོག། མ་འོངས་སྲིད་པའི་སྐྱེ་ཕྲེང་ཐམས་ཅད་དུ།། བློ་བཟང་རྒྱལ་བའི་བསྟན་དང་མི་འབྲལ་ཞིང་།། ཚང་ལ་མ་ནོར་དགེ་ལྡན་བཀའ་བརྒྱུད་ཀྱི།། གདམས་པས་འགྲོ་བའི་མགོན་པོ་མྱུར་ཐོབ་ཤོག།
ཅེས་རྗེ་བཙུན་འཇམ་དཔལ་དབྱངས་དང་གཉིས་སུ་མ་མཆིས་ཤིང་སྐྱེ་རྒུ་རྣམས་ལ་གཅིག་ཏུ་བརྩེ་བའི་གཞན་དབང་དུ་གྱུར་བ་གངས་རིའི་ལྗོངས་འདིར་འཕགས་མཆོག་ཀླུ་སྒྲུབ་ཡབ་སྲས་ཀྱི་བཞེད་སྲོལ་དཔལ་ལྡན་ཐལ་འགྱུར་བའི་རང་ལུགས་ཕྱིན་ཅི་མ་ལོག་པར་འགྲེལ་བ་ལ་འགྲན་པའི་ཟླ་ཐམས་ཅད་དང་བྲལ་བའི་སྨྲ་བའི་ཁྱུ་མཆོག གྲུབ་མཐའ་རིས་མེད་ཀྱི་མཁས་གྲུབ་ཚོགས་ཀྱི་སློབ་དཔོན་ཆེན་པོའི་ཆེན་པོར་བཞུགས་པ་དག་གིས་ཀྱང་བསྔགས་བརྗོད་ཀྱི་མེ་ཏོག་འཐོར་བའི་ཡུལ་དམ་པར་གྱུར་པ། ཕྱི་སོ་སོར་ཐར་བའི་བརྟུལ་ཞུགས་བརྟན་པོ་ལ་གནས་ཤིང་ནང་གསང་བ་སྔགས་ཀྱི་རྣལ་འབྱོར་ཟབ་མོ་ལ་རྩེ་གཅིག་ཏུ་གཞོལ་བའི་བདག་ཉིད་ཆེན་པོ། བཀའ་དྲིན་མཚུངས་མེད་མཚན་བརྗོད་པར་དཀའ་བ་དོན་གྱི་སླད་དུ་མཚན་ནས་སྨོས་ན་འཇམ་ མགོན་ཆོས་ཀྱི་རྒྱལ་པོ་ཤར་ཙོང་ཁ་བ་བློ་བཟང་གྲགས་པའི་དཔལ་ལ་སྙིང་ཐག་པ་ནས་ བསྟོད་ཅིང་གསོལ་བ་འདེབས་པའི་ཚིགས་སུ་བཅད་པ་དད་པའི་དྲི་བསུང་འཐུལ་བའི་སྤོས་ ཀྱི་རྫིང་བུ་ཞེས་བྱ་བ་འདི་ནི། ༧རྗེ་བླ་མའི་རིང་ལུགས་ལ་མི་ཕྱེད་པའི་དད་པ་བརྟན་པོ་དང་ལྡན་ཞིང་ཞི་དུལ་བག་ ཡོད་ལ་གནས་པའི་མང་ཐོས་དགེ་བའི་བཤེས་གཉེན་ཁྲི་བྱང་ཡོངས་འཛིན་ཕུ་ཁང་པ་བློ་ བཟང་ཚུལ་ཁྲིམས་ནས་འདི་ལྟ་བུ་ཞིག་བྲི་དགོས་ཞེས་ཡང་ཡང་ནན་ཏན་མཛད་པ་ལྟར། བཀའ་དང་དགོངས་འགྲེལ་གྱི་ལེགས་བཤད་མང་པོ་རྣ་ལམ་དུ་སོན་པའི་མཐུ་ལས་ཆོས་དང་ཆོས་མིན་གྱི་རྣམ་དབྱེ་འབྱེད་པའི་སྤོབས་པ་ཅུང་ཟད་དགེ་ཞིང་འཇམ་མགོན་བླ་མ་ས་ གསུམ་གྱི་སྒྲོན་མེ་གང་གི་རྗེས་སུ་དད་གུས་ཀྱིས་མངོན་པར་ཕྱོགས་པའི་ལུང་རིགས་ རབ་འབྱམས་སྨྲ་བ་ཤེས་རབ་རྒྱ་མཚོར་འབོད་པས་དགོས་དབང་གིས་དགག་ཕྱོགས་ནས་བརྩམས་ཏེ་ཤིན་ཏུ་གོ་སླ་བར་མཁས་གྲུབ་བྱེ་བའི་བསྟི་གནས་སེ་ར་ཐེག་པ་ཆེན་པོའི་གླིང་ དང་ཉེ་བར་ཆར་འཁོད་དབེན་པའི་གནས་མཆོག་ཆུ་བཟང་རི་ཁྲོད་དུ་དད་གུས་རྩེ་གཅིག་པས་སྦྱར་བ་ཚེ་རབས་ཀུན་ཏུ་ཞྭ་སེར་རིང་ལུགས་དྲི་མ་མེད་པ་དང་མི་འབྲལ་བའི་རྒྱུར་ གྱུར་ཅིག། །།
སྣ་ཚོགས་རང་གྲོལ་ཁྱོད་ཀྱིས་གོང་གི་བསྟོད་ཚིག་དེ་ཡང་ཡང་སྐྱོར་རོགས་ཞུ། རི་བོ་དགེ་ལྡན་པའི་ཁྱད་ཆོས་དེའི་སྟེང་དུ་ཡོད་པ་རེད།
་་་་་་ མཐུ་ལས་ཆོས་དང་ཆོས་མིན་གྱི་རྣམ་དབྱེ་འབྱེད་པའི་སྤོབས་པ་ཅུང་ཟད་དགེ་ཞིང་འཇམ་མགོན་བླ་མ་ས་ གསུམ་གྱི་སྒྲོན་མེ་གང་གི་རྗེས་སུ་དད་གུས་ཀྱིས་མངོན་པར་ཕྱོགས་པའི་ལུང་རིགས་ རབ་འབྱམས་སྨྲ་བ་ཤེས་རབ་རྒྱ་མཚོར་འབོད་པས་དགོས་དབང་གིས་དགག་ཕྱོགས་ནས་བརྩམས་ཏེ་་་་་་་་ ཟེར།